Siglgã taoor lʋɩtb Sull nin-paal a yiibu

YƲƲMD 2024 zĩ-likr kiuug rasem a 5 wã, siglgã yʋʋm-yʋʋmd tigsgã sasa, b togsa koɛɛg sẽn yɩ nebã noogo. B wilgame tɩ b yãka saam-biig a Jody Jedele ne saam-biig a Jacob Rumph tɩ b lebg a Zeova Kaset rãmbã Siglgã taoor lʋɩtb Sull neba. B yiibã fãa sɩng n tũuda a Zeova na maan yʋʋm wʋsgo.

Saam-biig a Jedele roga Misuuri sẽn be Etazĩni soolmẽ wã. A roagdbã ra yaa a Zeova Kaset rãmba. B ra bee zĩig a Zeova Kaset rãmbã sẽn pa waooge. Rẽ kɩtame t’a ra paamd n sõsd ne saam-biis sẽn yit zĩis toɛy-toɛy n wat n sõngd n moond koɛɛgã be. A sẽn da ne b nonglmã la b zems-n-taarã naf-a-la wʋsgo. A reega lisg yʋʋmd 1983 zĩ-likr kiuug rasem 15 wã. A ra nonga koɛɛgã mooneg wʋsgo. A sẽn karem kolɛɛsã n sa wã, a lebga wakat fãa so-pakd yʋʋmd 1989 bõn-bɩʋʋng kiuugã pʋgẽ.

Saam-biig a Jedele sẽn wa n yaa bilfã, a roagdbã ra mi n talla yẽ ne a yao-bi-puglã n tɩ kaag Betɛllã. Rẽ kɩtame tɩ b yiibã fãa yãk yam n na n tɩ tʋm Betɛllẽ wã. B wa n tõog n maana rẽ. Saam-biig a Jedele sɩnga Wallkill Betɛllẽ wã tʋmb yʋʋmd 1990 bõn-bɩʋʋng kiuugã pʋgẽ. A reng n sõnga ne rotã yẽesgo, tɩ rẽ poor t’a tɩ tʋm biru ning sẽn get tɩbsgã yellã pʋgẽ.

Wakat kãnga, tigims sẽn gomd Ɛspayõll sẽn da pẽ be neb sõor n da paasde, tɩ b rat saam-biis sẽn na n sõnge. Rẽ n so tɩ saam-biig a Jedele kẽng n na n tɩ sõng tigin-kãens a yembre, n sɩng Ɛspayõll zãmsgo. Rẽ poore, a bãnga pʋg-sad yʋʋr sẽn boond t’a Damaris n yaa so-pakda, n be b tigims sullã pʋgẽ. B wa n kẽe kãadem, t’a pagã bʋʋg-a Betɛllẽ wã.

Yʋʋmd 2005 wã, b basa Betɛllẽ wã tʋʋma, sẽn na yɩl n ges b roagdbã sẽn kʋʋlã yelle. B kell n yɩɩ wakat fãa so-pakdba. Saam-biig a Jedele ra yaa so-pakdbã lekoll karen-saamb me. A tʋma sull ning sẽn get logtor yirẽ tɩbsg zu-loees yellã pʋgẽ, la sull ning sẽn get rotã meeb yellã pʋgẽ.

Yʋʋmd 2013, b boola saam-biig a Jedele ne a pagã Betɛllẽ wã tɩ b wa sõng n me Warwik rotã. Rẽ poore b tʋma Patɛrsõnn la Wallkill me. Saam-biig a Jedele tʋma Betɛllã biru ning sẽn get rotã meeb yellã pʋgẽ, la a tʋm ne biru ning sẽn kõt kibay tɩbsgã wɛɛngẽ wã. Yʋʋmd 2023 tʋʋlg kiuugã pʋgẽ, b yãk-a lame t’a lebg Siglgã taoor lʋɩtb Sullã sull ning sẽn get koe-moonegã yellã sõangda. A tẽega tʋʋm nins fãa b sẽn kõ-a wã yell n yeel yaa: “Wakat ninga, b sã n kõ-f tʋʋm-paalle, f tõe n yɛɛsdame. La yaa wakat kãng la f segd n tẽeg tɩ f tog n teeg a Zeova, bala yẽ n yaa soab ning sẽn kɩtd tɩ yɩ wã.”

Saam-biig a Rumph roga Kaliforni sẽn be Etazĩni wã. A sẽn wa yaa bilfã, a ma wã basa koɛɛgã mooneg la tigissã kẽnde, la a ra wilgd-a-la bũmb kẽer Biiblã zugu. La yʋʋmd fãa, a ra kẽnd n kaagda a yaab-poakã sẽn da tũud a Zeova ne a sũur fãa wã. A sõng-a lame t’a rat n bãng Biiblã sẽn yetã n paase. A sẽn wa n tar yʋʋmd piig la a tãabo, a kosame tɩ b zãms-a Biiblã. Yʋʋmd 1992 bõn-bɩʋʋng kiuugã rasem 27 wã, a reega lisg a sẽn wa n ket n yaa bi-bɩɩga. Zu-noogo, a ma wã le sɩnga tigissã kẽnd la koɛɛgã moonego, t’a ba wã ne a ba-biisã me zãms Biiblã n wa reeg lisgu.

Saam-biig a Rumph sẽn wa n yaa bi-bɩɩgã, a gũus n gesame tɩ so-pakdbã tara sũ-noog wʋsgo. Rẽ n so tɩ yʋʋmd 1995 bõn-bɩʋʋng kiuugã pʋgẽ, a lebg so-pakd a sẽn wa n karem kolɛɛsã n sa wã. Yʋʋmd 2000 pʋgẽ, a yik n kẽnga Ekoatɛɛr n na n tɩ sõng zĩig koe-moondbã raab sẽn waoogẽ. Be a bãnga saam-bi-poak sẽn yit Kanada t’a yʋʋr boondẽ t’a Inga, n yaa so-pakda. B wa n kẽe kãadem. B kãadmã poor bala, b tɩ zĩnda Ekoatɛɛr tẽn-bil a ye pʋgẽ n na n sõng koe-moondb sul-bil sẽn be be. Rũndã-rũndã, sul-kãng lebga tigin-bedre.

B wa n yãka saam-biig a Rumph ne a pagã tɩ b lebg zall so-pakdba. Kaoosg zugẽ, b yãka saam-biig a Rumph t’a lebg tigims sull yel-gɛta. Yʋʋmd 2011 wã, b bool-b-la Galaad lekoll 132 soabã. Lekollã poore, b tʋm-b-la tẽns toor-toor dũniyã gill zugu. B tʋma tʋʋm toor-toor me. Wala makre, b tʋma Betɛllẽ wã la b yɩ misioneer-dãmba. Saam-biig a Rumph yɩɩ tigims sull yel-gɛt me, la a paam n yɩ Rĩungã koe-moondb lekoll karen-saamba.

Saam-biig a Rumph ne a pagã wa n lebg n leba Etazĩni koronavirisã bã-loangdgã yĩnga. B bool-b-la Wallkill Betɛllẽ wã, tɩ saam-biig a Rumph paam zãmsg biru ning sẽn get koɛɛgã mooneg yellã pʋgẽ. B wa n kɩtame tɩ b lebg n leb Ekoatɛɛr Betɛllẽ wã, tɩ saam-biig a Rumph lebg filyallã taoor lʋɩtb sull neba. Yʋʋmd 2023, b kɩtame tɩ b kẽng Warwik. Yʋʋmd 2024 yʋʋm-vẽkr kiuugã pʋgẽ, b yãka saam-biig a Rumph t’a lebg Siglgã taoor lʋɩtb Sullã sull ning sẽn get koe-moonegã yellã sõangda. A tagsa zĩis nins b sẽn tʋm-a wã yell n yeel yaa: “Bũmb ning sẽn tõe n kɩt tɩ tʋʋmd yɩ-f noogã pa f sẽn tʋmd-a zĩig ningã ye. Yaa neb nins f sẽn naagd n tʋmdẽ wã.”

D “waoogda neb a woto buudu,” b sẽn tʋmd ne b sũy fãa wã yĩnga.—Fili. 2:29.