D na n tɩ paama zãmsgo, la d kɩdem
1. Wãn to la a Zeova get a nin-buiidã yell tẽebã wɛɛngẽ?
1 A Zeova geta a nin-buiidã yell tẽebã wɛɛngẽ. Dũniyã neb sẽn kiid kom tẽebã wɛɛngẽ wã, tõnd yẽ paamda tẽebã rɩɩb wakat fãa tɩ sekdẽ. (Ezai 65:13) A Zeova tũnugda ne rasem a tãab tigis-kãsemsã d sẽn maand yʋʋmd fãa wã me n zãmsd tõndo. Yãmb segenda y mens sẽn na yɩl n tõog n kẽng tigis-kãsengã rasem a tãabã fãa bɩ? A gom-zugã la woto: “Vʋʋsem sõngã wilgda tõnd sore.” Tẽebã rɩ-nood wʋsg la b segl tõnd yĩnga.
2. Segl d mens pĩndã baoodame tɩ d maan bõe?
2 D segl d mens pĩnda: “Nin-tʋmdg gɛɛl wata ne nafa.” (Yel. 21:5, NW ) Woto yĩnga, y sã n wa segend y mens sẽn na yɩl n kẽng tigis-kãsengã rasem a tãabã fãa n tẽeg tɩ y segd n kosa sore, bɩ y wilg y tʋʋmã taoor soab tao-tao. Y sã n na n baoa ro-gãaga, bɩ y ra yĩm tɩ y segd n segla y meng rẽ wɛɛngẽ me ye. Y segd n talla y midi wã rɩɩb me n kẽng tigis-kãsengã zĩigẽ, sẽn na yɩl n tɩ paam n dɩtẽ la y sõsd ne y saam-biisã. Segl-y y mens sõma sẽn na yɩl n tat tigis-kãsengã zĩigẽ pĩnd daar fãa, n bao zĩiga, n paam n naag n yɩɩll sɩngr yɩɩlã la y kelg pʋʋsgã.
3. Fu-bʋs buud la d segd n ningi?
3 D segd n ninga fut sẽn yaa sõma, la sẽn wilgd me tɩ d yaa sik-m-mens rãmbã. (1 Tɩm. 2:9, 10) Tigis-kãsemsã yaa zu-noog d sẽn paamd n kõt sakã rãmb kasetã. Dẽnd d sã n maneg d mensã tɩ yaa sõma la d ning d badz rãmbã, sakã rãmb la neb a taabã na n yãame tɩ d yaa toore, tɩ kɩt tɩ b tall tagsg sẽn yaa sõma tõnd zugu.
4. Bõe n tõe n sõng tõnd ne d zakã rãmb tɩ d rɩ sõssã yõodo?
4 D kelg sõssã sõma: Yaa vẽeneg tɩ d rat n kelga sõssã fãa n da kong baa yembr ye. (Yel. 22:17, 18) D sã n tũud verse rãmbã kareng d Biiblã pʋgẽ la d rɩkd not rãmba, na n sõnga tõnd tɩ d yamã ra yuusi, la tɩ bũmb ra tɩɩs-d ye. Rẽ zaabr sã n ta, d tõe n dɩka d not rãmbã n sõs ne neb a taabã yɛl nins sẽn yɩ-d noogã zugu. Yʋʋm nins sẽn loogã pʋgẽ, d yãame tɩ tigis-kãsemsã sasa, kambã mi n zĩi ne taab n sõsd bɩ n gʋlsd mesaaz ne b selilɛɛr dãmbã n toond taaba. D sã n tara kamba, yɩta sõma tɩ d fãa naag taab n zĩnd zĩig a ye, la d ra bas-b tɩ b tɩ zĩnd ne kamb a taab ye.
5. Bõe la d tõe n maan tɩ d sũ-noogã paase?
5 D sõs ne d saam-biisã: Ned sã n dɩt ne a zo-rãmbã, noomame n yɩɩd a sẽn na n dɩt a yembre. (Yel. 15:17) D sã n sõsd ne d saam-biisã me tigis-kãsengẽ wã, d sũ-noogã paasdame. Dẽnd vʋʋsgã sasa, d segd n sõsa ne d saam-biisã, la d bao n bãng neb a taaba. (Yɩɩl 133:1) Sɛsiõ wã perzidã sã n wa yeel tɩ d tɩ zĩnd tɩ sõssã na n sɩnga ka la bilfu, d segd n kʋʋga d sõsgã la d tɩ zĩnd tao-tao tɩ nan pa sɩng ye.
6. Wilg-y kibar y sẽn paam tɩ wilgd tõnd sẽn tõe n kõ sakã rãmb kaset to-to tigis-kãsengã sasa?
6 D kõ kasetã: Tigis-kãsemsã sasa, d paamda zu-noog n kõt kasetã. Neb nins sẽn wat tigis-kãsengã wʋsg mi n kẽeda bis bɩ tagsi rãmba, walla n kẽngd rɩɩb koosg zĩisẽ, tɩ nebã yãt tigis-kãsengã gom-zugã sẽn be b badzã zugã n sokd a võore. Woto kɩtame tɩ saam-biis kẽer paam sor n sõs ne neb sãnda, n kõ-b kaset sɩdã zugu. B boola nin-kãensã kẽer tɩ b wa tigis-kãsengã, tɩ b sɩd wa.
7. Bõe yĩng tɩ d segd n kẽng rasem a tãab tigisg sẽn watã?
7 B rɩka lɛɛr dãmb wʋsg n segl sõssã, tigis-kãsengã zĩiga, n sigl sul toɛy-toɛy sẽn na n ges tigis-kãsengã yelle, la yɛl a taaba. Modgr ning b sẽn maan n segl woto fãa wã wilgdame t’a Zeova nonga tõndo, la a sɩd geta d yelle. Bɩ d fãa modg n zĩnd tigis-kãsengã sasa n dɩ sõssã fãa yõodo. D sã n maan woto, d na n kɩdemda ne sũ-noogo, bõn-sõma nins a Zeova sẽn kõt tõndã yĩnga, tɩ dũniyã rãmb yãbda.—Ezai 65:14.
[Zĩ-gũbri, seb-neng a 4]
Tẽegre, rasem a tãab tigis-kãsengã yĩnga
◼ Sõssã sɩngr wakate: Sõssã na n sɩngda daar fãa yibeoog wakat a 9.20. Mizikã sã n wa sɩnge, d fãa segd n tɩ zĩnda d zĩisẽ sẽn na yɩl tɩ tigis-kãsengã sɩng sõma. Arzũmã ne sibrã, tigsgã na n saa zaabr wakat a 5.5, la hatã rẽnd sata zaabr wakat a 4.10.
◼ Parkĩngã: Ning-y y badz rãmbã sẽn na yɩl tɩ parkĩngã rãmb bãng-y n welge. Tũ-y parkĩngã rãmb noy sõma sẽn na yɩl tɩ sãmpoag ra wa zĩnd ye.
◼ Zĩisã bĩngri: D pa segd n bĩng ned zĩiga, sã n pa mikame t’a soab tũu tõnd n wa tigis-kãsengã, bɩ a bee zak a ye ne tõnd ye.
◼ Midi wã rɩɩbã: Zã-y rɩɩb n wa tɩ vʋʋsgã sasa bɩ y ra yi tigis-kãsengã zĩigẽ n tɩ bao rɩɩb ye. D tõe n ninga d rɩɩbã galasɩɛɛr kɩds pʋgẽ n bĩng d zaoogã tẽngre. D pa segd n zã rãam, galasɩɛɛr bɛda, la teed buud fãa sẽn maan ne vɛɛr n wa tigis-kãsengẽ wã ye.
◼ Kũunã: Tigis-kãseng seglg baooda ligd wʋsgo. D tõe n wilga d mi- beoogo, n kõ yamleoog kũun d Rĩungã Roogẽ walla tigis-kãsengã zĩigẽ, sẽn na yɩl n teel tʋʋmdã b sẽn tʋmd dũniyã gill zugã. Burkĩna Faso ka, d sã n na n tũnug ne sɛk n kõ ligdi, d segd n gʋlsa sɛkã zug tɩ Association Les Témoins de Jéhovah du Burkina Faso.
◼ Sãmpoagã la tɩbsg nins sẽn baood yãgbã: Ned sã n dat tɩbsg ne yãgb tigis-kãsengã zĩigẽ, bɩ y tɩ yã sãamb rɛɛgda, t’a wilg-y neb nins sẽn get tɩbsgã yellã tɩ b sõng-yã. Neb nins sẽn yaa bãad rãmbã segd n tẽeg n zãa b tɩɩm n wa.
◼ Sõssã rɩkre: Sẽn yaa post bɩ aparɛy ning fãa la d rat n tall n dɩk sõssã, d pa segd n tɩ sel kʋʋrã wã bɩ sono wã zĩigẽ ye. D leb n segd n gũusame n da tiis nebã ye.
◼ Fot yõkre: Y sã n dat n yõk foto sõssã sasa, y pa segd n ning flas ye.
◼ Telefõn selilɛɛr dãmbã: B segd n kiisa telefõn selilɛɛr dãmbã tɩ ra wa tiis nebã ye.
◼ Parfẽ rãmbã la ka-zaeedmã: Zĩis kẽere, b maanda tigis-kãsemsã zĩis sẽn gũbg pʋsẽ tɩ yaa vãntɩlatɛɛr dãmb bal n kõt pemsmã. Woto yĩnga, yɩta sõma tɩ d gũus ne parfẽ rãmb la ka-zaeedem la mantolato nins yũug sẽn tõe n wa nams neb nins sẽn bẽed vʋʋsmã bãasã.—1 Kor. 10:24.
◼ D tʋm ne Veillez suivre l’intérêt seb-vãoogã: Tigis-kãsengã wakate, d sã n tõog n kõ ned kasetã t’a wilg t’a rat n bãnga koɛɛgã n paase, d segd n gʋlsa rẽ Veillez suivre l’intérêt (S-43) seb-vãoogã zugu. Koe-moondbã segd n zãa seb-vã-kãngã a ye bɩ a yiib n wa tigis-kãsengã zĩigẽ. Y sã n pids seb-vãoogã, y tõe n tɩ kɩs-a sẽn get-b sɛbã yell tigis-kãsengã zĩigẽ wã, walla y zã n tɩ kɩs y tigingã sekertɛɛre.—Ges-y yʋʋmd 2005 wao-fugdg kiuug Rĩungã Tʋʋmde, seb-neng a 6.
◼ Ro-gãasã: Zĩig ning y sẽn na n gãandẽ fãa bɩ y waoog nebã la y wilg tɩ y nong-b lame. Sã n yaa zak pʋgẽ la b reeg yãmba, bɩ y sõng zakã rãmb ne b tʋʋmã la ne depãens rãmbã wa y sẽn tõe tɛka. Yaoolem daarã, nand tɩ y loog bɩ y maneg rotã n bas-b yɩlma.