“Bɩ y yɩ neb sẽn mi beoogo”
1 A Zezi sẽn maag wãoob a piigã, a ye bal n lebg n wa wilg-a a mi-beoogo. Rẽ kɩtame t’a Zezi sok woto: “Ka bãmb piig n paam maagra la? La neb a wɛ wã bee yɛ?” (Luk 17:11-19) D segd n wilga Wẽnnaam a Zeova sẽn yaa d saasẽ ba wã tɩ d sũy nooma ne bũmb nins a sẽn kõt-dã la d wilg-a d mi-beoogo.—Kol. 3:15; Zak 1:17.
2 Bũmb kẽer a Zeova sẽn maan tɩ d segd n wilg-a d mi-beoog la bʋse? D tara mi-beoog ne a Zeova a sẽn kõ rondã sẽn tar yõod n yɩɩd bũmb a taab nins fãa a sẽn maan ninsaalbã yĩngã. (Zã 3:16) D tara mi-beoog me ne-a a sẽn sak tɩ d lebg a zo-rãmbã. (Zã 6:44) A sẽn tigim d fãa tɩ d yaa wa zak a yembr neb dũniyã gill zugã me seka d na wilg-a d mi-beoogo. (Yɩɩl 133:1-3) Yaa vẽeneg tɩ d pa tõe n sõdg a Zeova sẽn maan bũmb nins n kõ-dã n sa ye. D pa tol n dat n wõneg Israɛll nebã sẽn pa yɩ mi-beoog rãmba, n yĩm a Zeova sẽn maan bũmb nins n kõ-bã ye.—Yɩɩl 106:12, 13.
3 D sẽn tõe n wilg d mi-beoog to-to: Baa wãoob piigã fãa sũy sẽn yɩ noog a Zezi sẽn maag-bã, yaa a yembr bal n wilg a mi-beoogo. (Luk 17:15) Wala ra-kãngã, d sã n moond koɛɛgã ne yẽesem, tõnd me wilgdame tɩ d yaa neb sẽn mi beoogo. D sã n sɩd tar mi-beoog ne bũmb nins fãa d saasẽ ba wã sẽn maand tɩ wilgd t’a nong-d lame wã, na n kɩtame tɩ tõnd me nong nebã la d nong n gomd Wẽnnaam yell ne-ba. (Luk 6:45) D sã n gomd ne nebã bõn-bãn nins a Zeova sẽn maanã yelle, la d wilgd-b t’a tagsda tõnd yelle, na n kɩtame tɩ d nong-a wʋsgo. Sẽn paase, d mi-beoogã na n paasdame.—Yɩɩl 40:6.
4 Sõng-y neb a taabã tɩ b wilg b mi-beoogo: D segd n modg n sõnga d kambã la neb nins tõnd sẽn zãmsd Biiblã me tɩ b tall mi-beoogo. Roagdbã tõe n tũnuga ne bũmb wʋsg n sõng b kambã tɩ b tall mi-beoogo. Wala makre, b sã n wa sõsd ne b kambã bũmb kẽer a Zeova sẽn naan zugu. (Rom 1:20) D sã n wa zãmsd ned Biiblã, d tõe n sok-a-la woto: “Tõnd sẽn zãmsd bũmb ningã wilgda tõnd bõe a Zeova zugu?” Karen-biigã mi-beoog sã n tar paasgo, a na n nonga Wẽnnaam la a rat n ta a yam n paase.
5 Yaoolem wakat kãensã sasa, neb wʋsg pa tar mi-beoog ye. (2 Tɩm. 3:1, 2) A Zeova sẽn ne a Kaset rãmbã sẽn moond koɛɛgã ne yẽesem n wilgd b mi-beoogã, a sũur sɩd noomame.—Zak 1:22-25.