Reeg-y lisgu, n da bas tɩ kaoos ye

1. Bõe ne bõe n kɩt tɩ y segd n deeg lisgu?

YÃMB nonga Wẽnnaam a Zeova, soab ning sẽn kõ yãmb vɩɩmã la kũun sẽn yaa sõma buud fãa wã bɩ? Yãmb dat n wilgame tɩ y nong-a lame bɩ? Sẽn yɩɩd fãa, bũmb y sẽn tõe n maan n wilg rẽ vẽeneg yaa y sẽn na n dɩk y meng n kõ-a n deeg lisgu. Y sã n maan woto, y lebgda a Zeova zakã neda. Rẽ poore, a Zeova sẽn yaa y Ba la y zoa wã na n wilgd-y-la sor la a get y yelle, y sẽn lebg a nedã yĩnga. (Yɩɩn. 73:24; Eza. 43:1, 2) Y sã n dɩk y meng n kõo a Zeova n deeg lisgu, na n kɩtame me tɩ y saagd n na n wa paam vɩɩm sẽn kõn sa.—1 Pɩy. 3:21.

2. Bõe yell la d na n gom sõs-kãngã pʋgẽ?

² Bũmb n gɩdg-y tɩ y nan pa tõe n deeg lisg bɩ? Sã n yaa woto, bãng-y tɩ y pa y yembr ye. Yɩɩ tɩlɛ tɩ neb milyõ-rãmb toeem bũmb wʋsg b manesmã la b sẽn get yɛlã to-to wã wɛɛngẽ sẽn na yɩl tɩ b sak tɩ b reeg lisgu. Rũndã-rũndã, b tũuda a Zeova ne sũ-noog la yẽesem. Yam-bʋg la y tõe n dɩk pipi kiris-nebã mak-sõngã pʋgẽ? D na n yãa zu-loees b sẽn da tare, la d ges yam ning d sẽn tõe n dɩk b kibayã pʋsẽ.

SAMARI NEBÃ REEGA LISGU

3. Nand tɩ Samari nebã reeg lisgu, tõe tɩ yɩɩ tɩlɛ tɩ b kẽer maan bõe?

³ A Zeezi wakatẽ wã tɩ Samari nebã ra yaa tũudum sulli. B ra bee Sikɛm la a tẽn-yagsã pʋsẽ n paas Samari sẽn be Zide nug-rɩtg sẽnesã. Nand tɩ Samari nebã tõog n deeg lisgu, b ra segd n wʋma Wẽnnaam Gomdã võor n paase. Samari nebã ra tẽedame tɩ yaa Biiblã pipi sɛb a nu wã bal la Wẽnnaam vẽeneg tɩ b gʋlse, rat n yeel tɩ Sɩngr n tãag Tõodo. Tõe tɩ b ra tẽedame me tɩ yaa Wẽnnaam n vẽeneg tɩ b gʋls Zozuwe sebrã. Samari nebã ra tika Wẽnnaam pʋleng ning sẽn be Tõod 18:18, 19 wã n tẽed tɩ Mesi n wate. (Zã 4:25) Nand tɩ b reeg lisgu, b ra segd n sakame t’a Zeezi la Mesi ning Wẽnnaam sẽn da pʋlmã. Yɩɩ woto la “Samari . . . nebã wʋsg” maan-yã. (Zã 4:39) Sẽn paase, pipi kiris-neb wʋsg sẽn da yaa Zʋɩf-rãmbã yĩnga, tõe tɩ yɩɩ tɩlɛ tɩ Samari neb kẽer toeem b tagsg sẽn da yaa a soab ne Zʋɩf-rãmbã.—Luk 9:52-54.

4. A Filip sẽn moon Samari nebã koɛɛgã, b kẽer manesem yɩɩ wãna? (Tʋʋma 8:5, 6, 14)

⁴ Bõe n sõng Samari nebã tɩ b tõog n deeg lisgu? Koe-moond a Filip sẽn wa n tɩ gom “Kiristã yell” ne-bã, b kẽer “saka Wẽnnaam gomdã.” (Karm-y Tʋʋm 8:5, 6, 14.) A Filip ra yaa Zʋɩfe. La b pa tik rẽ n pa kelg-a ye. Tõe tɩ b tẽega vɛrse-rãmb sẽn be Pẽntatekã pʋgẽ n wilgdẽ tɩ Wẽnnaam pa bakd ned yelle. (Tõo. 10:17-19) Sẽn yaa a soab fãa, b maaga b yĩng “n kelg a Filip goamã neere,” a sẽn da gomd Kiristã yellã la b sak n deeg kaset ning sẽn wilgd vẽeneg tɩ Wẽnnaam da bee ne a Filipã. A ra maanda yel-soalem wʋsg me. Wala makre, a sãooga bãad-rãmb la a rig zĩn-dãmba.—Tʋʋ. 8:7.

5. Yam-bʋg la y tõe n dɩk Samari nebã kibarã pʋgẽ?

⁵ Samari nin-kãens ra tõe n zãgsame tɩ b kõn kelg a Filip a sẽn yaa Zʋɩfã yĩnga, wall a sẽn da gomd goam b sẽn zɩ n wʋmã yĩnga. La b pa maan woto ye. B sẽn wa n bãng t’a Filip sẽn zãmsd-b bũmb ningã yaa sɩdã, b reega lisg n pa bas tɩ kaoos ye. Biiblã yeelame: “B sẽn wa n tẽ a Filip sẽn da moond Wẽnnaam Rĩungã koe-noog n paas a Zeezi Kirist yʋʋrã koe-noogã, rap la pagb fãa ra reegda lisgu.” (Tʋʋ. 8:12) Yãmb kɩsa sɩd tɩ Wẽnnaam Gomdã yaa sɩd bɩ? Yãmb kɩsa sɩd t’a Zeova Kaset rãmbã tõog n basa bu-welsgo, la tɩ b modg n bɩɩsa nonglem ning buud a Zeezi sẽn yeel t’a karen-biis hakɩɩkã na n tallame wã bɩ? (Zã 13:35) Sã n yaa woto, bɩ y ra yɛɛs ne lisgã reegr ye. Y tõe n basa y yam t’a Zeova na n ning-y-la barka.

6. Yam-bʋg la y tõe n dɩk a Rubɛn kibarã pʋgẽ?

⁶ A Rubɛn sẽn yit Alemayn wã roagdbã yaa a Zeova Kaset rãmba. La a bi-bɩɩlmã wakatẽ, a wa n sãmbda a Zeova sã n sɩd beeme. A maana a wãn t’a sãmbsã sa? A bãngame t’a pa tar bãngre, n yãk yam n na n bao bãngre. A yeelame: “Mam meng Biibl zãmsgã sasa m bao n na n bãnga sẽn yaa sɩdã ne sẽn yaa ziri wã n bake. Mam karma sõss sẽn gomd evolisiõ wã yell naoor wʋsgo.” A karma Y a-t-il un Créateur qui se soucie de vous? sebrã. Seb-kãng sõnga a Rubɛn wʋsgo. A tagsa a sũurẽ yaa: ‘A Zeova sɩd beeme.’ A Rubɛn wa n tɩ kaaga tõnd biru-kãsengã. A sẽn yã bũmb ning be wã kɩtame t’a maneg n kɩs sɩd tɩ tõnd sẽn zemsd taab wa zag-yɛng nebã yaa yel-solemde. A Rubɛn sẽn wa n leb Alemayn wã, a reega lisg a sẽn wa n tar yʋʋm 17. Y sã n maanda sãmbs bũmb nins b sẽn zãms-yã wɛɛngẽ bɩ y maan vaeesg tõnd sɛbã pʋsẽ. Y sã n paam “bãngr hakɩɩkã” tõe n kɩtame tɩ y bas sãmbsã. (Efɛɛ. 4:13, 14) Sẽn paase, y sã n kelgd kibay sẽn wilgd tɩ nonglem la zems-n-taar bee a Zeova nin-buiidã sʋk dũniyã babs a taab pʋsẽ, la y ne rẽ y tigingã pʋgẽ, y sũur na n maneg n yɩɩ noog ne d sẽn zemsd taab dũniyã gill zug wa zag-yɛng nebã.

TARS RAO A SOLL REEGA LISGU

7. Bõe yĩng t’a Soll ra segd n toeem a tagsgã?

⁷ D gom Tars rao a Soll yelle. A ra paamda pãng Zʋɩf-rãmbã tũudmã pʋgẽ, n da yaa Zʋɩf neb wʋsg sẽn nande. (Gal. 1:13, 14; Fili. 3:5) Wakat kãng tɩ Zʋɩf-rãmb wʋsg ra geta kiris-nebã wa sɩdã kɩɩsdba. Rẽ n so t’a Soll ra namsd-b ne toolem wʋsgo. A ra tudgame n tagsdẽ t’a sẽn maandã yaa Wẽnnaam daabo. (Tʋʋ. 8:3; 9:1, 2; 26:9-11) Sẽn na yɩl n tẽ a Zeezi n deeg lisg n lebg kiris-neda, a Soll ra segd n saka namsgo.

8. a) Bõe n sõng a Soll t’a tõog n deeg lisgu? b) Wãn to la a Ananiyaas sõng a Solle? (Tʋʋma 22:12-16) (Ges-y fotã me.)

⁸ Bõe n sõng a Soll t’a tõog n deeg lisgu? Zu-soab a Zeezi vẽnega a meng ne a Solle, t’a ziirã vẽenemã kɩt t’a lebg zoanga. (Tʋʋ. 9:3-9) A loee noor rasem a tãabo. Sãmbg kae t’a ra bʋgsda bũmb ning sẽn paam-a wã zug ye. A Soll bãngame tɩ yaa a Zeezi la Mesi wã, la tɩ yaa a karen-biisã n be tũudum hakɩɩkã pʋgẽ. Yaa vẽeneg t’a Soll sũur sãama wʋsgo, a sẽn teel neb nins sẽn kʋ a Etɩɛnnã yĩnga. (Tʋʋ. 22:20) Rasem a tãab-n-soabã daare, karen-biig yʋʋr sẽn boond t’a Ananiyaas n wa a Soll nengẽ n gom ne-a ne bʋgsem. A kɩtame t’a ninã puki, la a sagl-a t’a yik n deeg lisg n da bas tɩ kaoose. (Karm-y Tʋʋm 22:12-16.) A Soll sika a meng n kelg a Ananiyaase, n yik n deeg lisgu.—Tʋʋ. 9:17, 18.

9. Yam-bʋg la y tõe n dɩk a Soll kibarã pʋgẽ?

⁹ D tõe n dɩka yam a Soll kibarã pʋgẽ. A ra tõe n basame tɩ wuk-m-meng wall ninsaal zoeesã gɩdg-a t’a pa reeg lisg ye. La a pa bas tɩ yɩ woto ye. A Soll sẽn bãng sɩdã Kiristã wɛɛngẽ wã, a sika a meng n sak n toeeme. (Tʋʋ. 26:14, 19) A Soll sak n lebga kiris-neda, baa a sẽn da mi tɩ b na n nams-a-la rẽ yĩngã. (Tʋʋ. 9:15, 16; 20:22, 23) A lisgã poore a kell n teega a Zeova t’a sõng-a t’a tõog toog zu-loees toor-toor taoore. (2 Kor. 4:7-10) Y sã n deeg lisg n lebg a Zeova Kaset soaba, tõe n kɩtame tɩ b nams-yã wall kɩt tɩ y paam zu-loeese . La y na n paama sõngre. Y tõe n kɩsa sɩd tɩ Wẽnnaam la Kiristã na n sõng-y-la wakat fãa.—Fili. 4:13.

10. Wãn to la a Ana mak-sõngã tõe n naf yãmba?

¹⁰ A Ana roga Erop yaang sẽnesã. A ma wã reega lisg n lebg a Zeova Kaset soaba. Rẽ poore a Ana kosa a ba wã t’a kõ-a sor t’a sɩng Biiblã zãmsg a sẽn wa n tar yʋʋm a 9. La rẽ ra pa noom b zakã neb a taabã sẽn naag-b n vɩ wã ye. B ra getame tɩ ned sã n bas a yaab-rãmbã tũudum, a paooga buudã tõre. A Ana sẽn wa n tar yʋʋm 12, a kosa a ba wã t’a kõ-a sor t’a reeg lisgu. A ba wã ra rat n bãnga sã n yaa yẽ mengã yam-yãkre, pa rẽ bɩ yaa ned n pẽdgd-a. A leok-a lame yaa: “Mam nonga a Zeova.” A ba wã sakame t’a na n deeg lisgu. Rẽ poore a Ana paama yaalg la namsg buud toor-toore. A yaab-raoogã yeelame yaa: “Fo sã n da lebg yoaad wall sɩga-yũud n são fo sẽn lebg a Zeova Kaset soabã.” A Ana maana wãn n tõog toogo? A yeelame: “A Zeova sõnga maam tɩ m tall raoodo. M ma ne m baaba me teel-m-la wʋsgo.” A Ana baoo sebr n gʋlsd bũmb nins fãa a Zeova sẽn maand n kõt-a wã n bĩngdẽ. A wae n lebgd n karemda seb-kãng wakat-wakate, sẽn na yɩl n da yĩm a Zeova sẽn sõngd-a to-to wã ye. Y sã n yɛɛsd b na wa n nams-y y tũudmã yĩnga, bɩ y tẽeg t’a Zeova na n sõng-y lame.—Ebre. 13:6.

A KORNEY REEGA LISGU

11. Bõe n da tõe n kɩt t’a Korney pa sak n deeg lisg tao-tao?

¹¹ D tõe n dɩka yam wʋsg a Korney kibarã pʋgẽ me. A ra yaa Rom sodaas koabg naaba. (Tʋʋ. 10:1) Tõe tɩ rẽ ra kɩtame tɩ nin-buiidã la sodaasã waoogd-a wʋsgo. Sẽn paase, a “ra kõta naong rãmbã kũun wʋsgo.” (Tʋʋ. 10:2) A Zeova tʋma tẽn-tʋmd a Pɩyɛɛr t’a tɩ taas-a koe-noogã. A Korney sẽn da yaa naabã kɩtame t’a pa sak n deeg lisg tao-tao bɩ?

12. Bõe n sõng a Korney t’a tõog n deeg lisgu?

¹² Bõe n sõng a Korney t’a tõog n deeg lisgu? Biiblã yeelame tɩ “yẽ ne a zakã rãmb fãa ra zoeta Wẽnnaam.” A Korney ra yõkda Wẽnnaam sɛɛg wakat fãa me. (Tʋʋ. 10:2) A Pɩyɛɛr sẽn taas a Korney koe-noogã, yẽ ne a zakã rãmb tẽe Kiristã n deeg lisg zĩig pʋgẽ. (Tʋʋ. 10:47, 48) Yaa vẽeneg t’a Korney ra sak n na n toeema bũmb nins fãa sẽn yaa tɩlɛ sẽn na yɩl tɩ yẽ ne a zakã rãmb naag taab n tũ a Zeova.—Zoz. 24:15; Tʋʋ. 10:24, 33.

13. Yam-bʋg la y tõe n dɩk a Korney kibarã pʋgẽ?

¹³ A Korney ra tara ziir nin-buiidã sʋk wa a Solle. A ra tõe n basame tɩ rẽ gɩdg-a t’a pa lebg kiris-ned ye. La a pa bas tɩ yɩ woto ye. Nand tɩ y tõog n deeg lisgu, yaa tɩlɛ tɩ y toeem bũmb kẽer tɩ pa nana bɩ? Sã n yaa woto, a Zeova na n yɩɩ y Sõangda. A na n ning-y-la bark y sẽn modgd n na n tũ-a tɩ zems ne Biiblã noyã yĩnga.

14. Wãn to la a Tsuyoshi mak-sõngã tõe n naf yãmba?

¹⁴ A Tsuyoshi sẽn be Zapõ wã ra segd n toeema bũmb kẽer a tʋʋmã wɛɛngẽ n yaool n tõog n deeg lisgu. A ra tʋmda lekoll-kãseng a ye sẽn zãmsd nebã fɩlɛɛr-dãmb manesg pʋgẽ. Yẽ n da yaa lekollã taoor soabã pʋgdga. Lekollã taoor soab ra manesda fɩlɛɛr-dãmbã kũ-rãmb mum yĩnga, la a naagd n maand budist-rãmbã yel-maandɩ. La a sã n da wa pa tõe n kẽng n tɩ naag n maan bõn-kãense, a Tsuyoshi n ledgd-a. A Tsuyoshi sẽn wa n bãng sɩdã sẽn ki-bã wɛɛngẽ wã, a bãngame t’a sã n pa bas bõn-kãens maanego, a pa tõe n deeg lisg ye. A yãka yam n pa na n le naag n maan budist-rãmbã yel-maandɩ ye. (2 Kor. 6:15, 16) A Tsuyoshi goma rẽ yell ne lekollã taoor soaba. A ra yɛɛsda a tʋʋmã na n sãamame, la pa yɩ woto ye. Taoor soabã yeel-a lame tɩ pa le yaa tɩlɛ t’a naag n maan budist-rãmbã yel-maandɩ ye. A sẽn sɩng Biiblã zãmsg na maan yʋʋmd poore, a reega lisgu.a Y sã n segd n toeema bũmb y tʋʋmã wɛɛngẽ sẽn na yɩl n ta Wẽnnaam yam, bɩ y bas y yam t’a na n gesame tɩ yãmb ne y zakã rãmb paamd bũmb nins sẽn yaa tɩlɛ wã.—Yɩɩn. 127:2; Mat. 6:33.

KORẼNT NEBÃ REEGA LISGU

15. Bõe n da tõe n gɩdg Korẽnt nebã tɩ b pa reeg lisgu?

¹⁵ Pĩnd wẽndẽ wã, nebã ra miime tɩ Korẽnt nebã nonga ligd la yoobo. B wʋsg sẽn da vɩ to-to wã pa noom Wẽnnaam ye. Rẽnd ra yaa vẽeneg tɩ ned sẽn vɩ b sʋkã sã n dat n sak koe-noogã, pa nana ye. La tẽn-tʋmd a Poll sẽn kẽng be n tɩ moon Kirist koe-noogã, “Korẽnt nebã wʋsg sẽn wʋm koe-noogã lebga tẽedb n deeg lisgu.” (Tʋʋ. 18:7-11) Zu-soab a Zeezi Kirist vẽneg a meng ne a Poll n yeel yaa: “Mam tara neb wʋsg tẽn-kãngã pʋgẽ.” Rẽ n so t’a Poll kell n moon koɛɛgã be yʋʋmd la pʋɩ-sʋka.

16. Bõe n sõng Korẽnt neb kẽer tɩ b tõog n deeg lisgu? (2 Korẽnt rãmba 10:4, 5)

¹⁶ Bõe n sõng Korẽnt nebã tɩ b tõog n deeg lisgu? (Karm-y 2 Korẽnt rãmb 10:4, 5.) Wẽnnaam Gomdã ne a vʋʋsem sõngã sẽn tar pãng wʋsgã sõng-b lame tɩ b tõog n toeem bũmb wʋsgo. (Ebre. 4:12) Korẽnt neb nins sẽn sak Kirist koe-noogã tõog n basa minim-wẽns wala rã-yũur la wagdem, tɩ b sʋkã rap sẽn da gãe ne rap wall pagb sẽn da gãe ne pagb tõog n toeeme.—1 Kor. 6:9-11.b

17. Yam-bʋg la y tõe n dɩk Korẽnt nebã kibarã pʋgẽ?

¹⁷ Baa Korẽnt neb kẽer sẽn da tar minim-wẽns n segd n toeem n yaool n tõog n lebg kiris-nebã, b pa ges tɩ rẽ yaa toog wʋsg ye. B modga wʋsg sẽn na yɩl n tõog n tũ so-sẽkã sẽn dabd vɩɩm sẽn kõn sa zĩigẽ wã. (Mat. 7:13, 14) Yãmb maooda wʋsg sẽn na yɩl n bas minim-wẽng n tõog n deeg lisg bɩ? Ra n tol-y n koms-y raood n bas ye. Kos-y-yã a Zeova t’a kõ-y a vʋʋsem sõngã tɩ sõng-y tɩ y ra maan sẽn yaa wẽng ye.

18. Wãn to la a Monik mak-sõngã tõe n naf yãmba?

¹⁸ A Monik sẽn be Zorzi wã ra nonga gom-dẽgdo. A ra kelgda mizig-yood la a get filim-yoodo. A modga wʋsg sẽn na yɩl n tõog n bas rẽ n deeg lisgu. A yeelame: “Mam bi-bɩɩlmã wakatẽ, pʋʋsgã ra kõta maam pãnga. A Zeova ra miime tɩ m dat n maana sẽn yaa tɩrga. A ra sõngda maam la a wilgd-m sor wakat fãa.” A Monik reega lisg a sẽn wa n tar yʋʋm 16. Manesem kẽer la y segd n bas sẽn na yɩl n tõog n tũ a Zeova wa a sẽn datã bɩ? Ket-y n kot-y-yã-a t’a kõ-y pãng tɩ y tõog n toeeme. A Zeova kõta a vʋʋsem sõngã wʋsgo.—Zã 3:34.

YÃMB TẼEBÃ TÕE N SERSA TÃENSE

19. Bõe n tõe n sõng-y tɩ y mao ne zu-loees sẽn yaa wa tãense? (Ges-y fotã me.)

¹⁹ Bas-y y yam t’a Zeova nonga yãmb n dat tɩ y lebg a zakã neda. Baa sẽn yaa bũmb ning n gɩdg yãmb tɩ y nan pa tõe n deeg lisgu, a Zeova ratame tɩ y lebg a zakã neda. Daar a ye, a Zeezi yeela a karen-biisã yaa: “Yãmb sã n tar tẽeb sẽn zem mutard bila, y na n yeela tãn-kãngã, ‘serg ka n leb ka,’ la a na serge. Bũmb kõn zĩnd yãmb sẽn pa na n tõog n maan ye.” (Mat. 17:20) Karen-bi-kãens ra sɩnga a Zeezi tũub yʋʋm a wãn bala. Rẽnd b tẽebã ra ket n bɩtame. La a Zeezi yeel-b lame tɩ b sã n bɩɩs b tẽebã, a Zeova na n sõng-b lame tɩ b tõog n mao ne zu-loees sẽn yaa wa tãense. A Zeova na n sõnga yãmb me.

20. Wãn to la pĩnd wẽndẽ la rũndã-rũndã kiris-neb nins yell d sẽn gom sõs-kãngã pʋgẽ wã mak-sõngã naf yãmba?

²⁰ Bũmb sã n beeme n gɩdgd yãmb tɩ y nan pa tõe n deeg lisg bɩ y modg n toeem tao-tao la y ra bas tɩ kaoos ye. Karm-y kibay sẽn gomd neb sẽn kõ mak-sõng pipi kiris-nebã wakatẽ la rũndã-rũndã yell tɩ y na n paama belsg la tẽeb kengre. B mak-sõngã tõe n kõ-y-la raood la kɩt tɩ y rɩk y meng n kõ a Zeova n deeg lisgu. Y sã n yãk yam n maan dẽ, y yãka yam sẽn yaa sõma wʋsgo.