Sõng-y neb nins sẽn dat n bãng Wẽnnaamã

1. D sã n wa moond koɛɛgã, nebã manesem yaa wãna? (Tʋʋma 13:47, 48; 16:14, 15)

PIPI kiris-nebã wakatẽ, neb wʋsg sẽn wʋm koe-noogã sũy yɩɩ noogo, tɩ b yãk yam n lebg kiris-neb zĩig pʋgẽ. (Karm-y Tʋʋm 13:47, 48; 16:14, 15.) Rũndã-rũndã me, neb kẽer sũy yɩɩ noogo, b sẽn wʋm koe-noogã pipi wã. Sãnda ra pa rat n kelge, la b wa n toeema yam n zãms Biiblã n sɩng a Zeova tũubu. Koɛɛgã mooneg sasa, d sã n wa seg ned sẽn dat n bãng Biiblã sẽn yetã, bõe la d segd n maane?

2. Bõe yĩng tɩ d tõe n dɩk sõng nebã tɩ b lebg a Zeezi karen-biisã n mak ne ned sẽn tʋmd zẽed zĩigẽ?

² D tõe n dɩka sõng nebã tɩ b lebg Kirist karen-biisã n mak ne ned sẽn tʋmd a zẽed zĩigẽ. Zẽedã zĩigẽ tɩɩg ning biis sã n bɩ a na n wobame, la a ket n kood zĩis a taabã la a zãgsd koom. Woto me, d sã n yã ned sẽn dat n kelg koe-noogã, d na n sõng-a lame sẽn na yɩl t’a lebg Kirist karen-biig tao-tao. La d na n ket n sõngda neb nins sẽn nan pa mi tɩ koe-noogã b sẽn kelgdã tara yõod wʋsgã. (Zã 4:35, 36) Yam-vẽenemã tõe n sõng-d lame tɩ d bãng d sẽn tõe n sõng ned kam fãa to-to. Bɩ d bao n bãng d sẽn tõe n maan to-to pipi sõsgã sasa, n sõng neb nins sẽn dat n bãng Wẽnnaam zĩig pʋgẽ wã. D leb n na n yãa d sẽn tõe n sõng neb a woto to-to tɩ b sɩng a Zeova tũubu.

D SẼN TÕE N SÕNG NEB NINS SẼN DAT N BÃNG WẼNNAAMÃ TO-TO

3. Koɛɛgã mooneg sasa, d sã n yã ned sẽn dat n bãng Wẽnnaam bõe la d segd n maane? (1 Korẽnt rãmbã 9:26)

³ Koe-moonegã sasa, d sã n yã ned sẽn dat n bãng Wẽnnaam, d rat n sõng-a lame t’a rɩk sor ning sẽn tar n dabd vɩɩm zĩigẽ wã tao-tao. Sã n wa yaa woto, d tõe n kãaba a soabã Biibl zãmsg pipi sõsgã bala, la d bool-a tõnd tigissã.—Karm-y 1 Korẽnt rãmb 9:26.

4. Togs-y kibar sẽn wilgd ned sẽn sak Biibl zãmsg zĩig pʋgẽ.

⁴ D kãabd nebã Biibl zãmsgo. Neb nins d sẽn sõsd ne wã tõe n saka Biibl zãmsg zĩig pʋgẽ. Wala makre, Kanada bi-pugl a ye n yã a Zeova Kaset rãmb sẽn moond koɛɛg ne perzãntoaare, n kolg n yãk Vɩɩmd-y wakat sẽn kõn sa! borsɩɩrã. Yɩɩ lamus daare. Saam-bi-poak ning sẽn da yas perzãntoaarã sɛɛgẽ wã yeel-a lame tɩ d tara seb-kãng n zãmsd nebã Biiblã zaalem. Bi-puglã yeelame t’a rata Biiblã zãmsgo, n kõ saam-bi-poakã a telefõn nimero. Daar-n-kãng bala, bi-puglã toola saam-bi-poakã mesaaz n gom Biiblã zãmsg yelle. Saam-bi-poakã yeelame t’a na n pɩʋʋga wɩkɛnnã, tɩ bi-puglã sok-a yaa: “Yãmb pa tõe n wa beoog la? M tara sẽka.” B sɩnga Biiblã zãmsg arzũm-kãng bala. Bi-puglã kẽnga a pipi tigsg wɩkɛn-kãng bala, n ket n tũud bũmb nins a sẽn zãmsdã.

5. Ned sã n pa rat n sɩng Biibl zãmsg zĩig pʋgẽ, bõe la d tõe n maane? (Ges-y fot-rãmbã me.)

⁵ La pa neb nins fãa sẽn kelgd koe-noogã n na n sak n sɩng Biiblã zãmsg zĩig pʋgẽ wa bi-pugl-kãng ye. Kẽer nengẽ, tõe n kaoosa bilf tɩ b yaool n wa sak n sɩng Biiblã zãmsgo. Tõe n yɩɩ tɩlɛ tɩ d reng n sõs ne a soabã bũmb sẽn noom-a zugu. La d sã n kell n tall yam-sõngo, n ket n wilgdẽ t’a soabã yell pak-d lame, tõe tɩ pa na n kaoos la d tõog n sɩng Biiblã zãmsg ye. D sã n wa rat n kãab ned Biibl zãmsgo bõe la d tõe n yeele? D ges saam-biis la saam-bi-pogs sẽn tõogd n sɩngd Biibl zãmsg nana-nana sẽn yeel rẽ wɛɛngẽ.

6. Y sã n sõs ne ned t’a sak n kelge, bõe la y tõe n yeel tɩ pak sor tɩ y le wa nindaare?

⁶ Koe-moondb la so-pakdb nins b sẽn sokã kẽer yeelame tɩ zĩis kẽere, yɩta sõma tɩ d sã n na n kãab ned Biibl zãmsg bɩ d ra gom “zãmsgo,” “Biibl zãmsg” wall “zãms-y” yell ye. B yãame tɩ sẽn sõngd-b n tɩ yɩɩd yaa b sẽn na n gom “sõsg” la “bao n wʋm Biiblã goam võor” yelle. Sẽn na yɩl t’a soabã le rat n sõs ne-y nindaare, sõsgã baasgẽ y tõe n yeelame yaa: “Yãmb pa ne tɩ Biiblã tõe n sõnga tõnd tɩ d paam sogsg nins sẽn tar yõodã leoor sɩda?” Pa rẽ bɩ y yeel yaa: “Biiblã pa tũudum sebr bal ye. A sõngda tõnd bũmb wʋsg wɛɛngẽ.” Rẽ poore y tõe n paasame yaa: “Pa baood tɩ d sõs n kaoos ye. Minit piig bɩ piig la a nu pʋgẽ, d tõe n bao n bãnga bũmb sẽn na n naf-y wʋsgo.” Pa tɩlɛ tɩ y gom sɛk yelle, pa rẽ bɩ y yeel a soabã tɩ y na n wata semen fãa ye. Bala rẽ tõe n kɩtame t’a yɛɛse.

7. Wakat-bʋg la neb kẽer bãng tɩ kiris-nebã sẽn zãmsd nebã bũmb ninsã la sɩda? (1 Korẽnt rãmbã 14:23-25)

⁷ D bool nebã tɩ b wa d tigissã. Wõnda tẽn-tʋmd a Poll dãmb wakatẽ wã, yɩɩ neb kẽer sẽn kẽng b pipi tigsg la b bãng tɩ kiris-nebã sẽn zãmsd nebã bũmb ninsã la sɩda. (Karm-y 1 Korẽnt rãmb 14:23-25.) A buud mi n maana rũndã-rũndã me. Nin-paals wʋsg sã n wat tigissã, bãmb ne a Zeova zoodã pãng paasda tao-tao. Y sã n sɩng Biiblã zãmsg ne neda, wakat-bʋg la y segd n bool-a t’a wa d tigissã? Vɩɩmd-y wakat sẽn kõn sa! sebrã sak 10 soabã gomda tigissã yelle. La pa tɩlɛ tɩ y zãms n ta be n yaool n sɩng a soabã boolg ye. Y pipi sõsgã sasa bala, y tõe n boola y kɛlgdã t’a wa wɩkɛnnã tigsga. Y tõe n togs-a-la sõsg zãma wã yĩngã gom-zugu, wall y gom bũmb d sẽn na n yã semen-kãng Gũusg Gasgã zãmsg pʋgẽ yelle.

8. D sã n wa na n bool ned d tigissã, bõe la d tõe n yeel a soabã? (Ezayi 54:13)

⁸ Y sã n wa na n bool ned t’a wa d tigsga, bɩ y wilg-a tɩ tõnd sẽn maand tigissã to-to wã yaa toor fasɩ ne tũudum a taabã. Biibl karen-biig a ye sẽn wa a pipi tigsg n yã d sẽn zãmsd Gũusg Gasgã to-to wã, a soka a karen-saambã yaa: “Sẽn lʋɩt-a taoorã mii nebã fãa yʋy la?” Saam-bi-poakã leok-a lame tɩ d modgd n na n bãnga d tigingã neb yʋya, wa d sẽn mi d zakã rãmb yʋyã. Biibl karen-biigã yeel-a lame tɩ bãmb wẽnd-doogẽ wã, yɛlã yaa toor fasɩ. D leb n tõe n wilga Biibl karen-biig bũmb a to sẽn kɩt tɩ tõnd tigissã yaa toor ne tũudum a taabã tigissã. (Karm-y Ezayi 54:13.) D tigimda taab n na n waoog a Zeova, n bao n bãng-a n paase, la d keng taab raoodo. (Ebre. 2:12; 10:24, 25) Rẽ kɩtame tɩ b sigl tõnd tigissã sõma sẽn na yɩl tɩ d tõogd n zãmsd bũmb wʋsgo, n pa naag ne tũudum yel-maandɩ ye. (1 Kor. 14:40) D meta d Rĩungã rot n pa nags-b ne bũmb wʋsgo, d sẽn pa rat tɩ bũmb tiis-d zãmsgã sasa wã yĩnga. D pa na n tol n pẽg politik sull a ye wall d paoog a to ye. Bala d pa kẽesd d toog politikã yɛlẽ ye. D tigissã sasa, tãsg wall kɩɩs-taab me ka be ye. Y tõe n deng n wilga y Biibl karen-biigã Bõe la b maand Rĩung roogẽ? video wã. Woto, a na n bãnga d sẽn maand d tigissã to-to nand t’a kẽnge.

9-10. Y sã n wa na n bool ned t’a wa d tigsga, bõe la y tõe n yeel tɩ sõng-a t’a bas a yam n wa? (Ges-y fotã me.)

⁹ Neb kẽer yɛɛsdame n pa rat n wa d tigissã, bala b tagsdame tɩ b na n wa yeel-b lame tɩ b toeem tũudum. D tõe n yeela d sẽn boond a soabã t’a bas a yam tɩ d nong n boonda nebã d tigissã, la tɩ d pa pẽdgd-b n dat tɩ b yeel bũmb wall b maan bũmb tigissã sasa ye. Ned tõe n waa ne a zak rãmba, baa ne a kom-bõoneg menga. D tigissã sasa, d pa welgd kambã toor n zãmsd-b ye. Roagdbã ne b kambã naagda taab n zĩ n kelgdẽ. Woto, roagdbã tõe n basa b yam tɩ baa fʋɩ pa na n paam b kambã, la b mi bũmb nins b sẽn zãmsd-bã me. (Tõo. 31:12) D tigissã sasa, d pa pɩʋʋgd ne lepr wall bũmb a to n kos ligd ye. D tũuda noor ning a Zeezi sẽn kõ wã. A yeelame: “Yãmb deega zaalem, bɩ y kõ zaalem.” (Mat. 10:8) Y leb n tõe n yeela a soabã tɩ pa tɩlɛ t’a ning fut ligd sẽn yaa toog n yaool n wa tigsg ye. Wẽnnaam geta sẽn be ned sũurẽ, pa a soabã yalẽ ye.—1 Sãm. 16:7.

¹⁰ Y sẽn bool a soabã sã n wa tigsga, bɩ y modg t’a yam gãand bãane. Sõng-y-yã-a t’a bãng kãsem-dãmb a wãna, la koe-moondb a taaba. A sã n neẽ tɩ neb a taabã nong-a lame la t’a yell pak-b lame, tõe n kɩtame t’a le wa nindaare. A sã n pa tar Biible, bɩ y naag taab n karem vɛrse-rãmbã yãmb meng Biiblã pʋgẽ tigsgã sasa, la y sõng-a t’a tõog n kelg sõsgã wall zãmsgã n wʋm a võore.

D SẼN TÕE N SÕNG NED SẼN SAK N SƖNG BIIBLÃ ZÃMSG TO-TO

11. Bõe la y tõe n maan tɩ zãmsgã zems ne y Biibl karen-biigã sẽk sẽn yaa to-to wã?

¹¹ Ned sã n sak n na n zãms Biiblã, bõe la d segd n ning d yamẽ? Sak-y n zãmsd-y-yã a soabã tɩ zemsd ne a sẽkã sẽn yaa to-to wã. Wala makre, y sã n yãk wakat takɩ zãmsgã yĩng bɩ y modgd n kẽnd wakat kãnga, baa yãmb babgẽ wã nebã sã n pa getẽ tɩ kẽng sɛk a wakat tara yõodo. Sẽn paase, yɩta sõma tɩ y maan pipi zãmsgã koɛɛg-koɛɛga. Koe-moondb kẽer sẽn zãms neb wʋsg Biiblã yeelame tɩ yɩta sõma tɩ y baas zãmsgã pĩnda, baa a soabã sã n dat n zãmsa bũmb wʋsgo. Ra gomd-y wʋsg me ye. Kõt-y y Biibl karen-biigã weer t’a togsd sẽn be a sũurẽ wã.—Yel. 10:19.

12. Ned sã n sak n na n sɩng Biiblã zãmsgo, d bõn-daabã segd n yɩɩ bõe?

¹² Sɩngrẽ wã bala, d bõn-daabã yaa sõng d Biibl karen-biigã t’a bãng a Zeova la a Zeezi, n wa nong-ba. Sẽn na yɩl n maan woto, d segd n wilgd-a-la Biiblã sẽn yetã wakat fãa, la pa tõnd meng sẽn mi wã ye. (Tʋʋ. 10:25, 26) Tẽn-tʋmd a Poll kõo mak-sõng zĩ-kãng wɛɛngẽ. A sã n da zãmsd nebã, a ra wae n gomda a Zeezi Kirist sẽn yaa soab ning a Zeova sẽn tʋm t’a wa sõng tõnd tɩ d bãng-a la d nong-a wã yelle. (1 Kor. 2:1, 2) A Poll wilgame me tɩ tara yõod tɩ d sõng Biibl karen-biisã tɩ b bɩɩs zʋg-sõma d sẽn tõe n dɩk n mak ne sãnem, wanzuri la kug-neeba. (1 Kor. 3:11-15) Yaa zʋg-sõma wa tẽebo, yam, yam-vẽenem la a Zeova zoeese. (Yɩɩn. 19:9, 10; Yel. 3:13-15; 1 Pɩy. 1:7) Rɩk-y-yã a Poll togs-n-taare, n sõng y Biibl karen-biisã tɩ b paam tẽeb sẽn tar pãnga, la zood sẽn yaa sõma ne d Ba sẽn be saasẽ wã sẽn nong-dã.—2 Kor. 1:24.

13. Y sã n wa zãmsd ned Biiblã, wãn to la y tõe n wilg tɩ y yaa sũ-mar soab la wʋmda? (2 Korẽnt rãmbã 10:4, 5) (Ges-y fotã me.)

¹³ Rɩk-y-yã a Zeezi togs-n-taar n zãmsd nebã ne sũ-mare, la y yɩ wʋmda. Ra sokd-y y Biibl karen-biigã sogsg sẽn na n ning-a yãnd ye. Sã n wa yaa toog t’a wʋm bũmb võore, y tõe n basa rẽ la y zãms bũmb a to, n wa gom rẽ yell nindaare. Ra modg-y-yã-a t’a sak bũmb Biiblã sẽn yet ye. Kõ-y-yã-a weer t’a tags rẽ zug n wa toeem a tagsgã. (Zã 16:12; Kolo. 2:6, 7) Biiblã maka bũmb nins nebã sẽn tẽed tɩ pa sɩdã ne ‘bũmb sẽn vigl kãn-kãe’ d sẽn segd n tus n lubi. (Karm-y 2 Korẽnt rãmb 10:4, 5.) Tõe n yɩɩ toog ne Biibl karen-biig t’a bas bũmb a sẽn sɩng n tẽed hal sẽn kaoose. Woto wã, wall tɩ y ket n modgd n na n wilg-a t’a sẽn tẽed bũmb ningã pa sɩdã, y tõe n sõng-a lame t’a kɩs a Zeova sɩda. Woto, yɩta nana t’a toeem tagsgo.—Yɩɩn. 91:9.

D SẼN TÕE N SÕNG SẼN NAN SƖNG-B TIGISSÃ WAOONGÃ TO-TO

14. D manesem segd n yɩɩ wãn ne neb nins sẽn nan sɩng tigissã waoongã?

¹⁴ A Zeova ratame tɩ d tall manesem-sõng ne nebã fãa, n pa get ned sẽn yitẽ, a minund sẽn yaa a soab la a tarem ye. (Zak 2:1-4, 9) Woto wã, bõe la d tõe n maan n wilg tɩ d nonga neb nins sẽn wat d tigissã?

15-16. Bõe la d tõe n maan n sõng nin-paalsã sẽn wat d tigissã tɩ b yam gãand bãane?

¹⁵ Neb kẽer wata tõnd tigissã b sẽn dat n bãng d sẽn maand d tigissã to-to wã yĩng bala, pa rẽ bɩ yaa ned sẽn be zĩig a to n sagl-b tɩ b kẽnge. Woto wã, nin-paalg sã n wa d tigissã zĩigẽ, yɩta sõma tɩ d tɩ pʋʋs-a, n sõs ne-a. Wilg-y-yã a soabã tɩ y sũur yaa noog a sẽn wa wã, la ra maan-y tɩ loog noor ye. Yeel-y-yã-a t’a tõe n wa zĩnda ne yãmba. Y tõe n baoo Biibl wall sebr ning d sẽn zãmsdã n kõ-a, pa rẽ bɩ y lak y Biiblã wall y sebrã tɩ y naag taab n karme. Sẽn paase, tags-y n ges-y bũmb a to sã n bee y sẽn tõe n maan t’a yam gãand bãane. Rao a ye sẽn wa Rĩung roogẽ yeela saam-biig ning sẽn yɩ pipi n pʋʋs-a wã t’a yɛɛsdame, bala a pa maneg a meng sõma wa neb a taabã ye. Saam-biigã yeel-a lame t’a bas a yam, la a paas tɩ baa a Zeova Kaset rãmbã sẽn manegd b mens sõma tigissã yĩnga, b yaa wa neb a taabã bala. Raoã wa n deega lisgu, la a pa tol n yĩm saam-biigã sẽn leok-a to-to wã ye. La d sã n wa sõsd ne ned sẽn wa d tigsga, d segd n gũusame n da wa kẽes d toog yɛl sẽn pa pak-d pʋgẽ, pa rẽ bɩ n sok-a sogsg sẽn na n ning-a yãnd ye.—1 Pɩy. 4:15.

¹⁶ Bũmb a to me la d tõe n maan tɩ nin-paalsã yam gãand bãane. Wala makre, d sã n wa sõsd ne taaba, d sã n zẽk d nug n na n leok sokre, pa rẽ bɩ d sã n wa wɛgsd sõsg n segd n gom neb nins sẽn pa a Zeova Kaset rãmbã bɩ b sẽn tẽed bũmb ninsã yelle, d segd n maana rẽ ne waoogre. D segd n gũusame n da wa pʋd gom-biis sẽn na n sãam b sũuri, wall sẽn na n kɩt tɩ b getẽ tɩ d paoog-b lame ye. (Tɩt 2:8; 3:2) D pa segd n gom n paoog b sẽn tẽed bũmb ninsã me ye. (2 Kor. 6:3) Saam-biis nins sẽn wɛgsd sõss zãma wã yĩngã n segd n gũus ne rẽ n yɩɩda. B leb n tõe n wilgame tɩ b tagsda neb nins sẽn pa a Zeova Kaset rãmb n yaool n kelgd b sõsgã yelle, b sẽn na n maagd b yĩng n bilgd goam nins võor wʋmb sẽn tõe n yɩ toog ne-bã.

17. Koɛɛgã mooneg sasa d sã n yã ned sẽn dat n bãng Wẽnnaam, d bõn-daab segd n yɩɩ bõe?

¹⁷ Beoog sẽn vẽeg fãa, moon koɛɛgã n sõng nebã tɩ b lebg a Zeezi karen-biisã manegd n lebga tʋʋm-yãgdem. Sẽn paase, d ket n yãta neb “sẽn tar yam ning sẽn zems ne vɩɩm sẽn ka sɛtã.” (Tʋʋ. 13:48) D sã n wa yã ned a woto buud fãa, d segd n kãab-a-la Biibl zãmsgo, wall d bool-a t’a wa d tigsga. D sã n maan woto, d tõe n sõng-a lame t’a sɩng “sor ning sẽn tar n dabd vɩɩm zĩigẽ wã” tũubu.—Mat. 7:14.