Wẽnnaam zo-rãmbã na n vɩɩmda arzãn pʋgẽ

Arzãnã pa na n yɩ wa masã dũni ning tõnd sẽn vɩ a soab pʋgẽ wã ye. Wẽnnaam zɩ n tʋlg tɩ tẽngã pid ne gudgr la sũ-sãamse, toog la namsg ye. Beoog-daare, Wẽnnaam na n kɩtame tɩ tẽngã lebg arzãna. Arzãnã na n wõnega bõe? Bɩ d ges Biiblã sẽn yete:

Nin-sõma. Arzãnã na n yɩɩ Wẽnnaam zo-rãmbã yiri. B na n maana bõn-sõma n kõ taaba. B na n vɩɩmdame tɩ zems ne Wẽnnaam so-tɩrsã.—Yelbũna 2:21.

Rɩɩb wʋsgo. Arzãnã pʋgẽ, kom pa na n zĩnd ye. Biiblã yetame: “Ki [bɩ rɩɩb] wʋsg na n zĩnda soolem pʋgẽ.”—Yɩɩl Sõamyã 72:16.

Ro-sõma la tʋʋm sẽn be yamleoogo. Tẽng zug Arzãnã pʋgẽ, zak fãa na n paama a meng roogo. Ned fãa na n tʋma tʋʋmd sẽn kõt sũ-noog hakɩka.—Ezai 65:21-23.

Bãan dũniyã gill zugu. Nebã pa na n ye kʋ taab zabr pʋgẽ ye. Wẽnnaam Gomdã yetame: “[Wẽnnaam] kɩtdame tɩ zabr sɛ.”—Yɩɩl Sõamyã 46:9, 10.

Yĩns keelem. Biiblã kãabdame: “Tẽnga [Arzãnã] ned ba a ye ka na n le yeel t’a ka laafɩ ye.” (Ezai 33:24) Sẽn paase, ned ba a yembr pa na n yɩ koamsa, zoanga, wʋng bɩ muk ye.—Ezai 35:5, 6.

Toogo, sũ-sãams la kũum saabo. Wẽnnaam Gomdã yetame: “Kũum ka na n le zĩnd ye, la sũ-sãoong bɩ yãbre walla toog kõn le zĩnd yɛs ye, tɩ bõe, dẽenem bũmb fãa loogame.”—Wilgri 21:4.

Nin-wẽnsã na n menemame. A Zeova kãabdame: “B na n yiisa nin-wẽns tẽnga pʋgẽ. B na n yiisa neb nins sẽn ka baood sɩdã.”—Yelbũna 2:22.

Nebã na n nonga taab la b waoogd taaba. Kɛgre, weoogre, rat-tɩ-loog la kisgr pa na n ye zĩnd ye. Nebã na n paama zems-n-taar la b vɩɩmd tɩ zems ne Wẽnnaam so-tɩrsã.—Ezai 26:9.