A Zeova sõnga tõnd tɩ d paam sũ-noog zĩig ning fãa b sẽn tʋm-do

A Mats ne a Ann-Catrin Kassholm maana Galaad lekollã yʋʋmd 1979 wã. Yʋʋm wʋsg pʋgẽ b tʋm-b-la tẽns wʋsg pʋsẽ wala Birmani, Ɩll Moriis, Irã, Tãnzani, Ugãnda la Zayɩɩre. Yɩɩ Galaad karen-saamb a Jack Redford n kõ-b saglgã tɩ sõng-b b sẽn kẽng tẽns wʋsg pʋsẽ wã. Ad b sẽn wilg yɛlã sẽn yɩ to-to.

Mats, d bõos tɩ f reng n togs-d f sẽn bãng sɩdã to-to.

A Mats: M baaba ra bee Poloyn dũni gill zabr a yiib-n-soabã sasa, n yã Katolikã taoor dãmbã pʋ-lik tʋʋmã wʋsgo. Baasgo, a ra wae n yetame yaa: “M miime tɩ tũudum hakɩɩk n be!” M wa n bãngame tɩ sɩd yaa woto. M da nong n daada seb-kʋda. Sebr a yembr la m da t’a kõbgã yaa bʋla-bʋla t’a gom-zugã yaa La vérité qui conduit à la vie éternelle. Sebrã gom-zug yɩɩ maam noogo, tɩ m karma a tõrã yʋn-kãng bala. Beoogã sẽn wa n na n vẽegã tɩ m kɩsa sɩd tɩ m bãnga tũudum hakɩɩkã n bake.

Yʋʋmd 1972 tʋʋl-nif kiuugã tɛka, m karma a Zeova Kaset rãmbã sɛb a taaba, n paam sogsg nins m sẽn da sokd m meng Biiblã zugã leoore. M da yaa wa toand ning yell a Zeezi sẽn gom a yel-bũndã pʋgẽ wã. Toandã sẽn yã kĩndf sẽn tar yõod wʋsgã poore, a koosa a sẽn tarã fãa n da-a. M yãka yam n bas m sẽn da rat n kẽng inivɛrsite n tɩ karem n lebg logtorã, tɩ yaa wa m “koosa” rẽ n da sɩdã sẽn yaa wa “kĩndf “ sẽn tar yõod wʋsgã. (Mat. 13:45, 46) M deega lisg yʋʋmd 1972 yʋʋm-sar kiuug rasem piigã daare.

Sẽn wa n na n ta yʋʋmdã tɩ m roagdbã ne m yao-bi-riblã saka sɩdã n deeg lisgu. Yʋʋmd 1973 sẽoog kiuugã, m lebga wakat fãa so-pakda. Pʋg-sad-neer me n da be tõnd tigingẽ wã n yaa so-pakd t’a yʋʋr boondẽ t’a Ann-Catrin. A ra tara yẽesem, n da nong a Zeova ne a sũur fãa me. D yamã kẽe taaba, tɩ d kẽ kãadem yʋʋmd 1975. D kãadmã poore, d zĩnda Ɛstormsund tẽngã n maan yʋʋm a naase. Yaa Suwɛɛd tẽn-neere, tɩ koɛɛgã mooneg ra womd biis be.

A Ann-Catrin: Yɩɩ m baaba sẽn wa n be Ɛstokolom inivɛrsite a ye pʋgẽ n karemdẽ la a bãng sɩdã, a karengã sẽn wa n kolg saabã. Rẽ tɩ m ra yaa kiuug a tãab bi-pɛɛlga. La m baaba ra tallda maam n kẽnd tigissã la a yit koɛɛgã moonego. Rẽ ra pa noom m ma ye. A makame n na n wilg t’a Zeova Kaset rãmbã sẽn yetã yaa ziri. La a pa tõog ye. Tarẽ-tarẽ, yẽ me wa n deega lisgu. M deega lisg m sẽn wa n tar yʋʋm piig la a tãabo. M sẽn wa n tar yʋʋm piig la a yoobe, m lebga wakat fãa so-pakda. M tɩ sõng n moona Umeya sẽn yaa zĩig koe-moondbã raab sẽn yaa wʋsgã. Yaa be la m lebg zall so-pakda.

Maam ne a Mats kãadmã poore, d paam n sõnga neb a wãn tɩ b bãng sɩdã tɩ kõ-d sũ-noogo. Wala makre, pʋg-sad yʋʋr sẽn boond t’a Maivor. A basa tʋʋmd sẽn da tõe n kɩt t’a yʋʋr yi la a paam ligd wʋsg sẽn na yɩl n tõog n tũ a Zeova sõma. A wa n lebga so-pakd tɩ yẽ ne mam yao-bi-puglã naagd taab n moondẽ. B kẽnga Galaad lekollã yʋʋmd 1984, n lebg misioneer-dãmb tɩ b tʋm-b Ekuatɛɛr.

Yãmb sẽn lebg misioneer-dãmb tɩ b tʋm-y zĩis wʋsgã, bõe n sõng-y tɩ y kell n tall sũ-noogo?

A Mats: B sɩd tʋma tõnd zĩis wʋsgo. La bũmb sẽn sõng tõnd yaa tɩ wakat fãa, d modgd n dɩkda a Zeezi togs-n-taare. Sẽn yɩɩd fãa sik-m-mengã wɛɛngẽ. (Kolo. 2:6, 7) Wala makre, d sã n toeem tẽnga, d pa baood tɩ saam-biisã toeem b minundã sẽn na yɩl tɩ yɛlã yɩ nana ne tõnd ye. D modgd n bao n wʋma b sẽn maand yɛl kẽer to-to wã võore. D maanda d sẽn tõe fãa n bao n bãng b sẽn get yɛlã to-to wã la b minundã. D sã n modgd n dɩkd a Zeezi togs-n-taar sõma, d getame tɩ d yaa wa tɩɩg b sẽn sel kʋɩlg noore, n tar sũ-noog zĩig ning fãa b sẽn tʋm-do.—Yɩɩn. 1:2, 3.

A Ann-Catrin: B sã n võog tɩɩg n tɩ sel zĩig a to, wĩntoogã vẽenem yaa tɩlɛ ne-a. Wakat buud fãa, a Zeova wilgame t’a yaa d “wĩntoogo.” (Yɩɩn. 84:11) A sõng-d lame tɩ d paam saam-biis la saam-bi-pogs sẽn nong-d wʋsgo. Wala makre, d sẽn wa n be tigin-bil a yembr pʋgẽ Teerã sẽn be Irã soolmẽ wã, saam-biisã reeg-d-la sãand sõma tɩ kɩt tɩ d tẽeg Biiblã kibay kẽere. D ra nongẽ lame n pa Irã la yʋʋmd 1980 sẽoog kiuugã, b gɩdga a Zeova Kaset rãmbã tũudum beenẽ. B yeelame tɩ d yi tẽngã tɩ lɛɛr pis-naas la a nii ra ta ye. Siglgã kɩtame tɩ d kẽng Zayɩɩr sẽn be Afirikã, b sẽn boond rũndã-rũndã tɩ Kõngo wã.

M sẽn wa n wʋm tɩ m segd n kẽnga Afirikã, m yãbame. M sẽn da wʋmd tɩ b gomd tɩ wiis la bãas n be Afirikã kɩtame tɩ m da yɛɛsdẽ. La d zo-rãmb a yiib sẽn zĩnd Afirik n kaoos yeela tõnd yaa: “Ra yɛɛs-y ye! Yãmb nan pa kẽng Afirik ye. La d miime tɩ be vɩɩmã na n wa yɩ-y-la noog wʋsgo.” Sɩd yɩɩ woto! Saam-biisã la saam-bi-pogsã sẽn be be wã nonga neb wʋsgo. Sɩd me, yʋʋm a yoob poor b sẽn wa n gɩdg tõnd tũudmã tɩ yaa tɩlɛ tɩ d yi Zayɩɩrã, mam laa m menga. Bala m da pʋʋsda a Zeova n yetẽ yaa: “M bõos tɩ f sõng-d tɩ d kell n pa Afiriki.”

Bark-bʋs la y paam yʋʋm wʋsgã pʋgẽ?

A Mats: D yõga zood ne misioneer-dãmb sẽn yit tẽns toɛy-toɛya. Sẽn paase, tẽns wʋsg pʋsẽ d ra paamda Biibl karen-bɩɩs wʋsg hal tɩ kõt-d sũ-noogo. Wakat ninga d ned kam fãa tõe n tara sẽn na maan Biibl karen-bɩɩs pisi. M pa na n tol n yĩm d tẽed-n-taas nins sẽn be Afirikã nonglmã la b sẽn nong sãamb-reegrã yell ye. D sẽn wa n be Tãnzani n gilgd n kaagd tigimsã, d ra gãee d mobillã pʋgẽ. La saam-biis wʋsg wilgame tɩ b nonga sãamb-reegre, hal n mi n maan tɩ “yɩɩg b paoongã.” (2 Kor. 8:3) Bũmb la d ra mii n maandẽ tɩ noom-d wʋsgo, n boondẽ tɩ kibay wakate. Zaabr fãa, maam ne a Ann-Catrin ra zĩndame n sõs ne taaba, tɩ ned kam fãa togs a to bũmb ning sẽn maan daarã pʋgẽ wã, tɩ rẽ poor bɩ d pʋʋs a Zeova bark a sẽn sõngd tõndã yĩnga.

A Ann-Catrin: Bũmb sẽn kõ maam sũ-noog wʋsg yaa m sẽn paam n bãng saam-biis la saam-bi-pogs wʋsg tẽns toɛy-toɛy pʋsẽ wã. D zãmsa buud-goam wala Farsi, Farende, Luganda, la Suwahili. D bãnga tẽns toɛy-toɛy neb minundu. D sõnga saam-biis la saam-bi-pogs tɩ b paam minim, d paama zo-rãmb hakɩɩk tɩ d “naag taab yam a yembr” n tũ a Zeova.—Sof. 3:9.

D paam n yãa a Zeova bõn-naands toor-toor sẽn yaa neeb me. B sã n da kɩt tɩ d toeem zĩig fãa, d ra neeme t’a Zeova bee ne tõnd n wilgd-d sore. A zãms-d-la bũmb wʋsg d sẽn da pa tõe n bãng d toore.

Zu-loe-bʋs la y paam-yã, la bõe n sõng-y tɩ y tõog toogo?

A Mats: Pali la bãas a taab n nams tõndo. Yɩɩ tɩlɛ tɩ b wopeer a Ann-Catrin naoor a wãna. D ra maanda yɩɩr d roagdbã sẽn wa n kʋʋndẽ wã yĩng me. La d pʋʋsda d yaopã barka, bala bãmb n ges b yell n tɩ yɩɩda. B maana rẽ ne sũ-mare, sũ-noog la nonglem. (1 Tɩm. 5:4) Baa d sẽn da be yɩɩg n sõngdẽ wã, d ra mi n ningda d mens taale, n sokd d mens d sã n pa segd n maan tɩ yɩɩg rẽ.

A Ann-Catrin: Yʋʋmd 1983, d sẽn wa n be Zayɩɩrã, kolera n yõk maam hal tɩ pa yɩ nana ye. Logtorã yeela a Mats yaa: “Tall-a n yi tẽngã rũndã!” Vẽkembeoogã, d loogame. D kẽe sɩlg b sẽn tar n wʋkd teed n kẽng Suwɛɛde, bala sɩlg a to ra ka be ye.

A Mats: D ra tagsdame tɩ d pa na n le tõog n yɩ misioneer-dãmb ye. Rẽ n so tɩ d yãb wʋsgo. Baa logtorã sẽn da tagsd t’a Ann-Catrin yĩnsã pa na n sãoogã, wa n sãoogame. Yʋʋmd poore, d le leba Zayɩɩre. So-kãnga, b kɩtame tɩ d kẽng Suwayili tigin-bil a ye sẽn be Lubumbasi pʋgẽ.

A Ann-Catrin: D sẽn wa n be Lubumbasi wã, mam dɩka pʋg tɩ sãame. Baa d sẽn da yãk yam n pa na n dog kambã, m pʋgã sãoongã nams-m-la wʋsgo. La wakat kãng sẽn pa yɩ nana wã, a Zeova kõ-d-la bũmb tɩ ling-du. D paama neb wʋsg sẽn sak n na n zãms Biiblã n yɩɩd pĩndã. Sẽn wa n na n ta yʋʋmdã tɩ tigingã koe-moondb sẽn da yaa pis-tã la a nu wã lebga pis-yopoe, tɩ sẽn da wat-b tigissã sõor sẽn da zems pis-naasã zẽk n ta neb kobs-yi la pis-yi. D ra tʋmda wʋsg koɛɛgã mooneg pʋgẽ, t’a Zeova ning bark tɩ rẽ bels-m wʋsgo. Baa ne rẽ d mi n tagsda d biigã d sẽn nong wʋsgã yell la d gomd a yelle. D gũuda wakat ning a Zeova sẽn na n kɩt tɩ d sũurã sig zãng arzãnã pʋgẽ wã ne yãgbo.

A Mats: Wakat n zĩnd t’a Ann-Catrin sã n maan bũmb bilf fãa bɩ a ya wʋsgo. Wakat kãng me, logtoɛɛmbã bãngame tɩ kãnsɛɛr n tar maam tɩ b segd n maan maam wopeere sẽn pa nana ye. Rũndã-rũndã m yĩnsã sãoome, t’a Ann-Catrin me tʋmd a Zeova tʋʋmdã wa a sẽn tõe tɛka.

D wa n bãngame tɩ pa tõnd bal n paamd zu-loees ye. Yʋʋmd 1994, buud-zabr n zĩnd Ruwãnda. Rẽ poore, d tɩ kaaga d tẽed-n-taas wʋsg sẽn da be zoɛtb zĩisẽ. D sẽn yã b sẽn da tar tẽebã, b sẽn tõogd toog la b ket n nong sãamb-reegrã kɩtame tɩ d neẽ t’a Zeova tõe n gesa a nin-buiidã yell baa toog wakate.—Yɩɩn. 55:22.

A Ann-Catrin: Zu-loɛɛg a to la d paam yʋʋmd 2007 wã, d sẽn wa n kẽng Ugãnda Betɛllã pakrã n lebgdẽ wã. D kẽe mobill ne misioneer-dãmb a taab la Betɛllẽ tʋm-tʋmdb n dabd Nayerobi sẽn be Kenya wã. D sẽn wa n kolg Kenya toadgã, mobill n yi taoorã n wa fão mobill ning pʋgẽ tõnd sẽn da be wã. Sofɛɛrã ne d tẽed-n-taas a nu n ki zĩig pʋgẽ. Saam-bi-poak a ye n tɩ ki logtorã yiri. D yãgdame n na n le yã d zo-rãmbã!—Zoob 14:13-15.

Mam sãmpoagã wa n maagame. La maam ne a Mats n paas neb a taab sẽn da be mobillã pʋgẽ kell n namsa wʋsg yellã sẽn maanã yĩnga. Mam nengẽ wã, yaa yʋng la ra namsd maam n tɩ yɩɩda. M da mi n nekame tɩ yaa wa m sũurã rat n tõsgame. Rẽ ra kẽesd-m-la rabeem wʋsgo. La maam ne a Mats sẽn naagd taab n pʋʋsd a Zeova ne d sũur fãa la d karemd Biiblã vɛrse-rãmb kẽer sẽn noom-d wʋsgã sõng-d lame tɩ d tõog toogo. D paama logtoɛɛmb sõngr me tɩ naf-d wʋsgo. Masã, yellã ka le namsd-d wa pĩndã ye. La d kota a Zeova t’a sõng-d tɩ d bels neb nins sẽn maood ne zu-loees a woto buudã.

Y sã n mi n gomd zu-loees nins y sẽn mao ne wã yelle, y wae n yetame t’a Zeova zãa yãmb wa gɛla. Woto rat n yeelame tɩ bõe?

A Mats: Yaa goam Suwayili-rãmbã sẽn wae n yetẽ. B wae n yetame yaa “B zãa tõnd wa gɛla.” Ned sã n zãad gɛla, a maagda a yĩng sẽn na yɩl tɩ ra wã ye. Woto me, a Zeova teela tõnd ne nonglem zĩig ning fãa d sẽn kẽnge. Wakat fãa d paamda sẽn yaa tɩlɛ ne-dã, bɩ sẽn yɩɩd rẽ menga. Bũmb a ye sẽn kɩt tɩ d neẽ t’a Zeova nonga tõnd la a teend tõndo, yaa Siglgã taoor lʋɩtb Sull neb sẽn wilgd tɩ b kʋmd-d lame wã.

A Ann-Catrin: M dat n goma a Zeova sẽn teend tõnd ne nonglmã yelle. Daar a ye, b boola maam ne telefõn n togs tɩ m baaba sẽn be Suwɛɛdã lʋɩɩ bãag tɩ b tall-a n kẽng logtor yir tɩ pa nana ye. Rẽ tɩ pali n yõk a Mats tɩ nan pa sa zãng ye. Sẽn paase, d ra pa tar ligd sẽn sek d na rɩk sɩlg n kuil ye. Rẽ n so tɩ d yãk yam n na n koos d mobillã. Rẽ poore b boola tõnd naoor a yiib ne telefõnne. Pipi wã yaa saam-bi-poak ne a sɩd sẽn wʋm tõnd zu-loɛɛgã, n dat n yao d nin-yend so-toak ligdi. Yiib-n-soabã yaa saam-bi-poak yʋʋm sẽn vẽsg sẽn da bĩng ligdi, n baood ned sẽn be raab pʋgẽ n na n sõnge. Minit a wãn pʋgẽ bala, a Zeova sõng-d lame tɩ d paam d sẽn da ratã!—Ebre. 13:6.

Yãmb sẽn kẽes y meng zãng a Zeova tʋʋmdã pʋgẽ yʋʋm pis-nu wã, bõe la y bãng-yã?

A Ann-Catrin: M bãngame tɩ yaa d sẽn na n ‘kell n pa sɩɩ la d teeg a Zeova’ la d paamd pãnga. D sã n teeg a Zeova, a sõngd-d-la d zu-loeesã fãa pʋgẽ. (Eza. 30:15; 2 Kib 20:15, 17) D sẽn tʋm a Zeova tʋʋmdã wa d sẽn tõe tɛk zĩig ning fãa b sẽn tʋm-dã, d paama bark toor-toor d sẽn da pa tõe n paam tʋʋmd a to pʋgẽ ye.

A Mats: Sẽn yɩɩd fãa m bãngame tɩ bũmb fãa pʋgẽ, m segd n teega a Zeova, n gũ t’a wa sõng-ma. (Yɩɩn. 37:5) A pa na n tol n bas n pa sõng-d wa a sẽn pʋlmã ye. Rũndã-rũndã d bee Birmani Betɛllẽ wã n tʋmdẽ. La d ket n neeme t’a Zeova sõngda tõndo.

D saagdame tɩ kom-bɩɩs nins sẽn dat n tʋm a Zeova tʋʋmdã n paasã na n paamame t’a wilg t’a nong-b lame wa sẽn yɩ to-to ne tõndã. D kɩsa sɩd tɩ na n yɩɩ woto, b sã n sak t’a Zeova sõng-b tɩ b paam sũ-noog zĩig ning fãa b sẽn na n tʋm-ba.