Kiris-nebã vɩɩm la b tʋʋma tigissã na-kẽndr not-rãmbã
WAO-FUGDG RASEM A 3-9
D SẼN BÃNG BIIBLÃ KARENG PƲGẼ | SƖNGRE 12-14
“Kaool sẽn nafd yãmba”
Sɩngre 12:1, 2; it-1 78 6
Kaoole
Kaool ne a Abrahaam. Wõnda yaa a Abram (Abrahaam) sẽn wa n pasg Efrat kʋɩlgã n na n kẽng Kanaã soolmẽ wã la kaool ning Wẽnnaam sẽn maan ne-a wã sɩng-yã. Yʋʋm 430 poor la b maan kaool-paalgã. (Gal. 3:17) Wẽnnaam goma ne a Abrahaam a sẽn wa n be Ʋʋr sẽn be Kalde nebã soolmẽ wã, n yeel-a t’a yik n kẽng tẽng ning yẽ sẽn na n wilg-a wã. (Tʋʋ. 7:2, 3; Sɩng. 11:31; 12:1-3) Yikr 12:40, 41 (LXX) pʋgẽ, b yeelame tɩ Israyɛll nebã sẽn zĩnd Ezɩpt la Kanaã soolmẽ wã yʋʋm 430 wã poore, “baraarã bala,” Israyɛll nebã sẽn da be yembd Ezɩptã loogame. Yɩɩ yʋʋmd 1513 sẽn deng a Zeezi rogmã, nizã kiuugã rasem 14 sẽn yaa Pakã daarã la Israyɛll nebã yi Ezɩpti. (Yik. 12:2, 6, 7) Woto wilgdame tɩ yaa yʋʋmd 1943 sẽn deng a Zeezi rogmã, nizã kiuugã rasem 14 la a Abrahaam pasg Efrat kʋɩlgã n na n kẽng Kanaã soolmẽ wã. Yaa wakat kãng me la kaool ning Wẽnnaam sẽn maan ne a Abrahaamã sɩng-yã. A Abrahaam sẽn pasg Kanaã soolmã n sãag n ta Sɩkɛmmã, a Zeova le vẽnega a meng ne-a, n paas bũmb a taab a pʋlengã pʋgẽ. A yeelame yaa: ‘Mam na n kõo fo yagensã tẽn-kãngã tɩ b sooge.’ Woto wilgdame tɩ kaool ning a sẽn maan ne a Abrahaamã ne bũmb ning a sẽn pʋlem Edɛnnã tũuda taaba, la tɩ pagã “yagengã” na n yɩɩ ninsaala, rat n yeel tɩ na n tũu ne ninsaalb t’a wa. (Sɩng. 12:4-7) Wẽnnaam wa n paasa bũmb a taab pʋlengã pʋgẽ, wa Sɩngr 13:14-17; 15:18; 17:2-8, 19; 22:15-18 sẽn wilgdã.
Sɩngre 12:3; w89 1/7 3 4
Bõe yĩng tɩ d segd n bãng sɩdã a Abrahaam zugu?
Sɩd yaa pʋleng tɛkẽ! Yaa hal sẽn ta naoor a yiib bɩ sẽn yɩɩd rẽ la a Abrahaam wʋm pʋlengã. (Sɩngre 18:18; 22:18) Sẽn na yɩl n pids pʋlengã, Wẽnnaam na n pʋd n vʋʋga buud sẽn menem neb sẽn maan kaalem. B vɩɩmã na n yɩɩ bark meng-menga, bala, wʋsg na n vʋʋg n mikame tɩ tẽngã lebga wa arzãn ning ninsaalbã sẽn bõn sɩngrẽ wã. Rẽ la b na n yaool n sõng-b tɩ b bãng b sẽn tõe n maan to-to n paam n vɩɩmd wakat sẽn kõn sa.—Sɩngre 2:8, 9, 15-17; 3:17-23.
Sɩngre 13:14-17; it-2 152 6
Tõogã
Bãngdb kẽer tika kʋdemd wẽndẽ yɛl kẽere, n yeel tɩ b sã n da na n koos pʋʋgo, b ra kɩtdame tɩ sẽn na n da-a pʋʋgã yals zĩig a sẽn tõe n paam n yã pʋʋgã toadgã zãnga. A sã n yeel t’a “yãame,” wilgdame t’a sakame n na n da pʋʋgã. A Zeova sẽn wa n yeel a Abrahaam t’a na n kõ-a-la Kanaã soolmã, a reng n yeel-a lame t’a ges goabg la rɩtgo, yaang la nin-taoore. A Abrahaam pa yeel t’a “yãame” ye. Tõe tɩ yaa a Zeova sẽn yeel-a tɩ yaa a yagensã la a na n wa kõ kãabg tẽngã yĩnga. (Sɩng. 13:14, 15) Wẽnnaam yeela a Moyiiz sẽn da yaa Israyɛll nebã taoor lʋɩtã t’a “ges” tẽngã. Sã n mikame tɩ bãngdbã sẽn yeelã yaa sɩda, dẽnd rat n yeelame tɩ Wẽnnaam rɩka tẽngã n kõ Israyɛll nebã tɩ b na n sooge. Yaa a Zozoe n da na n lʋɩ taoor tɩ b reeg tẽngã n sooge. (Tõo. 3:27, 28; 34:4; ges-y a Sʋɩtãan sẽn wilg a Zeezi bũmb nins Mat. 4:8 pʋgẽ wã.) Bũmb a to me la b ra maand n na n wilg tɩ b sooga tẽnga: Yaa tũ tẽngã n looge, wall n kẽ tẽngã pʋgẽ sẽn na n yɩl tɩ lebg f rẽnda. (Sɩng. 13:17; 28:13) Kʋdemd wẽndẽ sɛb kẽer pʋsẽ, b wilgame tɩ b sã n da na n koos zĩiga, b sõta tɩɩs nins fãa sẽn be zĩigã pʋgẽ wã.—Ges-y Sɩng. 23:17, 18.
D bʋgs Wẽnnaam Gomdã zug neere:
Sɩngre 13:8, 9; w16.05 10 s. 12
D mao tɩ laafɩ kell n zĩnd d sʋka
12 Kibay n be Biiblã pʋgẽ, n wilgd wẽn-sakdbã sẽn tõe n welg b mo-yõsã to-to. Wala makre, a Abrahaam ne a kẽem biig a Lot kibarã. Bãmb b yiibã fãa ra tara rũms wʋsgo, tɩ b rũm-kɩɩmbã wa zabd taab rũmsã wãbneg zĩis poorẽ. Sẽn na yɩl tɩ zabã sa, a Abrahaam yeelame tɩ b welg taaba. La a basame t’a Lot reng n yãk a sẽn dat n kẽngẽ. (Sɩng. 13:1, 2, 5-9) Woto yaa mak-sõng tɛkẽ! A Abrahaam baoa laafɩ, a pa bao a meng nafr ye. A sẽn sak n bas t’a Lot reng n yãkã, a maana a meng bɩ? Ayo. Rẽ poor bala, a Zeova yeela a Abrahaam t’a na n ning-a-la bark hal tɩ zʋʋg a sẽn bõnã. (Sɩng. 13:14-17) Yam-bʋg la kiba-kãngã kõt tõndo? D sã n sak n bõn sẽn na yɩl tɩ laafɩ zĩnd tõnd ne d to sʋka, a Zeova na n ning-d-la barka.
Sɩngre 14:18-20, Ebre-rãmbã 7:4-10; it-2 654 7
Maan-kʋʋda
A Melkisedɛk sẽn da yaa Salem rĩmã yɩɩ maan-kʋʋd (kohen) sẽn yaa toor zalle. Biiblã pa gomd a yaab-rãmbã yelle, a rogmã wall a kũumã yell ye. Pa buud ning pʋgẽ a sẽn yitã n kɩt t’a lebg maan-kʋʋd ye. A pa ledg ned n lebg maan-kʋʋda, ned me pa ledg-a a kũumã poor ye. A Melkisedɛk ra yaa rĩma, la a leb n yaa maan-kʋʋda. A maan-kʋʋrã ra yaa kãseng n yɩɩd a Levi buudã maan-kʋʋrã. A Abrahaam sẽn kõ a Melkisedɛk piig-pʋɩɩrã t’a ning-a barkã, ra yaa wa a Levi sẽn kõ a Melkisedɛk piig-pʋɩɩre, bala wakat kãng t’a Levi ra ket n bee a Abrahaam pendẽ wã. (Sɩng. 14:18-20; Ebre. 7:4-10) Yaa bõn-kãens yĩng la a Melkisedɛk sẽn makd a Zeezi wã. Rẽ n so tɩ b yeel t’a Zeezi yaa “maan-kʋʋd wakat fãa yĩng wa a Melkisedɛke.”—Ebre. 7:17.
WAO-FUGDG RASEM 10-16
D SẼN BÃNG BIIBLÃ KARENG PƲGẼ | SƖNGRE 15-17
“Bõe yĩng t’a Zeova toeem a Abram ne a Sarayi yʋyã?”
Sɩngre 17:1; it-1 870
Kongre, taale
Naoor wʋsgo, ninsaal soayã la a sẽn tõogd n maand bũmb ninsã pa zems zãng ye. Tõnd sẽn yaa a Ãdem yagensã, d yaa yel-wẽn-maandba, la koangdba. (Rom. 5:12; Yɩɩn. 51:5) La a Zeova sẽn pa tol n kongdẽ wã ‘mii b sẽn tall bũmb ning n naan tõndã. Bãmb tẽrame tɩ tõnd yaa tẽng tom,’ n zoet tõnd nimbãanega. (Yɩɩn. 103:13, 14) A gesame t’a Nowe “zamaanã neb fãa sʋka,” a ra yaa burkĩna, n sakd Wẽnnaam la a maan sɩd ne-a. (Sɩng. 6:9) A yeela a Abrahaam yaa: “Tũ maam ne burkĩndi.” (Sɩng. 17:1) Baa nin-kãensã a yiibã sẽn da yaa neb sẽn pa zems zãnga, n wa baas n ki wã, a Zeova sẽn ‘get sũurã’ ra get-b-la wa neb sẽn pa tar yelle. (1 Sãm. 16:7; ges-y 2 Rĩm. 20:3; 2 Kib. 16:9) A yeela Israyɛll nebã yaa: “Bɩ y yɩ neb sẽn zems zãng Sẽn-Ka-Saab sẽn yaa yãmb Wẽnnaamã nifẽ.” (Tõo. 18:13; 2 Sãm. 22:24) A kõo a Bi-riblã sẽn pa tar yellã (Ebre. 7:26) t’a yɩ maoongo. Maoon-kãng maasem yĩnga, a Zeova tõe n boola neb nins fãa sẽn tar tẽeb la sẽn yaa sakdbã tɩ ‘tɩrse,’ bɩ neb sẽn pa tar yelle, tɩ baa ne rẽ bɩ a ket n yaa bʋ-kaood sẽn yaa tɩrga, la sẽn pa tar yelle.—Rom. 3:25, 26; ges-y INTÉGRITÉ; PERFECTION.
Sɩngre 17:3-5; it-1 30 1
A Abrahaam
Yʋʋm wʋsg loogame. B sẽn be Kanaã taa yʋʋm piiga, la a Saara ra ket n pa tar rogem ye. Rẽ n so t’a kos a Abrahaam t’a kẽ ne a yem-poak a Agaar sẽn yaa Ezɩpt buudã nedã, t’a paam biig ne yẽ maasem. A Abrahaam sakame. Yʋʋmd 1932 sẽn deng a Zeezi rogmã, a Agaar roga a Ismayɛlle. Rẽ t’a Abrahaam tara yʋʋm 86. (Sɩng. 16:3, 15, 16) Yʋʋm wʋsg le loogame. Yʋʋmd 1919 sẽn deng a Zeezi rogmã, a Zeova yeelame t’a Abrahaam ne rap nins fãa sẽn be a zakẽ wã segd n kẽe bãongo, tɩ yɩ bãnd sẽn na n wilg tɩ kaool n be yẽ ne a Abrahaam sʋka. Rẽ t’a Abrahaam tara yʋʋm 99. Wakat kãng me la a Zeova toeem a Abram yʋʋrã tɩ lebg Abrahaam, bala a na n kɩtame t’a “lebg buud wʋsg ba.” (Sɩng. 17:5, 9-27; Rom. 4:11) Rẽ poor bilfu, malɛgs a tãab n tedg n lebg ninsaalba, n wa a Abrahaam nengẽ, t’a reeg-b sãand a Zeova yʋʋr yĩnga. Malɛgsã pʋlmame tɩ ka ne vẽere, a Saara na n dɩka pʋga, n dog bi-ribla.—Sɩng. 18:1-15.
Sɩngre 17:15, 16; w09 1/2 13
Yʋy sẽn tar võore
Wẽnnaam mengã toeema neb kẽer yʋya, sẽn na yɩl tɩ zems ne bãngr-goam a sẽn togse. Wala makre, a toeema a Abram yʋʋrã tɩ lebg Abrahaam. Abram võor yaa “m ba yaa kãsenga,” tɩ Abrahaam võor yaa “neb wʋsg ba.” A Abrahaam lebga buud wʋsg ba, wa sẽn zems ne a yʋʋrã võorã. (Sɩngre 17:5, 6) D gom a Abrahaam pag a Sarayi me yelle. Tõe tɩ Sarayi võor yaa “zab-zabda.” A sũur tog n yɩɩ noog wʋsgo, Wẽnnaam sẽn toeem a yʋʋrã tɩ lebg “Saara,” sẽn dat n yeel tɩ “na-bi-poaka.” Yʋ-kãngã yaa sẽn da na n wilg t’a na n lebga rĩm-dãmb yaab-poaka.—Sɩngre 17:15, 16.
D bʋgs Wẽnnaam Gomdã zug neere:
Sɩngre 15:13, 14; it-1 464-465
Yɛlã sẽn pʋg taab to-to
A Zeova yeela a Abram (Abrahaam) yaa: “Bãng tɩ fo yagensã na n yɩɩ sãamb n zĩnd tẽng sẽn ka bãmb tẽng pʋga. Bãmb na n lebga yembse, la b na n namsa bãmb yʋʋm kobs-naase.” (Sɩng. 15:13; ges-y Tʋʋ. 7: 6, 7.) A Zeova togsa gom-kãnga t’a Izaak nan pa rog ye. Yʋʋmd 1932 sẽn deng a Zeezi rogmã, a Agaar sẽn yaa yem-poak la Ezɩpt buudã nedã roga a Ismayɛll n kõ a Abrahaam, t’a Saara roga a Izaak yʋʋmd 1918 wã. (Sɩng. 16:16; 21:5) ‘Namsgã’ saa wakat ning Israyɛll nebã sẽn yi Ezɩptã. (Sɩng. 15:14) D sã n sɩng ne wakat kãng n sõd yʋʋm 400 n leb poorẽ, d tata yʋʋmd 1913 sẽn deng a Zeezi rogmã. Rẽ t’a Izaak tara yʋʋm a nu. Wõnda a Izaak ra basa bĩĩsim wakat kãnga. A ra zoe n yaa ‘sãan’ tẽng sẽn pa a meng tẽngẽ. A Ismayɛll wa n laada a Izaake. (Sɩng. 21:8, 9) Rẽ n yɩ namsg ning b sẽn pĩnd n togsã sɩngre. A Ismayɛll ra tara yʋʋm 19. Rũndã-rũndã, nebã tõe n getame t’a Ismayɛll sẽn da laad a Abrahaam biigã pa yell ye. La bãmb wakatẽ wã, ra pa woto ye. A Saara manesmã, n paas Wẽnnaam meng sẽn yeel a Abrahaam t’a tũ a pagã noor n dig a Agaar ne a Ismayɛllã wilgdame tɩ ra pa yel-bil ye. (Sɩng. 21:10-13) Sẽn paase, kiba-kãngã Wẽnnaam sẽn kɩt tɩ b togs ball-ball Biiblã pʋgẽ wã yaa kaset tɩ yaa wakat kãng la namsgã sẽn kaoos yʋʋm 400 sɩng-yã, n tall n tãag Israyɛll nebã sẽn yi Ezɩptã.—Gal. 4:29.
Sɩngre 15:16; it-1 844 7
Ezɩpt yiibã
“Zamaan a naas loogr zugẽ.” D tẽeg t’a Zeova ra yeela a Abrahaam tɩ zãmaan a naas loogr poore, a yagensã na n leba Kanaã soolmẽ wã. (Sɩng. 15:16) D sã n sõd yʋʋm 430 sẽn sɩng ne kaool ning Wẽnnaam sẽn maan ne a Abrahaamã sɩngr tɛk n tãag Ezɩpt yiibã, yɩɩda zãmaan a naase, baa ne nebã sẽn da vɩ n kaoosd wʋsg wakat kãngã. La yaa yʋʋm 215 bal la Israyɛll nebã zĩnd Ezɩpti. D sã n dɩk makr ne Levi buudã, n sɩng sõdg ne wakat ning Israyɛll nebã sẽn ta Ezɩpt soolmẽ wã, ad d sẽn tõe n mag ‘zãmaan a naasã’ to-to: 1) A Levi, 2) a Kehat, 3) a Amram, la 4) a Moyiizi.—Yik. 6:16, 18, 20.
WAO-FUGDG RASEM 17-23
D SẼN BÃNG BIIBLÃ KARENG PƲGẼ | SƖNGRE 18–19
“‘Dũniyã fãa Bʋ-kaoodã’ sãama Sodom ne Gomoore”
Sɩngre 18:23-25; w17.04 18 s. a 1
“Dũniyã fãa bʋ-kaoodã” maanda tɩrg wakat fãa
DAAR a ye, a Abrahaam soka a Zeova yaa: “Dũniyã fãa bʋ-kaoodã ka na n maan tɩrg sɩda?” (Sɩng. 18:25, Wẽnnaam Sebre, 1983) A Abrahaam sẽn sok woto wã wilgdame t’a kɩsa sɩd t’a Zeova na n kaoo Sodom ne Gomoor soolmã bʋʋd tɩrga. A ra kɩsa sɩd t’a Zeova pa na n “lagem nin-tɩrs ne nin-wẽns n kʋ” ye. A pʋd n pa tol n tõe n tags t’a Zeova na n maana bũmb a woto ye. Na maan yʋʋm 400 rẽ poore, a Zeova kɩtame t’a Moyiiz gom yẽ yelle, n yeel yaa: “Bãmb yaa Pĩiga! Bãmb tʋʋmã zemsa zãnga! Bãmb soayã fãa yaa tɩrse! Bãmb tʋʋmã zemsa zãnga! Bãmb yaa sɩd soab wakatã fãa! Zãmb ka be bãmb pʋgẽ ye. Bãmb yaa sɩda, la tɩrga.”—Tõo. 31:19; 32:4.
Sɩngre 18:32; w18.08 30 s. a 4
Sũ-mare: D tõog toogo, n tẽed manegre
Sũ-marã wɛɛngẽ, a Zeova n kõ mak-sõng sẽn ka to, tɩ d segd n dɩk a togs-n-taare. (2 Pɩy. 3:15) Kibay wʋsg n be Biiblã pʋgẽ, n wilgd a Zeova sẽn maan sũ-mar meng-menga. (Nee. 9:30; Eza. 30:18) Wala makre, y tẽra a Zeova manesem sẽn yɩ to-to, a sẽn wa n yãk yam n na n sãam Sodom, t’a Abrahaam soka sogsg rẽ wɛɛngẽ wã bɩ? A Abrahaam sẽn wa n gomdã, a Zeova pa kʋʋg a goamã ye. A pʋd n talla sũ-mare, n kelg a Abrahaam sogsgã fãa, la bũmb nins sẽn da kɩt t’a maand yɩɩrã. Rẽ poore, a Zeova lebs n togsa bũmb nins sẽn kɩt t’a Abrahaam maand yɩɩrã, tɩ wilgdẽ t’a kelg-a-la sõma, la a yaool n yeel-a t’a bas a yam tɩ baa yaa nin-tɩrs piig bal n be Sodom, yẽ pa na n sãam tẽngã ye. (Sɩng. 18:22-33) Ad yaa mak-sõng tɛkẽ! Wakat fãa, a Zeova maagda a yĩng n kelge, n pa yikd a sũur ye.
Sɩngre 19:24, 25; w10 11/1 26 s. 12
A Zeova yaa tõnd Zusoab la d Soaala!
12 D tõe n kɩsa sɩd tɩ ka la bilfu, a Zeova na n wilgame tɩ yẽ n segd n yɩ yĩngr la tẽng naaba. A pa na n bas tɩ wẽnemã zĩnd wakat fãa yĩng ye. Sẽn paase, d miime tɩ d vɩɩ yaoolem wakatã sasa. A Zeova sãama nin-wẽnsã sa-kãsengã sasa. A sãama Sodom la Gomoore, n paas a Faraõ ne a sodaasã. A Sizera ne a sodaasã la a Senakeriib ne Asiri sodaasã pa tõog n yaas Sẽn-ka-to soabã taoor ye. (Sɩng. 7:1, 23; 19:24, 25; Yik. 14:30, 31; Bʋk. 4:15, 16; 2 Rĩm 19:35, 36) Rẽnd d tõe n kɩsa sɩd tɩ Wẽnnaam a Zeova pa na n bas tɩ b paoogd a yʋʋrã la b namsd a kaset rãmbã wakat fãa yĩng ye. Sẽn paase, rũndã-rũndã, d nee bãnd ning sẽn wilgd t’a Zezi sɩnga a naamã rɩɩb saasẽ, la tɩ dũni-kãngã bee a yaoolem wakatã.—Mat. 24:3.
D bʋgs Wẽnnaam Gomdã zug neere:
Sɩngre 18:1, 22; w88 15/5 23 s. a 5-6
Ned n zoe n yã Wẽnnaam bɩ?
D tõe n wʋma a Abrahaam sẽn gom ne malɛkã sẽn tedg a meng n lebg ninsaalã wa yaa a Zeova la a gomd ne wã võor masã. Malɛkã waa a Zeova yʋʋr yĩnga, la a sɩd togsa a Abrahaam bũmb nins fãa a Zeova sẽn dat t’a togs-a wã kɛpɩ. Yaa rẽ yĩng la Biiblã sẽn yeel t’a Zeova ‘puka a meng ne a Abrahaamã.’—Sɩngre 18:1.
D tẽeg tɩ Wẽnnaam tõe n tʋma malɛk t’a tɩ taas a koees kɛpɩ, wa tõnd me sẽn tõe n tũnug ne telefõn bɩ radio n taas d koeesã. A Abrahaam, a Moyiizi, a Manoa la neb a taab goma ne malɛk sẽn tedg n lebg ninsaala, tɩ yaa wa yaa Wẽnnaam la b gom ne. D wʋmda b sẽn maan woto wã võore. Yaa sɩd tɩ b yãa malɛgsã ne b nifu, la b yã a Zeova ziirã sẽn pukd malɛg-kãens zugu. La b pa yã a Zeova ye. Dẽnd pa kɩɩsd tʋm-tʋmd a Zã sẽn yeel tɩ ‘ned baa a ye zɩ n yã Wẽnnaamã ye.’ (Zã 1:18) Pa Wẽnnaam mengã la nin-kãensã sẽn yã wã ye. Yaa malɛgs Wẽnnaam sẽn tʋm b nengẽ.
Sɩngre 19:26; w19.06 20 s. a 3
3 A Lot sẽn yik ne a zakã rãmb n na n tɩ vɩɩmd Sodommã, pa yɩ yam-yãkr sẽn yaa sõma ye. Bala, tẽngã nebã ra yaa nin-yoaadb meng-menga. (Karm-y 2 Pɩyɛɛr 2:7, 8.) Zĩigã ra sakda kood la gʋʋlg sõma, la a Lot ne a zakã rãmb sẽn yik n kẽng be wã, b paama zu-loees wʋsgo. (Sɩng. 13:8-13; 14:12) Wõnda a Lot pagã wa n nonga tẽngã wall tẽngã neb kẽer wʋsgo, hal n wa baas n kɩɩs a Zeova. A Zeova sẽn wa n kɩt tɩ saagã ni bugum ne kidbr n na n sãam tẽngã, a Lot pagã paa yellã pʋgẽ. Tẽeg-y-yã a Lot kom-pugli a yiibã me yelle. B ra rɩk-b lame n kõ Sodom tẽngã rap a yiib tɩ b na n kẽ kãadem, la rap a yiibã kii tẽngã sãoong sasa. A Lot bõna a zakã la a paoongã fãa, t’a pagã me ki. (Sɩng. 19:12-14, 17, 26) Yaa vẽeneg t’a pagã kũumã n nams-a n tɩ yɩɩda. La a Lot zu-loeesã pʋgẽ, a Zeova yãka yam n pa na n le maan sũ-mar ne-a bɩ? Ayo.
WAO-FUGDG RASEM 24–TƲƲLG PIPI DAARE
D SẼN BÃNG BIIBLÃ KARENG PƲGẼ | SƖNGRE 20–21
“A Zeova pidsda a sẽn pʋlem fãa”
A yɩɩ rĩm-dãmb ma
A Saara sẽn la wã rat n yeelame t’a tẽebã paoodame bɩ? Ayo. Ad Biiblã sẽn yeele: “Yaa ne tẽeb la a Saara menga, baa ne a sẽn kʋʋl wʋsgã, . . . tõog n dog biiga, bala, a maana tẽeb tɩ soab ning sẽn kãab-a wã pidsda a sẽn kãabe.” (Ebre-rãmbã 11:11) A Saara ra mii a Zeova sõma. A miime t’a pidsda a sẽn pʋlem fãa. Ãnda n pa rat tẽeb a woto buudu? Rẽ wã, yɩta sõma tɩ d bao n bãng Wẽnnaam ning yell b sẽn gomd Biiblã pʋgẽ wã sõma. Woto, d bãngdame t’a Saara bee bʋʋm la a sẽn tẽ-a ne a sũur fãa wã. A Zeova yaa sɩd soaba. A pidsda a pʋleng fãa. Wakat ning menga, a sẽn pidsd a pʋlemsã to-to wã tõe ling-d lame, hal tɩ d sã n getẽ bɩ maand laado.
“MAAN . . . A SAARA SẼN KOT FOOMÔ
A Saara sẽn wa n tar yʋʋm 90 la a yaa n paam a sẽn da sɩng n datã. A roga biig n kõ a sɩdã. Rẽ t’a sɩdã tara yʋʋm 100. A Abrahaam pʋda biigã t’a Izaake, sẽn dat n yeel tɩ “laado,” wa Wẽnnaam sẽn da yeelã. Rogmã yaams ra tog n tara a Saara. La mams-y n ges-y a sẽn yõgemd a noor n yeel yaa: “Wẽnnaam kõo maam laado. Ned ning fãa sẽn na n wʋm-a yel-kãngã, na n pusga laad mam wɛɛngẽ!” (Sɩngre 21:6) Sãmbg kae tɩ hal n tãag a kaalem, a maana sũ-noog ne yel-solemdã a Zeova sẽn maan t’a paam biigã. La biigã rogmã waa ne zɩɩb n paase.
A Izaak wa n ta yʋʋm a nu, tɩ b na n yãk-a bĩisim. Baraare, a Abrahaam ne a zakã rãmb maana tig-kãsenga. La yell n zĩndi. Biiblã yeelame t’a Saara “yãnda” a Agaar biig a Ismayɛll sẽn tar laado. Rẽ t’a tara yʋʋm 19. Yaa a Izaak la a sẽn laadã. Pa reem la a ra reemd ne-a ye. Wẽnnaam wa n vẽnega tʋm-tʋmd a Poll t’a wilg t’a Ismayɛll sẽn da maandã yaa sẽn na n nams a Izaake. A Saara yãame tɩ yaa yell sẽn tõe n sɩd nams a biigã. Yaa sɩd t’a Izaak yaa a biiga, la pa rẽ yĩng bal ye. A Zeova yeelame t’a na n tũu ne a Izaak n maan bũmb a raabã pidsg yĩnga. Rẽ n so t’a tall raoodo, n tɩ gom ne a Abrahaam, n pa zoe nif ye. A yeel-a lame t’a rig a Agaar ne a Ismayɛll tɩ b looge.—Sɩngre 21:8-10; Galat-rãmbã 4:22, 23, 29.
A Abrahaam manesem yɩɩ wãna? Ad Biiblã sẽn yete: “Gom-kãngã ka tol n yɩ a Abrahaam noog ye.” A nonga a Ismayɛll wʋsgo. Sẽn paase, sẽn yaa a biigã, yaa toog t’a kʋ a sũur n maan wa a Saara sẽn datã. La a Zeova mii yellã vɩʋʋgo. Rẽ n so t’a wilg a Abrahaam a sẽn segd n maanegã. Ad Biiblã sẽn yeele: “Wẽnnaam yeela a Abrahaam yaa: ‘Da maan sũ-sãang f bi-riblã ne f yem-poakã yĩng ye. Maan bũmb nins fãa a Saara sẽn kot foomã n kõ-a. Bala, na n yɩɩ ne a Izaak la fo na n paam yagens sẽn na n tar fo yʋʋrã.’” A Zeova leb n yeel-a lame t’a bas a yam tɩ yẽ pa na n yĩm a Agaar ne a biigã yell ye. A sẽn yaa wẽn-sakdã, a tũu a Zeova sẽn yeelã.—Sɩngre 21:11-14.
D bʋgs Wẽnnaam Gomdã zug neere:
Sɩngre 20:12; wp17.3 12, vẽnegrã
“Fo yaa pʋg-neer wʋsgo”
A Saara ra yaa a Abrahaam ba-biiga. A Teera ra yaa b fãa ba, la b ra pa ma a yembr ye. (Sɩngre 20:12) Yaa sɩd tɩ rũndã-rũndã, yi-kãadem a woto buud pa segd ye. La d tẽeg tɩ bãmb wakatẽ wã ne rũndã pa yembr ye. Bãmb ra nan pa zãag wʋsg ne wakat ning a Ãdem ne a Awa sẽn da ket n yaa neb sẽn zems zãngã ye. Nin-kãensã sẽn da ket n tar keelem sõma wã, neb sẽn kĩ ne taab sã da kẽ kãadem ne taaba, pa bũmb sẽn da tõe n wa ne yell b kambã la b yagensã zug ye. La yʋʋm 400 rẽ poore, nebã sẽn da vɩ n kaoosd to-to wã ra yaa wa rũndã-rũndã wã bala. Wakat kãngã, a Moyiiz tõogã pʋgẽ, b gɩdga kãadem neb sẽn kĩ ne taab sʋka.—Maan-kʋʋre 18:6
Sɩngre 21:33; w89 1/7 20 s. a 9
A Abrahaam yaa mak-sõng n kõ neb nins fãa sẽn baood Wẽnnaam zoodã
9 A Abrahaam le maana bũmb a to sẽn wilgd a tẽebã. B yeela kibarã pʋgẽ t’a “mee tẽn-kugr beenẽ,” a Zeova yĩnga. (Sɩngre 12:7) Yaa vẽeneg t’a kʋʋ rũng n maan maoongo, bala Ebre gom-bil ning b sẽn lebg tɩ ‘tẽn-kugrã’ võor yaa “zĩig b sẽn maand maoongo.” A Abram le wa n maana woto buud n yɩlem tẽngã zĩis a taaba. Sẽn paase, a ‘pẽga a Zeova yʋʋre.’ (Sɩngre 12:8; 13:18; 21:33, MN) Ebre wã goam nins b sẽn lebg tɩ ‘pẽg a Zeova yʋʋrã’ rat n yeelame me tɩ ‘togs (bɩ n moon) a Zeova yʋʋre.’ A Abram zakã rãmb n paas Kanaã nebã tog n wʋma a sẽn da togsd a Wẽnnaam a Zeova yʋʋrã ne raoodo. (Sɩngre 14:22-24) Woto me, neb nins fãa sẽn baood Wẽnnaam zood rũndã-rũndã wã tog n pẽga a yʋʋrã ne tẽebo. Wala makre, b segd n moonda koɛɛgã, n ‘kõt Wẽnnaam pẽgr maoong wakat fãa, rat n yeel tɩ kaset b sẽn kõt bãmb yʋʋrã yĩng ne b no-bɩmsã.’—Ebre-rãmbã 13:15; Rom dãmbã 10:10.