Gũus-y y sẽn tʋmd ne y sẽkã to-to wã neere
1. Yel-bʋs la neba segd rũndã-rũndã zĩig fãa?
1 Rũndã-rũndã, baa masĩn dãmb wʋsg sẽn be n tõe n sõng-d tɩ d ra sãam d sẽkã la d pãngã, neb wʋsg yãame tɩ wõnda wa b tara tʋʋm wʋsg n paase, n ka tar sẽk tɩ sek n na n maan-b ye. Yãmb mikame tɩ yaa toog tɩ y tõog n tall tẽeb tʋʋm na-kẽndr sẽn yaa sõma bɩ? Yãmb tʋllẽ lame n paam sẽk n paas koe-moonegã yĩng bɩ? Wãn to la d tõe n tʋm ne d sẽkã sõma?—Yɩɩl 90:12; Fil. 1:9-11.
2, 3. Koe-taasgã masĩn dãmb wata ne yel-bʋse, la wãn to la ned kam fãa tõe n vaees a mengã yɛl sẽn yaa to-to n gese?
2 Bao-y n bãng-y bũmb nins sẽn sãamd sẽkã: Wakat-wakate, tõnd fãa segd n gesa d sẽn tʋmd ne d sẽkã to-to. Biiblã sagenda tõnd woto: “Gũus-y neer ne yãmb kẽnde, n da kẽn wa yalemb ye. Kẽn-y wa yam dãmba. Da bas-y tɩ weerã sãamd zaalem ye. Bala, mosã yaa wẽng wakate.” (Ef. 5:15, 16, Kãab-paalgã Koe-noogo) Ges-y koe-taasgã masĩn dãmb sẽn lebgd sõma n paasdẽ wã sẽn wa ne zu-loees ninsi. Baa b sẽn tõe n dɩk ordinatɛɛr dãmbã la masĩn dãmb a taab n maan bũmb sẽn zemsã, d sã n pa gũusi, b leb n tõe n yɩɩ bẽdg n kõ-d d sẽkã rɩk-n-tʋm pʋgẽ.—1 Kor. 7:29, 31.
3 Tõnd ned kam fãa segd n soka a meng woto: ‘Rẽ yĩnga m dɩkda sẽk daar fãa n karemdẽ la m leokd koees sẽn namsd-m zaalem bala, b sẽn toond ne ẽntɛrnetã maasem bɩ? Naoor wʋsgo mam nonga neb boaal ne telefõne, bɩ m tũnugda ne rẽ n gʋlsd-b koees yel-yaals zut bɩ? (1 Tɩm. 5:13) Tõe n mikame tɩ mam tʋmda ne ẽntɛrnetã zaalem yĩng woto bala, bɩ m sã n get televiziõ wã m minim n toeemda televiziõ sɛn toɛy-toɛy zaalem bal bɩ? Rẽ yĩnga sẽk ning m sẽn dɩkd n get reem nins sẽn be masĩn dãmbã pʋsẽ wã sɩngame n dɩt sẽk ning m sẽn dɩkd n zãmsd Wẽnnaam Gomdã bɩ?’ Yel-kãensã pʋgb tõee bilf-bilf n wa sãam tõnd tẽebã.—Yel. 12:11.
4. Yɩɩ tɩlae ne bi-bɩɩg a yembr t’a maan rems-bʋgo, la bõe yĩnga?
4 D tʋm ne d sẽkã neere: Masĩn dãmbã rat n deega tõnd sẽkã la b yãmb tõnd tagsgã. Bi-bɩɩg a yembr masĩn dãmbã pʋsẽ deem sẽn kẽ sõma sak n deega woto: “Wakat ninga, mam sã n da maan deem masĩna pʋgẽ la m yi koe-moonegã bɩ n kẽng kiris-neb tigisga, m neeme tɩ yaa toog tɩ m tags bɩ m kelg neere. Wakat fãa la bala m da tagsda m sẽn na n maan to-to n welg yell sẽn tɩ loe ne reem m sã n wa leb yiri. Rẽ sãama m meng zãmsgã la m Biiblã kareng wakat fãa wã. Sũ-noog ning m sẽn tar Wẽnnaam balengã pʋgẽ wã sɩngame n boogdẽ.” A sẽn yã tɩ yaa tɩlae t’a maan toeengã yĩng kɩtame t’a yiis reem nins fãa sẽn be a masĩnã pʋgẽ wã. A tẽega woto: “Pa yɩ nana ye. M sũurã ra kẽe reema wʋsg n yɩɩd m sẽn da tagsdã. La mam sẽn tõogã kõ-m-la sũ-noogo, bala m bãngame tɩ m maana rẽ m meng neer yĩnga.”—Mat. 5:29, 30.
5. Wãn to la d tõe n bao sẽk tẽebã tʋʋm yĩnga, la d sã n maan woto, wãn to la na n naf-do?
5 Y sã n mikame tɩ zĩis n be y sẽn segd n maan demsgo, tõeeme tɩ yɩ tɩlae tɩ y maan dẽ. Rẽ yĩnga y na n tõogame n bas tʋʋm sẽn ka tɩlae maaneg n paam baa yaa minit 30 daarã pʋgẽ bɩ? Yaa sẽk sẽn zems woto bal la d baood sẽn na yɩl n karem Biiblã tõr yʋʋmd a ye pʋgẽ. Woto na n sɩd naf-d-la sõma tẽebã wɛɛngẽ! (Yɩɩl 19:8-12; 119:97-100) Yãk-y wakat takɩ Biiblã karengo, tigisgã seglgo, la koe-moonegã yĩnga. (1 Kor. 15:58) Y sã n maan dẽ, na n sõng-y lame tɩ y ra bas tɩ bũmb nins sẽn sãamd sẽkã reeg y sẽkã, la sõng-y tɩ y “bãng Zusoaba yam sẽn yaa bũmb ninga.”—Ef. 5:17.