Sẽn nong-b rũmsã tɩ loog noor la b rat n maan b sẽn tõe fãa n kogl-bã: Bõe la Biiblã yeta?

Dũniyã gill zugu, neb wʋsg baood n bãnga neb nins sẽn nong rũmsã tɩ loog noorã la b maand b sẽn tõe fãa n na n kogl-bã manesem sẽn yaa to-to.

• “Sẽn nong-b rũmsã tɩ loog noor la b rat n maan b sẽn tõe fãa n kogl-bã modgdame tɩ b tagsa wã la b sẽn vɩ to-to wã ra wa kɩt tɩ b namsd rũmsã n pa zoet-b nimbãanega, n wãbd b nemdã, n da wa rɩk b gãndã n maan futu, la bũmb a taab ye.—The Vegan Society.

Neb kẽer me sẽn vɩ woto wã pa rũmsã yell sẽn pak-bã yĩng bal ye. Yaa b sẽn dat n kogl tẽngã, b laafɩ wã bɩ b tũudmã yĩnga.

• “Sẽn vɩ-b woto wã tagsg yaa toor ne neb kẽer sẽn mi n yãk yam n pa na n dɩ rɩɩb kẽerã. B tagsdame tɩ ned kam fãa segd n yãka yam n maan woto, sẽn na yɩl tɩ vɩɩmã dũniyã zug yɩ sõma n yɩɩda.”—Britannica Academic.

Yaa d sã n nong rũmsã tɩ loog noor la d maand d sẽn tõe fãa n na n kogl-b la tẽngã zu-loeesã fãa tɩɩm bɩ? Bõe la Biiblã yeta?

D Naandã tagsg sẽn yaa a soab ne rũmsã la ninsaalbã

Biiblã yetame tɩ Wẽnnaam a Zeovaa sẽn yaa d Naandã nifẽ, ninsaalbã yɩɩda rũmsã, la t’a kõ-b-la sor tɩ b soog-ba. (Sɩngre 1:27, 28) Wẽnnaam kõo ninsaalbã sor tɩ b tõe n kʋ rũmsã, n wãb b nemdo. (Sɩngre 9:3) La a Zeova pa rat tɩ d nams rũmsã ye.—Yel-bũnã 12:10.

Sẽn zems ne Biiblã sẽn yetã, yaa ned kam fãa n yãkd a sã n na n wãba nemd bɩ a pa na n wãbe.b Pa d sẽn na n yãk yam ning rẽ wɛɛngẽ wã n na n kɩt tɩ d pẽneg Wẽnnaam n paas ye. (1 Korẽnt rãmbã 8:8) Ned baa a ye pa segd n kao a to bʋʋdo, a sẽn yãk yam n dɩt bũmb ningã yĩng ye.—Rom dãmbã 14:3.

Bũmb ning sẽn na n wa ne manegrã

Biiblã wilgame tɩ pa d sẽn yãk yam n vɩ to-to wã n na n welg dũniyã zu-loeesã fãa ye. Yaa politik siglsã, leebgã siglsã, la nin-buiidã sigls a taab n kɩt tɩ namsg be dũni-kãngã pʋgẽ, tɩ ned baa a ye pa tõe tɩ sa wã. Biiblã yetame yaa:

• “Bũmb sẽn golem pa tõe n tẽeg ye.”—Koɛɛg soaba 1:15.

D Naandã na n wa welga zu-loees nins fãa d sẽn maood ne rũndã-rũndã wã. Biiblã tũnugda ne makre, n wilgd a sẽn na n wa maan bũmb ningã.

• “La mam yãa sa-paalg la tẽn-paalga. Bala pĩnd saasã ne pĩnd tẽngã loogame, tɩ mogrã me pa le beẽ ye.”—Vẽnegre 21:1.

Wẽnnaam na n ledga “pĩnd saasã” sẽn makd ninsaalbã goosneema-rãmbã ne “sa-paalg” sẽn makd a Rĩungã sẽn be saasẽ wã. A Rĩungã na n sãama “pĩnd tẽngã” sẽn makd nin-wẽnsã, la a soog “tẽn-paalga,” sẽn makd neb nins sẽn sakd Wẽnnaam naamã.

Yaa Wẽnnaam Rĩungã sã n wa soog tẽngã bal la laafɩ na n tõog n zĩnd ninsaalbã ne we-rũmsã sʋka, tɩ ninsaalbã bãng n ges tẽngã yell neere.—Ezayi 11:6-9.