Y rat n bãnga Biiblã n paas bɩ?

Bõe yĩng tɩ d segd n karem Biiblã?

BIIBLÃ pa wõnd sɛb a taabã ye. A tara sagls Wẽnnaam sẽn kõ ne nonglem. (1 Tesalonik rãmba 2:13) Y sã n tũ Biiblã sẽn zãmsd-y bũmb ningã, na n naf-y-la wʋsgo. Y na n talla nonglem ne Wẽnnaam n paase, la y na n pẽnega yẽ sẽn yaa “bark sõama fãa la kũun sõama fãa” Kõatã. (Zak 1:17) Y na n bãnga y sẽn tõe n pʋʋs-a to-to. Toog wakate, y tõe n paama Wẽnnaam sõngre. Y sã n tũ Biiblã noy y vɩɩmã pʋgẽ, Wẽnnaam na n kõ-y-la vɩɩm sẽn pa satã.​—Rom dãmb 6:23.

Biiblã tara sɩd sẽn kõt vẽnegre. Neb nins sẽn paamd Biiblã bãngrã paamda b mens ne ziri zãmsgã sẽn tar neb milyõ rãmb vɩɩm n namsdẽ wã. Wala makre, d sẽn bãng bũmb ning sẽn be kũum poorã kɩtdame tɩ d ye pa zoet rabeem n tagsdẽ tɩ sẽn ki-​bã tõe n maan-d-la wẽng bɩ tɩ d roagdb la d zo-rãmb nins sẽn ki wã namsdame ye. (Koɛɛg Soaba 9:​5, 10) Biiblã sẽn wilgd tɩ kũum na n vʋʋgame wã kõta neb nins neb sẽn maan kaalma belsgo. (Zã 11:25) D sẽn mi sɩdã malɛg-​wẽnsã wɛɛngẽ wã sõngda tõnd tɩ d bãng tɩ tɩɩm dɩɩb la a saoog wata ne yɛla. Rẽ leb n sõngda tõnd tɩ d bãng bũmb ning sẽn kɩt tɩ wẽng wʋsg be dũniyã zugã.

Wẽnnaam noyã sẽn be Biiblã pʋgẽ wã wilgda tõnd d sẽn na n vɩɩmd to-to tɩ naf-do. Wala makre, y sã n ‘tõog y meng n gũus tɩ y yel-​manesem zemse,’ y paasda y yĩnsa laafɩ. (1 Tɩmote 3:2) D sã n ‘lakd d mens ne bũmb fãa sẽn yaa rẽgdo, yĩnga rẽnda la sũur dẽnda,’ d kogenda d yĩnsã laafɩ. (2 Korẽnt dãmba 7:1) D sã n tũ Wẽnnaam saglsã sẽn be Biiblã pʋgẽ wã, leb n sõngda tõnd tɩ d paam sũ-noog kãadem pʋgẽ, la d yɩ neb sẽn tar burkĩndi.​—1 Korẽnt dãmba 6:18.

Y sã n tũ Wẽnnaam Gomdã saglse, y na n paama sũ-noog n paase. Biiblã bãngr sõngda tõnd tɩ d yamã gãand bãan la d paam sũ-noogo, a leb n kõt-d-la saagre. Bãng-​kãng sõngda tõnd tɩ d tall nimbãan-​zoeere, nonglem, sũ-noogo, laafɩ, tɩ d yɩ maan-​neer dãmb la d tall tẽebo. (Galat dãmba 5:22, 23; Efɛɛz rãmba 4:24, 32) Zʋg-​sõma kãensã sõngda tõnd tɩ d yɩ sɩda, paga, ba, ma, bɩ bi-​sõng n yɩɩd pĩndã.

Yãmb zoe n soka y meng n dat n bãng beoog-​daarã sẽn na n yɩ a soab bɩ? Biiblã bãngr-​goam wilgda tõnd d sẽn be wakat ningã pʋgẽ. Bãngr-​gom-​kãensã pa bilgd dũniyã sẽn yaa to-to rũndã-rũndã wã bal ye, b leb n wilgdame tɩ ka la bilfu, Wẽnnaam na n toeema tẽngã t’a lebg arzãna.​—Wilgri 21:​3, 4.

Sõngr sẽn na yɩl tɩ y wʋm Biiblã võore

Tõe tɩ y makame n na n karem Biiblã, la y yãame tɩ y pa tõe n wʋm a võorã nana-​nana ye. Tõe tɩ y pa mi y sẽn na n ges zĩig ning Biiblã pʋgẽ n paam y sogsgã leoor ye. Sã n yaa woto, yãmb pa y yembr ye. Tõnd fãa ratame tɩ b sõng-⁠d tɩ d wʋm Wẽnnaam Gomdã võore. Tẽns 235 pʋsẽ, a Zeova Kaset rãmbã zãmsda neb milyõ rãmb Biiblã. Yaa ne sũ-noog la b na n sõng yãmb me woto.

Naoor wʋsgo, sẽn são yaa d sẽn na n zãmsd Biiblã bilf-​bilfu, n sɩng ne a zãms-​yẽgã. (Hebre dãmba 6:1) Y sã n kell n maand woto, y na n tõogame n dɩ ‘rɩɩb sẽn yaa taokã’ sõma, sẽn dat n yeel tɩ sɩd nins võor wʋmb sẽn yaa toog n yɩɩdã. (Hebre dãmba 5:14) Yaa Biiblã la sɩdã yẽgre. Sɛb nins sẽn tik Biiblã zug wala seb-​bil ning sẽn yaa Bõe la Wẽnnaam baood tɩ tõnd maane?, na n sõnga yãmb tɩ y wʋm Gʋlsg Sõamyã sẽn gomd yɛl toɛy-​toɛy ninsã võore.

Yãmb ratame n dɩk sẽk semen fãa sẽn na yɩl n wʋm Biiblã võor bɩ?

B tõe n maana Biibl zãmsg ne yãmba, wakat la zĩig ning sẽn yaa sõma ne-​yã. B zãmsda neb wʋsg Biiblã b zagsẽ. Zãmsgã pa maand ne neb wʋsg wa yaa karen-​doogẽ ye. Yaa zãmsg b sẽn maand ne yãmb y yembr tɩ zems ne y sẽkã, la y bãngrã. Zãmsgã pa sẽn na n mak y bãngrã, la pa sẽn na n ning-y yãnd me ye. Sogsg nins yãmb sẽn maand Biiblã zugã na n paama leoore, la na n sõng-y lame tɩ y bãng y sẽn na n pẽneg Wẽnnaam to-to.

Yaa zaalem la b na n zãms yãmb Biiblã. (Matɩe 10:8) B kãabda tũudma fãa neb Biiblã zãmsg zaalem. Yaa woto me ne neb nins sẽn pa tar tũudum, n yaool n dat ne b sũy fãa n bãng Wẽnnaam Gomdã n paasã.

Ãnd dãmb n tõe n naag sõsgã pʋgẽ? Yaa yãmb zakã neb fãa. Y zo-​rãmb y sẽn bool me tõe n naagame. Y sã n dat me, sõsgã tõe n yɩɩ ne yãmb y ye bala.

Neb wʋsg yãkda lɛɛr a ye semen fãa n zãmsd Biiblã. Y sã n tõe n dɩka sẽk sẽn yɩɩd woto bɩ sẽn pa ta rẽ semen pʋgẽ, a Zeova Kaset rãmbã na n sõng-y lame.

B kãabd-y-la zãmsgo

Bao-y a Zeova Kaset rãmbã zĩiga. Sẽn na yɩl n maan dẽ, y tõe n tũnuga ne adɛrs nins sẽn be-b tẽngrã a ye n gʋls-ba. Rẽ, b na n kɩtame tɩ ned wa zãms Biiblã ne yãmb y yir zaalem.

□ Tool-y-m seb-bi-​kãngã: Bõe la Wẽnnaam baood tɩ tõnd maane?

□ M bõos tɩ y bao n seg-m tɩ m dat n zãmsa Biiblã zaalem.

Verse rãmbã fãa yita Wẽnnaam Sebre pʋgẽ.