Vẽnegr sebrã sẽn gomd bũmb ning yelle
Biiblã sẽn yete
Biiblã gom-bil ning b sẽn lebg tɩ Vẽnegrã yaa Gɛrkã gom-bil sẽn yaa apokalips. A rat n yeelame tɩ “Wilgi” bɩ “Vẽnege.” Sebrã yʋʋrã sõngda tõnd tɩ d bãng bũmb nins sẽn be a pʋgẽ wã. A wilgda tõnd bũmb kẽer sẽn da solge, la wilgd tõnd yɛl sẽn na n wa maan kaoosg zugẽ, a gʋlsgã poore. Sebrã bãngr-goam wʋsg n nan pa pidsi.
Vẽnegr sebrã sẽn gomd bũmb ning yelle
Sɩngr goamã.—Vẽnegre 1:1-9.
Koees nins a Zeezi sẽn taas tigims a yopoe wã.—Vẽnegre 1:10–3:22.
Vẽnegr sẽn wilgd Wẽnnaam sẽn zĩ a geerã zug saasẽ.—Vẽnegre 4:1-11.
Vẽnegr toor-toor sẽn pʋgd taaba:
Sogds a yopoe.—Vẽnegre 5:1–8:6.
Tãntãad a yopoe, tɩ yaoolem tãntãad a tãabã wilgd yel-beed sẽn wate.—Vẽnegre 8:7–14:20.
Tood sẽn be laas a yopoe pʋsẽ, tɩ toog fãa wilgd sɩbgr ning Wẽnnaam sẽn na n kɩt tɩ wa tẽngã zugu.—Vẽnegre 15:1–16:21.
Vẽnegr toor-toor sẽn wilgd Wẽnnaam bɛɛbã sãoongo.—Vẽnegre 17:1–20:10.
Vẽnegr toor-toor sẽn wilgd Wẽnnaam sẽn na n ning saasã la tẽngã bark to-to.—Vẽnegre 20:11–22:5.
Baasg goamã.—Vẽnegre 22:6-21.
Bũmb toor-toor sẽn tõe n sõng-d tɩ d wʋm Vẽnegr sebrã goam võore
Vẽnegr sebrã sẽn yet bũmb ningã pa kẽesd neb nins sẽn tũud Wẽnnaamã rabeem ye. A yaa koe-noog ne-ba. Neb wʋsg tagsdame tɩ b sã n wa gomd “apokalips” yelle, yaa sãoong-kãseng yell la b gomda. La vẽnegr sebrã sɩngr goamã ne a baasg goamã wilgdame tɩ neb nins sẽn karemd-a n baood n wʋmd a võorã, la b tũud bũmb nins b sẽn bãngã na n paama sũ-noogo.—Vẽnegre 1:3; 22:7.
Bãn nins sẽn be Vẽnegr sebrã pʋgẽ wã makda bũmb toor-toore.—Vẽnegre 1:1.
Vẽnegr sebrã gomda bũmb kẽer yell sẽn be Biiblã sɛb a taab pʋsẽ. Wala makre:
A Zeova. A yaa “Wẽnnaam sɩd-sɩd saasẽ” la soab ning sẽn naan bũmb fãa wã.—Tõodo 4:39; Yɩɩn-sõamyã 103:19; Vẽnegre 4:11; 15:3.
A Zeezi Kirist. A yaa “Wẽnnaam Pe-bilã.”—Zã 1:29; Vẽnegre 5:6; 14:1.
A Sʋɩtãan. A yaa Wẽnnaam bɛ.—Sɩngre 3:14, 15; Zã 8:44; Vẽnegre 12:9.
Babilon-kãsengã. A yaa a Zeova la a nin-buiidã bɛ. A zãmsda nebã bũmb nins sẽn yaa ziri Wẽnnaam wɛɛngẽ, wa pĩnd Babilonnã (Babɛll).—Sɩngre 11:2-9; Ezayi 13:1, 11; Vẽnegre 17:4-6; 18:4, 20.
“Mogrã”. A makda neb nins sẽn kɩɩsd Wẽnnaamã.—Ezayi 57:20; Vẽnegre 13:1; 21:1.
Bũmb toor-toor b sẽn da tar n waoogd Wẽnnaam sɛk-roogã pʋgẽ. Wala makre: kaoolã koglgã, mogrã sẽn yaa wa vɛɛrã (koom waasg yĩnga), fɩtl-dãmbã, wisdu, la tẽn-kugrã.—Yikri 25:10, 17, 18; 40:24-32; Vẽnegre 4:5, 6; 5:8; 8:3; 11:19.
We-rũmsã. B makda ninsaalbã goosneema-rãmbã.—Dãniyɛll 7:1-8, 17-26; Vẽnegre 13:2, 11; 17:3.
Nimero-dãmb sẽn makd bũmb kẽere.—Vẽnegre 1:20; 8:13; 13:18; 21:16.
Vẽnegr nins sẽn gomd “Zu-soabã daarã” yellã sɩnga pidsgu wakat ning Wẽnnaam sẽn lugl a Rĩungã yʋʋm 1914 t’a Zeezi sɩng a naamã rɩɩbã. (Vẽnegre 1:10) Dẽnd vẽnegr sebrã bãngr-goam wʋsg n na n pids tõnd wakatã.
D sã n dat n wʋm Vẽnegr sebrã võore, d segd n maana wa d sẽn maand ne Biiblã sɛb a taabã. D segd n kosa Wẽnnaam t’a kõ-d yam, la d kos neb nins sẽn wʋmd sebrã võorã sõngre.—Tʋʋma 8:26-39; Zak 1:5.