SÕNGRE, ZAGSÃ RÃMB YĨNGA | KÃADMÃ
Pag bɩ sɩd sã n yaa rãamã yamba
Y pagã bɩ y sɩdã yeelame tɩ y yũuda rãamã wʋsg bɩ? Sã n yaa woto, bũmb kẽer la y segd n maane.
Ad bũmb kẽer yell d sẽn na n gom sõs-kãngã pʋgẽ:
Rã-tɩgr tõe n sãama kãadem
Rã-tɩgrã wata ne bãas buud toor-toore, wala makre, sũurã bãase, sãoorã bãaga, la kãnsɛɛre. Bãasã sẽn yãk b toogo, rã-tɩgrã wata ne zu-loees kãadmã pʋgẽ, wala makre nen-kɛglem tʋʋma, ligd zu-loeese, yoobo, la baa kãadem kaoobo.
Biiblã yeelame tɩ ned sã n yũ rãam n tɩge, rãamã “wat n kɛɛ wa waafo, n yiisd zẽnem wa põeere.” (Yel-bũnã 23:32) Y maanda wãn n bãng y sã n lebga rãamã yamba?
Y lebga rãamã yamb bɩ?
Ad sogsg sẽn tõe n sõng-y tɩ y bãng rẽ:
Yaa toog ne-y tɩ y bãng y sã n segd n yũu rãam bɩ y pa segd n yũ bɩ?
Y wae n tagsda y sẽn na n yũ bũmb ningã yell bɩ?
Y ket n yũuda rãam, baa ne rẽ sẽn wat ne zu-loees y vɩɩmã la y kãadmã pʋgẽ wã bɩ?
Y sã n wa makd n na n bas rãamã, namsd-y lame bɩ?
Yãmb ne y pagã bɩ y sɩdã nong n zabda taab rãamã yũub poorẽ bɩ?
Y yũuda rãamã wʋsg masã n yɩɩd pĩndã bɩ?
Y soosd n yũuda rãamã, bɩ n solgd rãam zakẽ wall tʋʋmã zĩigẽ bɩ?
Y sã n leok sokr baa yaa a yembr tɩ n-ye, wilgdame tɩ y lebga rãamã yamba.
Sak-y n deeg-y tɩ rãamã yaa y zu-loɛɛga
Y pagã bɩ y sɩdã yeelame tɩ y yũuda rãamã wʋsg bɩ? Sã n yaa woto, tõe tɩ y baoo pademse, n yeel tɩ ka yell ye. Tõeeme me tɩ y ninga neb a taabã taale, baa y pagã menga, n da yetẽ yaa:
“F sã n da geta mam yell sõma, m da pa na n lebg ra-yũud ye.”
“F sã n tʋmd mam tʋʋmdã buudu, f pa tõe n pa yũ rãam ye.”
“Mam mii neb wʋsg sẽn yũud rãam n yɩɩd maam.”
F sã n tagsd woto, wilgdame tɩ rãamã yũub n tar yõod ne f n yɩɩd f sẽn na n paam tɩ sũ-noog zĩnd f kãadmã pʋgẽ. Bʋg n yaool n tar yõod n tɩ yɩɩda?
Biiblã sẽn yete: ‘Rao sẽn kẽ kãadem maanda yɩɩr . . . ne a sẽn na n maan to-to n ta a pagã yam.’—1 Korẽnt rãmbã 7:33.
Y sã n kɩɩsdẽ tɩ y pa rãamã yamba, yaa wa lalg sẽn be y taoor tɩ y pa ne baa fʋɩ ye. La y sã n sak y pagã bɩ y sɩdã sẽn yet bũmb ningã, yaa wa fenetr sẽn pake, tɩ tõe n n naf-yã
Y sẽn tõe n maane
Wilg-y tɩ y sɩdã wall y pagã sẽn yet bũmb ningã pak-y lame. Baa y sã n tagsdame tɩ y pagã wall y sɩdã maanda yɩɩr tɩ loog noore, y tõe n modg n toeemame. Y sã n pa tõe n maan rẽ, n baas n ket n yũud rãamã baa ne rẽ sẽn sãamd y pagã wall y sɩdã sũurã, wilgdame tɩ y sɩd lebga rãamã yamba.
Biiblã sẽn yete: “Bɩ ned baa a ye ra baood a meng nafr ye. La bɩ a baood a taabã nafre.”—1 Korẽnt rãmbã 10:24.
Bao-y y sẽn tõe n maane. Sodaag sã n dat n tõog zabre, a segd n bao n bãnga bɛ wã sɩlmã. Yaa woto me la y segd n maane. Sẽn na yɩl n tõog n bas rãamã yũubu, y segd n bao n bãnga rã-tɩgrã sẽn yaa a soaba, la bũmb ning sẽn tõe n kɩt tɩ ned wa lebg rãamã yambã. Y leb n segd n bao n bãnga bũmb kẽer y sẽn tõe n maan tɩ sõng-y tɩ y tõog n zãag y meng n bũmb sẽn tõe n wa kɩt tɩ y lebg rãamã yamba, la sõng-y me tɩ y tõog n bas yũubã n da tol n le wa sɩng ye.
Biiblã sẽn yete: “Mam sagenda yãmb tɩ y kell n zãag y mens ne yĩngã ratem sẽn zabd ne yãmbã.”—1 Pɩyɛɛr 2:11.
Bao-y sõngre. Tɩbsg buud toor-toor n be n tõe n sõng ned sẽn lebg rãamã yamba. Y tõeeme n kos y zoa tẽeb sẽn bɩ sõngre, t’a sõng-y tɩ y bãng bũmb kẽer sẽn kɩt tɩ y lebg rãamã yamba. Sã n wa yaa toog ne-y tɩ y ra yũ rãam, y tõe n bool a soabã.
Y tõe n baoo logtoɛɛmb sõngre
Biiblã sẽn yete: “F zoa hakɩɩk nong-f-la wakat fãa. A yaa f ba-biig f sẽn tõe n teeg yel-pakr wakate.”—Yel-bũnã 17:17.
Rã-tɩgrã pa yel-bil ye. Yɩl n tõog n bas rãamã yũub pa bũmb maaneg sẽn yaa faag-faag ye. Pa sek bal tɩ f yeel tɩ f “na n modgame n boog yũubã ye.” Sẽn paase, y segd n bãngame tɩ y sã n modg n bas rãamã yũubã, pa y yĩnsã laafɩ wã la na n maneg ye. Sẽn yɩɩd fãa na n sõngame tɩ y zakã pʋgẽ vɩɩm yɩ noogo.
Y sã n dat n bãng n paase, bɩ y karem sõss nins sẽn pʋgdã, n bãng neb a taab sẽn maan to-to n tõog n bas rã-tɩgrã.
“Mam pa le yaa nen-kɛglem soab ye”
“M pa le tagsd tɩ m ka võor ye”
Y leb n tõe n gesa video gom-zug sẽn yaa: ‘M yamã ra yii m vɩɩmã’