SOGSG KOM-BƖƖSÃ SẼN SOKDE
Roobã—Pipi babgã: M segl n saame n na n do ned, kãadem yĩng bɩ?
Ad bũmb kẽer yell d sẽn na n gom sõs-kãngã pʋgẽ
Roob yaa bõe?
Neb kẽer tagsdame tɩ ned roob yaa reem yelle. La rao ne pag sã n wae n be ne taaba, bɩ n naag taab n maand bũmb kẽer sẽn na n yɩl n ges b sã n tõe n kẽe kãadem, b boonda rẽ tɩ “roobo.” Dẽnd rao ne pag sã n dood taaba, yaa bũmb takɩ yĩnga. Pa sẽn na yɩlẽ bal n paam tɩ raoã bɩ pagã nong-f ye.
Roobã sõngdame tɩ pagã ne raoã bãng b sã n na n kẽe kãadem, pa rẽ bɩ b na n basame tɩ sa. Dẽnd f sã n sɩng ned roobo, f segd n segl n saa bõn-kãensã a yiibã yĩnga.
Kʋmsgo: Fo sã n tagsdame tɩ f segla f meng n sa n tõe n do neda, dẽnd f segd n sak n deegame tɩ f segla f meng n sa n na n kẽ kãadem.
Fo sã n dood ned n na n deeme, yaa wa fo sẽn na n kẽng tʋʋm baoobo, n sõs ne patrõ wã, n yaool n pa rat t’a rɩk-f tʋʋm ye
M segl n saame n na n do ned, kãadem yĩng bɩ?
Fo sã n dood neda, tõe n wa baasa kãadem kõom. Dẽnd yɩta sõma tɩ f tags zʋg-sõma nins fo sẽn bɩɩse, tɩ tõe n sõng yãmb roobã sasa, la zʋgd nins f sẽn tar me tɩ tõe n kɩt tɩ roobã pa baas neer ye. Wala makre, tags-y bũmb nins sẽn be tẽngrã yelle:
Fo manesmã sẽn yaa to-to ne f zakã rãmba. Naoor wʋsgo, fo manesem sẽn yaa to-to ne f roagdbã la ne f yapã la f kẽem-dãmbã, sẽn yɩɩd fãa f sã n wa maand yɩɩrã wilgda f manesem sẽn na n yɩ to-to ne f pagã wall f sɩdã.
Biiblã sẽn yete: “Lak-y y mens ne sũ-kẽk buud fãa, la sũ-puugri, ne sũ-yikri, la tãsga, ne tʋya, la ne wẽnem buud fãa.”—Efɛɛz rãmbã 4:31.
Sok f menga: ‘Rẽ yĩnga, m roagdbã la m yapã ne m kẽem-dãmbã neeme tɩ m waoogd-b lame bɩ? M sã n tar mo-yõsr ne b nin-yende, m maagda m yĩng n sõs ne-a yellã zug bɩ, bɩ m basdame tɩ m sũurã yikd tao-tao?’
Fo sã n pa tõe n welg mo-yõsr sẽn be foo ne f roagdbã sʋka, rẽ yĩnga, fo na n tõog n welga mo-yõs nins sẽn na n zĩnd foo ne f pagã wall ne f sɩdã sʋk sɩda?
Mong-m-menga. Fo sã n kẽ kãadem, na n yɩɩ tɩlɛ tɩ f tags bũmb nins sẽn noom f pagã bɩ f sɩdã yell n tɩ yɩɩda. Naoor wʋsg menga, yaa f pagã bɩ f sɩdã raab la f na n lʋɩɩs taoore.
Biiblã sẽn yete: “Bɩ ned baa a ye ra baood a meng nafr ye. La bɩ a baood a taabã nafre.”—1 Korẽnt rãmbã 10:24.
Sok f menga: ‘Wakat fãa, m datame tɩ yɛlã yɩ wa mam sẽn datã bal bɩ? Neb a taabã nifẽ, m yaa ned sẽn pa dem-dem bɩ? Bõe la m maand tɩ wilgdẽ tɩ m lʋɩɩsda neb a taabã raab taoore?’
Sik-m-menga. Sɩd-sõng bɩ pʋg-sõng sakd n deega a kongre, n kos sugr ne a sũur fãa.
Biiblã sẽn yete: “Tõnd fãa lakda naoor wʋsgo.”—Zak 3:2, notã.
Sok f menga: ‘Rẽ yĩnga, m sɩd sakd n deegda m kongr bɩ, bɩ m baooda pademse? Neb a taabã sã n kõ-m sagls bũmb nins m sẽn tõe n maneg n paasã wɛɛngẽ, m sũur sãamdame bɩ, bɩ m sũurã yikdame tɩ m gom-b põaasa?’
Fo sẽn zãad ligdã to-to. Ned sã n mi ligd zãabo, a kãadmã pʋgẽ, na n sõngame t’a tõog n gil bũmb a yembr sẽn wat ne zu-loɛɛg kãadmã pʋgẽ n tɩ yɩɩda.
Biiblã sẽn yete: “Ãnd n be yãmb sʋk n dat n me gasgo, n pa na n deng n zĩnd n geelg ligd ning a sẽn segd n yiisã, n ges a sã n tara sẽn sek a baasgo?”—Luk 14:28.
Sok f menga: ‘Depãens-rãmbã wɛɛngẽ, m tõee m meng bɩ, bɩ m wae n kẽeda sam pʋgẽ? Bõe la m maand tɩ wilgd tɩ m tõe n zãa ligd sõma?’
Fo sẽn get f tẽebã yell to-to. Fo sã n yaa a Zeova Kaset soaba, f segd n sigla na-kẽndre, n zãmsd Biiblã la f kẽnd tigissã n pa vaandẽ ye.
Biiblã sẽn yete: “Sũ-noog rãmb la neb nins sẽn mi tɩ b segd n baoo Wẽnnaamã.”—Matiye 5:3.
Sok f menga: ‘M maanda modgr sẽn na yɩl tɩ m tẽebã kell n tall pãng bɩ? Rẽ yĩnga, m lʋɩɩsda bũmb nins m sẽn tog n maan m tẽebã kengr yĩngã taoor bɩ, bɩ m basdame tɩ bũmb a taab tiisd maam?’
Kʋmsgo: Fo segd n modgame n yɩ pʋg-sõng bɩ sɩd-sõngo. Fo sã n maand modgr wʋsg n na n yɩ pʋg-sõng bɩ sɩd-sõngo, na n yɩɩ nana ne ned a to sẽn maand modgr a woto buud t’a yamã kẽ foom.