Teeg-y a Zeova t’a kõ-y pãnga
1 Yɛl wʋsg yĩng n kɩt tɩ d segd n teeg a Zeova. Moon koe-noogã tɩ ta “dũniyã tɛk fãa” yaa tʋʋm toog menga. (Mat. 24:14) Wakat fãa tõnd maooda ne d pa-zems-zãngã. (Rom 7:21-23) Sẽn paase, ‘tõnd zabda ne yĩngr dĩm dãmb [pãng sẽn yɩɩd ninsaal dẽnda].’ (Ef. 6:11, 12) Dẽnd yaa vẽeneg tɩ d rata sõngre. Wãn-wãn to la d tõe n paam pãng a Zeova nengẽ?
2 Ne pʋʋsg maasem: A Zeova kõta a vʋʋsem sõngã a sõgen dãmb nins sẽn kot-a rẽ wã zaalem. (Luk 11:13) Rẽ yĩnga yãmb tagsdame tɩ y ka tõe n kõ kasetã zak-zaka, soayã zutu, bɩ ne telefõn bɩ? Yãmb zoeta yãnd n ka rat n kõ kasetã ne manesem sẽn ka yãk wakat bɩ? Bɩ yaa nebã sẽn ka rat n kelg moonegã zĩigẽ wã n boog yãmb yẽesmã? La yaa wãn to yẽ, ned sã n tusd yãmb tɩ y bas y tẽebã la y burkĩndã? Teeg-y a Zeova. Pʋʋs-y-yã-a n kos pãnga.—Fil. 4:13, Sebr Sõngo.
3 Ne meng zãmsg maasem: D sã n dɩ yĩngã rɩɩbo, d paamda pãnga. Woto me, d sã n dɩlgd d mens wakat fãa ne Wẽnnaam Gomdã la ‘tʋm-tʋmd sẽn tũud sɩd la sẽn tar yamã’ sɛba, d paamda pãng tẽebã wɛɛngẽ. (Mat. 4:4; 24:45) B sʋka a Stanley Jones n dat n bãng bũmb ning sẽn kõ-a pãng t’a tõog n yals kãn-kãe ne a sẽn da ka tar Biiblã, b sẽn da wa n kẽes a roog yʋʋm wʋsg Sinnã, t’a yeele: “Tõnd tõe n yalsa kãn-kãe tẽebã pʋgẽ. La yaa vẽeneg tɩ d segd n deng n zãmsame. Tõnd ka tõe n tall pãng tɩ sã n ka d zãmsame ye.”
4 Ne tigissã kẽngr maasem: Pipi yʋʋm kob-gĩndẽ wã, kiris-neb tigisgẽ a Ziid ne a Sɩlas “sagla ba-biisa ne goam wʋsgo n paas bãmb pãnga.” (Tʋʋ. 15:32) Woto me rũndã-rũndã, bũmb ning tõnd sẽn wʋmd tigissẽ wã paasda tõnd mi-beoog ne a Zeova, kengda tõnd tẽebã, la paasd tõnd yẽesem koe-moonegã pʋgẽ. Tigissã kɩtdame tɩ d tõe n yã ‘sẽn lagemd-b ne tõnd n tʋmd Wẽnnaam soolem yĩngã’ wakat fãa. Bãmb yaa ‘belsg tõnd yĩnga.’—Kol. 4:11.
5 Tõnd data sõngr ‘wakat kãngã sẽn yaa toog wʋsgã’ sasa. (2 Tɩm. 3:1, Sebr Sõngo) B kõta tõnd bas-m-yam woto sã n yaa ne neb nins sẽn paamd pãng a Zeova nengẽ wã: “Bãmb na n yɩga wa sɩlse. Bãmb na n zoeeme la b pãng ka na n sɛ ye. Bãmb na n kẽname n ka yɛ ye.”—Ezai 40:31.