Y taabã weoogr la y moonegã zu-noogo

¹ Neb a taabã weoogr tara pãnga. A tõe n tusa ned t’a maan sõma bɩ wẽnga. A Zeova sõgen dãmb sẽn yaa d sõgen-taasã tara pãn-tusd-​sõng sẽn tusd tõnd tɩ d maan kiris-neb tʋʋm sõma. (Heb. 10:24) Baasg zãnga, roagdba, tʋmd-n-taase, karen-bi-taase, yagse, bɩ mitins a taab sẽn pa Kaset rãmb tõe n weoogda tõnd sẽn na yɩl tɩ d tall manesem sẽn kɩɩsd kiris-neb noyã. B tõeeme n “gomd [tõnd] yel-manesem sõama Kirist tũudum pʋgẽ [wã] wẽnga.” (1 Pɩɛ. 3:16) Wãn-wãn la d na n kell n tall sardã d sẽn dɩk kãn-kãe n na n ket n moondẽ, baa ne neb a taabã pãn-tusd-wẽnsã d sẽn segdã?

² Zakã neba: Wakat ninga sɩd la ba sẽn pa a Zeova Kaset soab tõeeme n ka rat t’a pag la a kamb moon koe-noogã ye. Ra yaa woto ne zak a yembr neb Megsiko. Raoã pag ne a kamb a yopoe wã waa sɩdã pʋgẽ. Pipi wã a ra kɩɩsdame, bala a ra ka rat t’a zakã neb moon la b kãab sɛb sẽn tik Biiblã zug zak-zak ye. A ra tagsdame tɩ woto maaneg sãamda bãmb yʋʋre. La a pagã ne a kambã yalsa kãn-kãe sardã b sẽn dɩk n na n sõgen a Zeova la b maan koe-moonegã tʋʋmd n ka vaandẽ wã pʋgẽ. Tar-n-tarẽ, raoã wa n yãame tɩ segls nins Wẽnnaam sẽn dɩk moonegã yĩngã sakr tara yõodo, tɩ yẽ me rɩk a meng n kõ a Zeova. Maana yʋʋm 15 t’a yaool n na n sak sɩdã. La rẽ yĩnga a ra na n tol n maanẽ-la woto, a zakã neb sã n da pa kell n nang pãng b moonegã zu-noog tʋʋmd pʋgẽ sɩda?​—Luk 1:74; 1 Kor. 7:16.

³ Tʋmd-n-taase: Tõeeme tɩ modgr nins y sẽn maand n na n kõ y tʋmd-n-taasã kasetã ka paam reegr sõma ne kẽer ye. Saam-bi-poak a yembr togsame tɩ no-koeemd n yik biruẽ wã dũniyã saab zugu. Yẽ sẽn sagl tɩ b karem Matɩe sak 24, neba yaal-a lame. La rasem a wãn poore, a tʋmd-n-taag a yembr togs-a lame t’a karma sakã hal tɩ zĩnd yamleoog ne-a. A basa sebr ne-a, la a rɩk segls sẽn na yɩl n maan Biibl zãmsg ne yẽ la a sɩdã. Pipi zãmsgã kaoosame n ta yibeoog wakat a 2. Zãmsg a tãab-n-soabã poore, b sɩngame n wat tigissã, la rẽ poor bilfu b basa sɩgaar yũub la b sɩng koe-noogã moonego. Rẽ yĩngã woto ra na n zĩndẽ lame, tõnd saam-bi-poakã sã n da ka maanẽ modgr n taas a saagrã neb a taab sɩda?

⁴ Karen-bi-taase: Ka yel-​sãang ne Kaset rãmb sẽn yaa kom-bɩɩs tɩ b yã karen-bi-​taas weoogr lekollẽ wã, tɩ b yɛɛsd kamb a taabã na n wa paoog-ba, b sẽn moond koe-moonegã yĩng ye. Kiris-ned sẽn yaa bi-bɩɩg sẽn be Etazĩni yeela woto: “Mam yɛɛsdame n ka rat n kõ karen-biis a taabã kaset ye, bala mam zoeta b na n wa paoog maam.” Rẽ kɩtame t’a bas soay tɩ loog n pa kõ a kom-taasã kaset lekollẽ wã la moonegã zĩigẽ ye. Wãn to la y tõe n tall pãng n yals kãn-kãe ne raood y taabã weoogr taoore? Teeg-y a Zeova, la y bao n ta a yam. (Yel. 29:25) Ges-y tɩ tõog ning y sẽn tar n tʋmd ne Wẽnnaam Gomda y ministɛɛrã pʋgẽ wã yaa zu-zẽkr ne-yã. (2 Tɩm. 2:15) Bi-bɩɩg ning goam b sẽn nan togs zugẽ wã sɩngame n pʋʋsd a Zeova, n kos-a t’a sõng-a t’a tall tʋlsem n gom ne a karen-bi-taasã. A sɩngame n kõt kaset ne manesem sẽn ka yãk wakat lekollẽ wã, n paam bi-sõma, la pa kaoos la a gomd ne ned ning fãa a sẽn da mi ye. A yeela woto n baase: “Kom-kãensã segdame la b ratame n paam saagr beoog-daar yĩnga, la a Zeova tũnugda ne tõnd n sõngd-ba.”

⁵ Yagse: D tõe n tara yags bɩ mitins a taab sũy sẽn kãbd ne tõndo, tõnd sẽn yaa neb nins la d sẽn tẽed bũmb ninsã yĩnga. Yãmb sã n yɛɛsd b sẽn tagsdã, bɩ y sʋk y menga: ‘B mii sɩd ning sẽn tar n debd vɩɩm sẽn-kõn-saẽ wã bɩ? Bõe la m tõe n maan n paam tɩ koɛɛgã kẽ b sũyã?’ Bab-sak sull yel-gɛt gũusame n ges tɩ b paamda bi-sõma, b sã n kõt kasetã neb a taabã bilf-bilf wakat fãa. Bõos-y a Zeova t’a kõ-y pãng la yam ning sẽn yaa tɩlae wã sẽn na yɩl n ket n baood pʋ-peelem dãmbã.​—Fil. 4:13, NW.

⁶ Tõnd sã n bas tɩ neb a taabã pãn-tusd-wẽns tõog-do, rẽ tõe n nooga kɩɩsdbã sũyã. La rẽ yĩnga, woto na yɩ nafr n kõ bãmba, bɩ tõnd mengã sɩda? A Zezi mengã tẽngẽ neb ra kɩɩsd-a lame. A tol n talla tõog-toog a ma-bi-pogsã tagsa sẽn yaa wẽns wʋsg taoore. La a ra miimi tɩ ya a sẽn da na n kell n sɩd tall vɩɩm manesem ning Wẽnnaam sẽn da yãk a yĩngã bal la a ra tõe n sõng-ba. Dẽ, a Zezi “tõoga toog kɩɩsg goam yel-wẽn-maandb sẽn gom n kɩɩs b mens nafa taoore.” (Heb. 12:2, 3, NW) Tõnd tog n maana woto me. Rɩk-y sard kãn-kãe n tũnug ne zu-noog ning y sẽn tar n tõe n moon Rĩungã koɛɛgã wʋsg wa y sẽn tõe tɛka. Yaa y sẽn na n maand woto la ‘y na n fãag y meng la neb nins sẽn kelgd yãmbã.’​—1 Tɩm. 4:16.