Ezekɩyɛll sebre

46 “Ad a Zeova sẽn yaa Zu-soab sẽn ka to wã sẽn yeele: ‘Saman-bilã rignoor ning sẽn tees yaangã+ segd n kell n paga+ tʋʋmã ray a yoobã.+ La b segd n pak-a-la Vʋʋsg daarã, la ki-paall daare. 2 Naabã na n yii saman-kãsengẽ wã, n tũ rignoorã zãongẽ* wã n kẽ.+ A na n yaasa rignoorã lugã sɛɛga. Maan-kʋʋdbã na n kõo a maoong sẽn yõogd bugmã la a zems-n-taar maandã. Rẽ poore, a na n wõgemda rigno-koakẽ wã, la a yi n looge. La b pa segd n pag kʋɩlengã tɩ zaabrã pa ta ye. 3 Vʋʋsg rayã la ki-paalã wakate,+ soolmã nin-buiidã me na n wõgemdeda a Zeova taoor rigno-kãng noore.

4 “‘Vʋʋsg daarã, maoong sẽn yõogd bugmã naabã sẽn na n kõ a Zeova wã na n yɩɩ pe-bi-raad a yoob sẽn pa tar zanga, la pe-raoog sẽn pa tar zanga.+ 5 Kood biis kũunã na n yɩɩ efa* a ye pe-raoogã yĩnga, la bũmb ning a sẽn tõe n kõ pe-bi-raadã yĩnga, n paas kaam hĩn* a ye efa fãa yĩnga.+ 6 Ki-paallã daare, kũunã na n yɩɩ lol-poll sẽn pa tar zang b sẽn yãk rũm-bɛdã sʋka, pe-bi-raad a yoobe, la pe-raoogo. B baa a ye pa segd n tar zang ye.+ 7 A segd n kõo kood biis kũun efa a ye lol-pollã yĩnga, efa a ye pe-raoogã yĩnga, la bũmb ning a sẽn tõe n kõ pe-bi-raadã yĩnga. A segd n kõo kaam hĩn a ye efa fãa yĩng me.

8 “‘Naabã sã n wa na n kẽ, a segd n tũu rignoorã zãongẽ wã n kẽ, la a tũ be n yi.+ 9 Soolmã nin-buiid sã n wa na n wa a Zeova taoor tigã wakate,+ neb nins sẽn na n tũ rɩtg rignoorã+ n kẽ n waoog Wẽnnaamã segd n tũu goabg rignoorã n yi,+ tɩ neb nins sẽn tũ goabg rignoorã n kẽ wã tũ rɩtg rignoorã n yi. Ned baa a ye pa segd n lebg n tũ rignoor ning a sẽn tũ n kẽ wã n yi ye. Bala b segd n tũu rignoor ning sẽn be b taoorã n yi. 10 Sã n yaa ne naab ning sẽn be b sʋkã, a segd n kẽe wakat ning b sẽn wat n kẽedẽ wã, la a yi b sẽn wat n yitã. 11 Tigã sasa, kood biis kũunã na n yɩɩ efa a ye lol-pollã yĩnga, efa a ye pe-raoogã yĩnga, la bũmb ning a sẽn tõe n kõ pe-bi-raadã yĩnga. A segd n kõo kaam hĩn a ye efa fãa yĩng me.+

12 “‘Naabã sã n na n kõ a Zeova maoong sẽn yõogd bugum+ wall zems-n-taar maand tɩ yɩ yamleoog kũuni, b na n paka rignoor ning sẽn tees yaangã a yĩnga. A na n kõo a maoong sẽn yõogd bugmã ne a zems-n-taar maandã wa a sẽn maand to-to Vʋʋsg daarã.+ A sã n wa yi, b segd n lebs n paga rignoorã.+

13 “‘Daar fãa, yãmb segd n kõo a Zeova pe-bi-raoog sẽn zems yʋʋmd la sẽn pa tar zanga, tɩ yɩ maoong sẽn yõogd bugum.+ Yãmb segd n maana woto yibeoog fãa. 14 Yibeoog fãa yãmb segd paasa kood biis kũun efa pʋɩɩr a yembr pʋɩ a yoob zugu, ne kaam hĩn pʋɩɩr a ye pʋɩ a tãab zug sẽn na yɩl tɩ b mes zom-bãanegã zugu. Rẽ na n yɩɩ kood biis kũun b sẽn kõt a Zeova wakat fãa. Woto yaa noor sẽn paad wakat fãa. 15 B segd n kõo pe-bi-raoogã, kood biis kũunã la kaamã yibeoog fãa tɩ yɩ maoong sẽn yõogd bugum wakat fãa.’

16 “Ad a Zeova sẽn yaa Zu-soab sẽn ka to wã sẽn yeele: ‘Naabã sã n kõ a bi-ribl fãa kũun tɩ yaa a rogem-pʋɩɩre, na n lebga a kom-dibli wã rẽnda. Yaa b rogem-pʋɩɩre. 17 La a sã n yãk kũun a rogem-pʋɩɩrã pʋgẽ n kõ a tʋm-tʋmd a ye, na n yɩɩ a tʋm-tʋmdã rẽnd hal n tãag lohorem yʋʋmdã.+ Rẽ poore, bũmbã na n le lebga naabã rẽnda. Yaa a kom-dibli wã rogem-pʋɩɩr bal n na n yɩ b rẽnd wakat fãa yĩnga. 18 Naabã pa segd n dig nin-buiidã n yiis b zĩisẽ wã n deeg b rogem-pʋɩɩr ye. Yaa a meng zĩigã la a segd n yãk n kõ a kom-dibli wã tɩ yɩ b rogem-pʋɩɩre, sẽn na yɩl tɩ b ra rig mam nin-buiidã sʋk ned baa a ye n yiis a zĩigẽ ye.’”

19 Rẽ poore, a talla maam n tũ rignoor a ye n kẽ.+ Yaa rignoor ning sẽn pẽ rignoor ning sẽn tũud n kẽed maan-kʋʋdbã rɩɩbã rot sẽn yaa sõamyã wã* sẽn tees rɩtgã.+ Be, mam yãa zĩig sẽn be poorẽ wã, nin-taoor sẽnese. 20 A yeela maam yaa: “Yaa zĩ-kãngã la maan-kʋʋdbã na n dʋgd taal maoongã ne yel-wẽnd maoongã nemdo, la b maand bur ne kood biis kũunã.+ Woto, b pa na n tall baa fʋɩ n yi saman-kãsengẽ wã, tɩ wa kɩt tɩ nin-buiidã lebg sõamyã ye.”+

21 A talla maam n yi saman-kãsengẽ wã, n kɩt tɩ m kẽng samandã gõd a naasẽ wã. Mam yãame tɩ samand n be saman-kãsengã gõdrẽ fãa. 22 Saman-bi n da be samandã gõd a naasẽ wã, tɩ b woglmã yaa kãntɩɩg* pis-naase, tɩ b yalmã yaa kãntɩɩg pis-tã. Bãmb b naasã fãa ra zema taaba.* 23 Koag* la b ra maan n gilg b naasã fãa, la b maneg zĩis koagã tẽngr n na n dʋgd maandã nemd be. 24 Dẽ, a yeela maam yaa: “Yaa ro-kãensã pʋsẽ la wẽnd-doogã tʋm-tʋmdb rʋgd nin-buiidã maandã nemdo.”+