Watchtower SƐB VAEESG ZĨIGA
Watchtower
SƐB VAEESG ZĨIGA
Moore
  • BIIBLE
  • SƐBA
  • TIGISSÃ
  • w25 Sa-sik kiuugu s.n. 14-19
  • Sak-y n deeg-y t’a Zeova kõ-y-la sugri

Video pa be zĩ-kãngã ye.

Video wã pa tõog n yi ye.

  • Sak-y n deeg-y t’a Zeova kõ-y-la sugri
  • Gũusg Gasgã moonda a Zeova Rĩungã (Zãmsgã rẽnda)—2025
  • Gom-zu-bõonesã
  • Bũmb sẽn wõnd woto
  • BÕE YĨNG TƖ D SEGD N SAK N DEEG T’A ZEOVA KÕ-D-LA SUGRI?
  • BÕE N TÕE N SÕNG-D TƖ D SAK N DEEG T’A ZEOVA KÕ-D-LA SUGRI?
  • RA YĨM-Y BŨMB NING A ZEOVA SẼN TẼRÃ YE
  • KELL-Y N KƖS-Y SƖD T’A ZEOVA KÕ-Y-LA SUGRI
  • A Zeova sẽn kõt sugrã sẽn nafd tõnd to-to
    Gũusg Gasgã moonda a Zeova Rĩungã (Zãmsgã rẽnda)—2025
  • A Zeova yaa sug-kõat sẽn ka to
    Gũusg Gasgã moonda a Zeova Rĩungã (Zãmsgã rẽnda)—2022
  • A Zeova sã n kõ ned sugri, a wat n leb n sok-a lame bɩ?
    2017 Kiris-nebã vɩɩm la b tʋʋma: Tigissã na-kẽndre
  • Yãmb wʋmda a Zeova sẽn kõt sugrã võor bɩ?
    Gũusg Gasgã moonda a Zeova Rĩungã—2012
Bũmb a taaba
Gũusg Gasgã moonda a Zeova Rĩungã (Zãmsgã rẽnda)—2025
w25 Sa-sik kiuugu s.n. 14-19

ZÃMSGÃ YĨNGA 34

YƖƖLL A 3 Foo la tõnd pãng zĩiga, foo la tõnd teeg-yã

Sak-y n deeg-y t’a Zeova kõ-y-la sugri

“Yãmb kõo maam sugr m kongrã ne m yel-wẽnã yĩnga.”—YƖƖN. 32:5.

D SẼN NA N BÃNGE

D na n yãa d sẽn segd n sak n deeg t’a Zeova kõ-d-la sugrã võore, la Biiblã sẽn wilgd to-to t’a Zeova kõta yel-wẽnd-maandb nins sẽn tek yam n kos sugrã sugri.

1-2. Bõe la yel-wẽn-maandb nins sẽn tek yam n kos sugrã paamda? (Ges-y fotã me.)

RĨM A DAVƖƖD sũur da sãamda yel-wẽn nins a sẽn maanã yĩnga. (Yɩɩn. 40:12; 51:3; sɩngr goamã) Sɩd me, a maana yel-wẽn-kãsemse. La a teka yam ne a sũur fãa n kos sugri, t’a Zeova kõ-a sugri. Rẽ kɩtame t’a Davɩɩd bãng yolsg ning ned sẽn paamde, a sã n bãng t’a Zeova kõ-a-la sugri. (2 Sãm. 12:13) Tõnd me tõe n paama yolsg wa a Davɩɩde, d sã n bãng t’a Zeova zoee d nimbãaneg n kõ-d sugri.—Yɩɩn. 32:1.

2 D sã n maan yel-wẽnã, baa yaa yel-wẽn-kãsemse, a Zeova na n sak n kõ-d-la sugri, d sã n tek yam ne d sũur fãa n vẽneg d yel-wẽnã n togs la d maand d sẽn tõe fãa n da le maan a buud ye. (Yel. 28:13; Tʋʋ. 26:20; 1 Zã 1:9) D sẽn mi rẽ wã belsd-d lame. La sẽn kengd raood n yɩɩdã yaa t’a sã n na n kõ sugri, a kõta sugr zãng-zãng tɩ yaa wa d zɩ n maan yel-wẽnd ye.—Eze. 33:16.

Rĩm a Davɩɩd sẽn zĩ a teraas zug n wẽed pɛndg la a yɩɩndẽ.

Rĩm a Davɩɩd gʋlsa yɩɩl wʋsg n wilg a Zeova sẽn kõt sugr to-to wã (Ges-y sull a 1-2)


3-4. Saam-bi-poak a ye lisg poore, a tagsg ra yaa wãna, la bõe yell la d na n gom sõs-kãngã pʋgẽ?

3 La wakat ninga, yaa toog ne neb kẽer tɩ b sak n deeg t’a Zeova kõ-b-la sugri. Ra yaa woto ne a Zenifɛɛre. A roagdbã zãms-a-la Biiblã. La a bi-bɩɩlmã wakatẽ, a ra soosd n tʋmda tʋʋm-yoodo. La yʋʋm wʋsg poore, a wa n teka yam n dɩk a meng n kõ a Zeova n deeg lisgu. A yeelame: “Pĩndã m da nonga ligdi, yoob la rãam. M sũurã ra yikda tao-tao me. M miime tɩ m sẽn tek yam n kos a Zeova sugrã, a kɩtame tɩ m lebg yɩlemd Kirist maoongã maasem yĩnga. La ra yaa toog ne-m tɩ m kɩs sɩd t’a Zeova kõ-m-la sugri.”

4 Mi n yaa toog ne-y tɩ y kɩs sɩd t’a Zeova kõ-y-la sugr yel-wẽn y sẽn maan pĩnd yĩng bɩ? A Zeova ratame tɩ y bas y yam wa a Davɩɩd t’a kõ-y-la sugri. Sõs-kãngã pʋgẽ, d na n yãa d sẽn segd n sak n deeg t’a Zeova kõ-d-la sugrã võore, la bũmb ning sẽn tõe n sõng-d tɩ d kɩs sɩd ne rẽ.

BÕE YĨNG TƖ D SEGD N SAK N DEEG T’A ZEOVA KÕ-D-LA SUGRI?

5. Bõe la a Sʋɩtãan rat tɩ d tẽ? Rɩk-y makre.

5 D sã n sak n deeg t’a Zeova kõ-d-la sugri, tõe n sõng-d lame tɩ d ra lʋɩ a Sʋɩtãan bẽdg a ye pʋgẽ ye. Tẽeg-y t’a Sʋɩtãan maanda a sẽn tõe fãa n dat tɩ d bas a Zeova tũubu. Wala makre, a tõe n modgda sẽn na yɩl tɩ d tẽ tɩ d yel-wẽnã yaa wẽns wʋsg t’a Zeova pa na n tol n kõ-d sugr ye. Tẽeg-y Korẽnt rao ning b sẽn yiis tigingã pʋgẽ a sẽn yo yĩngã yelle. (1 Kor. 5:1, 5, 13) A sẽn wa n tek yam n kos sugrã, a Sʋɩtãan ra ratame tɩ tigingã neb ra sak n kõ-a sugr n lebs n deeg-a ne yamleoog tigingã pʋgẽ ye. Sẽn paase, a ra ratame tɩ raoã sẽn tek yam n kos sugrã tags t’a pa tõe n paam sugri, ‘n sãam a sũur wʋsg’ hal n koms raood n bas a Zeova tũubu. A Sʋɩtãan bõn-daabã pa toeem ye. A ket n maanda woto rũndã-rũndã me. La “tõnd pa zɩ a sɩlmã ye.”—2 Kor. 2:5-11.

6. Bõe la d tõe n maan n da le ningd d meng taal yel-wẽn d sẽn maan pĩnd yĩnga?

6 D sã n sak n deeg t’a Zeova kõ-d-la sugri, d tõe n paama yolsgo. D sã n maan yel-wẽnde, d wae n ningda d meng taale. (Yɩɩn. 51:17) D sã n ningd d meng taale yaa sõma. Bala d sũur-kasetã tõe n kɩtame tɩ d toeem n maan sẽn yaa tɩrga. (2 Kor. 7:10, 11) La d sã n tek yam n kos sugr n ket n ningd d meng taal wʋsgo, tõe n wa kɩtame tɩ d koms raood n bas a Zeova tũubu. La d sã n sak n deeg t’a Zeova kõ-d-la sugri, d pa na n le ningd d meng taal ye. Rẽ la d tõogd n kell tũ a Zeova ne sũ-noog la d kɩs sɩd tɩ d tata a yam. Woto la a Zeova rat tɩ d maane. (Kolo. 1:10, 11; 2 Tɩm. 1:3) La bõe la d tõe n maan n kɩs sɩd tɩ Wẽnnaam kõ-d-la sugri?

BÕE N TÕE N SÕNG-D TƖ D SAK N DEEG T’A ZEOVA KÕ-D-LA SUGRI?

7-8. Bõe la a Zeova yeel a Moyiiz yẽ mengã zugu, la rẽ kɩtame tɩ d tõe n bas d yam ne bõe? (Yikri 34:6, 7)

7 Bʋgsd-y-yã a Zeova sẽn gom a meng yell to-to wã zugu. Wala makre, ges-y a Zeova sẽn yeel a Moyiiz bũmb ning Sinayi tãngã zugã.a (Karm-y Yikr 34:6, 7.) A Zeova ra tõe n yeela bũmb wʋsg a zʋg-sõma wã la a noyã wɛɛngẽ. La a yãka yam n yeel t’a yaa “Wẽnnaam sẽn yaa nimbãan-zoɛta, la sõmblem soaba.” Yãmb tagsdame tɩ Wẽnnaam a woto na zãgs t’a kõ ned sẽn sɩd tek yam n kot sugr sugr sɩda? A bada! A Zeova sã n zãgs t’a kõn kõ ned a woto sugri, d tõe n yeelame t’a yaa wẽnem soab la t’a pa nimbãan-zoɛt ye. A Zeova pa na n tol n maan a buud ye.

8 D tõe n kɩsa sɩd t’a Zeova sẽn yeel t’a yaa nimbãan-zoɛtã, a togsa sɩda. Bala a yaa sɩdã Wẽnnaam. Rẽnd d tõe n tẽe a sẽn yeel bũmb ningã. (Yɩɩn. 31:5) Y sã n wa ningd y meng taal yel-wẽn y sẽn maan pĩnd yĩng bɩ y sok y meng yaa: ‘M kɩsa sɩd t’a Zeova sɩd yaa nimbãan-zoɛt la sõmblem soaba, la t’a zɩ n zãgs t’a kõn kõ yel-wẽn-maand sẽn tek yam n kot sugr sugr bɩ? Rẽ wã, m pa segd n sak n deeg t’a kõo maam sugr sɩda?’

9. Bõe la Yɩɩn-sõamyã 32:5 sõngd tõnd tɩ d bãng a Zeova sẽn kõt sugr to-to wã wɛɛngẽ?

9 Bʋgsd-y-yã a Zeova sẽn yeel bũmb ning Biiblã pʋgẽ a sẽn kõt sugr to-to wã zugu. Wala makre, ges-y-yã a Davɩɩd sẽn bilg a Zeova sẽn kõt sugr to-to wã. (Karm-y Yɩɩn-sõamyã 32:5.) A yeelame: “Yãmb kõo maam sugr m kongrã ne m yel-wẽnã yĩnga.” Ebre wã gom-bil ning b sẽn lebg tɩ kõ sugrã rat n yeelame tɩ “zẽke,” “zã,” wall “tall n looge.” A Zeova sẽn kõ a Davɩɩd sugrã, yaa wa a sẽn zẽk a yel-wẽnã n tall n looge. Woto, a Davɩɩd paama yolsg n pa le ningd a meng taal ye. (Yɩɩn. 32:2-4) Tõnd me tõe n paama yolsg a woto buudu. D sã n tek yam ne d sũur fãa n kos sugri, d pa segd n ket n ningd d meng taal d yel-wẽnã yĩng ye. Bala a Zeova zẽk-b lame n tall n looge.

10-11. B sẽn yeel t’a Zeova “kõta sugr wʋsgã” sõng-d lame tɩ d bãng bõe? (Yɩɩn-sõamyã 86:5)

10 Karm-y Yɩɩn-sõamyã 86:5. Vɛrse-kãngã pʋgẽ, a Davɩɩd yeelame t’a Zeova “kõta sugr wʋsgo.” Woto rat n yeelame tɩ tõnd sã n maan yel-wẽnde, a Zeova pa yɩt tao-tao n yik a sũuri, la tɩ wakat fãa, a raabã yaa d tek yam t’a kõ-d sugri. Bõe yĩng t’a maand woto? Vɛrse wã yaoolem babgã paasame: “Yãmb pida ne maan-neere, neb nins fãa sẽn boond yãmbã yĩnga.” Sõsg ning sẽn loogã pʋgẽ, d yãame t’a Zeova pʋlmame t’a na n maanda neb nins sẽn nong-a wã neer wakat fãa, la t’a pa na n tol n daag-b n bas ye. A maan-neerã yĩnga, a kõta yel-wẽn-maandb nins fãa sẽn tek yam n kos sugrã “sugr ne yamleoogo.” (Eza. 55:7, notã) Sã n yaa toog ne-y tɩ sak n deeg tɩ Wẽnnaam kõ-y-la y yel-wẽnã sugri, y tõe n soka y meng yaa: ‘M kɩsa sɩd t’a Zeova yaa sug-kõata, la t’a sakd n kõta neb nins fãa sẽn tek yam n kot-a t’a zoe b nimbãanegã sugr bɩ? Woto wã, m pa segd n sak n deeg tɩ ma-me sẽn kot-a t’a zoe m nimbãanegã, a sak n kõo maam sugr sɩda?’

11 Biiblã wilgame me t’a Zeova mii vẽeneg tɩ d yaa pãn-komsem dãmba, tɩ rẽ kengd raoodo. (Yɩɩn. 139:1, 2) A Davɩɩd yɩɩll a to pʋgẽ, a wilga rẽ vẽenega. Yɩɩn-kãng me tõe n sõng-d lame tɩ d sak n deeg t’a Zeova kõ-d-la sugri.

RA YĨM-Y BŨMB NING A ZEOVA SẼN TẼRÃ YE

12-13. Yɩɩn-sõamyã 103:14 wilgdame t’a Zeova tẽra bõe tõnd wɛɛngẽ, la rẽ kɩtdame t’a maand bõe?

12 Karm-y Yɩɩn-sõamyã 103:14. A Davɩɩd yeelame t’a Zeova“tẽrame tɩ tõnd yaa tẽng tom.” A gomdã wilgda bũmb a ye sẽn kɩt t’a Zeova sakd n kõt neb nins sẽn tek yamã sugrã: Yaa t’a mii vẽeneg tɩ d yaa pãn-komsem dãmba. Sẽn na yɩl n wʋm dẽ võor sõma, d na n maneg n goma a Davɩɩd sẽn yeel bũmb ningã yelle.

13 A Davɩɩd yeelame t’a Zeova “mii a sẽn naan tõnd ne bũmb ningã sõma.” A nana a Ãdem “ne tẽngã tom,” n miẽ tɩ bũmb kẽer n yaa tɩlɛ ne neb sẽn zems zãnga. Wala makre, b segd n dɩtame, n gõe la b vʋʋsdẽ. (Sɩng. 2:7) La a Ãdem ne a Awa beegrã poore, bũmb a to n kɩt tɩ d tõe n yeel tɩ ninsaal sɩd yaa tẽng tom. D sẽn yaa b yagensã yĩnga, d rogda ne yel-wẽndã n mii n tar tʋls-wẽnse. A Zeova mii rẽ vẽenega. Bala a Davɩɩd yeelame t’a “tẽrame tɩ tõnd yaa tom.” Ebre wã gom-bil ning b sẽn lebg ka tɩ tẽrame wã bilgda bũmb sẽn yaa sõma. D tõe n kʋmsa a Davɩɩd goamã n yeel yaa: A Zeova miime tɩ d wae n kongdame. La d sã n wa konge, n tek yam ne d sũur fãa n kos sugri, a kʋm-d lame n kõ-d sugri.—Yɩɩn. 78:38, 39.

14. a) Bõe la a Davɩɩd yeel n bilg a Zeova sẽn kõt sugr to-to wã? (Yɩɩn-sõamyã 103:12) b) A Zeova sẽn kõo a Davɩɩd sugr to-to wã wilgda tõnd bõe? (Ges-y zĩ-gũbrã: “A Zeova sã n kõ sugri, a yĩmdame.”)

14 Bõe me la Yɩɩn-sõamyã 103 soabã sõngd tõnd tɩ d bãng a Zeova sugrã wɛɛngẽ? (Karm-y Yɩɩn-sõamyã 103:12.) A Davɩɩd yeelame t’a Zeova sã n kõ tõnd sugri, a zãagda tõnd ne d yel-wẽnã “wa yaang sẽn zãr ne nin-taoor to-to wã.” Yaang ne nin-taoor zãrmã pa tõe n bãng n wilg ye. B pa tol n tõe n yek taab a bada. Woto sõngda tõnd tɩ d bãng bõe a Zeova sẽn kõt sugr to-to wã wɛɛngẽ? Sebr a yembr goma vɛrse-kãngã yell n yeel tɩ Wẽnnaam sẽn zãagd tõnd ne d yel-wẽnã woto wã, yaa wa b sẽn tall bũmb n loog tɩ d pa le tõe n wʋm a yũug baa bilfu. Rẽnd d tõe n basa d yam t’a pa na n tol le tags d yel-wẽnã yell bɩ n tẽeg tõnd rẽ ye. Yũug tõe n kɩtame tɩ d tẽeg bũmb yelle. A Zeova sã n kõ sugri, yaa wa a sẽn kɩt tɩ d yel-wẽnã yũugã menem zãnga, t’a pa na n le wa wʋm rẽ n tẽeg b yell wall a sɩbg tõnd rẽ yĩng ye.—Eze. 18:21, 22; Tʋʋ. 3:19.

Fot-rãmbã: 1. Rĩm a Davɩɩd sẽn be bɛoong zug n get a Batseba sẽn sood koom. 2. A pʋʋsda ne a sũur fãa. 3. A bʋgsda a sẽn na n gʋls bũmb ningã zugu.

A Zeova sã n kõ sugri, a yĩmdame

A Zeova sã n kõ-d sugri, a yĩmda d yel-wẽnã, rat n yeel t’a pa na n wa sɩbg-d beoog-daar yel-wẽn-kãens yĩng ye. (Eza. 43:25) D ges a sẽn maan to-to ne Rĩm a Davɩɩdã. A kibarã wilgdame tɩ d tõe n paama zood sõma ne Wẽnnaam, baa d sã n maan yel-wẽn-kãsemse.

A Davɩɩd maana yel-wẽn-kãsemse. Wala makre, a yoome la a maan sɩlem tɩ b kʋ neda. La a sẽn tek yam ne a sũur fãa wã yĩnga, a Zeova kõ-a-la sugri. A Davɩɩd saka kiblgã n toeeme. Rẽ poore, a pa le saag n maan a buud ye.—2 Sãm. 11:1-27; 12:13.

A Zeova wa n goma a Davɩɩd yell n yeela a Salomo yaa: “Tũ maam ne burkĩnd la pʋ-peelem wa f ba a Davɩɩde.” (1 Rĩm. 9:4, 5) A Zeova pa gom a Davɩɩd yel-wẽnã yell meng ye. A yeelame bal t’a Davɩɩd yɩɩ ned sẽn tũ yẽ ne burkĩnd la pʋ-peelem. A Zeova ‘keo-a-la wʋsg’ a sẽn maan sɩd ne-a wã yĩnga.—Yɩɩn. 13:6.

Rẽ wilgda tõnd bõe? A Zeova sã n kõ ned sugri, a pa le get a soabã yel-wẽnã ye. A geta bõn-sõma nins a sẽn maand t’a tõe n tik n keo-a wã. (Ebre. 11:6) Rẽnd d pa segd n le tẽegd yel-wẽn nins d sẽn maan pĩndã yelle, bala a Zeova yãka yam n yĩm-ba.

15. D sã n ket n ningd d meng taal yel-wẽnd d sẽn maan pĩnd yĩnga, bõe la d tõe n maan tɩ sõng-do?

15 A Davɩɩd goam nins sẽn be Yɩɩn-sõamyã 103 pʋgẽ wã tõe n sõng-d lame tɩ d sak n deeg t’a Zeova kõ-d-la sugri. D sã n ket n ningd d meng taal yel-wẽn d sẽn maan pĩnd yĩnga, d tõe n soka d meng yaa: ‘M pa yĩmd bũmb ning a Zeova sẽn tẽrã sɩda? Rat n yeel tɩ m pa yĩmd t’a miime tɩ m yaa ned sẽn pa zems zãnga, la t’a kõta yel-wẽn-maandb nins fãa sẽn tek yamã sugr sɩda? M pa tẽegd bũmb ning a Zeova sẽn yãk yam n yĩmã sɩda? Rat n yeel tɩ m pa tẽegd yel-wẽn nins a Zeova sẽn kõ sugr n pa na n tol n sɩbg-m rẽ yĩngã yell sɩda?’ A Zeova pa tagsd tõnd pĩnd yel-wẽnã yell ye. Tõnd me pa segd n tags b yell ye. (Yɩɩn. 130:3) D sã n sak n deeg t’a Zeova kõ-d-la sugri, d na n tõog n yĩma d pĩnd yel-wẽnã n ket n tũud-a ne sũ-noogo.

16. Rɩk-y makr n wilg tɩ d sã n tagsd d pĩnd yel-wẽnã yell wakat fãa pa sõma ye. (Ges-y fotã me.)

16 D rɩk makre. Y sã n tagsd y pĩnd yel-wẽnã yell wakat fãa, yaa wa y sẽn wẽnd mobill la y get a nin-gɛtgẽ wã n pa basdẽ ye. Y sã n mi n lɩk n ges nin-gɛtgẽ wã yaa sõma. Tõe n kɩtame tɩ y yã yell sẽn be y poorẽ wã n watẽ n gili. La y sã n dat n kẽn sõma n da wa fão bũmbu, y segd n geta sorã. Woto me, d sã n mi n tagsd d pĩnd yel-wẽnã yelle, tõe n sõng-d lame. D tõe n dɩka yam rẽ pʋgẽ tɩ kɩt tɩ d modg n da le wa maan a buud ye. La d sã n tagsd d pĩnd yel-wẽnã yell wʋsgo, d tõe n ningda d meng taal hal n pa tõe n tʋm a Zeova tʋʋmdã sõma ye. D segd n yɩɩ wa sẽn wẽnd-a mobillã sẽn get sorã sõma wã. D kẽnda sor ning sẽn tar n dabd Wẽnnaam dũni-paalgẽ wã zugu, zĩig ning d sẽn pa na n le “tẽeg” bõn-wẽns nins d sẽn maanã yellã.—Eza. 65:17; Yel. 4:25.

Rao sẽn wẽnd mobill sẽn ta zĩig sorã sẽn gõdgde, n lob nif mobillã nin-gɛtgẽ.

Ned sã n wẽnd mobilli, a segd n geta sorã n yɩɩd mobillã nin-gɛtgã. Tõnd me segd n tagsda bark nins sẽn watã yell n yɩɩd yel-wẽn nins d sẽn maan pĩndã (Ges-y sull 16)


KELL-Y N KƖS-Y SƖD T’A ZEOVA KÕ-Y-LA SUGRI

17. Bõe yĩng tɩ d segd n kell n kɩs sɩd t’a Zeova nong-d lame la t’a kõ-d-la sugri?

17 D segd n kell n kɩsa sɩd t’a Zeova nong-d lame, la t’a kõ-d-la sugri. (1 Zã 3:19) Bõe yĩnga? Bala a Sʋɩtãan na n kell n maana a sẽn tõe sẽn na yɩl tɩ d tẽ tɩ d pa zems ne a Zeova nonglmã, la tɩ d yel-wẽnã pa tõe n paam sugr ye. Sẽn yaa a soab fãa, a sẽn datã yaa bõn-yɛnga. Yaa tɩ d bas a Zeova tũubu. D miime t’a Sʋɩtãan na n maneg n makda tõndo, bala a miime t’a wakatã keta bilfu. (Vẽn. 12:12) D pa segd n bas t’a tõog-d ye.

18. Bõe la y tõe n maan n kɩs sɩd t’a Zeova nong-y lame, la t’a kõ-y-la sugri?

18 Y sã n dat n maneg n kɩs sɩd t’a Zeova nong-y lame bɩ y tũ sagls nins d sẽn yã sõsg ning sẽn loogã pʋgẽ wã. Sẽn na yɩl n kɩs sɩd t’a Zeova kõ-y-la sugri, bɩ y bʋgs a sẽn gom a meng yell to-to wã zugu. Bʋgs-y-yã a Zeova sẽn yeel bũmb ning Biiblã pʋgẽ a sẽn kõt sugr to-to wã zugu. Ra yĩm-y t’a miime tɩ y yaa ned sẽn pa zems zãnga, la t’a na n kʋma y nimbãaneg ye. Sẽn paase, tẽeg-y t’a sã n kõ sugri, a kõo sugr zãng-zãnga. Woto, y tõogd n basa y yam t’a Zeova yaa nimbãan-zoɛta, n yeel wa a Davɩɩd yaa: “Bark wʋsgo Zeova, bala yãmb kõo maam sugr m ‘kongrã la m yel-wẽnã’ yĩnga!”—Yɩɩn. 32:5.

Y NA N LEOKAME TƖ BÕE?

  • Bõe yĩng tɩ d segd n sak n deeg t’a Zeova kõ-d-la sugri?

  • Bõe n tõe n sõng-y tɩ y sak n deeg t’a Zeova kõ-y-la sugri?

  • Bõe yĩng tɩ d segd n kell n kɩs sɩd t’a Zeova kõ-d-la sugri?

YƖƖLL A 1 A Zeova yaa Wẽnnaam sẽn ka to

a Ges-y Yʋʋmd 2022 Sigr kiuug Gũusg Gasgã sõsg ning gom-zug sẽn yaa: “A Zeova yaa sug-kõat sẽn ka to” wã sull a 4-7.

    Moorã Sɛba (1991-2025)
    Pag-y
    Pak-y
    • Moore
    • Toole
    • Y sẽn date
    • Copyright © 2025 Watch Tower Bible and Tract Society of Pennsylvania
    • Y sẽn segd n sake
    • Noy d sẽn tũudi
    • Paramètres de confidentialité
    • JW.ORG
    • Pak-y
    Toole