A Zeova sẽn sõngd tõnd to-to tɩ d tõogd toogo

1. Bõe yĩng tɩ yaa tɩlɛ tɩ d tõog toogo, la yɛ la d tõe n paam sõngre? (1 Pɩyɛɛr 5:10)

VƖƖMÃ sẽn yaa toog yaoolem wakatã yĩnga, sẽn tũud-b a Zeova wã segd n tõoga toogo. Kẽer bẽeda bãag sẽn tõt saabo. Sãnda ned n maan kaalem tɩ namsd-b wʋsgo. Kẽer nengẽ, yaa tẽngã taoor dãmb wall b zakã neb n namsd-b b tũudmã yĩnga. (Mat. 10:18, 36, 37) Bas-y y yam tɩ sẽn wa n yaa zu-loɛɛg ning fãa la y maood ne, a Zeova tõe n sõng-y lame tɩ y tõog toogo.—Karm-y 1 Pɩyɛɛr 5:10.

2. Yɛ la d paamd pãng n tõogd toogo?

² Ned sẽn tõogd toog kelld n maana sɩd ne a Zeova la a tũud-a ne sũ-noogo, baa a sã n wa maood ne zu-loeese, b sã n wa namsd-a a tũudmã yĩnga, la makr taoore. Ned a woto tẽeda manegre. La d pa tõe n tõog toog ne d meng pãng ye. Yaa ne a Zeova sẽn yaa soab ning sẽn kõt “pãng ning sẽn yɩɩd ninsaal rẽndã” sõngr bal la d tõe n tõog toogo. (2 Kor. 4:7) Sõs-kãngã pʋgẽ, d na n yãa bũmb a naas a Zeova sẽn maand sẽn na yɩl n sõng-d tɩ d tõog toogo. D leb n na n yãa d sẽn tõe n dɩ bõn-kãens yõod to-to.

PƲƲSGÃ

3. Bõe yĩng tɩ d tõe n yeel tɩ d sẽn tõe n pʋʋs a Zeova wã yaa yel-solemde?

³ A Zeova maana bũmb n na n sõng tõnd tɩ d tõog toogo, hal tɩ yaa yel-solemde. A paka sor tɩ d tõe n pʋʋs-a, baa d sẽn yaa yel-wẽn-maandbã. (Ebre. 4:16) Tags-y n ges-y-yã: D tõe n pʋʋsa a Zeova wakat buud fãa, n gom bũmb ning d sẽn dat yelle. Sẽn yaa buud-gomd ning fãa la d gomda, a wʋmdame. D sẽn be zĩig ning fãa me a kelgdame. Baa yaa bãens roogẽ. (Zon. 2:1, 2; Tʋʋ. 16:25, 26) Baa d yɛlã sã n wa loog-d tɩ d pa mi d sẽn na n togs a Zeova rẽ sẽn namsd-d to-to wã, a tõe n bãnga d sẽn dat n yeel bũmb ningã. (Rom. 8:26, 27) D sẽn tõe n pʋʋs a Zeova wã yaa yel-solemd meng-menga!

4. Bõe n kɩt tɩ d tõe n kɩs sɩd tɩ d sã n pʋʋs a Zeova n kos t’a sõng-d tɩ d tõog toogo, zemsa ne a raabã?

⁴ A Zeova Gomdã pʋgẽ, a yeelame tɩ d bas d yam tɩ “sẽn wa n yaa bũmb ning fãa la d kos tɩ zems ne a raabã, a kelgda tõndo.” (1 Zã 5:14) D tõe n pʋʋsa a Zeova n kos t’a sõng-d tɩ d tõog toog bɩ? N-ye! Rẽ zemsa ne a raabã. Bõe n kɩt tɩ d tõe n yeel woto? D sã n tõogd toogo, d kõta a Zeova weer t’a leok a Sʋɩtãan sẽn baood a noorã. (Yel. 27:11) Sẽn paase, Biiblã yeelame t’a Zeova rat n ‘sõnga neb nins sẽn tũud-a ne b sũur fãa wã.’ (2 Kib 16:9) Rẽnd d tõe n kɩsa sɩd t’a Zeova rat n sõnga tõnd tɩ d tõog toogo, la t’a tõe n maana rẽ me.—Eza. 30:18; 41:10; Luk 11:13.

5. Bõe yĩng tɩ pʋʋsgã kɩtdẽ tɩ d paamd bãane? (Ezayi 26:3)

⁵ Biiblã yeelame tɩ d sã n pelg d pʋg n togs a Zeova bũmb nins sẽn namsd tõndã, “Wẽnnaam laafɩ wã sẽn yɩɩd bũmb nins fãa ninsaalbã sẽn tõe n wʋm a võorã na n gũ [tõnd] sũyã la [d] tagsa wã.” (Fili. 4:7) Woto rat n yeelame tɩ bõe? Neb nins sẽn pa tũud a Zeova wã sã n wa tar zu-loeese, b maanda bũmb toor-toor sẽn na yɩl n boog b yɩɩrã. Wala makre, neb kẽer tara bʋgsg buud b sẽn maande. B maoodame n yiis tagsa buud fãa b yamẽ wã, sẽn yɩɩd fãa tagsa nins sẽn kɩtd tɩ b maand yɩɩrã. La rẽ tõe n waa ne yelle. Bala ned sã n maan woto a pa le so a yamã, tɩ kɩt tɩ zĩn-dãmb tõe n soog-a. (Ges-y Matiye 12:43-45.) Sẽn paase, baa ned sã n maan woto n paam laafɩ bɩ bãane, a pa paamd laafɩ hakɩɩk ning a Zeova sẽn kõt tɩ yaa sõma n yɩɩdã ye. D sã n pʋʋsd a Zeova, d wilgdame tɩ d kɩs-a-la sɩd zãng-zãnga, t’a na n kɩt tɩ d paam “bãan wakat fãa.” (Karm-y Ezayi 26:3.) Bũmb a ye a Zeova sẽn tũnugd ne n kõt tõnd bãan yaa a sẽn sõngd tõnd tɩ d tẽegd vɛrse-rãmb sẽn belsd tõndã. Vɛrse-kãens tẽegda tõnd t’a Zeova nonga tõndo, la t’a rat n sõng-d lame tɩ d yɩɩrã booge.—Yɩɩn. 62:1, 2.

6. Bõe la y tõe n maan tɩ pʋʋsgã naf-y sõma? (Ges-y fotã me.)

⁶ Y sẽn tõe n maane. Y sã n wa maood ne zu-loɛɛg bɩ y togs a Zeova yellã sẽn namsd-y to-to wã. ‘Lob-y y zɩɩbã a Zeova zugu,’ n kos-a t’a sõng-y tɩ y yam gãand bãane. (Yɩɩn. 55:22) Pʋʋs-y-yã-a n kos t’a kõ-y yam tɩ y bãng y sẽn segd n maanega. (Yel. 2:10, 11) La y pa segd n pʋʋsd n kotẽ t’a sõng-y tɩ y tõog toog bal ye. Tẽegd-y n pʋʋsd-y bark me. (Fili. 4:6) Gũusd-y n get-y-yã a Zeova sẽn sõngd-y to-to y zu-loɛɛgã pʋgẽ wã, n pʋʋsd-a bark rẽ yĩnga. Ra bas-y tɩ y zu-loɛɛgã kɩt tɩ y yĩm bark nins y sẽn zoe n paamã ye.—Yɩɩn. 16:5, 6.

WẼNNAAM GOMDÃ

7. Bõe yĩng tɩ Biiblã zãmsg tõe n sõng tõnd tɩ d tõog toogo?

⁷ A Zeova kõo tõnd a Gomdã n na n sõng-d tɩ d tõog toogo. Biiblã vɛrse-rãmb wʋsg wilgdame t’a Zeova sõngda tõndo. Ad vɛrse a ye sẽn wilgd rẽ: Matiye 6:8 yetame: “Nand tɩ y kos menga, yãmb Ba wã mii bũmb nins yãmb sẽn datã.” Yaa a Zeezi sẽn yaa soab ning sẽn mi a Zeova n yɩɩd ned buud fãa wã n yeel gom-kãense. Rẽnd d sã n wa namsdẽ d tõe n basa d yam t’a Zeova mii bũmb nins d sẽn datã, la t’a na n sõng-d lame. Biiblã tara goam wʋsg sẽn wõnd woto sẽn tõe n sõng tõnd tɩ d kell n tõog toogo.—Yɩɩn. 94:19.

8. a) Biiblã sagl-bʋs n tõe n sõng-d tɩ d tõog toogo? b) Bõe la d tõe n maan tɩ sõngd-d tɩ d tẽegd Biiblã sagls nana-nana?

⁸ Biiblã sagls tõe n sõng-d lame tɩ d tõog toogo. Sɩd me, b tõe n kõ-d-la yam tɩ d bãngd n yãkd yam. (Yel. 2:6, 7) Wala makre, Biiblã sagend-d lame tɩ d ra le maan yɩɩr wʋsg ne sẽn wat beoogo, la tɩ d teeg a Zeova daar fãa. (Mat. 6:34) D sã n minim n karemd Biiblã daar fãa la d bʋgsdẽ, d sã n wa rat n yãk yam wall d sã n wa tar zu-loeese, na n yɩɩ nana tɩ d tẽeg Biiblã saglsã yelle.

9. Bõe yĩng tɩ Biiblã kibay tõe n sõng-d tɩ d maneg n kɩs a Zeova sɩda?

⁹ Sẽn paase, Biiblã tara sagls sẽn gomd neb sẽn teeg a Zeova t’a sõng-b yelle. Bãmb me ra yaa wa tõndo. (Ebre. 11:32-34; Zak 5:17) D sã n bʋgs kiba-kãens zugu, d manegd n kɩsa sɩd t’a Zeova yaa “tõnd soondg zĩiga, la d pãnga,” la tɩ “yel-pakr wakate, d tõe n paama sõngr a nengẽ nana-nana.” (Yɩɩn. 46:1) D sã n bãng nin-kãens sẽn maan sɩd ne a Zeova to-to pĩnd wẽndẽ wã, na n kɩtame tɩ d modg n dɩk b togs-n-taar n tall tẽeb la d tõog toogo.—Zak 5:10, 11.

10. Bõe la d tõe n maan n dɩ Biiblã yõod sõma?

¹⁰ Y sẽn tõe n maane. Karemd-y Biiblã daar fãa, tɩ y sã n yã vɛrse y sẽn tagsd tɩ na n sõng-y lame bɩ y gʋls n bĩngi. Neb wʋsg yãka yam n karemd daar vɛrse wã yibeoogo, tɩ sõngd-b tɩ b tagsd bũmb sẽn kengd raood yell daarã tõre. Saam-bi-poak a ye yʋʋr sẽn boond t’a Maari yãame tɩ rẽ sõng-a-la wʋsgo, a ba wã ne a ma wã fãa sẽn wa n bẽed kãnsɛɛr bãagã.a Bõe n sõng-a t’a tõog n ges b yell hal n tãag b kũum? A yeelame yaa: “Yibeoog fãa, m da karemda daar vɛrse wã sẽn be D vaees Gʋls-sõamyã daar fãa sebrã pʋgẽ wã, la m bʋgse. M sẽn da maand woto wã sõnga maam tɩ m da tagsd a Zeova la bõn-sõma nins a sẽn zãmsd tõnd a Gomdã pʋgẽ wã yelle, n yɩɩd zu-loees nins m sẽn da maood ne wã.”—Yɩɩn. 61:2.

D TẼED-N-TAASÃ

11. Bõe yĩng tɩ d sẽn mi tɩ pa tõnd d ye n tar zu-loeesã kengd raoodo?

¹¹ A Zeova kɩtame tɩ d tar saam-biis la saam-bi-pogs dũniyã gill zug sẽn na yɩl n sõng-d tɩ d tõog toogo. D sẽn mi tɩ d “saam-biisã fãa sẽn be dũniyã zugã me paamda namsg a woto buudã” belsd-d lame. (1 Pɩy. 5:9) Sɩd me, d tõe n kɩsa sɩd tɩ sẽn wa n yaa zu-loɛɛg ning fãa la d tara, neb a taab n mao ne zu-loe-kãng buud n tõog toogo. Woto rat n yeelame tɩ tõnd me tõe n tõoga toogo.—Tʋʋ. 14:22.

12. Bõe la d tẽed-n-taasã tõe n maan n sõng-do, la bõe la tõnd me tõe n maan n kõ-ba? (2 Korẽnt rãmbã 1:3, 4)

¹² D sã n wa tar zu-loeese, d tẽed-n-taasã tõe n kenga d raoodo. Yɩɩ woto ne tẽn-tʋmd a Polle. A ra wae n pʋʋsda neb nins sẽn sõng-a a sẽn wa n be roog pʋgẽ tɩ sodaas gũud-a wã barka, hal n pʋt b yʋya. B belsa a Polle, n keng a raood la b sõng-a sõng-vẽenega. (Fili. 2:25, 29, 30; Kolo. 4:10, 11) Tõnd me tõe n paamame tɩ d tẽed-n-taasã sõng-d woto. D sã n wa maood ne zu-loeese, d tẽed-n-taasã tõe n sõng-d lame tɩ d tõog toogo. Bãmb me sã n wa tar zu-loeese, d tõe n sõng-b lame.—Karm-y 2 Korẽnt rãmb 1:3, 4.

13. Bõe n sõng saam-bi-poak yʋʋr sẽn boond t’a Maya t’a tõog toogo?

¹³ Risi saam-bi-poak yʋʋr sẽn boond t’a Maya paamame t’a tẽed-n-taasã keng a raood wʋsgo. Yʋʋmd 2020 wã, polɩɩs-rãmb n wa n kẽ n vaees a roogã. Rẽ poore b tall-a lame n kẽng bʋʋdo, a sẽn gomd bũmb nins a sẽn tẽedã yell ne neb a taabã yĩnga. A Maya yeelame: “Wakat n zĩnd tɩ m koms raood wʋsgo, la saam-biisã ne saam-bi-pogsã boola maam ne telefõnne, n gʋls-m lɛta n wilg-m tɩ b nong-m lame. M da sɩng n miime tɩ d yaa wa zag-yɛng neb sẽn nong taab wʋsgo. La yʋʋmd 2020 wã tɛka, m maneg n kɩsa sɩd ne rẽ.”

14. Bõe la d tõe n maan n paam tɩ d tẽed-n-taasã sõng-do? (Ges-y fotã me.)

¹⁴ Y sẽn tõe n maane. Y sã n wa maood ne zu-loees bɩ y baood y tẽed-n-taasã zĩigẽ. Kos-y kãsem-dãmbã sõngre. B tõe n yɩɩ “wa zĩ-soalgdg sobg wakate, wa soondg zĩig sa-kẽeng wakate.” (Eza. 32:2) Tẽeg-y tɩ y tẽed-n-taasã me maooda ne zu-loees a woto buudu. Y sã n maan ned sẽn dat sõngr neere, na n sõng-y lame tɩ y tall sũ-noogo, la y tõog toogo.—Tʋʋ. 20:35.

A ZEOVA PƲLEM-NOODÃ

15. Bõe n sõng a Zeezi ne neb nins fãa sẽn maand sɩd ne Wẽnnaamã? (Ebre-rãmbã 12:2)

¹⁵ A Zeova pʋlma tõnd tɩ bõn-sõma n wate, sẽn na yɩl n sõng-d tɩ d tõog toogo. (Rom. 15:13) Tẽeg-y t’a Zeezi kũumã daar sẽn yɩ daar ning sẽn yɩ toog ne-a n yɩɩdã, yɩɩ a sẽn da tagsd bõn-sõma nins sẽn watã yellã n sõng-a t’a tõog toogo. (Karm-y Ebre-rãmb 12:2.) A Zeezi ra miime t’a sã n kell n maan sɩda, na n sõngame t’a Zeova yʋʋrã paam waoogre. Sẽn paase, a Zeezi ra tagsda wakat ning a sẽn na n bʋʋg a Ba wã saasẽ wã yelle, la wakat ning a sẽn na n lebg Rĩm saasẽ n dɩ naam ne a ba-biisã yelle. Yaa woto me ne tõndo. D sã n tagsd d sẽn saagd n na n wa vɩɩmd wakat sẽn kõn sa Wẽnnaam dũni-paalgã pʋgẽ wã yelle, sõng-d lame tɩ d tõogd toog zu-loɛɛg ning fãa a Sʋɩtãan dũniyã sẽn na n kɩt tɩ d paam taoore.

16. Wãn to la saam-bi-poak a ye sẽn da tagsd bõn-sõma nins sẽn watã yellã sõng-a t’a tõog toogo, la yam-bʋg la d tõe n dɩk a goamã pʋgẽ?

¹⁶ Risi saam-bi-poak yʋʋr sẽn boond t’a Lala sẽn tagsd bark nins Rĩungã sẽn na n wa ne wã yellã sõng-a-la wʋsgo, b sẽn wa n yõk a sɩdã n pag roog nand tɩ b kao a bʋʋdã. A Lala yeelame: “M da wae n pʋʋsda a Zeova n gomd bõn-sõma nins a sẽn pʋlem-dã yell la m bʋgsd rẽ zugu, tɩ sõng-m tɩ m pa koms raood wʋsg ye. M da miime tɩ zu-loeesã poore manegr n wate. A Zeova na n tõoga bɛɛbã. Rẽnd yaa tõnd n na n tõoge.”

17. Bõe la d tõe n maan n wilg tɩ d sũur nooma ne bũmb nins a Zeova sẽn pʋlmã? (Ges-y fotã me.)

¹⁷ Y sẽn tõe n maane. Baood-y sẽk n bʋgsd bõn-sõma nins a Zeova sẽn pʋlem tɩ wat beoog-daarã zugu. Mams-y y vɩɩmã sẽn na n yɩ to-to dũni-paalgã pʋgẽ wã, la bark nins y sẽn na n paamã. D sã n maand woto, d na n neeme tɩ zu-loees nins d sẽn tar rũndã-rũndã wã yaa “wakat bilf yĩnga, n leb n yaa faasga.” (2 Kor. 4:17) Sẽn paase, tũnug-y ne segb buud fãa n taas neb a taabã bũmb nins y sẽn tẽedã. Tags-y vɩɩmã sẽn segd n yaa toog to-to ne neb nins sẽn pa mi a Zeova wã. Bãmb me maooda ne zu-loees a Sʋɩtãan dũniyã pʋgẽ, n pa mi bõn-sõma nins Wẽnnaam sẽn pʋlem tɩ watẽ wã ye. Y sã n sõs ne-b baa yaa koɛɛg-koɛɛga, tõe n sõngame tɩ b rat n bãng Rĩungã sẽn yaa bũmb ninga, la bũmb nins a Zeova sẽn pʋlmã n paase.

18. Bõe yĩng tɩ d tõe n kɩs sɩd ne a Zeova pʋlemsã?

¹⁸ A Zoob sẽn tõog toog zu-loees wʋsg pʋgẽ poore, a yeela a Zeova yaa: “Masã, mam miime tɩ yãmb tõe n maana bũmb fãa, la tɩ bũmb pa be yãmb sẽn dat n maan n pa tõe ye.” (Zoob 42:2) A Zoob bãngame tɩ baa fʋɩ pa tõe n gɩdg a Zeova t’a pa pids a raabã ye. D sã n tẽeg rẽ, tõe n sõngame tɩ d tõog toogo. D rɩk makr ne pag sẽn bẽed bãag sẽn koms raoodo, bala logtoɛɛmb wʋsg makame n na n tɩp a bãagã n pa tõog ye. La logtor sẽn tar minim tɩ neb wʋsg kɩs-a sɩd n wa n wilg-a sẽn yaa bãag ning n tar-a, la a wilg a sẽn na n tɩp-a to-to. A yam gãanda bãane, baa sẽn na n kaoos bilf t’a yaool n paam laafɩ wã. Lebga nana t’a kell n tõog toogo, bala a miime t’a na n paama laafɩ. Tõnd me sẽn kɩs sɩd tɩ tẽngã na n lebga arzãnã sõngd-d lame tɩ d tõogd toogo.

19. Bõe n tõe n sõng-d tɩ d tõog toogo?

¹⁹ D yãame t’a Zeova tũnugda ne pʋʋsgã, a Gomdã, d tẽed-n-taasã la a pʋlem-noodã n sõngd-d tɩ d tõogd toog d zu-loeesã pʋsẽ. D sã n modg n dɩ bõn-kãens yõod sõma, a Zeova na n sõng-d lame tɩ d kell n tõog toog zu-loɛɛg buud fãa pʋgẽ, hal n tãag wakat ning a Sʋɩtãan dũniyã sẽn pa na n le beẽ wã.—Fili. 4:13.