12. Yam-bʋg la d tõe n dɩk serubẽ-rãmbã mak-sõngã pʋgẽ?

¹² Serubẽ-rãmbã. Malɛgs nins sẽn yɩ pipi n vẽneg b mens tɩ ninsaalb yã-bã kẽer kõo mak-sõngo. B sã n wa kõ-d tʋʋmd sẽn yaa toogo, b kibarã tõe n sõng-d lame tɩ d maan sũ-mare. Bõe la b maan-yã? A Ãdem ne a Hawa kɩɩsgã poore, Wẽnnaam a Zeova “ninga Serubẽ-rãmb Edɛn zẽedã zĩig yaanga, ne sʋʋg sẽn wit bugum t’a wẽnemded zĩigã fãa, n gũud zẽeda zĩigã sor ning sẽn dabd tɩɩg ning biis sẽn kõt vɩɩmã sẽnẽ wã.”^[2] (Sɩng. 3:24) Yaa vẽeneg t’a Zeova ra pa naan serubẽ-rãmbã tʋʋm-kãng yĩng ye. Sɩd me, a Zeova sẽn wa n naan ninsaalã, a ra pa rat t’a kɩɩs-a n maan yel-wẽnd ye. La d sã n karem Biiblã, d pa na n yã zĩig baa a ye b sẽn wilg tɩ malɛg-kãensã sẽn da tar pãng wʋsgã tagsame tɩ bãmb yɩɩda tʋʋm-kãng ye. B yam pa yi tʋʋmdã tɩ b koms raood me ye. B kell n saka Wẽnnaam n tʋm tʋʋmdã n baase. Wõnda b maana rẽ n kaoos yʋʋm 1600. Tõe tɩ tãaga sa-kãsengã niibu.