M tõe n moona koɛɛgã sɩda?
1. Bõe yĩng tɩ d pa segd n tags tɩ d pa tar minim n na n moon koɛɛgã?
1 Sã n mik tɩ yãmb sokda y meng woto bɩ y ra koms raood ye. Pa ned sẽn na n karem bɩ a sẽn na n tar minim bal la a na n tõog n moon koɛɛgã ye. Biiblã wilgdame tɩ pipi kiris-nebã kẽer ra yaa “nin-tals sẽn ka paam zãmsgo.” La baa ne rẽ, b ra mii koe-noogã mooneg sõma, bala b ra tũuda a Zezi mak-sõngã ne b sũy fãa.—Tʋʋ. 4:13; 1 Pɩɛ. 2:21.
2. A Zezi ra zãmsda nebã wãn to?
2 A Zezi sẽn da zãmsd nebã to-to: A Zãmsgã ra yaa nana, tɩ ned buud fãa ra tõe n wʋm a võor sõma. A sogsgã, makr nins a sẽn da rɩkdã, la a sɩngr goamã sẽn da yaa noogã kɩtame tɩ nebã ra kelgd-a sõma. (Mat. 6:26) A ra wilgdame tɩ nebã yell pak-a lame. (Mat. 14:14) Sẽn paase, a Zezi ra gomda ne raoodo, n miẽ tɩ yaa a Zeova n tʋm-a, la a kõ-a pãng t’a moon koɛɛgã.—Luk 4:18.
3. Wãn to la a Zeova sõngd tõnd sẽn na yɩl tɩ d tõog n moon koɛɛgã sõma?
3 A Zeova sõngda tõndo: Tõnd karen-saam-kãseng a Zeova tũnugda ne a Gomdã la a siglgã n zãmsd tõnd d sẽn tõe n moon koɛɛgã sõma to-to. (Ezai 54:13) A Zeova sẽn kɩt tɩ b gʋls a Zezi sẽn da zãmsd nebã to-to wã n bĩngã kɩtame tɩ d tõe n ges n dɩk a togs-n-taare. A Zeova kõta tõnd a vʋʋsem sõngã, la a tũnugd ne tigissã n zãmsd tõndo. (Zã 14:26) Sẽn paase, a kɩtame tɩ d tar koe-moondb sẽn tar minim sẽn tõe n sõng tõnd tɩ d tõog n moon koɛɛgã sõma.
4. Bõe yĩng tɩ d segd n kɩs sɩd tɩ d tõe n moona koɛɛgã?
4 D pa segd n tags tɩ d pa tar minim n na n moon koɛɛgã, bala “tõnd tõogr yita Wẽnnaam nengẽ.” (2 Kor. 3:5) D sã n teeg a Zeova la d sɩd sak n tũ sagls nins a siglgã sẽn kõt-dã, na n kɩtame tɩ d “bɩ la [d] maan tʋʋm sõma fãa.”—2 Tɩm. 3:17.