Neb milyõ a 6 la koronaviriisã bãagã kʋ-yã: Bõe la Biiblã yet rẽ wɛɛngẽ?

Siglg ning sẽn get laafi wã yell dũniyã gill zugã (OMS) wilgame tɩ yʋʋmd 2022 sig-noy kiuug rasem 23 tɛka, neb milyõ a 6 la zak la koronaviriisã bã-longdgã kʋ-yã. La sẽn deng rẽ, yʋʋmd 2022 sig-noy kiuug rasem a 5 wã, kibar la OMS yiisi, n wilg tɩ nebã sẽn ki wã sõor yɩɩda rẽ hal zĩig sẽn zãre. Kibarã pʋgẽ, b wilgame tɩ yʋʋmd 2020 n tãag yʋʋmd 2021 wã, “bãagã sẽn kʋ neb ninsã, la neb nins sẽn ki bãagã yĩngã fãa sõor sã n naag taaba, . . . kolga neb milyõ 15.” Biiblã togsda bũmb yel-be-kãensã wɛɛngẽ bɩ?

Biiblã ra pĩnd n togsame tɩ bã-longds na n zĩndame

• A Zeezi ra pĩnd n togsame tɩ bã-longds sẽn yaa “bãn-kãsems” n na n zĩndi, la tɩ na n yɩɩ “yaoolem wakatã.”—Luk 21:11, Wẽnnaam Sebre 1983; 2 Tɩmote 3:1.

A Zeezi sẽn da pĩnd n togs bũmb ningã pidsda rũndã-rũndã. Y sã n dat n bãng bũmb a taab n paase, bɩ y karem sõsg ning gom-zug sẽn yaa: “Yɛl nins sẽn yaa bãnd n wilgdẽ tɩ d vɩɩ ‘yaoolem wakatã,’ bɩ ‘dũniyã saab wakate.’”

Biiblã tõe n bels-d lame

• ‘Belsg fãa Wẽnnaamã belsda tõnd d zu-loeesã fãa pʋsẽ.’—2 Korẽnt rãmbã 1:3, 4.

Neb wʋsg neb sẽn maan kaalem paamame tɩ Biiblã bels-ba. Y sã n dat n bãng bũmb a taab rẽ wɛɛngẽ n paase, bɩ y karem sõss nins gom-zut sẽn yaa: “Comment revivre : ce que vous pouvez faire,” ne “Une aide incomparable.”

Biiblã wilgda ãdem-biisã zu-loeesã tɩɩm sẽn yaa a soaba

• “Bɩ yãmb Rĩungã wa. Bɩ y raabã maan tẽngã zugu, wa sẽn maand saasẽ wã.”—Matiye 6:10.

Ka la bilfu “Wẽnnaam Rĩungã” sã n wa soog dũniyã gilli, “ned kõn yeel t’a ka keem ye!” (Mark 1:14, 15; Ezayi 33:24) Y sã n dat n bãng saasẽ goosneema-kãng sẽn yaa a soaba, la a sẽn na n wa maan bũmb ningã, bɩ y ges video ning gom-zug sẽn yaa: Wẽnnaam Rĩungã yaa bõe?

D kot-y lame tɩ y bao n bãng Biiblã sẽn yet bũmb ningã n paase, t’a saglsã ne a pʋlemsã na n sõnga yãmb ne y zakã rãmba.