D maanda wãn n da le zoe kũumã?

Biiblã sẽn yete

Kũumã yaa ninsaal bɛ. Dẽnd zemsame tɩ zoe-a, la d modg n kogl d yõorã. (1 Korẽnt rãmbã 15:26) La soalma, minund la kibay kẽer kɩtame tɩ neb kẽer zoet kũumã tɩ loog noore, hal n “be yembd pʋgẽ b vɩɩmã tɛka.” (Ebre-rãmbã 2:15) La y sã n bãng sɩdã kũumã wɛɛngẽ, y pa le maand rabeem tɩ loog noor ye. Rabeemã tõe n kɩtame tɩ ned sũur pa noom ne vɩɩmã ye.—Zã 8:32.

Biiblã sẽn yet kũumã wɛɛngẽ

• Sẽn ki-bã pa mi bũmb ye. (Yɩɩn-sõamyã 146:4) Ned kũum poore, a pa namsd ye. Biiblã maka kũumã ne gõeem.—Yɩɩn-sõamyã 13:4; Zã 11:11-14.

• Sẽn ki-bã pa tõe n maan tõnd bũmb ye. Baa neb yaa nin-toos to-to, b sã n maan kaalem, b pa tõe n le maan baa fʋɩ. Biiblã yetame tɩ “bãmb kisgrã, ne bãmb sũ-kiirã me fãa sɛɛme.”—Koɛɛg soaba 9:6.

• Ned sã n ki, pa sa zãng fasɩ ye. Wẽnnaam na n vʋʋga neb nins sẽn maan kaalmã, tɩ b le vɩɩmde.—Zã 5:28, 29; Tʋʋma 24:15.

• Wẽnnaam pʋlmame tɩ wakat n wat tɩ “kũum kõn leb n zĩnd ye.” (Vẽnegre 21:4) Biiblã goma wakat kãng yelle, n yeel yaa: “Nin-tɩrsã na n sooga tẽngã, la b na n paa beenẽ wakat sẽn kõn sa.” Ninsaalbã kõn tol n le zoe kũum ye.—Yɩɩn-sõamyã 37:29.