Neb kẽer yetame tɩ yaa toog tɩ b nong Wẽnnaam. B tagsdame tɩ b pa tõe n wʋm Wẽnnaam yɛlã võore, t’a zãra ne-ba, la t’a pʋd n yaa wẽnem soaba. Ad kẽer sẽn yeele:

• A Marco sẽn yit Itali yeela woto: “Maam pʋʋsa Wẽnnaam n dat t’a sõng-ma, la m da getame t’a zãra ne ninsaalbã, la tɩ d pa tõe n paam t’a kelg-d ye. M da tagsdame tɩ Wẽnnaam yaa pãng buud sẽn be, n pa tar yĩn-sidg ye.”

• A Rosa sẽn yit Guatemala yeelame: “Baa ne m sẽn da rat n tũ Wẽnnaam ne m sũur fãa wã, m da getame t’a zãra ne-d wʋsgo. M da tagsdame t’a yaa Wẽnnaam sẽn yaa wẽnem soaba, sẽn baood bal n na n sɩbg tõndo. M da pa tẽed t’a mii nimbãan-zoeere, bʋgsem la nonglem ye.”

• Ad a Raymonde sẽn yit Kanada wã me sẽn yeele: “Mam sẽn da yaa biiga, m da tẽedame tɩ Wẽnnaam sẽn gẽesd bal yaa d kongrã, tɩ sã n toga ne sɩbgr bɩ a paam n sɩbg-do. M waa n getame t’a toog kae ne tõnd ye. M yamẽ, a yaa wa peremiye ministr sẽn so nin-buiidã n tog n get b yelle, t’a toog yaool n kae ne-b woto ye.”

La yãmb yẽ tagsg yaa bõe? Ned tõe n nonga Wẽnnaam bɩ? Na maan yʋʋm kobs sẽn looge, kiris-neb n da sok woto. Sɩd me pĩnd wẽndẽ wã, neb wʋsg sẽn da yet tɩ b yaa kiris-neb ra pʋd n pa pʋʋsd Wẽnnaam sẽn-tõe-a fãa wã ye. Bõe yĩnga? Bala nebã ra yɛɛsda a na n wa sɩbg-ba. Rẽ wɛɛngẽ, kʋdemd yɛl-mit a Will Durant yeela woto: “Ned sẽn yaa koangd na n yɩɩ wãn n saag n pʋʋs Wẽnnaam sẽn zãr ne-do, la sẽn yaa wẽnem soaba?”

Sɩnga wãn tɩ wʋsg wa tagsdẽ tɩ Wẽnnaam zãra ne-do, la t’a yaa wẽnem soaba? Biiblã yetame tɩ Wẽnnaam yaa wãn-wãna? Rẽ yĩnga y sã n bãng sɩdã, tõe n sõng-y lame tɩ y nong-a bɩ?

NEB WƲSG SẼN TẼEDE:

A David Cunningham sẽn yaa tũudum yɛl-mitã yeela a sebr a ye (Theological Studies) pʋgẽ: “Tõnd pa tõog n zems taab d sã n tõe n yeelame tɩ Wẽnnaam tara yʋʋr bɩ a pa tar ye. La a sã n tara yʋʋr me, a yʋʋr la a bõe?”

BIIBLÃ SẼN YETE:

Wẽnnaam meng yeelame: “Mam yaa a Zeova, yaa mam yʋʋr la woto.” (Ezai 42:8, MN) “Zeova” wã yaa hebre gom-bila, t’a võorã yaa “kɩt tɩ yɩ.” Rẽnd rat n yeelame tɩ Wẽnnaam “kɩtdame tɩ yɩ.”—Sɩngre 2:4.

A Zeova ratame tɩ d pʋt a yʋʋrã, la d sõng neb a taabã tɩ b bãng a yʋʋrã. Biiblã yetame: ‘Pʋʋs-y ne bãmb yʋʋre. Wilg-y nebã bãmb tʋʋmã n tẽeg tɩ bãmb yʋʋr yaa kãsenga.’—Ezai 12:4.

A Zezi ra pʋta Wẽnnaam yʋʋrã. A pʋʋsg pʋgẽ, a yeela a Zeova woto: “Mam wilga bãmb [rat n yeel t’a karen-biisã] yãmb yʋʋre, la mam na n le wilga bãmba, tɩ yãmb [rat n yeel tɩ Wẽnnaam] sẽn nong maam ne nonglem ningã zĩnd bãmb pʋsẽ, tɩ mam me pa ne bãmba.”—Zã 17:26.

SƖDÃ BÃNGR YÕODO:

A Walter Lowrie sẽn yaa tũudum yɛl-mitã yeelame tɩ “ned sã n pa mi Wẽnnaam yʋʋre, d tõe n yeelame t’a pa mi Wẽnnaam sõma ye. A sã n tagsdame tɩ Wẽnnaam yaa pãng buud bala, a pa tõe n nong-a ye.”

Rao a ye yʋʋr sẽn boond t’a Victor ra kẽnda egiliizẽ wakat fãa, la a ra getame t’a pa mi Wẽnnaam sõma ye. Ad a sẽn yeele: “Mam wa n bãngame tɩ Wẽnnaam yʋʋr la a Zeova. Yɩɩ wa rẽ tɛk la mam bãng Wẽnnaam. Mam yamẽ wã, yɩɩ wa m sẽn da wʋmd b sẽn gomd a yelle, n wa sɩd yã-a. M bãngame tɩ m tõe n yõga zood ne-a.”

Ned sã n pʋt a Zeova yʋʋrã, a Zeova me nonga a soaba. A pʋlma neb nins sẽn ‘waoogd yẽ yʋʋrã’ woto: “Mam na n zoee bãmb nimbãaneg wa ned sẽn zoet a biig sẽn zoet-a nimbãanega.” (Malaki 3:16, 17) Sẽn paase, Wẽnnaam keooda neb nins sẽn kot ne yẽ yʋʋrã. Biiblã yeelame tɩ “ned ninga fãa sẽn kot ne Zu-soabã yʋʋre, a na n paama fãagre.”—Rom dãmba 10:13.

NEB WƲSG SẼN TẼEDE:

B yeela sebr a ye (The New Encyclopædia Britannica) pʋgẽ tɩ “Katolik rãmbã, Ortodogs rãmbã la Portɛstã rãmbã fãa tẽedame tɩ Wẽnnaam yaa mens a tãabo. Ba wã, Biigã la vʋʋsem sõngã. Sã n yaa ne tũudum kãensã sẽn yet tɩ b yaa kiris-nebã, woto pa rat n yeel tɩ yaa wẽnnaam dãmb a tãab ye. Yaa b tãabã fãa n naag taab n yaa Wẽnnaam a yembre.”

BIIBLÃ SẼN YETE:

A Zezi sẽn yaa Wẽnnaam Biigã zɩ n yeel tɩ yẽ ne a Ba wã zema taaba, wall b naaga taab n yaa Wẽnnaam a yembr ye. A pʋd n yeela woto: “Yãmb sã n nong maam, yãmb na maan sũ-noog ne mam sẽn dabd m Ba nengẽ wã; tɩ bõe, mam Ba yɩɩda maam.” (Zã 14:28) A ra yeela a karen-biig a yembr me woto: “Mam dabda m Ba sẽn yaa yãmb me Ba wã nengẽ, la m Wẽnnaam sẽn yaa yãmb me Wẽnnaamã nengẽ.”—Zã 20:17.

Vʋʋsem sõngã bɩ sɩɩg sõngã pa ned ye. Biiblã yeelame tɩ pipi kiris-nebã ra ‘pida ne sɩɩg sõngo.’ A Zeova meng ra yeela woto: ‘Mam na n pʋdga m sɩɩg sõng ninsaalbã buud fãa zutu.’ (Tʋʋma 2:1-4, 17) Dẽnd d pa tõe n yeel tɩ vʋʋsem sõngã ne a Zezi la Wẽnnaam naaga taab n yaa mens a tãab ye. Vʋʋsem sõngã yaa Wẽnnaam pãnga.

SƖDÃ BÃNGR YÕODO:

A Karl Rahner ne a Herbert Vorgrimler sẽn yaa Katolik tũudmã bãngdb yeelame tɩ “yaa tɩlae tɩ f paam tɩ Wẽnnaam meng vẽneg-fo, tɩ f tõog n bãng t’a yaa mens a tãabo. La baa f paam vẽnegr me, yɩl n wʋm a võor yaa toogo.” Yãmb sã n pa tol n tõe n bãng neda, wall n wʋm a sẽn maand võore, y tõe n nong-a lame sɩda? Dẽnd b sẽn yet tɩ Wẽnnaam yaa mens a tãabã kɩtame tɩ nebã pa tõe n bãng-a la b nong-a ye.

Marco ning yell d sẽn da gomã yãame tɩ sɩd yaa woto. Ad a sẽn yeele: “Mam da tagsdame tɩ Wẽnnaam pa rat tɩ m bãng-a ye. Rẽ pʋd n kɩtame tɩ m da getẽ t’a zãra wʋsg ne maam, tɩ m pa tõe n wʋm a yɛlã võore, la tɩ m pa tõe n paam t’a lebg m zoa ye.” Wẽnnaam yaool n pa maan tɩ yɩl n bãng-a yaa toog ye. A ratame tɩ d bãng-a. Sɩd me, nebã tõe n bãng-a lame. A Zezi ra yeela woto: “Tõnd . . . waoogda tõnd sẽn mi.”—Zã 4:22.

A Marco paasa woto: “M sẽn wa n bãng tɩ vʋʋsem sõngã ne a Zezi la Wẽnnaam pa naag taab n yaa mens a tãabã, sõnga maam tɩ m tõog n yõg zood ne Wẽnnaam mengã.” D sã n miẽ t’a Zeova yaa a ye tãa, la t’a pa wa yel-solemd b sẽn pa tõe n wʋm a võore, na n yɩɩ nana tɩ d nong-a. Biiblã yetame: “Ned ninga sẽn ka tar nonglem ka mi Wẽnnaam ye, tɩ bõe, Wẽnnaam yaa nonglem.”—1 Zã 4:8.

NEB WƲSG SẼN TẼEDE: Sebr a yembr (Catéchisme de l’Église catholique) yeela woto: “Ned sã n maan yel-wẽn-kʋʋdga, a sã n ki bala, a sɩɩgã kẽngda bug-tẽnga, n tɩ nams bugum sẽn pa kiid pʋgẽ.” Tũudum kẽer taoor dãmb yeelame tɩ b sẽn boond tɩ bug-tẽngã yaa zĩiga, tɩ f sã n be be bɩ f zãr ne Wẽnnaam hal wʋsgo.

BIIBLÃ SẼN YETE: Biiblã yetame tɩ “kũum ka mi bũmb ye.” (Koɛɛg Soaba 9:5) Kũum sã n ka mi bũmbu, a na n yɩɩ wãn n tɩ nams bugum sẽn pa kiid pʋgẽ, bɩ n bãng meng t’a zãra ne Wẽnnaam, tɩ rẽ namsd-a?

Biiblã pʋgẽ, hebre la gɛrk gom-biis nins b sẽn lebg ne moor tɩ “bug-tẽng” bɩ “kɩɩm-kulgã” rat n yeelame tɩ yaoogo. Wala makre, a Zoob bãagã sẽn wa namsd-a wʋsgã, a pʋʋsa Wẽnnaam n yeel woto: “Kato! M paamẽ lame tɩ y solg-m bokẽ tɩ m sor be n gũudẽ.” (Zoob 14:13, Sebr Sõngo) A Zoob ra ratame tɩ Wẽnnaam solg-a yaoogẽ t’a paam n vʋʋse. A ra miime tɩ pa zĩig a sẽn na n tɩ namsdẽ, bɩ n tolg n zãag ne Wẽnnaam ye.

SƖDÃ BÃNGR YÕODO: Wẽnnaam sã n yaa wẽnem soaba, d pa na n dat n bao a zĩigẽ ye. D pʋd n na n zãaga d mens ne-a. A Rocío sẽn yit Megsikã yeela woto: “Hal m yãadmẽ, b zãmsa tõnd tɩ bugum yir beeme. Ra yɛɛsda maam wʋsgo, hal tɩ m da pa tagsd tɩ Wẽnnaam tara zʋg-sõng baa yaa a ye meng ye. M da tẽedame t’a yaa sũ-yikr soaba, n pa mi sugr ye.”

A Rocío wa n yãame tɩ Biiblã gomda Wẽnnaam bʋ-kaoorã yell vẽenega, la a wilgd bũmb ning sẽn maand ned kũum poore. Woto sõng-a lame t’a bãng tɩ Wẽnnaam ka wa yẽ sẽn da tagsdã ye. Ad a sẽn yeele: “Mam paama m menga. Yaa wa m sẽn da tʋk zɩɩbo, n paam tɩ b sik-ma. Rẽ tɛka, m kɩsa sɩd tɩ Wẽnnaam data tõnd neere, t’a nonga tõndo, la tɩ ma-me tõe n nong-a lame. A yaa wa tõnd ba sẽn gãt d nugu, n sõngd tõnd d neer yĩnga.”—Ezai 41:13.

Neb wʋsg modgdame n tũud Wẽnnaam, b sẽn yɛɛsd bugum yirã yĩnga. La Wẽnnaam pa rat tɩ y tũ-a rabeem yĩng ye. A Zezi pʋd n yeelame: ‘Nong Zu-soabã fo Wẽnnaam.’ (Mark 12:29, 30) Sẽn paase, d sã n bãng tɩ baa rũndã-rũndã menga, Wẽnnaam pa maand kɛgre, d tõogd n kɩsa sɩd tɩ beoog-daar bʋ-kaoorã sasa me, a pa na n maan kɛgr ye. Wa a Zoob zoa a Eliyu, d tõe n yeela ne bas-m-yam tɩ “Wẽnnaam sẽn tõe fãa wã zãra ne wẽnga. Bãmb ka maand wẽng ye.”—Zoob 34:10.

Daar a yembre, a Zezi sẽn wa n be Zerizalɛm, a goma a Ba a Zeova yelle, n puk tũudmã taoor dãmb bãongo. (Zã 8:12-30) A sẽn yeel bũmb ning daar-n-kãngã wilgda d sẽn segd n maan to-to, n bãng nebã sẽn yet bũmb ning Wẽnnaam zugã sã n yaa sɩda. A yeelame: “Yãmb sã n tall mam goamã, yãmb yaa mam karen-biis hakɩka. Yãmb na bãng sɩdã, la sɩdã na kõ yãmb lohorem.”—Zã 8:31, 32.

A Zezi gom-kãensã wilgdame tɩ d sã n dat n bãng b sẽn zãmsd tõnd bũmb nins d tũudmã pʋgẽ wã sã n yaa “sɩda,” d segd n ‘talla yẽ goamã.’ D sã n wʋm bũmb Wẽnnaam zugu, bɩ d sok d meng woto: ‘Gom-kãensã zemsa ne a Zezi sẽn zãms nebã bũmb ningã, la Biiblã goam a taabã bɩ?’ D rɩk neb nins sẽn kelg tʋm-tʋmd a Pollã togs-n-taare. B “baoo Gʋlsg Sõamyã pʋgẽ daar fãa tɩ bãng bũmb nins b sẽn yet bãmbã sã n yaa tɩrga.”—Tʋʋma 17:11.

A Marco ne a Rosa la a Raymonde maaga b yĩng n zãms Biiblã ne a Zeova Kaset rãmbã, n na n ges bãmb sẽn tẽed bũmb ninsã sã n zemsame. Bõe la b bãng-yã?

A Marco: “Ned ning sẽn wa n zãms maam ne m pagã Biiblã ra tallda Biiblã n leokd tõnd sogsgã. Tõnd nonglmã ne a Zeova wa n paamda pãnga, tɩ maam ne m pagã me nonglem paasdẽ.”

A Rosa: “Mam da tẽedame tɩ Biiblã yaa fɩlozofi sebr bal ninsaalb sẽn gʋlse, n mak n na n bilg Wẽnnaam sẽn yaa a soaba. La m wa n mikame tɩ Biiblã leokda sogsg nins fãa m sẽn da sokd m mengã. Masã, Wẽnnaam lebga m zoa, tɩ m tõe n kɩs sɩd ne-a.”

A Raymonde: “M pʋʋsa Wẽnnaam t’a sõng-ma, tɩ m paam n bãng-a. Rẽ poor bilfu, maam ne m sɩdã sɩnga Biiblã zãmsgo. Kɩtame tɩ d bãng sɩdã a Zeova zugu. D sẽn bãng a sẽn yaa Wẽnnaam ning buudã kõo tõnd sũ-noog wʋsgo.”

Biiblã pa vẽnegd tõnd tɩ d bãng bũmb nins b sẽn togs Wẽnnaam zug tɩ yaa ziri wã bal ye. A wilgda bũmb nins sẽn kɩt tɩ d tog n nong-a wã me. Biiblã yaa Wẽnnaam Gomd a sẽn vẽneg tɩ b gʋlse, tɩ sõngd-d tɩ d tõe n “bãng bũmb nins Wẽnnaam sẽn kõ tõndo, bãmb barkã yĩngã.” (1 Korẽnt dãmba 2:12) Nebã nong n sokda b mens sogsg sẽn na yɩl n bãng Wẽnnaam, a raabã la tõnd beoog-daarã sẽn na n yɩ to-to. Yɩta sõma tɩ yãmb mengã bao n bãng Biiblã sẽn yete. Y tõe n kẽe www.jw.org/fr n kilik “La Bible et vous” n ges zĩig ning b sẽn gʋls tɩ “Questions Bibliques.” Y tõeeme n gʋls n kos Biibl zãmsgo, wall y kos a Zeova Kaset soab t’a wa zãms-y Biiblã. D kɩsa sɩd tɩ y sã n maan woto, y na n mikame tɩ yɩl n nong Wẽnnaam pa toog ye.