A Zeova tõe n sõng-d lame tɩ d paam “sũ-no-kãsenga”

1-2. a) Neb wʋsg yɛl yaa wãn rũndã-rũndã? b) Bõe yell la d na n gom sõs-kãngã pʋgẽ?

RŨNDÃ-RŨNDÃ, sẽn pak neb wʋsg yaa b we n modg n paam sũ-noogo. La baa b sẽn modgdã, b pa paamd sũ-noog hakɩɩk ye. Neb wʋsg kẽnda ne sũ-sãamse, n tagsdẽ tɩ b yɛlã pa na n tol n toeem ye. Neb sẽn tũud a Zeova meng tõe n wa talla tagsg a woto buudu. Rũndã-rũndã sẽn yaa “yaoolem wakatã” yĩnga, d miime tɩ d tõe n paama zu-loe-kɛgemse, hal tɩ “vɩɩmã lebg toog” ne-do.—2 Tɩm. 3:1.

² Sõs-kãngã pʋgẽ d na n yãa bũmb nins sẽn tõe n menes d sũ-noogã, la d sẽn tõe n maan to-to n le paam sũ-noogo. La d na n deng n bao n bãnga sũ-noog hakɩɩkã sẽn yitẽ.

SŨ-NOOG HAKƖƖKÃ SẼN YITẼ

3. Bũmb nins a Zeova sẽn naanã sõng-d lame tɩ d bãng bõe yẽ mengã zugu? (Ges-y fot-rãmbã me.)

³ A Zeova tara sũ-noog wakat fãa. A ratame tɩ tõnd me paam sũ-noogo. Rẽ n so t’a naan bũmb wʋsg sẽn kõt-d sũ-noogo. Wala makre, d sã n get tẽngã sẽn yaa neerã, kõbg buud toor-toorã, la rũms kẽer sẽn mi n deemdẽ wã noom-d lame. D sã n dɩt rɩɩb d sẽn nong me, noom-d lame. Wẽnnaam sɩd nong-d lame, n dat tɩ d vɩɩmã yɩ noogo.

Wob-bila: Image © Romi Gamit/Shutterstock. Pĩngõwẽ-bõonese: Vladimir Seliverstov/500px via Getty Images. Bulli: Rita Kochmarjova/stock.adobe.com. Dofẽ-rãmb a yiibu: georgeclerk/E+ via Getty Images

4. a) Bõe n kɩt t’a Zeova tar sũ-noogo, baa a sẽn ne ninsaalbã sẽn namsdã? b) Bõe la a Zeova kõt tõndo? (Yɩɩn-sõamyã 16:11)

⁴ Baa a Zeova sẽn yaa “Wẽnnaam sẽn yaa sũ-noog soabã,” a mii zu-loeesã sẽn namsd ninsaalbã to-to tẽngã zugã sõma. (1 Tɩm. 1:11) La a pa bas tɩ rẽ boog a sũ-noogã ye. A miime tɩ namsgã fãa tara tɛka. Yẽ mengã n yãk wakat ning a sẽn na n kɩt tɩ b sa wã. A maaga a yĩng n gũud daar ning a sẽn na n kɩt tɩ namsgã la sũ-sãamsã fãa sa wakat fãa yĩngã. La nand tɩ wakat kãng ta, a mii zu-loeesã sẽn namsd tõnd to-to wã, n dat n sõng-do. Bõe la a maand n sõngd tõndo? Bũmb a ye yaa a sẽn kõt-d sũ-noogã. (Karm-y Yɩɩn-sõamyã 16:11.) D ges a sẽn sõng a Zeezi sẽn yaa a Bi-riblã to-to t’a paam sũ-noogo.

5-6. Bõe n kɩt t’a Zeezi tar sũ-noogo?

⁵ A Zeova bõn-naandsã fãa sʋka, a Zeezi sũ-noog n yɩɩda. Bõe yĩnga? Ad bũmb a yiib sẽn kɩt tɩ yaa woto: 1) A yaa “Wẽnnaam ning ninsaal sẽn pa tõe n yã wã wõnego,” n dɩkd a Ba wã togs-n-taar bũmb fãa pʋgẽ. (Kolo. 1:15; 1 Tɩm. 6:15) 2) A Zeezi zĩnda ne a Ba wã sẽn yaa soab ning nengẽ sũ-noogã sẽn yitã n kaoos n yɩɩd bõn-naandsã fãa.

⁶ A Zeezi tara sũ-noogo, bala a maanda bũmb nins a Ba wã sẽn datã wakat fãa. (Yel. 8:30, 31; Zã 8:29) A sẽn maand sɩdã kɩtame t’a tat a Zeova yam.—Mat. 3:17.

7. Bõe la d tõe n maan n paam sũ-noog hakɩɩka?

⁷ Tõnd me tõe n paama sũ-noog hakɩɩka, d sã n kolgd a Zeova sẽn yaa soab ning nengẽ sũ-noogã sẽn yitã. Bɩ d baood sẽk n zãmsd Biiblã n bãngd a Zeova n paasdẽ. D sã n bãngd a Zeova n paasdẽ la d rɩkd a togs-n-taare, d sũ-noogã me na n paasdame. Sẽn paase, d sã n maand Wẽnnaam daabã n miẽ tɩ d tata a yam, d na n tara sũ-noogo.a (Yɩɩn. 33:12) Yaa sɩd tɩ wakat ningã d sũur na n mi n sãamame. Tõe n yɩɩ woto n kaoos rasem a wãna, wall kaoos n yɩɩg rẽ menga. Sã n wa yaa woto, rat n yeelame t’a Zeova sũur pa noom ne-d bɩ? Ayo! D sẽn yaa neb sẽn pa zems zãngã yĩnga, wakat ninga d bũmb tõe n zabdame, d sũur tõe n sãamame, wall d yam ka d meng ye. Sã n wa yaa woto a Zeova wʋmda rẽ võore. (Yɩɩn. 103:14) Bɩ d gom bũmb nins sẽn tõe n menes d sũ-noogã yelle, la d bao n bãng d sẽn tõe n maan to-to n le paam sũ-noogo.

RA BAS-Y TƖ BAA FƲƖ MENES Y SŨ-NOOGÃ YE

8. Wãn to la zu-loeesã tõe n nams tõndo?

⁸ D sã n wa tar zu-loeese, tõe n yɩɩ toog tɩ d tall sũ-noogo. Tõe tɩ b namsd-y-la y sẽn tũud a Zeova wã yĩnga, pa rẽ bɩ yaa sabab-wẽng n paam-y tɩ y namsdẽ, wall yaa bãaga, kʋʋlem bɩ talemd n namsd-yã. Zu-loees a woto tõe n sãamda d sũur wʋsgo, sẽn yɩɩd fãa d sã n pa tõe n maan bũmb n toeem yɛlã. Sɩd me, Biiblã yeelame tɩ “sũ-sãang komsda raoodo.” (Yel. 15:13) Yɩɩ woto ne a Babis sẽn yaa kãsem-soabã. A kẽema, a ba wã ne a ma wã kii yʋʋm a naas pʋgẽ bala. A yeelame: “M da getame tɩ m yaa m yembre, n pa tar sõangd ye. Sẽn paase, m sũurã mi n sãamda wʋsgo. Bala m da tara bũmb wʋsg n segd n maane, tɩ kɩt tɩ m da pa tõe n paam sẽk sõma n zĩnd ne m roagdbã la m kẽemã nand tɩ b ki ye.” Sɩd-sɩda, zu-loeesã tõe n komsa d raoodo, la kɩt tɩ d pãngã sa.

9. Bõe n tõe n sõng-d tɩ d le paam sũ-noogo? (Zeremi 29:4-7, 10)

⁹ Bõe n tõe n sõng-d tɩ d le paam sũ-noogo? D sã n dat n le paam sũ-noogo d segd n basame n pa maand yɩɩr bũmb nins d sẽn pa tõe n toeemã wɛɛngẽ, la d wilgdẽ tɩ d sũur yaa noog ne bũmb nins d sẽn tarã. Dũniyã nebã kẽer tagsdame tɩ yaa tɩlɛ tɩ d yɛlã yɩ sõma tɩ d yaool n paam sũ-noogo, la pa woto ye. Wala makre, b sẽn wa n tall Zʋɩf-rãmbã n kẽng yembd Babilonnã, a Zeova yeel-b lame tɩ b modg tɩ b vɩɩmã yɩ noog be. (Karm-y Zeremi 29:4-7, 10.) Rẽ sõngd-y lame tɩ y bãng bõe? Baa y yɛlã sẽn yaa a soab bɩ y bao n bãng bõn-sõma nins y sẽn tarã, n maan sũ-noog ne rẽ. Tẽeg-y t’a Zeova pa na n tol n daag-y n bas ye. A na n sõng-y lame. (Yɩɩn. 63:7; 146:5) Saam-bi-poak a ye yʋʋr sẽn boond t’a Efi maana agsɩdã n lebg koamsa. A yeelame: “Mam paamame t’a Zeova ne m zakã rãmb la tigingã neb sõng-m wʋsgo. Rẽ kɩtame tɩ m sã n koms raood n base, na n yɩɩ wa m yaa sõm-zɩta. Mam dat n wilga a Zeova ne m zo-rãmbã tɩ m sũur yaa noog b sẽn sõngd-m woto wã.”

10. Bõe yĩng tɩ d tõe n kell n tall sũ-noogo, baa d sã n wa tar zu-loeese?

¹⁰ Baa d yɛlã sã n pa wa d sẽn datã, pa rẽ bɩ yaa yel-beed n paam tõnd bɩ d zakã rãmba, d ket n tõe n talla sũ-noogo.b (Yɩɩn. 126:5) Bõe yĩnga? Bala d sũ-noogã pa be ne d yɛlã sẽn yaa to-to wã ye. A Maariya sẽn yaa so-pakdã yeelame: “Baa d sã n wa tar zu-loeese d ket n tara sũ-noogo, bala d tẽegda bũmb nins a Zeova sẽn pʋlem-dã yelle. Rẽ pa rat n yeel tɩ d pa na n tol n yãbe, wall tɩ d pa na n tol n togs ned bũmb ning sẽn be d sũurẽ wã ye. La tõnd Ba wã tõe n sõnga tõnd tɩ d kell n tall sũ-noogo, baa bũmb ning sẽn namsd tõndo.” Tẽeg-y tɩ baa d yɛlã sẽn yaa kãn-kãe to-to rũndã-rũndã, d zu-loeesã pa na n kell n pa ne-d wakat fãa ye. Ka la bilfu, a Zeova na n kɩtame tɩ bũmb nins fãa sẽn namsd tõnd la kõt-d sũ-sãamsã sa.

11. Wãn to la tẽn-tʋmd a Poll kibarã kengd y raoodo?

¹¹ Wakat ninga, d tõe n tagsdame tɩ d sẽn tar zu-loeesã yaa d sẽn pa tat a Zeova yam yĩnga. Sã n wa yaa woto, yɩta sõma tɩ d tags neb sẽn tũ a Zeova ne b sũy fãa n baas n paam zu-loe-kɛgems yelle. Wala makre, tẽn-tʋmd a Polle. Yaa a Zeezi meng a toor n yãk-a t’a moon “bu-zẽmsã ne rĩm-dãmbã la Israyɛll nebã” koe-noogã. (Tʋʋ. 9:15) Sɩd yaa zu-zẽkr tɛkẽ! La a Poll paama zu-loees wʋsgo. (2 Kor. 11:23-27) A Poll sẽn da tar zu-loees tɩ wõnd b pa na n sa wã wilgdame t’a Zeova sũur da pa noom ne-a bɩ? Ayo! A sẽn da tõogd toogã wilgdame t’a Zeova ra ningd-a-la barka. (Rom. 5:3-5) Yaa woto ne yãmb me. Y ket n maanda sɩd ne a Zeova baa ne y zu-loeesã fãa. Rẽnd yãmb me tõe n basa y yam t’a Zeova sũur nooma ne-yã.

12. D sã n pa tõe n tʋm a Zeova tʋʋmdã wa d sẽn datã, bõe n tõe n maane?

¹² D sã n pa tõe n maan bũmb d sẽn da magd n na n maan a Zeova tʋʋmdã pʋgẽ, tõe n booga d sũ-noogã. (Yel. 13:12) D nonga a Zeova, tɩ d sũur yaa noog ne bũmb nins a sẽn maan n kõ-dã me. Rẽ n so tɩ d baood n maan bũmb wʋsg a tʋʋmdã pʋgẽ. La d sã n dat n maan bũmb sẽn yɩɩd d pãnga, d tõe n wa komsa raoodo. (Yel. 17:22) So-pakd a ye yʋʋr sẽn boond t’a Oliviya yeelame: “Mam da rat n kẽnga Rĩungã koe-moondb lekollã, tɩ rẽ poor bɩ m tɩ sõng n moon tẽn-zẽnga, wall m tɩ sõng ne Ramapo rotã meebo. La m yɛlã wa n toeemame, tɩ m pa le tõe n maan bõn-kãensã baa a yembr ye. Sãama m sũur hal wʋsgo. F sã n dat n maan bũmb kẽer n yaool n pa tõe, komsda raoodo.” Neb wʋsg tagsda woto.

13. D yɛlã sẽn yaa to-to wã sã n kɩt tɩ d pa tõe n tʋm a Zeova tʋʋmdã wa d sẽn datã, bõe la d tõe n maane?

¹³ Bõe n tõe n sõng-d tɩ d le paam sũ-noogo? Tẽeg-y t’a Zeova pa dem-dem ye. A pa rat tɩ d maan tɩ yɩɩg d pãng ye. Leb n pa bũmb nins d sẽn tõogd n maandẽ wã n kɩtd tɩ d tar yõod a nifẽ ye. A Zeova ratame tɩ d yɩ sik-m-mens rãmba, la d maand sɩd ne-a. (Mis. 6:8; 1 Kor. 4:2) Bũmb ning sẽn noom a Zeova n yɩɩd yaa tõnd sẽn sɩd yaa ned ning buudã, pa d sẽn tõogd n maandẽ wã ye. Rẽnd pa zems tɩ d bao n maan tɩ yɩɩg d pãng ye. Woto wã, y yɛlã sẽn yaa to-to wã sã n kɩt tɩ y pa tõe n tʋm a Zeova tʋʋmdã wʋsg wa y sẽn datã, bɩ y modgd n maand bũmb nins y sẽn tõe n maanã. Wala makre, y tõe n sõnga kom-bɩɩsã tɩ b paam minim n paase, wall y maand bũmb toor-toor n sõngd sẽn kʋʋl-bã tɩ kengd b raoodo. Y leb n tõe n tɩ kaaga neda, n bool-a ne telefõnne, pa rẽ bɩ y tool-a mesaaz n keng a raoodo. A Zeova sã n neẽ tɩ y maanda bũmb nins y sẽn tõe wã, noom-a lame. A na n ning-y-la barka, n sõng-y tɩ y paam sũ-noogo. La tẽeg-y tɩ ka la bilfu, d na n tõog n maana bũmb wʋsg a Zeova yĩng dũni-paalgã pʋgẽ, tɩ yɩɩg tõnd sẽn tõe n mamsã menga. A Oliviya sẽn yaa saam-bi-poak ning yell d sẽn zoe n gomã tagsda rẽ yell tɩ kengd a raoodo. A yeelame: “M sã n mi n koms raoodo m tẽegdame tɩ m na n wa vɩɩmda wakat sẽn kõn sa, la tɩ ne a Zeova sõngre m na n tõog n maana bũmb kẽer m sẽn dat n maanã dũni-paalgã pʋgẽ.”

14. Bõe me n tõe n boog d sũ-noogã?

¹⁴ Sã n yaa tõnd mengã yell bal n pak-d n yɩɩda, tõe n booga d sũ-noogã. Neb kẽer tũnugda ne rezo sosiyo-rãmbã n dat tɩ d tẽ tɩ yaa d sã n noogd d yõor wakat fãa la d tar sũ-noog hakɩɩka. B ratame tɩ d tẽ tɩ yaa d sã n maand bũmb nins sẽn noom tõndã, d sã n daad bũmb toor-toor la d togd sor n kẽnd n get zĩis sãndã la d paamd sũ-noog hakɩɩka. Bõn-kãensã maaneg pa wẽng ye. A Zeova naana tõnd tɩ d tõe n maan sũ-noog ne bõn-sõma nins a sẽn naanã. La neb wʋsg wa n bãngame tɩ bũmb nins bãmb sẽn da tagsd tɩ kõta sũ-noogã pa kõt-b sũ-noog hakɩɩk ye. A Eva sẽn yaa so-pakdã yeelame: “Sã n yaa bũmb nins sẽn noogd sũurã yell bal n pak-fo, bõn-kãens pa na n tol n sek-f ye.” Sã n yaa yõ-noogrã yell bal n pak-do, d pa tõe n pa paam sũ-sãams ye.

15. Yam-bʋg la d tõe n dɩk rĩm a Salomo kibarã pʋgẽ?

¹⁵ Rĩm a Salomo kibarã sõngda tõnd tɩ d bãng tɩ sã n yaa yõ-noogrã yell bal n pak-do, baasda ne sũ-sãamse. A maana bũmb toor-toor sẽn noom-a, n dat n bãng sã n na n kõ-a-la sũ-noogo. Wala makre, a rɩɩ rɩbd buud toor-toore, n kelg yʋʋm-teed sẽn wẽed tɩ noomẽ, la a ra teed ligd sẽn yaa toogo. La bõn-kãensã pa kõ-a sũ-noog ye. A yeelame: “Bũmb nins nif sẽn getã pa sekd-a, la tʋbr me sẽn kelgd bũmb ninsã pa pit-a ye.” (Koɛ. 1:8; 2:1-11) Neb kẽer tagsdame tɩ yaa f sẽn na n tar ligdi, la f maand bũmb nins fãa sẽn noom-fã la f paamd sũ-noogo. La yaa ziri fasɩ. Bõn-kãensã pa wat ne sũ-noog hakɩɩk ye.

16. Bõe yĩng tɩ d sã n maand bũmb n sõngd d taabã bɩ kõt-d sũ-noogo? (Ges-y fot-rãmbã me.)

¹⁶ Bõe n tõe n sõng-d tɩ d le paam sũ-noogo? A Zeezi yeelame tɩ “kũun wata ne sũ-noog n yɩɩd reegre.” (Tʋʋ. 20:35) Kãsem-soab a ye yʋʋr sẽn boond t’a Alɛgsɩ yeelame: “Mam modgdame n maand baa yaa bõn-kɩds n sõngd m taabã. M sã n wa sõngd m taabã, m yĩmda bũmb nins m datã yelle, tɩ rẽ kõt-m sũ-noogo.” Bõe la yãmb tõe n maan n sõng neb a taabã? Y sã n wa yã tɩ ned sũur pa noom bɩ y keng a raoodo. Tõe tɩ y pa na n tõog n welg a zu-loɛɛgã ye. La y sã n maag y yĩng n kelg-a, n wilg tɩ y kʋmd-a lame, la y tẽeg-a t’a lob a zɩɩbã a Zeova zugu, tõe n bels-a lame. (Yɩɩn. 55:22; 68:19) Y tõe n tẽeg-a lame me t’a Zeova pa raag-a n bas ye. (Yɩɩn. 37:28; Eza. 59:1) Y tõe n maana bũmb takɩ me n sõng-a. Wala makre, y tõe n segla rɩɩb n kõ-a, wall y sõng-a t’a maan bũmb sẽn noom-a. Y leb n tõe n bool-a lame tɩ y naag taab n moon koe-noogã. Bala koɛɛgã mooneg kõt-d-la sũ-noog wakat fãa. Sak-y t’a Zeova tũnug ne-y n keng y taabã raoodo. D sã n tagsd d taabã yell n yɩɩd tõnd mengã, d na n paama sũ-noog hakɩɩka.—Yel. 11:25.

17. D sã n dat n paam sũ-noog hakɩɩka, bõe la d segd n maane? (Yɩɩn-sõamyã 43:4)

¹⁷ D sã n ket n paasd tõnd ne d Ba sẽn be saasẽ wã zoodã pãnga, d tõe n paama sũ-noog hakɩɩka. Biiblã yeelame t’a Zeova yaa tõnd “sũ-no-kãsenga.” (Karm-y Yɩɩn-sõamyã 43:4.) Rẽnd baa d sã n wa tar zu-loeese, d pa segd n maan yɩɩr wall d yɛɛs ye. D segd n kell n teega a Zeova sẽn yaa tõnd sũ-noogã yẽgrã.—Yɩɩn. 144:15.