Ezekɩyɛll sebre

41 Rẽ poore, a talla maam n kẽ Zĩ-sõngẽ wã,* n mak lugã sẽn be kɩremsã. B kɩreng a yembrã yalem yaa kãntɩɩg a yoobe,* tɩ b kɩreng a to wã me yalem yaa kãntɩɩg a yoobe. 2 Rignoorã yalem ra yaa kãntɩɩg piiga, t’a kɩreng lalsã* ra yaa kãntɩɩg a nu kɩreng a yembre, la kãntɩɩg a nu kɩreng a to wã. A maka a woglmã n mik tɩ yaa kãntɩɩg pis-naase, t’a yalmã yaa kãntɩɩg pisi.

3 Rẽ poore, a kẽe pʋgẽ wã* n mak rignoorã lugrã sẽn be kɩrengã, n mik t’a taglmã yaa kãntɩɩg a yiibu, tɩ rignoorã yalem yaa kãntɩɩg a yoobe. Rignoorã kɩreng lalsã* ra yaa kãntɩɩg a yopoe. 4 A maka ro-pʋg ning sẽn tees Zĩ-sõngã, n mik t’a woglmã yaa kãntɩɩg pisi, t’a yalmã me yaa kãntɩɩg pisi.+ A yeela maam yaa: “Yãoã yaa Zĩ-sõng sẽn yɩɩdã.”+

5 A maka wẽnd-doogã lalgã, n mik t’a taglmã yaa kãntɩɩg a yoobe. Ro-pʋs nins sẽn be wẽnd-doogã kɩremsã yalem ra yaa kãntɩɩg a naase.+ 6 Ro-pʋs nins sẽn be kɩremsã ra roga taab zut tãab-tãabo, tɩ rulg fãa tar ro-pʋs pis-tã. Koag n da gilg wẽnd-doogã lalgã, tɩ ro-pʋs nins sẽn be kɩremsã be b zutu, sẽn na yɩl tɩ ro-pʋsã raad ra kẽ wẽnd-doogã lalg pʋgẽ ye.+ 7 Ned sã n da yi pipi rulgã ro-pʋsẽ wã n dabd tãab-n-soab rulgã ro-pʋsẽ wã, a mikdame tɩ ro-pʋsã yalem paasdame.+ Wẽnd-doogã kɩrems a yiibẽ wã, rʋʋds sẽn gilgd n da be be. B sɩngda pipi rulgã ro-pʋsẽ wã, n zẽk n ta yiib-n-soab rulgã ro-pʋsẽ wã, la tãab-n-soab rulgã ro-pʋsẽ wã.

8 Mam yãame tɩ zĩ-zãntlg n da gilg wẽnd-doogã, la tɩ ro-pʋs nins sẽn be kɩremsã yẽbgrã zãntlem ra yaa tãnwĩig tõr n tãag gõdrẽ wã, rat n yeel tɩ kãntɩɩg a yoobe. 9 Ro-pʋs nins sẽn be kɩremsã yɩng lalgã yalem ra yaa kãntɩɩg a nu. Vɩʋʋg* n da be ro-pʋs nins sẽn be kɩremsã wogelle. Ro-pʋsã ra naaga wẽnd-doogã.

10 Zĩig n da be wẽnd-doogã ne rɩɩbã rot* sʋka,+ t’a kɩreng fãa yalem yaa kãntɩɩg pisi. 11 Rignoor n da be ro-pʋs nins sẽn be kɩremsã ne vɩʋʋgã sẽn be rɩtgã sʋka, tɩ rignoor a to be goabga. Vɩʋʋgã yalem ra yaa kãntɩɩg a nu, n gilg wẽnd-doogã.

12 Roog ning sẽn da be nin-taoor n tees vɩʋʋgã yalem ra yaa kãntɩɩg pis-yopoe, t’a woglmã yaa kãntɩɩg pis-wɛ. Roogã lalgã sẽn gilg-a wã taglem ra yaa kãntɩɩg a nu.

13 A maka wẽnd-doogã, n mik t’a woglmã yaa kãntɩɩg koabga. Vɩʋʋgã, roogã* ne a lalgã me woglem ra yaa kãntɩɩg koabga. 14 Wẽnd-doogã neng ning sẽn tees yaangã ne vɩʋʋgã yalem ra yaa kãntɩɩg koabga.

15 A maka roog ning sẽn tees vɩʋʋgã sẽn be poorẽ wã woglem, la a zĩis nins b sẽn tõe n tũ wã sẽn be kɩrems a yiibã, n mik tɩ yaa kãntɩɩg koabga.

A maka Zĩ-sõngã ne Zĩ-sõng sẽn yɩɩdã,+ la samandã zãong toor-toorã me, 16 n paas rigno-kogsã, võy nins pʋgẽ wã sẽn yalem n yɩɩd yɩngã,+ la zĩ-kãens a tãabã zĩis nins b sẽn tõe n tũ wã. Kaadr-dãmb sẽn maan ne raad+ n da be rigno-koakã noore, sẽn sɩng ne tẽngã n tãag võyã. Võyã ra ludame. 17 A maka rignoorã zugẽ, wẽnd-doogã pʋgẽ la a yɩngã, la lalgã sẽn gũbg-a wã tõre. 18 B peesa seribẽ-rãmb+ la koms naande,+ tɩ koang fãa be seribẽ-rãmb a yiib sʋka. Seribẽ fãa ra tara nens a yiibu. 19 A neng ning sẽn wõnd ninsaal nengã ra teesa koang ning sẽn be kɩreng a ye wã, t’a neng ning sẽn wõnd gɩgemd nengã tees koang ning sẽn be kɩreng a to wã.+ B ra pees-b-la woto n gilg wẽnd-doogã pʋg fãa. 20 Wẽnd-doogã lalgã zugu, sẽn sɩng ne tẽng n tãag rignoorã zugẽ, b ra peesa seribẽ-rãmb la koms naande.

21 Wẽnd-doogã kʋɩlengã ra-luk* fãa kɩrems ra zema taaba.+ Zĩ-sõngã* taoore, bũmb n da be be n wõnd 22 tẽn-kugr sẽn maan ne raado,+ t’a zãntlem yaa kãntɩɩg a tãabo, t’a woglem yaa kãntɩɩg a yiibu. Ra-lugs n da be a gõdẽ wã, t’a tẽngrã* ne a kɩremsã ra maan ne raado. Dẽ, raoã yeela maam yaa: “Yãoã yaa taabl ning sẽn be a Zeova taoorã.”+

23 Zĩ-sõngã ne Zĩ-sõng sẽn yɩɩdã fãa ra tara kʋɩlens a yiibu.+ 24 Kʋɩlensã ra tara pagds a yiib-yiibu. Kʋɩleng fãa ra tara pagds a yiibu.

25 B ra peesa seribẽ-rãmb la koms naand wẽnd-doogã kʋɩlensã zutu, tɩ wõnd sẽn be-b lalsã zutã.+ Yɩngã, b ra maaname tɩ raadã zʋʋg zãongã* zugẽ tɩ yaa wa zãnde. 26 Võy b sẽn maan tɩ pʋgẽ wã yaa yalems n yɩɩd yɩngã,+ ne koms naand n da be zãongã kɩrems a yiibã, n paas ro-pʋs nins sẽn be wẽnd-doogã kɩremsã zutu, la raadã sẽn zʋʋg tɩ yaa wa zãnã zutu.