Bãngr-gomd yaa bõe?

Biiblã sẽn yete

Bãngr-gomd yaa koɛɛg Wẽnnaam sẽn vẽneg no-rɛɛs t’a taas neb a taaba. Biiblã yeelame tɩ no-rɛɛsdb “n togs Wẽnnaam koees wa sẽn zems vʋʋsem sõngã sẽn vẽneg-bã.” (2 Pɩyɛɛr 1:20, 21) Rẽnd no-rɛɛs yaa ned sẽn deegd koees Wẽnnaam nengẽ n taasd neb a taabã.—Tʋʋma 3:18.

Wẽnnaam kõo no-rɛɛsdbã a koeesã wãn to?

Wẽnnaam tũnuga ne manesem toor-toor n kõ no-rɛɛsdbã a koeesã:

• Gʋlsem. Daar a ye, Wẽnnaam tũnuga ne manesem kãng n kõ a Moyiiz Tõod piigã yẽ menga sẽn gʋlse.—Yikri 31:18.

• Malɛk sẽn gom Wẽnnaam yʋʋr yĩnga. Wala makre, Wẽnnaam tũnuga ne malɛk n yeel a Moyiiz koɛɛg ning a sẽn da segd n tɩ taas Ezɩpt rĩm a Farawõ wã. (Yikri 3:2-4, 10) Wẽnnaam sã n da rat tɩ yɩ goam takɩ, a yãkda gom-biisã n wilg malɛgsã tɩ b tɩ taase. A maana woto ne a Moyiizi, n yeel-a yaa: “Fo segd n gʋlsa gom-kãensã, bala yaa sẽn zems ne gom-kãensã la mam maand kaool ne foo la ne Israyɛll nebã.”—Yikri 34:27.a

• Vẽnegre. Wakat ninga, yaa no-rɛɛsã sẽn wat n pa gõe t’a yamã vẽenẽ la a paamd vẽnegre. (Ezayi 1:1; Habakuk 1:1) Wakat kẽer menga, sẽn paamd-a vẽnegrã kẽesda a toogo. (Luk 9:28-36; Vẽnegre 1:10-17) Wakat ning me, yɩɩ pʋʋsg sasa la b paam vẽnegrã. (Tʋʋma 10:10, 11; 22:17-21) Wẽnnaam tũnuga ne zãmsd me n taas no-rɛɛsdb a koeese, b gõeem sasa.—Dãniyɛll 7:1; Tʋʋma 16:9, 10

• A ninga a koɛɛgã b yamẽ wã. Wẽnnaam mi n ninga a koeesã no-rɛɛsdbã yamẽ tɩ b taas nebã. Biiblã sɩd wilgda rẽ. A yeelame: “Gʋls-sõamyã tõr yaa Wẽnnaam n vẽneg tɩ b gʋlse.” D tõe n lebga gom-biis nins sẽn yaa “Wẽnnaam n vẽnegã” me tɩ “Wẽnnaam n walme.” (2 Tɩmote 3:16) Wẽnnaam tũnuga ne a vʋʋsem sõngã bɩ a pãngã n ning a koeesã no-rɛɛsdbã yamẽ tɩ yaa wa a sẽn walem-ba. Ra yaa Wẽnnaam koeese, la yaa no-rɛɛsdbã n da yãkd gom-biis nins b sẽn na n tũnug ne n taas koeesã.—2 Sãmwɛll 23:1, 2.

Bãngr-goamã fãa gomda bũmb sẽn wat beoog yell bɩ?

Ayo. Biiblã bãngr-goamã pa gomd bũmb sẽn wat beoog yell bal ye. La b fãa la bal gomda bũmb sẽn wat yelle, baa sã n pa vẽeneg-vẽenega. Wala makre, Wẽnnaam no-rɛɛsdbã sagla Israyɛll nebã naoor wʋsgo, tɩ b bas b manesem-wẽnsã. B wilga Israyɛll nebã bark nins b sẽn na n paame b sã n sak keoogrã, la tood nins sẽn na n paam-ba, b sã n zãgse. (Zeremi 25:4-6) Israyɛll nebã yɛlã sẽn da na n baas to-to wã bee ne b manesem sẽn da na n yɩ to-to.—Tõodo 30:19, 20.

Biiblã bãngr-goam kẽer sẽn pa gomd bũmb sẽn wat beoog yelle:

• Wakat n zĩnd tɩ Israyɛll nebã kos Wẽnnaam sõngre, t’a tʋm a no-rɛɛs t’a tɩ yeel-b tɩ b sẽn zãgs n pa sak a noyã yĩnga, a pa na n sõng-b ye.—Bʋ-kaoodbã 6:6-10.

• A Zeezi sẽn wa n sõsd ne Samari pagã, a togs-a-la bũmb kẽer a sẽn da maane, tɩ sã n da pa Wẽnnaam n vẽneg-a bɩ a ra pa tõe n bãng rẽ ye. Pagã bãngame t’a Zeezi yaa no-rɛɛsa, baa ne a sẽn pa gom ne-a bũmb sẽn na n wa pids yellã.—Zã 4:17-19.

• A Zeezi bɛɛbã sẽn wa n namsd-a wã, b pila a nengã, n wẽ-a, la b yeel-a yaa: “Togs bãngr-gomd wɛ! Yaa ãnd n wẽ foo?” B ra pa yet a Zeezi t’a togs bũmb sẽn na n wa pids ye. B sẽn da rat yaa a tũnug ne pãng ning Wẽnnaam sẽn kõ-a wã n togs-b sẽn yaa ned ning n wẽ-a wã.—Luk 22:63, 64.