Yel-bũnã 16:3: “Dɩk f yɛla fãa n bas ne Zusoaba”

“Ning f sẽn maand fãa a Zeova nugẽ, tɩ rẽ la f magb toor-toorã na n yãk nenga.”—Yel-bũnã 16:3, Dũni-paalgã lebgre.

“Dɩk f yɛla fãa n bas ne Zusoaba tɩ b na n sõng-f lame tɩ f tõoge.”—Yelbũna 16:3, Wẽnnaam Sebre, 1983.

Yel-bũn 16:3 goamã võore

Yel-bũn-kãngã wilgdame tɩ neb nins sẽn tũud Wẽnnaam sɩd-sɩdã sẽn maand fãa na n yãka nenga, b sã n teeg-a, n basdẽ t’a wilgd-b sore, la b tũud sagls nins a sẽn kõt-bã.

“Ning f sẽn maand fãa a Zeova nugẽ.” Nand tɩ ned sẽn tũud a Zeova yãk yam n maan bũmbu,a a segd n sika a meng n bas t’a Zeova wilg-a sore. (Zak 1:5) Bõe yĩnga? Bũmb a ye yaa tɩ ninsaalbã pa mi bũmb nins fãa sẽn na n maan b vɩɩmã pʋgẽ, la b pa tõe me n gɩdg bõn-kãens tɩ pa maan ye. (Koɛɛg soaba 9:11; Zak 4:13-15) Sẽn paase, b mi n pa tar yam ning sẽn na n sõng-b tɩ b maan b sẽn datã ye. Rẽ n so tɩ neb wʋsg ningd b sẽn maand fãa Wẽnnaam nugẽ wã. Sẽn na yɩl n maan woto, b pʋʋsd-a lame n kos-a t’a wilg-b sore, la b tũud bũmb nins a sẽn togs a Gomdã pʋgẽ wã, rat n yeel tɩ Biiblã.—Koɛɛg soaba 9:11; Zak 4:13-15.

B sẽn yeel tɩ “dɩk f yɛla fãa n bas ne Zusoabab” rat n yeelame tɩ f ‘ning f sẽn maand fãa Zusoaba nugẽ.’ Sebr a yembr pʋgẽ, b wilgame tɩ yaa wa “ned sẽn na n sik a zɩɩb n dogl ned sẽn tar pãng n yɩɩd yẽ zug t’a na n tʋke.” Neb nins sẽn sikd b mens n teeg Wẽnnaamã tõe n basa b yam t’a na n sõng-b lame la a teel-ba.—Yɩɩn-sõamyã 37:5; 55:22.

B sẽn yeel tɩ “f sẽn maand fãa” wã pa rat n yeel tɩ d sẽn maand fãa tata Wẽnnaam yam, t’a na n ning-d bark ye. Sẽn na yɩl n paam a Zeova barkã, d sẽn maandã fãa segd n zemsa ne a noyã la a raabã. (Yɩɩn-sõamyã 127:1; 1 Zã 5:14) Wẽnnaam pa ningd kɩɩsd bark ye. Sɩd me, “a kɩtdame tɩ nin-wẽnsã magb pa yãkd neng ye.” (Yɩɩn-sõamyã 146:9) La a teenda neb nins sẽn tũud a noyã sẽn be Biiblã pʋgẽ tɩ wilgdẽ tɩ b sakd-a lame wã.—Yɩɩn-sõamyã 37:23.

“Rẽ la f magb toor-toorã na n yãk nenga.” Biibl kẽer pʋsẽ, b lebga gom-kãngã tɩ “la f sẽn saagdã fãa na paam pidsgu.” Biiblã babg ning b sẽn da gʋls ne Ebre tɩ nebã nong n boond tɩ Kãab-kʋdgã pʋgẽ, b lebga gom-bilã ne ãngilind t’a võorã yaa “yẽbge.” La naoor wʋsgo, gomda Wẽnnaam sẽn naan bũmb ninsã sẽn yẽbg kãn-kãe wã yelle. (Yel-bũnã 3:19; Zeremi 10:12) Woto me, Wẽnnaam kɩtdame tɩ neb nins sẽn yaa nin-tɩrs a nifẽ wã magb fãa yãkd nenga, la a sõngd-b tɩ b tar sũur pʋgẽ bãane, la sũ-noogo.—Yɩɩn-sõamyã 20:4; Yel-bũnã 12:3.

B sẽn yeel bũmb ning n yaool n na n togs Yel-bũn 16:3 goamã

Yaa rĩm a Salomo sẽn yaa Yel-bũn sebrã fãa la bal gʋlsdã n gʋls yel-bũn-kãngã. A tõog n togsa yel-bũn bãmb tusa, Wẽnnaam sẽn kõ-a yamã yĩnga.—1 Rĩm-dãmbã 4:29, 32; 10:23, 24.

Sak 16 sɩngrẽ, a Salomo goma Wẽnnaam yamã sẽn ka to wã yelle, la a wilg tɩ Wẽnnaam kisa wuk-m-mens rãmbã. (Yel-bũnã 16:1-5) Rẽ poore, a yeela bũmb sak kãng pʋgẽ, n na n sõng karemdbã tɩ b bãng bũmb sẽn tar yõod wʋsgo: Yaa tɩ ninsaalbã fãa tõe n paama yam hakɩɩk tɩ b sẽn maan fãa me yãk nenga, b sã n sik b mens n bas tɩ Wẽnnaam wilg-b sore. (Yel-bũnã 16:3, 6-8, 18-23) D yãta gom-kãensã naoor wʋsg Biiblã pʋgẽ.—Yɩɩn-sõamyã 1:1-3; Ezayi 26:3; Zeremi 17:7, 8; 1 Zã 3:22.

Ges-y video koɛɛg sẽn gomd Yel-bũn sebrã sẽn gomd bũmb ningã yelle.