A Zeezi “zãmsa sakre”

A Zeezi ra sɩng n sakda a Zeova. (Zã 8:29) La bõe yĩng tɩ Biiblã yeel t’a “zãmsa sakr namsg ning a sẽn paamã maasem yĩnga”?—Ebre. 5:8.

A Zeezi sẽn wa n be tẽngã zugã, a yɛlã sẽn da yaa to-to wã ra yaa toor fasɩ ne a sẽn wa n be saasẽ wã. Wala makre, baa neb nins sẽn wub-a wã sẽn da yaa wẽn-zoɛtbã, b ra yaa neb sẽn pa zems zãnga. (Luk 2:51) Tũudum taoor dãmb sẽn yaa pʋ-lik rãmba, la goosneema tʋm-tʋmdb sẽn yaa zãmb dãmb n nams-a. (Mat. 26:59; Mark 15:15) Sẽn paase, a kii kũ-toaaga. Biiblã yeelame t’a “sika a meng n lebg sakd n tãag kũum.”—Fili. 2:8.

Zu-loees nins a Zeezi sẽn paam a sẽn wa n be tẽngã zugã kɩtame t’a zãms sakr buud a sẽn zɩ n zãms saasẽ. Woto, a lebga Rĩm sẽn zems zãnga, la Maan-kʋʋdb kãsem sẽn tõe n kʋm tõndo. (Ebre. 4:15; 5:9) A Zeezi sẽn zãms sakr namsg ning a sẽn paamã maasem yĩngã kɩtame t’a maneg n tar yõod wʋsg a Zeova nifẽ. Tõnd me sã n kell n sak a Zeova baa zu-loe-kɛgems taoore, d manegd n talla yõod a nifẽ, n tõe n tʋm tʋʋmd ning fãa a sẽn na n kõ-d me.—Zak 1:4.