Karemdbã sogsgo

Yel-bũn 30:18, 19 pʋgẽ wã, b yeelame tɩ “rao manesem sẽn yaa to-to pʋg-sad nengẽ wã” yaa bũmb d sẽn pa ‘tõe n wʋm a võore.’ Gom-kãensã võor yaa bõe?

Neb wʋsg pa wʋmd gom-kãensã võor sõma, baa Biibl-mitb kẽere. Ad b sẽn lebg vɛrse-kãens to-to Dũni-paalgã lebgr pʋgẽ: “Bũmb a tãab n be n yɩɩd mam sẽn tõe n wʋm b võore [bɩ, “sẽn yaa yel-solemd wʋsg ne maam,” notã]. A naas n be mam sẽn pa wʋmd b võore: Yaa sɩlg sẽn tũud sor ning saasẽ, waaf sẽn tũud sor ning pĩig kugr zugu, koom-koglg sẽn tũud sor ning mogr zugu, la rao manesem sẽn yaa to-to pʋg-sad nengẽ wã.”—Yel. 30:18, 19.

Pĩndã, d ra tagsdame tɩ b sẽn gom “rao manesem sẽn yaa to-to pʋg-sad nengẽ wã” yellã, yaa bũmb sẽn pa sõma yell la b ra gomda. Bõe yĩnga? Yel-bũn sak 30 wã vɛrse-rãmb a taab pʋsẽ, b goma bõn-wẽns sẽn pa na n tol n yeel tɩ “sekame” yelle. (Yel. 30:15, 16) Sẽn paase, vɛrse 20 wã pʋgẽ, b goma “pʋg-yoodr” sẽn yeel t’a pa maan bũmb sẽn yaa wẽng yelle. Rẽ kɩtame tɩ d ra tagsdẽ tɩ vɛrse-kãens pʋsẽ, b gomda bũmb sẽn maan n pa bas bãnd yelle. D ra tagsdame tɩ wilgdame tɩ rao tõe n maana bũmb tɩ ned pa bãnge, wa sɩlg sẽn lugd yĩngrã, wa waaf sẽn kẽnd kugr zugu, pa rẽ bɩ pĩnd wẽndẽ koom-koglg sẽn kẽnd mogrã zug n pa basd bãndã. Rẽ kɩtame tɩ d ra tagsdẽ tɩ “rao manesem sẽn yaa to-to pʋg-sad nengẽ wã” bilgda bõn-wẽnga, bi-bɩɩg sẽn tõe n belg pʋg-sad ne sɩlem to-to n paam-a wã.

La bũmb wʋsg n kɩt tɩ d tõe n yeel tɩ vɛrse-kãens gomda bõn-sõng yelle. Biibl-gʋlsdã ra gomda bũmb toor-toor sẽn noom-a yell bala.

Ebre wã pʋgẽ, b sẽn gom to-to wã me wilgdame tɩ vɛrse-kãng gomda bõn-sõng yelle. Sebr a ye sẽn wilgd Ebre wã gom-biis võor yeelame tɩ gom-biis nins b sẽn lebg tɩ “yɩɩd mam sẽn tõe n wʋm b võor” Yel-bũn 30:18 pʋgẽ wã “bilgda bũmb sẽn maan tɩ ned getẽ tɩ yaa bõn-kãsenga, tɩ yaa yel-solemde, wall tɩ wõnda bũmb sẽn pa tõe menga.”

A Crawford Toy sẽn yaa Harvard inivɛrsite wã sẽn be Etazĩni wã karen-saambã me yeelame tɩ Biiblã vɛrse-kãng gomda bõn-sõng yelle. A yeelame: “Biibl-gʋlsdã sẽn da rat n wilg bal yaa tɩ bũmb nins yell a sẽn gomã yaa wa yel-solemde.”

Rẽnd zemsame tɩ d tẽ tɩ goam nins sẽn be Yel-bũn 30:18, 19 pʋgẽ wã gomda bõn-kãsems yelle, bũmb toor-toor sẽn yɩɩd tõnd sẽn tõe n wʋm b võore. Tõnd me yaa wa Biibl-gʋlsdã. D sã n ne sɩlg sẽn tõe n lug yĩngr to-to wã, waaf sẽn pa tar nao n yaool n tõe n kẽn pĩig kugr zugã, koom-koglg sẽn yaa zɩsg n yaool n tõe n pasg mogrã n zãag zĩiga, la bi-bɩɩg ne pʋg-sad sẽn tõe n wa nong taab hal n kẽ kãadem tɩ b vɩɩmã noome wã, lingd-d lame.