BIIBLÃ VƐRSE-RÃMB B SẼN BILG A VÕORE
Rom dãmb 10:13: “Bool Zu-soabã yʋʋre”
“Ned ning fãa sẽn pʋʋsd ne a Zeova yʋʋrã na n paama fãagre.”—Rom dãmbã 10:13, Dũni-paalgã lebgre.
“Ned ning fãa sẽn na n bool Zu-soabã yʋʋr na n paama fãagre.”—Rom dãmbã 10:13, Wẽnnaam Sebre, 2014.
Rom dãmb 10:13 goamã võore
Wẽnnaam pa bakd ned ye. A kõta nebã fãa weer tɩ b tõe n wa paam fãagre, n tõog n vɩɩmd wakat sẽn kõn sa, baa ne b sẽn yitẽ, b yĩn-kõbgo, la b tarem. La sẽn na yɩl n wa paam rẽ, d segd n pʋʋsda ne yʋʋr ning sẽn yaa Zeova wã, sẽn yaa Wẽnnaam Sẽn-tõe-a-fãa wã yʋ-peellã.a—Yɩɩn-sõamyã 83:18.
B sẽn yeel Biiblã pʋgẽ tɩ “pʋʋsd ne a Zeova yʋʋrã” pa rat n yeel tɩ f bãng yʋʋrã la f pʋt-a bal ye. (Yɩɩn-sõamyã 116:12-14) Rat n yeelame me tɩ d kɩs soab ning yʋʋr sẽn yaa Zeova wã sɩd zãng-zãnga, la d teeg-a t’a sõng-do.—Yɩɩn-sõamyã 20:7; 99:6.
A Zeezi Kirist sẽn wa n be tẽngã zugã, a wilgame tɩ Wẽnnaam yʋʋrã tara yõod wʋsg a nifẽ. A sẽn na n wilg a karen-biisã b sẽn segd n pʋʋs to-to wã, pʋʋsgã sɩngrẽ a yeelame yaa: “Tõnd Ba sẽn be saasẽ, bɩ yãmb yʋʋr paam waoogre,” bɩ n yɩ sõngo. (Matiye 6:9) A Zeezi wilgame me tɩ d sã n dat n wa paam vɩɩm sẽn ka sɛtã, d segd n bao n bãnga a Zeova, n sak-a, la d nong-a.—Zã 17:3, 6, 26.
Bõe yĩng tɩ d tõe n yeel tɩ “Zu-soab” ning yell b sẽn gomd Rom dãmb 10:13 Wẽnnaam Sebr ning b sẽn yiis yʋʋmd 2014 pʋgẽ wã yaa a Zeova? Bala yaa goam nins sẽn be Zowɛll 2:32 pʋgẽ wã la b sẽn lebg n togs be wã. Pĩnd wẽndẽ Biiblã ne Ebre wã b sẽn da gʋls ne nugã pʋgẽ, vɛrse-kãngã pʋgẽ b pa ning tɩ “Zu-soaba,” sẽn yaa naam yʋʋrã ye. Yaa Wẽnnaam yʋ-peellã sẽn yaa Zeova wã la b ning-yã.b
B sẽn yeel bũmb ning n yaool n na n togs Rom dãmb 10:13 goamã
Biiblã wilgda Rom dãmb sak 10 pʋgẽ tɩ sẽn na yɩl n paam zood sõma ne Wẽnnaam, d segd n tẽe a Zeezi Kiristi. (Rom dãmb 10:9) Bũmb wʋsg n be b sẽn boond a soab tɩ Kãab-kʋdgã pʋgẽ n wilgd rẽ vẽenega. Ned wilgdame t’a tara tẽebo, a sã n “kõt kaset nebã taoore,” rat n yeel t’a sã n moond neb nins sẽn pa mi a Zeova wã fãagr koe-noogã. Ne rẽ maasem, neb a taabã tõe n paam n bɩɩsa tẽeb ning sẽn na n kɩt tɩ b wa paam vɩɩm sẽn ka sɛtã.—Rom dãmb 10:10, 14, 15, 17.
Karm-y Rom dãmb sak 10, ne a not-rãmbã la vɛrse nins sẽn tar loees ne vɛrse-kãensa wã.
a Pĩnd wẽndẽ Biibl-dãmb nins b sẽn gʋls ne nugã pʋsẽ, Wẽnnaam yʋ-peellã bee be sẽn ta naoor tus a yopoe. Ebre buud-gomdã pʋgẽ, b gʋlsda Wẽnnaam yʋ-peellã ne gʋls-biis a naase, tɩ b boond tɩ Tetragram. Moorã buud-gomd pʋgẽ, b lebga yʋ-kãng tɩ “Zeova.” La Biibl-mitb kẽer boonda yʋʋrã tɩ “Yahwe.”
b Wõnda kiris-nebã sẽn wa n lebgd Biiblã, b kell n basa Wẽnnaam yʋ-peellã Kãab-kʋdgã pʋgẽ vɛrse nins b sẽn lebs n togs Kãab-paalgã pʋgẽ wã, n pa toeem-a ye. Sebr a yembr (The Anchor Bible Dictionary, Volim a 6 soabã, seb-neng 392) pʋgẽ, b yeelame yaa: “Kaset beeme n wilgdẽ tɩ b sẽn wa n gʋlsd Kãab-paalgã pipi wã, vɛrse-rãmb nins sẽn da be Kãab-kʋdgã pʋgẽ tɩ b lebg n togs-b Kãab-paalgã pʋgẽ wã fãa la bal pʋsẽ, Tetragrammã, rat n yeel tɩ Wẽnnaam yʋʋrã sẽn yaa Yahwe wã ra bee be.” Rẽ wɛɛngẽ, y sã n dat n bãng n paas bɩ y ges Gʋls-sõamyã: Dũni-paalgã lebgre, Vẽnegre A5, gom-zug sẽn yaa “Wẽnnaam yʋʋrã sẽn be Biiblã babg ning b sẽn da gʋls ne Gɛrkã pʋgẽ.” Y sã n ges Traduction du monde nouveau wã b sẽn yiis zãmsgã yĩng ne Ãngilindã pʋgẽ, Appendix C2 wã zĩigẽ, y na n yãa b sẽn sõdg Biibl toor-toor b sẽn lebge, tɩ Wẽnnaam yʋ-peellã be Rom dãmb 10:13 pʋgẽ.