D sõng d karen-biisã ne d sũy fãa
1. Wãn to la d segd n sõng d karen-biisã?
1 Sẽn na yɩl n sõng karen-biig t’a wa rɩk a meng n kõ a Zeova, pa Biiblã bal la d segd n zãms-a ye. Tʋm-tʋmd a Poll ra wilgame t’a nonga neb nins a sẽn da zãmsd Biiblã wa pag sẽn nong a kamb n get b yell to-to wã. Tõnd me segd n nonga d karen-biisã la d sõng-b ne d sũy fãa tɩ b tẽebã bɩ.—1 Tes. 2:7-9.
2. Bõe yĩng tɩ d segd n wilg d karen-biisã tɩ b yell pak-d lame, la wãn to la d tõe n maan dẽ?
2 D wilg d karen-biisã tɩ b yell pak-d lame: Karen-biig sã n tũud bũmb nins a sẽn zãmsdã, a sũur-kasetã na n sõng-a lame t’a bãng t’a segd n basa neb nins sẽn pa tũud Wẽnnaam noyã tũubu. (1 Pɩɛ. 4:4) A zakã neb tõeeme n kisg-a. (Mat. 10:34-36) D sã n wilg-a t’a yell pak-d lame, kengda a raoodo. Misioneer a ye yeela woto: “Y sã n zãmsd ned Biiblã, zãmsg fãa poor bɩ y ra yɩ tao-tao n loog ye. Sã n tõe bɩ y yals bilf n sõs ne-a.” Gũusd-y n get y sẽn tõe n sõng y karen-biisã to-to. Wala makre, a sã n wa ka laafɩ y tõe n tɩ ges-a lame, bɩ n bool-a ne telefõn n bãng a keelem. Sã n mik t’a tara kamba, tigissã sasa, sã n tõe bɩ y zĩnd ne-a n sõng-a n ges b yelle.
3. Bõe la d tõe n maan tɩ d karen-biig paam tigingã neb sõngre?
3 Tigingã neb sẽn tõe n sõng karen-biisã to-to: Y sã n wa moond zĩig sẽn pẽ y karen-biig zaka, y tõe n talla koe-moondb a taabã tɩ b tɩ bãng-a. Sã n tõe bɩ y mi n kot koe-moondbã, baa ne kãsem dãmbã, tɩ b yãagd-y tɩ y tʋgd n zãmsd-a Biiblã. Y sã n wa sɩng ned Biiblã zãmsgo, bɩ y yeel-a t’a wat tigissã Rĩungã roogẽ. Rẽ na n kɩtame t’a paamd n sõsd ne tigingã neb sẽn na n wa lebg a tẽed-n-taasã.—Mark 10:29, 30; Heb. 10:24, 25.
4. D sã n modgd d karen-biisã yĩnga, bark bʋg la d na n paame?
4 Roagd sã n modg n sõng a kamb tɩ b wa yãk yam n tũud a Zeova, kõt-a-la sũ-noog wʋsgo. (3 Zã 4) Tõnd me sã n modg n sõng d karen-biisã ne d sũy fãa, d na n paama sũ-noog wʋsgo.