Waoogd-y y taabã

1. Bõe yĩng tɩ ninsaalbã rat tɩ b waoogd-ba? (Yel-bũnã 22:1)

NEBÃ sã n waoogd yãmba, pa noom-y sɩda? Yaa vẽeneg tɩ noom-y lame. Ned buud fãa ratame tɩ b waoogd-a. B sã n waoogd tõndo, d sũur nooma wʋsgo. Rẽ n so tɩ Biiblã yeel tɩ “b sẽn na n waoogd-f n são wanzuri ne sãnem.”—Karm-y Yel-bũn 22:1.

2-3. Bõe yĩng tɩ pa nana tɩ d waoogd d taabã wakat fãa, la bõe yell la d na n gom sõs-kãngã pʋgẽ?

² Pa wakat fãa la yaa nana tɩ d waoog d taabã ye. Bũmb a ye sẽn kɩt tɩ yaa toog yaa tɩ d nee neb a taabã pãn-komsmã. Sẽn paase, rũndã-rũndã, neb wʋsg pa wae n waoogd b taabã ye. La d pa segd n maan wa bãmb ye. Bõe yĩnga? Bala a Zeova ratame tɩ d waoog “nebã buud fãa.”—1 Pɩy. 2:17.

³ Sõs-kãngã pʋgẽ, d na n yãa waoogd d taabã sẽn dat n yɛɛlga, la d sẽn tõe n wilg to-to tɩ d waoogda 1) d zakã rãmba, 2) d tẽed-n-taasã, la 3) neb nins sẽn nan pa tũud a Zeova wã. Sẽn yɩɩd fãa, d na n yãa d sẽn tõe n waoogd d taabã to-to baa sã n wa pa nana.

WAOOG D TAABÃ RAT N YEELAME TƖ BÕE?

4. Bõe n wilgd tɩ d waoogda neda?

⁴ Bõe n wilgd tɩ d waoogda neda? Yaa d sẽn get ned to-to wã, la d manesem sẽn yaa a soab ne-a wã n wilgd tɩ waoogd-a lame. D sã n neẽ tɩ ned tara zʋg-sõma, wall t’a tõog n maana bõn-kãsemse, pa rẽ bɩ a yaa ned sẽn tar zu-sobendo, yɩta nana tɩ waoogd-a, rat n yeel tɩ d manesem sẽn yaa to-to ne-a wã na n wilgdame tɩ d nand-a lame, la tɩ d getame t’a tara yõodo. Sɩd-sɩda, waoogr hakɩɩkã segd n yita sũurẽ.—Mat. 15:8.

5. Bõe n kɩt tɩ d waoogd d taabã?

⁵ A Zeova ratame tɩ d waoogd d taabã. A yeelame tɩ d segd n waooga “nanambsã.” (Rom. 13:1, 7) La neb kẽer yetame yaa: “Yaa neb nins manesem sẽn wilgd tɩ b segda ne waoogrã bal la m waoogda.” Tagsg a woto zemsame bɩ? D sẽn yaa a Zeova Kaset rãmbã, d miime tɩ pa nebã manesem bal la d segd n tikd n waoogd-b ye. D maanda rẽ, d sẽn nong a Zeova n dat n noog a sũurã yĩnga.—Zoz. 4:14; 1 Pɩy. 3:15.

6. D tõe n waooga ned sẽn pa waoogd tõnd bɩ? Wilg-y y leoorã võore. (Ges-y fotã me.)

⁶ Neb kẽer tõe n sokda b mens yaa: ‘F tõe n waooga ned sẽn pa waoogd-f sɩda?’ N-ye. Ad kibay a wãn sẽn wilgd rẽ. Rĩm a Sayull paooga a biig a Zonatã nebã taoore. (1 Sãm. 20:30-34) Baa ne rẽ, a Zonatã ra ket n waoogd a ba wã, n yãagd-a n kẽnd zab hal n tãag a kũumã daare. (Yik. 20:12; 2 Sãm. 1:23) Maan-kʋʋdb kãsem a Eli yeela a Ann t’a yũu rãam n su tɩ yaool n da pa woto ye. (1 Sãm. 1:12-14) Baa ne rẽ a Ann goma ne a Eli ne waoogre, baa ne Israyɛll neb wʋsg sẽn da mi t’a pa kibind a kambã sõma, la t’a yaa maan-kʋʋdb kãsem sẽn pa tʋmd a tʋʋm sõma wã. (1 Sãm. 1:15-18; 2:22-24) Atɛn nebã me paooga a Polle, n yeel t’a yaa “gom-to-neda.” (Tʋʋ. 17:18) Baasgo, a Poll goma ne-b ne waoogre. (Tʋʋ. 17:22) Kiba-kãensã wilgdame tɩ d sã n nong a Zeova, n pa rat n maan bũmb n sãam a sũuri, tõe n sõng-d lame tɩ d waoogd d taabã, baa sã n wa pa nana. D na n bao n bãnga neb nins sẽn segd ne waoogrã, la d sẽn segd n waoog-bã võore.

D WAOOGD D ZAKÃ RÃMBA

7. Bõe n tõe n kɩt tɩ yɩ toog tɩ d waoog d zakã rãmba?

⁷ Sẽn yaa toogã võore. D wae n bee ne d zakã rãmba. Rẽ kɩtame tɩ d ne b zʋg-sõma wã la b pãn-komsem toor-toorã. Kẽer tõe n tara bãag sẽn kɩt tɩ yaa toog tɩ d ges b yelle, pa rẽ bɩ b maanda yɩɩr wʋsgo. Sãnda tõe n togsda goam wall b maand bũmb sẽn sãamd d sũur menga. D sã n be d zakẽ wã, d yam segd n gãee bãane. La d zakã rãmb sã n pa waoogd taaba, tõe n kɩtame tɩ zab be zakã pʋgẽ. Rẽ na n kɩtame tɩ zakã rãmb pa tõe n naag taab n tʋm sõma ye. D tõe n dɩka zakã n mak ne ninsaal yĩngã. Bãag tõe n kɩtame tɩ ninsaal yĩngã wil pa tʋmd sõma ye. Woto me, zak neb sã n pa waoogd taaba, tõe n kɩtame tɩ yɩ toog tɩ b naag taab n tʋm sõma. Yaa sɩd tɩ d pa tõe n tɩp bãas kẽer d toor ye. La d tõe n kɩtame tɩ paoog-taabã sa d zakã pʋgẽ.

8. Bõe yĩng tɩ tar yõod tɩ d waoog d zakã rãmba? (1 Tɩmote 5:4, 8)

⁸ Bõe yĩng tɩ d segd n waoogd-ba? (Karm-y 1 Tɩmote 5:4, 8.) Pipi lɛtr ning a Poll sẽn tool a Tɩmote wã pʋgẽ, a wilga zagsã rãmb sẽn segd n ges taab yell to-to. A wilgame tɩ sẽn yɩɩd fãa, bũmb ning sẽn kɩt tɩ d maand woto wã pa sẽn yaa tɩlɛ wã ye. Yaa d sẽn dat n wilg d “wẽn-sakrã” yĩnga. Woto rat n yeelame tɩ d maanda rẽ d sẽn nong Wẽnnaam, la d sẽn mi tɩ naaga bũmb nins d sẽn maand n waoogd-a wã yĩnga. Yaa a Zeova n lugl zaka. (Efɛɛ. 3:14, 15) Woto wã, d sã n waoog d zakã ned fãa, yaa a Zeova sẽn yaa zak lugundã la d waoogda. Woto pa kɩt tɩ d rat n waoogd d zakã rãmb sɩda?

9. Bõe la pag ne a sɩd tõe n maan n wilg tɩ b waoogda taaba? (Ges-y fot-rãmbã me.)

⁹ D sẽn tõe n waoog d zakã rãmb to-to. Pʋg-sɩd sã n waoogd a pagã nebã taoor la b sẽn wat n yaa b yembre, a wilgdame t’a tara yõod wʋsg a nifẽ. (Yel. 31:28; 1 Pɩy. 3:7) A pa na n tol n wẽ-a, n paoog-a wall a kɩt t’a tagsdẽ t’a ka võor ye. A Aryɛlla sẽn be Arzãntinnã yeelame: “Mam pagã sẽn yaa bãadã yĩnga, a mi n togsda goam sẽn sãamd m sũuri. A sã n mi n gom woto, mam tẽegdame tɩ pa pʋ-toog ye. Mam sũurã sã n mi n yiki m tẽegda 1 Korẽnt rãmb 13:5 goamã tɩ sõng-m tɩ m gom ne-a ne waoogre, la pa ne sũ-yikr ye.” (Yel. 19:11) Pag sẽn waoogd a sɩd pa gomd a yell wẽng ne neb a taab ye. (Efɛɛ. 5:33) A pa na n ningd-a taale, n yaand-a wall a tʋʋd-a ye. A pa na n gomd a yell sẽn na yɩl tɩ neb a taab la ye. A miime t’a sã n maand woto, a wãada a zakã. (Yel. 14:1) Saam-bi-poak sẽn be Itali t’a sɩdã wae n maand yɩɩr wʋsg yeelame: “Wakat ninga m getame tɩ m sɩdã yaa n maanda yɩɩr tɩ loog noore. Pĩndã, m no-goamã la m nen-wamdã ra wilgdame tɩ m pa nand-a ye. La m wa n bãngame tɩ m sã n wae n be ne neb no-goam sẽn wilgd tɩ b waoogda b taabã, kɩtdame tɩ m maneg n waoogd m sɩdã.”

10. Bõe la kom-bɩɩsã tõe n maan n wilg tɩ b waoogda b roagdbã?

¹⁰ Kom-bɩɩse, tũ-y noy nins y ba wã ne y ma wã sẽn gãneg zakã pʋgẽ wã. (Efɛɛ. 6:1-3) Gomd-y ne-b ne waoogre. (Yik. 21:17) B yʋʋmã sã n wa vẽsgdẽ, b tõe n wa rata y sõngre. Bɩ y ges b yell sõma. A Mariya maana woto. A ba wã pa a Zeova Kaset soab ye. A ba wã sẽn wa n lʋɩ bãagã, pa yɩ nana ne-a t’a ges a yell ye. A yeelame: “M da pʋʋsda a Zeova n kotẽ t’a sõng-m tɩ m nand m ba wã, la a sõng-m me tɩ m tõog n wilg tɩ m waoogd-a lame. M da yeta m meng yaa: ‘A Zeova sã n yeel mam tɩ m segd n waooga m doagdbã, yaa vẽeneg t’a na n kõ-m-la pãng tɩ m tõog n maan dẽ.’ M wa n bãngame tɩ pa tɩlɛ tɩ m baaba toeem manesem tɩ m yaool n tõog n waoogd-a ye.” D sã n waoogd d zakã rãmb baa sã n wa pa nana, d wilgdame tɩ d waoogda a Zeova sẽn yaa zak lugundã.

D WAOOG D TẼED-N-TAASÃ

11. Bõe n kɩt tɩ mi n yaa toog tɩ d waoog d tẽed-n-taasã?

¹¹ Sẽn yaa toogã võore. D tẽed-n-taasã tũuda Biiblã noyã. La wakat ninga, kẽer mi n maan-d-la bũmb sẽn pa segde, n ning-d taal bũmb d sẽn pa maan yĩnga, wall b maan bũmb n sãam d sũuri. D tẽed-n-taag sã n maan bũmb tɩ kɩt tɩ d “tar yell” ne-a, tõe n yɩɩ toog tɩ d kell n wilg tɩ d waoogd-a lame. (Kolo. 3:13) Sã n yaa woto, bõe n tõe n sõng-do?

12. Bõe yĩng tɩ tar yõod tɩ d wilgdẽ tɩ d waoogda d tẽed-n-taasã? (2 Pɩyɛɛr 2:9-12)

¹² Bõe yĩng tɩ d segd n waoogd-ba? (Karm-y 2 Pɩyɛɛr 2:9-12.) A Pɩyɛɛr lɛtr a yiib-n-soabã pʋgẽ, a yeelame tɩ pipi kiris-neb kẽer ra paoogda “sẽn tar-b ziirã,” rat n yeel tɩ tigingã kãsem-dãmbã. Malɛgs nins sẽn maan sɩd ne Wẽnnaamã sẽn yã rẽ wã, b manesem yɩɩ wãna? “B sẽn waoogd a Zeova wã yĩnga,” b pa sak n tʋʋs nin-kãens meng ye. Tags-y n ges-y-yã! Malɛgsã sẽn zems zãngã pa sak n gom nin-kãensã sẽn yaa wuk-m-mens rãmbã wẽng ye. B basa yellã ne a Zeova t’a kao b bʋʋd la a kibl-ba. (Rom. 14:10-12; ges-y Ziid 9.) D tõe n dɩka yam malɛgsã nengẽ. Malɛgsã pa paoog kɩɩsdbã meng ye. Woto wã, d pa segd n modg n da paoog d tẽed-n-taasã sẽn nong a Zeova wã sɩda? D segd n ‘yɩta pipi’ n waoogd-ba. (Rom. 12:10) D sã n maand woto, d wilgdame tɩ d waoogda a Zeova.

13-14. Bõe la d tõe n maan n wilg tɩ d waoogda d tigingã neba? Rɩk-y makre. (Ges-y fot-rãmbã me.)

¹³ D sẽn tõe n waoog d tẽed-n-taasã to-to. Kãsem-dãmba, modgd-y n zãmsd-y neb a taabã ne nonglem. (File. 8, 9) Y sã n wa segd n sagl ned bɩ y maan dẽ ne bʋgsem, la ra yɩ ne sũ-yikr ye. Saam-bi-pogse, y tõe n sõngame tɩ tigingã neb waoogd taaba, y sẽn na n modgd n da kẽesd y toog wɩdg wall tẽn-kãnem pʋgẽ ye. (Tɩt 2:3-5) Tõnd fãa tõe n wilgame tɩ d waoogda kãsem-dãmbã d sẽn na n teend-ba, la d wilgdẽ tɩ d sũur yaa noog ne-ba, b sẽn modgd wʋsg n lʋɩt taoor tigissã sasa la koɛɛgã mooneg sasa wã, n paas b sẽn sõngd neb nins sẽn “rɩk so-wẽngã” yĩnga.—Gal. 6:1; 1 Tɩm. 5:17.

¹⁴ Ra yaa toog ne saam-bi-poak yʋʋr sẽn boond t’a Rokiyo t’a waoog kãsem-soab sẽn sagl-a. A yeelame: “M da getame t’a pa gom ne-m ne bʋgsem ye. M sã n da be yiri m da wae n wɩt-a lame. M da getame t’a pa baood m neere, baa m sẽn da pa rat tɩ ned bãngã. Rẽ kɩtame tɩ m pa tũ a saglgã ye.” Bõe n sõng-a? A yeelame: “Mam Biiblã kareng wakate, m wa n karma 1 Tesalonik rãmb 5:12, 13. M sẽn bãng tɩ m da pa waoogd saam-biigã, m sũur-kasetã ra ningd-m-la taale. Mam pʋʋsa a Zeova, la m maan vaeesg tõnd sɛbã pʋsẽ n bao sagls sẽn tõe n sõng-m tɩ m toeeme. M wa n bãngame tɩ yellã pa yit saam-biigã nengẽ ye. Yaa mam sẽn yaa wuk-m-meng soabã yĩnga. Masã m bãngame tɩ yɩl n tõog n waoogd m taabã, yaa tɩlɛ tɩ m yɩ sik-m-meng soaba. Mam ket n modgd n bɩɩsda sik-m-menga. La m miime tɩ m sẽn modgd n waoogd m taabã nooma a Zeova.”

D WILG TƖ D WAOOGDA NEB NINS SẼN NAN PA TŨUD A ZEOVA WÃ

15. Bõe yĩng tɩ tõe n yɩ toog tɩ d waoog neb nins sẽn nan pa tũud a Zeova wã?

¹⁵ Sẽn yaa toogã võore. Koɛɛgã mooneg sasa, d mi n segda neb manesem sẽn wilgd tɩ b pa nand Wẽnnaam la Biiblã ye. (Efɛɛ. 4:18) Neb kẽer yãka yam n na n kell n pa zɩɩlmã pʋgẽ, b sẽn wub-b to-to wã yĩnga. Tõe tɩ d tʋʋmã taoor dãmb wall d karen-saam-dãmbã pa nand d modgrã, pa rẽ bɩ yaa d tʋmd-n-taasã bɩ d karen-bi-taasã n yaa neb sẽn pa mi ned waoogre. D tõeeme n wa pa le waoogd neb a woto buud sõma, n pa le maand-b neer me ye.

16. Bõe yĩng tɩ tar yõod tɩ d waoog neb nins sẽn nan pa tũud a Zeova wã? (1 Pɩyɛɛr 2:12; 3:15)

¹⁶ Bõe yĩng tɩ d segd n waoogd-ba? Tẽeg-y tɩ d manesem sẽn yaa to-to ne neb nins sẽn nan pa tũud a Zeova wã tara yõod a nifẽ. Tẽn-tʋmd a Pɩyɛɛr tẽega kiris-nebã tɩ b manesem-sõngã tõe n kɩtame tɩ kẽer “waoog Wẽnnaam.” Rẽ n so t’a sagl-b tɩ b sã n wa na n gom bũmb nins b sẽn tẽedã yell bɩ b maan rẽ “ne bʋgsem la ne waoogr wʋsgo.” (Karm-y 1 Pɩyɛɛr 2:12; 3:15.) Kiris-ned sã n wa segd n gom bũmb nins a sẽn tẽedã yell bʋ-kaood taoor wall ne ned a to, a segd n maana rẽ ne waoogre, wa a yasa Wẽnnaam taoore. Sɩd me a Zeova kelgda bũmb nins d sẽn yetã, la a gũusd n get d sẽn yet rẽ to-to wã. Woto pa kɩt tɩ d rat n waoog neb nins sẽn nan pa tũud a Zeova wã sɩda?

17. Bõe la y tõe n maan n wilg tɩ y waoogda neb nins sẽn nan pa tũud a Zeova wã?

¹⁷ D sẽn tõe n waoog neb nins sẽn nan pa tũud a Zeova wã to-to. D sã n wa moond koɛɛgã, d pa tol n dat n maan tɩ yaa wa d pa nand neba, b sẽn pa wʋmd Biiblã goam võor sõma wã yĩng ye. D segd n tẽegame tɩ b tara yõod wʋsg Wẽnnaam nifẽ, n tagsdẽ tɩ b yɩɩda tõndo. (Aaze 2:7; Fili. 2:3) Ned sã n paoog yãmb y sẽn tẽed bũmb ninsã yĩnga, y segd n modgame n da maan n lebs ye. Wala makre, y pa na n gom n paoog-a ye. (1 Pɩy. 2:23) Y sã n gom n tudg bɩ y kos sugr zĩig pʋgẽ. Wãn to la y tõe n wilg tɩ y waoogda nebã y tʋʋmã zĩigẽ? Yɩ-y ned sẽn tʋmd sõma, la y modg n tall manesem-sõng ne y tʋmd-n-taasã, la ne y tʋʋmdã taoor dãmba. (Tɩt 2:9, 10) Y sã n yaa ned sẽn tʋmd ne pʋ-peelem la ne y sũur fãa tõe tɩ kẽer pẽge, tɩ sãnda pa pẽg ye. La a Zeova yẽ sũur na n yɩɩ noogo.—Kolo. 3:22, 23.

18. Bõe yĩng tɩ tar yõod tɩ d waoogd d taabã?

¹⁸ Y pa ne tɩ bũmb wʋsg n kɩt tɩ d segd n waoogd d taabã sɩda? D yãame tɩ d sã n waoogd d zakã rãmba, d waoogda a Zeova. Woto me d sã n waoogd d tẽed-n-taasã, d waoogda d Ba sẽn be saasẽ wã. Sẽn paase, d sã n waoogd neb nins sẽn nan pa tũud a Zeova wã, tõe n kɩtame tɩ b wa waoog tõnd Wẽnnaamã sẽn yaa kãsengã. Baa neb kẽer sã n pa waoogd tõndo, tara yõod tɩ d ket n waoogd-ba. Bõe yĩnga? Bala a Zeova na n ning-d-la barka. A yeelame yaa: “Ned ning sẽn waoogd maam, mam na n waoog-a lame.”—1 Sãm. 2:30.