SOGSG KOM-BƖƖSÃ SẼN SOKDE

M segd n deega lisg bɩ?—Pipi babgã: Lisg reegr sẽn dat n yɛɛlga

Yʋʋmd fãa, a Zeova Kaset rãmb kom-bɩɩs wʋsg n deegd lisgu. F magdame n na n wa reeg lisg bɩ? Sã n yaa woto, f segd n deng n bãnga rɩk f meng n kõ a Zeova la reeg lisgã sẽn dat n yɛɛlga.

Reeg lisg rat n yeelame tɩ bõe?

Biiblã pʋgẽ, lisg yaa b sẽn na n bõr ned koom pʋgẽ zãnga, la pa b sẽn na n mes-a wall b kɩrgd a zugã koom bal ye. A makda bũmb sẽn tar yõod wʋsgo.

B sã n wa bõrd-f koomẽ wã, wilgda zãma wã taoor tɩ f pa na n le lʋɩɩs f mengã raab taoor ye.
B sã n wa yiis foo koomẽ wã, wilgdame tɩ rẽ tɛka, yaa Wẽnnaam daabã la f na n lʋɩɩs taoor f vɩɩmã pʋgẽ.

Fo sã n reeg lisgu, f sak n deega zãma wã taoor t’a Zeova bal n tar sor n na n lugl noy sẽn wilgd sẽn yaa sõma ne wẽng n bake. Sẽn paase, rẽ wilgda vẽeneg tɩ f yãka yam n na n maan a raabã ne yamleoogo.

Ad sokre: Bõe yĩng tɩ f segd n wilg zãma wã taoor tɩ f rat n saka a Zeova f vɩɩmã tõre? Ges 1 Zã 4:19 la Vẽnegr 4:11.

Rɩk f meng n kõ a Zeova wã rat n yeelame tɩ bõe?

Nand tɩ f reeg lisgu, f segd n dɩka f meng n kõ a Zeova. Wãn to?

F pʋʋsda a Zeova, n pʋlm-a tɩ f na n tũ-a-la wakat fãa yĩnga, la f maan a raabã baa yɛlã bɩ nebã manesem sẽn yaa to-to fãa.

Lisgã reegr wilgda zãma wã taoor tɩ f rɩka f meng n kõ a Zeova. A wilgda neb a taabã tɩ f kɩɩsa f mengã raabo, la tɩ masã f vɩɩ a Zeova yĩnga.—Matiye 16:24.

Ad sokre: Fo sã n vɩ a Zeova yĩnga, bõe yĩng tɩ f vɩɩmã na n yɩ sõma? Ges Ezayi 48:17, 18 la Ebre-rãmbã 11:6.

Bõe yĩng tɩ tar yõod tɩ f reeg lisgu?

A Zeezi yeelame tɩ neb nins fãa sẽn dat n lebg a karen-biisã segd n deega lisgu. (Matiye 28:19, 20) Dẽnd kiris-nebã me segd n deega lisgu. Sɩd me, Biiblã wilgame tɩ ned sã n dat fãagre, yaa tɩlɛ t’a reeg lisgu.—1 Pɩyɛɛr 3:21.

La f sã n dat n deeg lisgu, segd n yɩɩ f sẽn nong a Zeova la f rat n pʋʋs-a barkã yĩnga. Fo tagsg segd n yɩɩ wa yɩɩn-gʋlsdã sẽn yeelã. A yeelame yaa: “Bõe la m na n maan n lebs a Zeova, bõn-sõma nins fãa a sẽn maan n kõ maamã yĩnga? Mam na n . . . boola a Zeova yʋʋrã. Mam na n pidsa mam sẽn pʋlem a Zeova bũmb ninsã.”—Yɩɩn-sõamyã 116:12-14.

Ad sokre: Bõn-sõma-bʋs la a Zeova maan n kõ foo, la bõe la f tõe n maan n lebs-a? Ges Tõodo 10:12, 13 la Rom dãmbã 12:1.

Tags-kɛga, la sɩdã

TAGS-KƐGRE — Yaa kom-kãsemsã bal n bɩ n sek b na reeg lisgu.

SƖDÃ — Pa ned yʋʋm sõor n wilgd t’a bɩɩme ye. La yaa a sẽn wilgd t’a nonga a Zeova ne a sũur fãa la a sakd-a wã. A Zozɛfe, a Sãmwɛll la a Zoziyaas sẽn wa n ket n yaa kom-bɩɩse, b wilgame tɩ b yaa neb a woto buudu. Rũndã-rũndã me, kom-bɩɩs wʋsg rɩkda b togs-n-taare.

Biiblã yetame: “Baa biig meng tʋʋm-tʋmdɩ tõe n kɩtame tɩ b bãng-a, rat n yeel tɩ n bãng a manesmã sã n yaa sõma la tɩrga.”—Yel-bũnã 20:11.

TAGS-KƐGRE — Fo zo-rãmbã sã n deeg lisgu, fo-me segd n deega lisgu.

SƖDÃ — Yaa fo meng n yãkd f sã n na n dɩka f meng n kõ a Zeova la f reeg lisgu. Pa f rog-taasã sẽn deegd lisgã yĩng la fo me segd n deeg lisg ye. Leb n pa segd n yɩ f sẽn tagsd tɩ yaa rẽnda la neb a taabã rat tɩ f maan yĩng ye.

Biiblã yetame: “[Wẽnnaam] nebã na n kõo b mens ne yamleoogo.”—Yɩɩn-sõamyã 110:3.

TAGS-KƐGRE — F sã n pa reeg lisgu, Wẽnnaam pa ningd-f taal f yel-wẽnã yĩng ye.

SƖDÃ — Pa f sã n wa reeg lisg la a Zeova ningd-f taal f yel-wẽnã yĩng ye. La yaa f sã n mi sẽn yaa sõma ne wẽng Wẽnnaam nifẽ.

Biiblã yetame: “Ned sã n mi a sẽn tõe n maan sẽn yaa tɩrg to-to la a yaool n pa maand rẽ, yaa yel-wẽnde.”—Zak 4:17.

SAGLGA: Fo sã n tagsd tɩ rɩk f meng n kõ a Zeova la reeg lisg wõnda bũmb sẽn yɩɩd f pãnga, yɩta sõma tɩ f fees f meng n bao n bãng bũmb ning sẽn kɩt tɩ f tagsd woto wã, la bũmb ning sẽn tõe n sõng-fo. Les jeunes s’interrogent — Réponses pratiques, volume 2 sak 37 wã tõe n sõnga foo rẽ wɛɛngẽ.