D sẽn tog n tũ Wẽnnaam to-to

1. Ãnd n segd n wilg tõnd d sẽn tog n tũ Wẽnnaam to-to?

TŨUDUM wʋsg yetame tɩ bãmb sõngda nebã tɩ b bãng Wẽnnaam sõma. Rẽ pa tõe n yɩ sɩd ye. Bala tũudum toor-toorã sẽn yet bũmb ning Wẽnnaam zugã, la b sẽn yet tɩ nebã tog n tũ-a-la to-to wã pa yembr ye. D maanda wãn n bãng d sẽn tog n tũ Wẽnnaam to-to? A Zeova bal n tõe n wilg tõnd d sẽn tog n tũ-a to-to.

2. Bõe la y tõe n maan n bãng y sẽn tog n tũ Wẽnnaam to-to?

² A Zeova kõo tõnd Biiblã sẽn na yɩl tɩ d bãng d sẽn segd n tũ-a sõma to-to. Bɩ y zãms Biiblã, t’a Zeova na n sõng-y lame tɩ y sẽn zãmsd bũmb ningã naf-yã, bala, yãmb yell pak-a-la hal wʋsgo.—Ezayi 48:17.

3. Bõe la Wẽnnaam dat tɩ tõnd maane?

³ Neb kẽer yetame tɩ tũudum buudã fãa tata Wẽnnaam yam. La pa woto la a Zeezi zãms nebã ye. A yeelame: “Ka ned ning fãa sẽn boond maam tɩ Zu-soaba! Zu-soaba! N na n kẽ arzãn [“saasẽ,” MN] soolmẽ ye. Yaa ned ning bal sẽn maand-a mam ba sẽn be arzãnã raab n na n kẽ.” Dẽnd segdame tɩ d bao n bãng Wẽnnaam sẽn datã la d tũ. Yaa tɩlɛ, bala a Zeezi boola neb nins sẽn pa maand Wẽnnaam daabã tɩ “tʋʋm-wẽns maandba.”—Matye 7:21-23.

4. Bõe la a Zeezi yeel Wẽnnaam daabã maaneg wɛɛngẽ?

⁴ A Zeezi keooga tõnd tɩ d sã n dat n maan Wẽnnaam daabã, d na n yãa toogo. A yeelame: “Tũ-y zag-no-sẽkã n kẽ. Bala, zag-noor ning sẽn kẽesd sãoong zĩigẽ wã, ne sor ning sẽn dabd-a be wã yaa yalemse, la neb wʋsg n tũud be. La zag-noor ning sẽn kẽesd vɩɩm pʋgẽ wã yaa sẽka, tɩ sor ning sẽn dabd-a be wã yaa bãanega, la yaa neb bilf bal n yãt-a.” (Matye 7:​13, 14) D sã n tũ sor ning sẽn yaa bãanegã, rat n yeel tɩ d sã n tũ Wẽnnaam sõma, d na n wa paama vɩɩm sẽn kõn sa. La ned sã n tũ sor ning sẽn yaa yalengã, rat n yeel t’a sã n pa tũ Wẽnnaam sõma, na n wa baasa wẽnga. La a Zeova pa rat tɩ ned baa a ye sãam ye. A kõta ned fãa sor t’a tõe n bao n bãng yẽ sõma.—2 Pɩyɛɛr 3:9.

D SẼN TÕE N TŨ WẼNNAAM SÕMA TO-TO

5. Bõe la y tõe n maan n bãng sẽn tũud-b Wẽnnaam sõma wã?

⁵ A Zeezi yeelame tɩ d tõe n bãnga neb nins sẽn tũud Wẽnnaam sõma wã. Yaa d sẽn na n maag d yĩng n ges b sẽn tẽed bũmb ninsã, la b tʋʋm-tʋmdɩ wã. A yeelame: “Biis nins bãmb sẽn womdã n na n kɩt tɩ yãmb bãng-ba.” La a paase: “Tɩ-sõng fãa womda bi-sõama.” (Matye 7:​16, 17) Woto pa rat n yeel tɩ sẽn tũud-b Wẽnnaamã zemsa zãng ye. La b modgdame n maand sẽn yaa tɩrga. Bɩ d ges bũmb nins sẽn na n sõng-d tɩ d bãng sẽn tũud-b Wẽnnaam neerã.

6, 7. Bõe yĩng tɩ tũudum hakɩɩkã neb tũud Biiblã sẽn yetã? A Zeezi sẽn maanã wilgda tõnd bõe?

⁶ D tũuda Biiblã sẽn yetã. Biiblã yetame: “Wẽnnaam n kɩt tɩ b gʋls gʋls-sõamyã fãa, la b bee yõod zãmsg yĩnga, tɩ kɩt tɩ ned bãng a kongre, tɩ rems neda, tɩ wub ned tɩrlem pʋgẽ, tɩ Wẽnnaam ned tõe n paam manegr la seglg tɩ maan tʋʋm-sõamy buud fãa.” (2 Tɩmote 3:​16, 17) Tʋm-tʋmd a Poll ra yeela kiris-nebã yaa: “Yãmb sẽn deeg Wẽnnaam goamã tõnd sẽn togs yãmbã, yãmb ka reeg-a wa a yaa ninsaalb goam ye. Yãmb deeg-a-la wa a sẽn yaa bũmb ning sɩd-sɩdã, Wẽnnaam goam.” (1 Tesalonik-rãmbã 2:​13) Yaa Biiblã sẽn yaa Wẽnnaam Gomdã la tũudum hakɩɩkã neb tũuda. B tũudmã pa tik ninsaalb tagsg bɩ rog-n-migs wall bũmb a to zug ye.

⁷ A Zeezi sẽn zãms nebã bũmb ninsã fãa yita Wẽnnaam Gomdã pʋgẽ. (Karm-y Zã 17:​17.) A ra nong n lebgd n togsda no-rɛɛsdbã goam. (Matye 4:​4, 7, 10) Wẽn-sakdb hakɩɩkã rɩkda a Zeezi togs-n-taare, n zãmsd nebã Biiblã sẽn yetã bala.

8. Bõe la a Zeezi yeel a Zeova tũubã wɛɛngẽ?

⁸ D segd n tũu a Zeova a ye tãa. Traduction du monde nouveau wã pʋgẽ, Yɩɩn-sõamyã 83:18 yetame: “Tɩ nebã bãng tɩ fo yʋʋr sẽn yaa a Zeova wã, foo f yembr bal n ka to dũniyã tɛk fãa.” A Zeezi ra ratame tɩ nebã bãng Wẽnnaam sɩd-sɩdã. Rẽ n so t’a wilg-b a yʋʋrã. (Karm-y Zã 17:​26.) A yeelame: “Waoog Zu-soabã fo Wẽnnaam la f sak bãmb b yen bal tãa.” (Matye 4:10) Dẽnd tõnd sẽn yaa wẽn-sakdbã, d rɩkda a Zeezi naoore, n tũud a Zeova a ye tãa, n pʋt a yʋʋrã, n wilgd nebã a yʋʋrã, la a sẽn na n maan n kõ ninsaalbã.

9, 10. Bõe la d maanda, tɩ wilgdẽ tɩ d nonga taaba?

⁹ D segd n nonga neb a taabã ne d sũy fãa. A Zeezi yeela a karen-biisã tɩ b nong taaba. (Karm-y Zã 13:​35.) Rẽ pa be ne d sẽn yitẽ, bɩ d sẽn yaa buud ning neda, wall d yaa rakãagr bɩ naong soab ye. D sẽn nong taabã segd n kɩtame tɩ d yaa wa zak a ye neba, tɩ zems-n-taar be d sʋka. (Koloos-rãmbã 3:14) Rẽ n kɩt tɩ d pa kẽesd d toog zabã pʋgẽ n kʋ neb ye. Biiblã yetame: “Yaa woto la b bãngd sẽn ya-b Wẽnnaam kambã la sẽn ya-b sʋtãanã kamb n bake. Ned ning fãa sẽn ka maand tɩrga la sẽn ka nong a ba-biig ka Wẽnnaam biig ye.” A paasame: “Bɩ d nong taaba. Bɩ d ra maan wala a Kayẽ sẽn dag n yaa wẽng soabã rẽndã, la sẽn kʋ a ba-biigã ye.”—1 Zã 3:​10-​12; 4:​20, 21.

¹⁰ D rɩkda d sẽkã, d pãngã la d tarmã n sõngd taab la d kengd taab pelse. (Ebre-rãmbã 10:​24, 25) La d ‘maanda nebã fãa neere.’—Galat-rãmbã 6:​10.

11. Bõe yĩng tɩ d sak n deeg tɩ yaa ne a Zeezi maasem la Wẽnnaam na n fãag-do?

¹¹ D segd n saka a Zeezi bala yaa ne yẽ maasem la d tõe n paam fãagre. Biiblã yetame: “Fãagr ka be ne ned a to sã n ka a Zeezi ye. Bala, Wẽnnaam ka kõ ned yʋʋr a to ninsaalba sʋk dũniyã zug tɩ tõnd tõe n tũ n paam fãagr ye.” (Tʋʋmã 4:​12) Sak a 5 wã pʋgã, d bãngame t’a Zeova tʋma a Zeezi t’a wa ki tɩ yɩ maoong wẽn-sakdbã yĩnga. (Matye 20:​28) Yaa yẽ la a Zeova yãk t’a na n dɩ naam tẽngã gill zugu. Yaa rẽ yĩng la Biiblã sẽn yet tɩ d sã n dat n wa paam vɩɩm sẽn kõn sa wã, yaa tɩlɛ tɩ d sak a Zeezi wã.—​Karm-y Zã 3:​36.

12. Bõe yĩng tɩ d pa kẽesd d toog politikã pʋgẽ?

¹² D pa segd n kẽes d toog politikã pʋgẽ ye. A Zeezi pa kẽes a toog politikã pʋgẽ ye. B sẽn wa n kaood a bʋʋdã, a yeela Rom naab a Pɩlat yaa: “Mam soolmã ka dũni ka rẽnd ye.” (Karm-y Zã 18:​36.) Wa a Zeezi, tõnd me pa yit Wẽnnaam Rĩungã poorẽ ye. Rẽ n so tɩ d sẽn be zĩig ning fãa, d pa kẽesd d toog politikã pʋgẽ ye. La Biiblã yetame tɩ d sak ‘pãn-soaadbã,’ rat n yeel tɩ goosneema rãmbã. (Rom-dãmbã 13:​1) D tũuda d sẽn be tẽng ning pʋgẽ wã laloa. La b sã n yiis noor sẽn kɩɩsd Wẽnnaam noore, d maanda wa a Zeezi tʋm-tʋmdbã. B ra yeelame yaa: “Tõnd tog n saka Wẽnnaam n yɩɩd ninsaalbã.”​—​Tʋʋmã 5:​29; Mark 12:​17.

13. Bõe la tõnd moond n yet nebã Wẽnnaam Rĩungã wɛɛngẽ?

¹³ D kɩsa sɩd tɩ Wẽnnaam Rĩungã bal n tõe n welg ãdem-biisã zu-loeesã fãa. A Zeezi yeelame tɩ b na n moona ‘Wẽnnaam soolmã koe-noog’ dũniyã gilli. (Karm-y Matye 24:​14.) Ninsaalbã goosneema baa a ye pa tõe n maan Wẽnnaam Rĩungã sẽn na n maan n kõ tõndã ye. (Yɩɩn-sõamyã 146:​3) A Zeezi yeelame tɩ d pʋʋs tɩ Wẽnnaam soolmã wa, t’a raabã maan tẽng zug wa sẽn maand saasẽ wã. (Matye 6:​10) Biiblã yeelame tɩ Wẽnnaam Rĩungã na n sãama ninsaalbã goosneema rãmbã fãa, la t’a “na n zĩnda wakat sẽn kõn sa.”—Dãniyɛll 2:​44.

14. Yãmb tagsdame tɩ yaa ãnd dãmb n tũud Wẽnnaam sõma?

¹⁴ Bɩ y sok y meng woto masã: ‘Ãnd dãmb n zãmsd nebã Biiblã sẽn yetã? Ãnd dãmb n wilgd nebã Wẽnnaam yʋʋrã? Ãnd dãmb n nong taaba, la b tẽed tɩ Wẽnnaam tʋma a Zeezi t’a wa fãag ninsaalbã? Ãnd dãmb n pa kẽesd b toog politikã pʋgẽ? Ãnd dãmb n wilgd nebã tɩ yaa Wẽnnaam Rĩungã bal n na n welg ãdem-biisã zu-loeesã?’ Yaa a Zeova Kaset rãmbã bala.​​—Ezayi 43:​10-​12.

BÕE LA Y NA N MAANE?

15. D sã n dat n tũ Wẽnnaam sõma, bõe la d segd n maane?

¹⁵ Yãmb sã n tẽed tɩ Wẽnnaam beeme, yaa sõma la pa sek ye. Baa zĩn-dãmbã meng tẽedame tɩ Wẽnnaam beeme. La b pa sakd-a ye. (Zak 2:19) D sã n dat n tũ Wẽnnaam sõma, d pa segd n tẽ-a bal t’a beeme ye. D segd n maana a raabã me.

16. Bõe yĩng tɩ d segd n lak d mens fasɩ ne ziri tũudmã?

¹⁶ D sã n dat n tũ Wẽnnaam sõma, d segd n laka d mens fasɩ ne tũudum nins sẽn pa tat a yamã. No-rɛɛs a Ezayi ra yeelame yaa: “Yi-y bãmb sʋka, welg-y toor ne-ba.” (Ezayi 52:​11; 2 Korẽnt-rãmbã 6:17) Rẽ n so tɩ yaa tɩlɛ tɩ d zãag d mens fasɩ ne bũmb nins fãa ziri tũudmã neb sẽn maandã.

17, 18. “Babilond kãsengã” yaa bõe? Bõe yĩng tɩ y segd n yi a pʋgẽ tao-​tao?

¹⁷ Tũudum nins fãa sẽn pa tũud Wẽnnaam wa Biiblã sẽn yetã, yaa ziri tũudum. Biiblã boonda tũudum-kãens fãa sẽn naag taabã tɩ “Babilond kãsengã.” (Vẽnegre 17:​5) Bõe yĩnga? Bala bũmb wʋsg b sẽn zãmsd nebã sɩnga pĩnd wẽndẽ Babilond tẽngẽ wã, a Nowe wakatẽ sa-kãsengã poore, n kell n yelg dũniyã gill zugu. Wala makre, Babilond nebã ra pʋʋsda wẽnnaam-dãmb sẽn naag taab tãab-tãabo. Rũndã-rũndã me, tũudum wʋsg zãmsda nebã tɩ Wẽnnaam yaa mens a tãabo. Biiblã yaool n wilgda vẽeneg tɩ Wẽnnaam sɩd-sɩdã yaa a ye tãa, t’a yʋʋr la a Zeova, la t’a Zeezi Kiris yaa a Bi-ribla. (Zã 17:​3) Babilond nebã ra tẽedame me tɩ ninsaal kũum poore, a tara sɩɩg sẽn ket n vɩ, n tõe n tɩ nams bugum yiri. Yaool n yaa ziri.—Ges-y Vẽnegr 13, 16 la 17 wã.

¹⁸ Wẽnnaam yeelame tɩ ka la bilfu, a na n sãama ziri tũudmã fãa. (Vẽnegre 18:​8) Woto wilgdame tɩ y segd n yii a pʋgẽ tao-tao. A Zeova ratame tɩ y yi tao-​tao tɩ nan pa kẽ n bõog ye.—Vẽnegre 18:4.

19. Y sã n yãk yam n na n tũ a Zeova, a nafa wã na n yɩɩ bõe?

¹⁹ Yãmb sã n yãk yam n na n yi tũudum ning pʋgẽ y sẽn be wã n na n tũ a Zeova, y zo-rãmb wall y zakã neb tõeeme n pa wʋm a võor ye. B tõeeme meng n nams-yã. La a Zeova kõn tol n bas yãmb ye. Y na n paam n naaga neb milyõ-rãmb sẽn be dũniyã gill zug n nong taaba, n yaa wa zak a ye neba. Y leb n na n wa paam n vɩɩmda wakat sẽn kõn sa, dũni-paalgã pʋgẽ. (Mark 10:​28-​30) Tõe meng tɩ y zo-rãmb la y zakã neb nins sẽn namsd yãmbã wa toeem yam, n sɩng Biiblã zãmsgo.

20. Bõe yĩng tɩ yaa tɩlɛ tɩ y modg n tũ Wẽnnaam sõma?

²⁰ Ka la bilfu, Wẽnnaam na n kɩtame tɩ wẽnem buud fãa sa, t’a Rĩungã soog tẽngã gilli. (2 Pɩyɛɛr 3:9, 13) Ad vɩɩmã sɩd na n talla yamleoog wakat kãnga! Nebã fãa na n tũu a Zeova sõma. Rẽ n so tɩ y segd n yãk yam masã tɛka, n tũ Wẽnnaam sõma.