M tõe n yãa belsg goam Biiblã pʋgẽ bɩ?
Biiblã sẽn yete
N-ye. (Rom dãmbã 15:4) Ges-y Biiblã vɛrse-rãmb kẽer sẽn bels neb wʋsg sẽn da maood ne zu-loe-kɛgemse, la sũy sẽn da sãam wʋsgo.
Ad bũmb kẽer yell d sẽn na n gom sõs-kãngã pʋgẽ:
D sã n tar zu-loeese
Yɩɩn-sõamyã 23:4: “Baa mam sã n kẽnd tãng long sẽn yaa lik bida pʋga, mam kõn zoe bũmb ba a yembr dabeem ye. Bala, yãmb bee ne maam.”
A võorã: Y sã n pʋʋsd Wẽnnaam la y baood sagls Biiblã sẽn yaa a Gomdã pʋgẽ, y tõe n paama raood n mao ne zu-loeesã.
Filip rãmbã 4:13: “Bũmb fãa pʋgẽ, mam tara pãnga, sẽn kõt-a maam pãngã maasem yĩnga.”
A võorã: Wẽnnaam tõe n kõ-y-la pãng tɩ y mao ne zu-loɛɛg buud fãa.
D ned sã n maan kaalem
Koɛɛg soaba 9:10: “Tʋʋmde, tagsgo, la bãngr ne yam ka be kɩɩm-kulgu, zĩig ning fo sẽn dabdẽ wã ye.”
A võorã: Sẽn ki-bã pa namsd ye. B pa tõe n maan tõnd wẽng me ye. B pa mi baa fʋɩ ye.
Tʋʋma 24:15: “Wẽnnaam na n vʋʋga nin-tɩrsã ne sẽn pa-b nin-tɩrsã me.”
A võorã: Wẽnnaam tõe n vʋʋga d neb nins sẽn maan kaalmã.
D sã n ningd d meng taal wʋsgo
Yɩɩn-sõamyã 86:5: “Zu-soaba, yãmb yaa sõmblem soaba, la y kõta sugri. Yãmb nonglmã yaa kãsenga, neb nins fãa sẽn boond yãmbã yĩnga.”
A võorã: Ned sã n sɩd maand a bãngẽ yel-wẽn nins a sẽn maan pĩndã yĩnga, la a maood sẽn na yɩl n da le maan a buudu, Wẽnnaam kõta a soab sugri.
Yɩɩn-sõamyã 103:12: “Yaang ne nin-taoor sẽn zãr ne taab to-to wã, Sẽn-Ka-Saab zãagda tõnd ne d beegrã me a woto.”
A võorã: Wẽnnaam sã n kõ-d sugri, a sẽn zãagd tõnd ne d yel-wẽnã to-to wã pa tõe n bãng n bilg ye. A pa tẽegd tõnd d yel-wẽnã wakat fãa sẽn na yɩl n ning-d taal wall n sɩbg-d ye.
D sã n kẽnd ne sũ-sãamse
Yɩɩn-sõamyã 31:8: “Yãmb nee mam nimbãanegã, la yãmb mii mam yel-pakrã.”
A võorã: Wẽnnaam mii bũmb ning fãa sẽn namsd yãmbã sõma. A wʋmda rẽ sẽn namsd yãmbã võore, baa neb a taabã sã n wa pa wʋmd rẽ võore.
Yɩɩn-sõamyã 34:19: “Sẽn-Ka-Saab pẽe sũ-sãang rãmbã, la b fãagda sũ-pa-noaang rãmbã.”
A võorã: Wẽnnaam pʋlmame tɩ y sã n wa kẽnd ne sũ-sãamse, a na n teel-y lame. A tõe n kõ-y-la pãng tɩ y mao ne y toogã.
D sã n lʋɩ bãaga
Yɩɩn-sõamyã 41:4: “A sã n wa gãe ne bãaga, Sẽn-Ka-Saab sõngd-a lame.”
A võorã: Y sã n wa lʋɩ bã-kɛgenga, Wẽnnaam tõe n sõng-y lame. A na n kõ-y-la sũur pʋgẽ bãane, n sõng-y tɩ y tõog toogo, la a kõ-y pãng la yam, sẽn na yɩl tɩ y tõog n yãk yam tɩ zemse.
Ezayi 33:24: “Tẽngã ned kõn yeel t’a ka keem ye!”
A võorã: Wẽnnaam pʋlmame tɩ wakat n wat tɩ ninsaalbã fãa na n paam laafɩ sõma.
D sã n maand yɩɩr wʋsgo
Yɩɩn-sõamyã 94:19: “Yɛl wʋsg sã n wa n be m pʋgẽ n namsd-ma, yãmb sẽn belsd maamã kõt-m-la sũ-noogo.”
A võorã: D sã n wa maand yɩɩr wʋsg n bao Wẽnnaam sõngre, a tõe n sõng-d lame tɩ d yamã gãande.
1 Pɩyɛɛr 5:7: “Sik-y y yɩɩrã fãa n bas ne bãmba, bala bãmb geta yãmb yelle.”
A võorã: Wẽnnaam pa maand a toog kae ne tõnd namsgã ye. A yeelame tɩ d pʋʋsd-a n togsd d zu-loeesã.
D sã n be tẽng zab sẽn beẽ
Yɩɩn-sõamyã 46:10: “Bãmb n kɩtd tɩ zabã sẽn be dũniyã tɛk fãa wã sɛ.”
A võorã: Ka la bilfu, Wẽnnaam Rĩungã na n kɩtame tɩ zabã sa.
Yɩɩn-sõamyã 37:11, 29: “Sik-m-mens rãmbã n na n soog tẽngã, la b na n paama vɩ-bãane, ne sũ-noog meng-menga. . . . Nin-tɩrsã na n sooga tẽngã, la b na n paa beenẽ wakat sẽn kõn sa.”
A võorã: Nin-tɩrsã na n zĩnda ne laafɩ tẽngã zug wakat sẽn kõn sa yĩnga.
D sã n maand yɩɩr wʋsg sẽn wat beoogã wɛɛngẽ
Zeremi 29:11: “Maam a Sẽn-Ka-Saab yetame: ‘Mam mii saagr ning m sẽn saagd yãmb yĩnga. Ka saagr sẽn na n wa ne toog yãmb zug ye, yaa vɩ-bãan saagre, sẽn na n yɩlẽ tɩ y beoog vɩɩmã yɩ neere, la tɩ y paam tẽeb pidsgu.’”
A võorã: Wẽnnaam yeta a nin-buiidã tɩ b bas b yam tɩ beoog na n yɩɩ neere.
Vẽnegre 21:4: “B na n yẽesa nintãm fãa ninsaalbã ninẽ, la kũum pa na n le zĩndi, sũ-sãanga, yãbr wall toog pa na n le zĩnd ye. Bũmb nins sẽn da be pĩndã loogame.”
A võorã: Wẽnnaam pʋlmame t’a na n kɩtame tɩ bõn-wẽns nins fãa sẽn maand rũndã-rũndã wã sa.