Tood sẽn kɩt tɩ d tẽed manegre

“Yaoolem wakate, tood na n zĩndame.”—2 TƖMOTE 3:1.

YÃMB zoe n maana kaset ne yel-beed nins sẽn pʋgdã wall y wʋm tɩ b gom b yell bɩ?

● Bã-kɛgeng sẽn yãgs neb wʋsg yõyã.

● Kom sẽn kʋ neb ka tɛka.

● Tẽn-digimdg sẽn kʋ neb tusa, la kɩt tɩ wʋsg rot sãame.

D na n goma yel-be-kãensã buudã yelle. Y na n bãngame tɩ Biiblã ra pĩnd n togsame tɩ yel-beed a woto na n zĩnda “yaoolem wakate.”a

D sẽn na n gom yel-be-kãensã yellã, pa sẽn na yɩl n wilg-y tɩ d vɩɩ dũni sẽn pid ne yel-beed pʋgẽ ye. Bala yaa vẽeneg tɩ yãmb mengã zoe n nee rẽ. D ratame tɩ y bãng tɩ manegr n wate. Na n sõnga yãmb tɩ y bãng tɩ yel-kãensã Biiblã sẽn deng n togs tɩ pidsd rũndã-rũndã wã wilgdame tɩ “yaoolem wakatã” na n taa a tɛk ka la bilfu. Y na n yãa goam neb kẽer sẽn yet rẽ wɛɛngẽ, la bʋʋm sẽn wilgd tɩ y segd n tẽeme tɩ manegrã kolgame.

[Tẽngr note]

1. Tẽn-digimdgu

“Tẽn-digimdg kãsems na n zĩndame.”—LUK 21:11.

● Tẽn-digimdg ning sẽn zĩnd Haiti wã sasa, b vaeesa rotã sẽn sirgã n yiis biig sẽn tar yʋʋmd la pʋɩ-sʋka, t’a yʋʋr boond t’a Winnie. Kiba-kɩtb sẽn kẽng be n wʋm a sẽn da be tãn-dagã tẽngr n wõosdẽ. Biigã põsame, la a roagdbã yẽ kiime.

PAAMDA PÃNG N PAASDẼ: B wilgame tɩ tẽn-digimdg kãsengã sẽn zĩnd Haiti yʋʋmd 2010 yʋʋm-vẽkr kiuugã, sẽn yɩɩd neb 300 000 n ki, tɩ sẽn kolg neb milyõ a ye la pʋɩ-sʋk rot sãam zĩig pʋgẽ. Yaa sɩd tɩ Haiti rẽndã yɩɩ kãsenga, la a buud maana zĩis a taaba. Yʋʋmd 2009 tʋʋl-nif kiuugã n tãag yʋʋmd 2010 tʋʋl-nif kiuugã, rat n yeel tɩ yʋʋm-yɛng pʋgẽ, sẽn yɩɩd tẽn-digimdg kãsems 18 n zĩndi.

NEB KẼER SẼN YETE: Woto pa rat n yeel tɩ tẽn-digimdgã n lebg wʋsg ye. Yaa bãngrã sẽn paas kibayã yelgr wɛɛngẽ wã n kɩt tɩ d wʋmd rẽ kibay n yɩɩd pĩndã.

B TARA BƲƲM BƖ? Bãng-y tɩ pa tẽn-digimdgã sõor sẽn na n zĩnd yaoolem wakatã yell la Biiblã gomd ye. A yetame tɩ ‘tẽn-digimdg kãsems na n zĩnda zĩig-zĩiga,’ tɩ yɩ bãnd sẽn wilgd vẽeneg tɩ d bee yaoolem wakatã.—Mark 13:8; Luk 21:11.

YÃMB TAGSG YAA WÃNA? Rẽ yĩnga d pa ne tẽn-digimdg kãsems wa Biiblã sẽn da pĩnd n togsã sɩda?

Tẽn-digimdsã bal pa sek na wilg tɩ d vɩɩ yaoolem wakat ye. A naaga bãn nins Biiblã sẽn deng n wilg tɩ pidsdẽ wã. D ges bãnd a yiib-n-soaba.

[Goam sẽn tar pãnga, seb-neng a 4]

“Tõnd [tẽn-gãongã bãngdbã] boonda tẽn-digimdg kãensã tɩ tẽn-digimdg kãsemse. Neb a taabã yẽ yetame tɩ yel-beedo.”—KEN HUDNUT, CENTRE AMÉRICAIN D’ÉTUDES GÉOLOGIQUES.

[Fotã soaadba, seb-neng a 4]

© William Daniels/Panos Pictures

2. Komã

“Kom na n zĩndame.”—MARK 13:8.

● Kom n kɩt tɩ rao a ye yik n kẽng Nizɛɛr tẽn-bil a ye sẽn boond tɩ Quaratadji. Komã kɩtame t’a yaopa, kom-pugli la kom-dibli me yik n babs-a. Yellã sẽn sãag-a wã kɩtame t’a bao pĩir n leb kɛɛng n gãeyã. Bõe yĩnga? A Sidi sẽn yaa tẽng-kãng naabã yeelame tɩ “yaa raoã sẽn pa tõe n paam dɩɩb n kõ a nebã n kɩt t’a leb kɛɛnga, n pa rat n zĩ n get-b ye.”

PAAMDA PÃNG N PAASDẼ: Daar fãa, dũniyã gill zugu, neb a 7 sʋka, ned a 1 n pa paamd rɩɩb tɩ seke. Afirik tẽns kẽer pʋsẽ, yellã wẽnem yɩɩda woto. Neb wʋsg n gãe pʋ-sãoogo. D rɩk makr ne pag ne a sɩd sẽn na n tar biiga. Rɩɩbã b sẽn tarã sekda neb a yiib bala. B na n kɩtame tɩ biigã rɩ n tɩge, la bãmb b yɩɩbã na n pʋɩya sẽn ketã. La yaa vẽeneg tɩ pa na n sek-b ye. Zags wʋsg pʋsẽ, yaa woto daar fãa.

NEB KẼER SẼN YETE: Tẽngã sẽn kõt kood ningã sekda nebã fãa. B sã n bas wẽgbã la b pʋɩ tɩ zemse, kom ra pa na n zĩnd ye.

B TARA BƲƲM BƖ? Yaa sɩd tɩ rũndã-rũndã, ka-koaadbã tõe n ko n paama rɩɩb n yɩɩd pĩndã. Sẽn yaa sõma yaa goosneema rãmbã sẽn da na n tõog n pʋɩ koodã tɩ zemse, sẽn na yɩl tɩ kom ra zĩnd ye. La b makda rẽ maaneg yʋʋm ka tɛka, la b pa tõogd ye.

YÃMB TAGSG YAA WÃNA? Mark 13:8 goamã pa pidsd sɩda? Baa ne bãngrã la tʋʋmã teed sẽn tar paasgã, komã pa ket n namsd nebã dũniyã gill zug sɩdã?

Naoor wʋsgo, tẽn-digimdgã la komã wata ne yel-beed a to sẽn naag bãnd ning sẽn wilgd tɩ d vɩɩ yaoolem wakatã.

[Goam sẽn tar pãnga, seb-neng a 5]

“Kamb nins fõosrã, sãagã la bãas a taabã sẽn kʋʋdã sʋka, bãmb b tãab fãa sʋka, biig a ye n da na n põse, a sã n da paamd n dɩt n tɩgda.”—ANN M. VENEMAN, ANCIEN DIRECTEUR DE FONDS DES NATIONS UNIES POUR L’ENFANCE.

[Fotã soaadba, seb-neng a 5]

© Paul Lowe/Panos Pictures

3. Bãasã

“Bã-longds . . . na n zĩnda zĩig-zĩiga.”—LUK 21:11.

● A Bonzali yaa logtor sẽn be Afirik tẽng a ye nin-buiidã sẽn zabd taab pʋgẽ. A sẽn beẽ wã, bãag b sẽn boond tɩ marburga n da kʋʋd neb sẽn da tʋmd sãnem-bok pʋgẽ. A maana a sẽn tõe fãa n na n tɩp nin-kãensã. A kosa goosneemã neb sẽn be tẽn-bedr pʋgẽ tɩ b wa sõng-a, tɩ b pa leok-a ye. Maana kiuug a naas tɩ b yaool n na n tʋm neb tɩ b wa, la b wa n mikame t’a Bonzali kiime. Yaa a sẽn da modgd n na n tɩp nebã la bãagã long-a t’a ki.

PAAMDA PÃNG N PAASDẼ: Fulfuudã bãasã, sãagã, SƖDA wã, kõs-kʋdgã la pali wã naaga bãas nins sẽn kʋʋd nebã wʋsgã. Yʋʋmd 2004 pʋgẽ, b geelame n mik tɩ bã-kãensã buudã kʋʋ neb sõor sẽn yɩɩd milyõ 10 la pʋɩ-sʋka. Woto rat n yeelame tɩ minit a 1 fãa pʋgẽ, neb 20 n da kiidi.

NEB KẼER SẼN YETE: Yaa nebã sõorã sẽn tar paasg dũniyã gill zugã n kɩt tɩ bãasã lebg wʋsgã. Kɩtame me tɩ bãasã tõe n paam neb wʋsgo.

B TARA BƲƲM BƖ? Yaa sɩd tɩ nebã sõor sɩd paasa wʋsgo. La ninsaalbã me paama bãngr n paas bãasã la tɩbsgã wɛɛngẽ. Dẽnd yaa vẽeneg tɩ bãasã ra pa segd n ket n namsd ninsaalbã woto ye. La yaool n ket n namsd-b lame.

YÃMB TAGSG YAA WÃNA? Rẽ yĩnga bã-longdsã pa namsd nebã wa Biiblã sẽn pĩnd n togsã sɩda?

Tẽn-digimdgã, komã la bãasã yaa yel-beed sẽn vargd neb wʋsg tɩ b pa tar a tɩɩm ye. La neb milyõ rãmb me la neb a taab namsda. Wakat ning mengã yaa neb nins sẽn da segd n kogl-bã n wẽneg n namsd-ba. D ges bũmb a to Biiblã sẽn pĩnd n togs tɩ na n zĩndame.

[Tẽngr note]

[Goam sẽn tar pãnga, seb-neng a 6]

“Bõn-yẽeg bɩ we-rũng a to sã n paam-f n wãbdẽ tɩ f pa tõe n põse, yaa yel-beedo. Bãag ning me sã n paam-fo, tɩ f neẽ t’a halkd-f lame tɩ f pa tar a tɩɩm, yaa yel-beed tɛkẽ.”—ÉPIDÉMIOLOGISTE MICHAEL OSTERHOLM.

[Fotã soaadba, seb-neng a 6]

© William Daniels/Panos Pictures

4. Nonglmã kaalem

“Neb wʋsg nonglem na n lebga maasga.”—MATƖE 24:12.

● A Chris yaa rao sẽn tʋmd ne nord du pays de Galles sull ning sẽn sõngd neb nins b sẽn namsd zagsã pʋsẽ wã. A yeela woto: “Daar a ye, pag m sẽn da mi n wa tõnd tʋʋmã zĩigẽ. M sẽn yã-a wã, m pa bãng meng tɩ yaa yẽ ye. Bala b pãb-a lame hal t’a pogl wʋsgo.” A paasa woto: “Pãbrã la namsgã sẽn loog nugã mi n kɩtame tɩ pagb kẽer meng sã n wa bɩ b pa rat n zẽk b neng n ges ned ye.”

PAAMDA PÃNG N PAASDẼ: Afirik tẽng a ye pʋgẽ, b geelame n mik tɩ pagb a 3 fãa sʋka, a 1 la b yõg a sẽn wa n yaa biiga. Tẽng-kãng pʋgẽ, b sogsa rapã n mik tɩ rap a 3 fãa sʋka, a 1 n tagsd tɩ pagbã pãbrã pa bũmb sẽn yaa wẽng ye. Pa pagbã bal la b pãbd bɩ n namsdẽ ye. Wala makre, Kanada, b geelame n mik tɩ rap 10 sʋka, sẽn na ta rap a 3 la b pagb nams wall b pãbe.

NEB KẼER SẼN YETE: A buudã ra sɩng n beeme. Yaa b sẽn gomd rẽ yell rũndã-rũndã n yɩɩd pĩndã n kɩt tɩ yaa wa kengame wã.

B TARA BƲƲM BƖ? B sɩd gomda rẽ yell wʋsg rũndã-rũndã n yɩɩd pĩndã. La rẽ yĩnga woto kɩtame tɩ yel-kãngã boog sɩda? A ka boog baa bilf ye. Nonglmã kaalmã maneg n yãngame.

YÃMB TAGSG YAA WÃNA? Goam nins sẽn be Matɩe 24:12 pʋgẽ wã pa pidsd sɩda? Rẽ yĩnga d pa ne tɩ baa nonglem ning sẽn da segd n zĩnd zagsã rãmb sʋkã kae sɩda?

Yell a nu soabã Biiblã sẽn pĩnd n togs tɩ pidsd rũndã-rũndã yaa tẽngã sãoongã. D ges Biiblã sẽn yet bũmb ning rẽ wɛɛngẽ.

[Goam sẽn tar pãnga, seb-neng a 7]

“B sẽn namsd nebã zagsã pʋsẽ wã bee wẽnem nins sẽn tar pãng n yɩɩdã sʋka. B wilgame tɩ naoor wʋsgo, pag sã n wa sek a na n tɩ yã polɩɩs rãmb n togse, rẽ t’a sɩdã zoe n pãb-a-la sẽn na ta naoor 35.”—UNE PORTE-PAROLE DU SERVICE D’ASSISTANCE TÉLÉPHONIQUE AUX VICTIMES DE VIOLENCES DOMESTIQUES, PAYS DE GALLES.

5. Tẽngã sãoongã

“[Wẽnnaam na n] sãama neb nins sẽn sãamd tẽngã.”—WILGRI 11:18, Kãab-paalgã Koe-noogo.

● A Pirri yaa Nizeria rao sẽn maand bãngi. B raaga ka-yook kʋɩlg ning b sẽn boond tɩ Dɛlta du Nizɛɛrã pʋgẽ, tɩ kʋ a tɩɩsã, tɩ kɩt t’a tʋʋmã sãame. A yeela woto: “Sãamda tõnd kʋɩlgã koom, n kʋʋd zĩmã, la sãamd d yĩnsã. M pa le tar tʋʋmd m sẽn na n tʋm n tõog n ges m zakã rãmb yell ye.”

PAAMDA PÃNG N PAASDẼ: Bãngdbã wilgame tɩ yʋʋmd fãa, sagd sẽn kẽed mogrã la kʋɩlsã pʋsẽ wã taa ton milyõ a 6 la pʋɩ-sʋka. B geelame n mik tɩ pʋɩ-sʋkã fãa yaa sũudu, sẽn na n kaoos yʋʋm wʋsg n yaool n põog n menem. Rẽ sẽn yãk a toogo, nebã sẽn yãkd bũmb nins tẽn-gãongã pʋgẽ wã looga noor hal tɩ sãamd tẽngã. Sẽn na yɩl tɩ b sẽn yãkd bũmb ning yʋʋmdã pʋgẽ wã le leb a zĩigẽ, rẽndame tɩ b bas tẽn-gãongã t’a vʋʋs yʋʋmd la kiuug a nu. Ostrali zʋrnall a ye (Sydney Morning Herald) wilgame tɩ nebã sõorã sã n ket n paasdẽ, tɩ b yãkd bũmb ning sẽn be tẽn-gãongã pʋgẽ wã n paasdẽ, ka ne yʋʋmd 2035 wã tɩ yaa tɩlae tɩ d paam tẽn-gãong a to n paase.

NEB KẼER SẼN YETE: Ninsaalbã tara yam la bãngre. D tõe n paama yel-kãngã tɩɩm.

B TARA BƲƲM BƖ? Neb la sigls n be, n tʋmd wʋsg sẽn na yɩl tɩ nebã bãng tɩ tẽn-gãongã la pemsmã rẽgengã, la tɩɩsã keeb ne weoogã sãoongã yaa zu-loe-kãsenga. Baa ne rẽ, yel-kãngã sẽn keng n ta zĩig ningã buud zɩ n zĩnd ye.

YÃMB TAGSG YAA WÃNA? Yãmb pa tagsd tɩ Wẽnnaam sɩd segd n maana bũmb sẽn na yɩl tɩ tẽn-gãongã sãoong sa sɩda?

Yel-kãensã a nu wã Biiblã sẽn pĩnd n togsã sẽn yãk a toogo, a wilgdame me tɩ bũmb toor-toor la b na n maan yaoolem wakatã sasa nebã neer yĩnga. D na n goma bũmb a yembr yelle.

[Goam sẽn tar pãnga, seb-neng a 8]

“Ne mam tagsgo, yaa wa m da bee arzãn pʋgẽ, n wa be bõn-põos la sagd b sẽn yõogd sʋka.”—ERIN TAMBER, UNE HABITANTE DE LA CÔTE DU GOLFE DU MEXIQUE, AUX ÉTATS-UNIS, COMMENTANT LES EFFETS DE LA MARÉE NOIRE DE 2010.

[Zĩ-gũbri, seb-​neng a 8]

Yaa Wẽnnaam yell bɩ?

Sẽn mik tɩ Biiblã pĩnd n togsame tɩ yel-beed nins tõnd sẽn ne rũndã-rũndã wã na n wa zĩndame wã, rat n yeelame tɩ yaa Wẽnnaam n wat ne yel-be-kãensã bɩ? Yaa Wẽnnaam n kɩtd tɩ d namsdẽ wã bɩ? Y sã n karem Biiblã sɩd yetame tɩ bõe? sebrã a Zeova Kaset rãmbã sẽn yiisã sak 11 wã, y na n yãa sogs-kãensã leoore.

[Fotã soaadba, seb-neng a 8]

U.S. Coast Guard photo

6. Koɛɛg sẽn ta dũniyã gilli

“Wẽnnaam soolem koe-no-kãngã na n moona dũniyã tɛk fãa.”—MATƖE 24:14.

● A Vaiatea yaa pag sẽn vɩ Pasifik ko-sʋk tẽng a ye yʋʋr sẽn boond tɩ Tuamotu pʋgẽ. Yaa tẽn-bila, n le kẽ be n weel zĩis sẽn kolg 80. Yaa neb 16 000 bal n vɩ beenẽ. La a Zeova Kaset rãmbã moona a Vaiatea ne a yagsã fãa koɛɛgã. Bõe yĩnga? Yaa a Zeova Kaset rãmbã sẽn dat tɩ Wẽnnaam soolem koe-noogã ta nebã buud fãa, baa b sẽn beẽ zĩig ning fãa wã yĩnga.

PAAMDA PÃNG N PAASDẼ: Koɛɛgã mooneg taa dũniyã ween-vɩɩs a naasã fãa. Yʋʋmd 2010 pʋgẽ bala, a Zeova Kaset rãmbã rɩka lɛɛr dãmb sẽn yɩɩd milyaar a ye la pʋɩ-sʋk n moon koe-noogã tẽns 236 pʋsẽ. Woto rat n yeelame tɩ daar fãa, a Zeova Kaset soab fãa rɩka minit 30 n moon koɛɛgã. Yʋʋm piigã sẽn loogã pʋgẽ, b basa sɛb sõor sẽn yɩɩd milyaar 20 ne nebã.

NEB KẼER SẼN YETE: Yʋʋm tusa la woto b sẽn sɩng n moond nebã Wẽnnaam koɛɛgã.

B TARA BƲƲM BƖ? Neb wʋsg sɩd moona Wẽnnaam koeese. La naoor wʋsgo, b pa moon n kaoose, bɩ b pa tõog tɩ koɛɛgã ta zĩis wʋsg ye. La a Zeova Kaset rãmbã yẽ siglame, n moond koɛɛgã neb milyõ rãmb dũniyã gill zugu. A Zeova Kaset rãmbã ket n moonda koɛɛgã, baa ne nin-toose, sigls la tẽns taoor dãmb sẽn tar pãng wʋsg sẽn bao n na n gɩdg-bã.a (Mark 13:13) Sẽn paase, b pa yaood a Zeova Kaset rãmbã tɩ b moond koɛɛgã ye. Yaa ne yamleoog la b rɩkd b sɛkã n moondẽ, la b sɛbã me pa koosd ye. Yaa ligd ning nebã sẽn kõt ne yamleoogã n teend tʋʋmdã.

YÃMB TAGSG YAA WÃNA? Wẽnnaam soolem koe-noogã pa moond dũniyã gill zug sɩda? Yãmb pa tẽed tɩ gom-kãngã sẽn pidsdã wilgdame tɩ manegr n wat ka la bilf sɩda?

[Tẽngr note]

[Goam sẽn tar pãnga, seb-neng a 9]

“A Zeova sã n ket n kõt sor fãa, d na n ket n moonda koe-noogã ne yẽesem, n maand d sẽn tõe fãa sẽn na yɩl tɩ ta nebã buud fãa.”—ANNUAIRE DES TÉMOINS DE JÉHOVAH, 2010.

Manegrã wakat ta n saame!

“A keta bilf bala, tɩ nin-wẽng kõn tol n zĩnd ye. . . . La sũ-maasem dãmbã na n sooga dũniyã, n maan sũ-noog laafɩ wʋsg yĩnga.”—YƖƖL SÕAMYÃ 37:10, 11.

YÃMB rat n yãa gom-kãngã pidsg bɩ? Yaa vẽeneg tɩ y rata woto. Bãng-y tɩ kaset wʋsg n be sẽn wilgd tɩ gom-kãngã na n pidsa ka la bilfu.

Sõss nins sẽn loogã pʋgẽ, d yãa bũmb nins Biiblã sẽn deng n togs tɩ wilgd vẽeneg tɩ d vɩɩ “yaoolem wakatã” bãmb b wãn bala. (2 Tɩmote 3:1-5) Wẽnnaam vẽnega Biiblã gʋlsdb tɩ b pĩnd n togs yel-kãensã, sẽn na yɩl tɩ tõnd sã n wa yã-b bɩ d bãng tɩ manegr n wate. (Rom dãmba 15:4) Gom-kãensã pidsgã wilgdame tɩ ka la bilfu, zu-loees la yel-beed nins tõnd sẽn ne wã fãa na n saame.

Yaoolem wakatã loogr poore, bõe n na n maane? Wẽnnaam Rĩungã na n sooga dũniyã, n dɩ naam ninsaalbã zugu. (Matɩe 6:9) Ges-y Biiblã sẽn wilgd yɛlã sẽn na n yɩ to-to tẽngã zug sasa kãngã:

● Komã na n saame. “Ki wʋsg na n zĩnda soolmã pʋgẽ. A na n miima tãens zutu.”—Yɩɩl Sõamyã 72:16.

● Bãasã na n saame. “Tẽngã ned baa a ye ka na n le yeel t’a ka laafɩ ye.”—Ezai 33:24.

● Tẽn-gãongã na n paama manegre. “Weoogã ne zĩ-koɛɛngã na n maana sũ-noogo, la rasempʋɩɩgã na n kɩdmame n ning puud wa sõs puudu.”—Ezai 35:1.

Woto yaa Biiblã sẽn kãab bõn-sõma nins tɩ na n pids ka la bilfã bãmb b wãn bala. Bõe yĩng tɩ y pa na n kos a Zeova Kaset rãmbã tɩ b wilg-y bũmb ning sẽn kɩt tɩ bãmb kɩs sɩd woto tɩ manegrã wakat ta n saame wã?