Bu-welsgã sɩd tõe n wa saame bɩ? Bõe la Biiblã yet rẽ wɛɛngẽ?

Sã n yaa ne neb wʋsgo, bu-welsgã pa tol n tõe n sa ye.

• “Bu-welsgã yaa wa pozõno sẽn be dũniyã gill zugu, n namsd sigls nins sẽn tʋmd ninsaalbã vɩɩm na yɩ noog yĩngã, la namsd nin-buiidã me b daar fãa vɩɩmã pʋgẽ. Bu-welsgã kɩtame tɩ nebã kis taaba, n pa le nand taab ye.”—A António Guterres, sẽn yaa Nasɩyõzĩni wã sekertɛɛr zenerallã n yeele.

Bu-welsgã na n wa saame bɩ? Bõe la Biiblã yeta?

Wẽnnaam tagsg sẽn yaa a soab ne bu-welsgã

Biiblã sõngda tõnd tɩ d bãng Wẽnnaam tagsg sẽn yaa a soab ne buud toɛy-toɛyã neba.

• “[Wẽnnaam] tũnuga ne rao a ye n maan buud toɛy-toɛyã fãa sẽn na yɩl tɩ b zĩnd tẽngã gill zugu.”—Tʋʋma 17:26.

• “Wẽnnaam pa bakd neda, la tɩ buud fãa pʋgẽ, ned ning sẽn zoet-a la a maand sẽn yaa tɩrg tata a yam.”—Tʋʋma 10:34, 35.

Biiblã wilgdame tɩ ninsaalbã fãa yaa yaab a yembre, la tɩ Wẽnnaam sakda buud toɛy-toɛyã fãa neba.

Bu-welsgã na n wa saame

Wẽnnaam Rĩungã sẽn yaa goosneema sẽn be saasẽ wã sã n wa soog tẽngã, bu-welsg pa na n le beẽ ye. Goosneema-kãng na n sõnga neba tɩ b bãng b manesem sẽn segd n yɩ to-to ne b taabã, tɩ zems ne Wẽnnaam sẽn datã. Nebã na n bãnga b sẽn tõe n maan to-to n yiis bu-welsgã tʋlsem b sũyẽ wã.

• ‘Tẽngã neb na n bãnga tɩrlem sẽn yaa a soaba.’—Ezayi 26:9.

• “Tɩrlem hakɩɩkã na n waa ne laafɩ, la tɩrlem hakɩɩkã biis na n yɩɩ yĩn-maasem la bãan sẽn kaoosd wakat fãa.”—Ezayi 32:17.

Rũndã-rũndã, Biiblã sẽn yet bũmb ningã sõngda neb milyõ-rãmba, tɩ b bãngd b sẽn tõe n maan n wilg tɩ b waoogda b taabã la tɩ b nand-b lame.

• Y sã n dat n bãng n paase, bɩ y karem Réveillez-vous ! wã sõsg ning gom-zug sẽn yaa: “Y a-t-il un remède contre les préjugés ?”

• Karm-y sõsg ning gom-zug sẽn yaa: “Comment parler de racisme à votre enfant” n bãng roagdbã sẽn tõe n sõss bu-welsgã zug to-to ne b kambã zakẽ.