Kiris-nebã vɩɩm la b tʋʋma tigissã na-kẽndr not-rãmbã

TƲƲL-NIF RASEM 13-19

D SẼN BÃNG BIIBLÃ KARENG PƲGẼ | SƖNGRE 31

“A Zakoob ne a Labã maana kaool ne taaba, sẽn na yɩl tɩ laafɩ zĩnd b sʋka”

Sɩngre 31:44-46; it-1 943 7 Galɛɛde

A Zakoob ne a Labã welga yɛl nins sẽn wa ne mõ-yõsr b sʋkã, la b maan kaool ne taaba. Kaoolã luglg yĩnga, a Zakoob rɩka kugr n vigli, la a yeel a “saam-biisã” tɩ b wʋk kug n zam taaba. Tõe tɩ b maana wa taabl buudu. Yaa kug-rʋrã zug la b rɩ kaoolã rɩɩbã. Rẽ kɩtame t’a Labã pʋd zĩigã yʋʋr tɩ “Yegaar-Sahaduta.” Yʋʋrã yaa ne Arameẽ (Siriyẽ). La a Zakoob pʋda zĩigã yʋʋr tɩ “Galɛɛde.” Yaa ne Ebre. A Labã yeelame yaa: “Kug-rur-kãngã [Ebre., gal] yaa kaset [Ebre., ʽedh] maam ne foom sʋk rũndã!” (Sɩng. 31:44-48) Kug-rʋrã (ne kugrã b sẽn viglã) yɩɩ kaset so-loaadbã fãa yĩnga. Vɛrse 49 wã wilgdame tɩ “Mispa” bɩ Gũusg gasgã [Ebre., mits·pahʹ]” ra yaa kaset t’a Zakoob ne a Labã ra sɩɩga taab noore, n dat tɩ laafɩ zĩnd b sʋka, la b zagsã rãmb sʋka. (Sɩng. 31:50-53) Neb me n wa n maan kaoole, n vigl kuga, bɩ n wʋk kug n dʋʋge, sẽn na yɩl tɩ yɩ kaset me.—Zoz. 4:4-7; 24:25-27.

Sɩngre 31:47-50; it-2 1089 Mispa bɩ Gũusg gasgã

Yaa a Zakoob n kɩt tɩ b wuk kugã n zam taaba, la a bool zĩigã tɩ “Galɛɛde” (sẽn dat n yeel tɩ “kaset rʋre”) la “Mispa” bɩ Gũusg gasgã. Rẽ poore, a Labã yeelame yaa: “Bɩ Sẽn-Ka-Saab gũus maam ne foom, baa tõnd sã n wa n ka leb n yãnd taaba.” (Sɩng. 31:45-49) Kug-rʋrã ra na n yɩɩ kaset t’a Zeova gũusd n geta a Zakoob ne a Labã sã n sɩd pidsda kaool ning b sẽn maan ne taab sẽn na yɩl tɩ laafɩ zĩnd b sʋkã.

D bʋgs Wẽnnaam Gomdã zug neere:

Sɩngre 31:19; it-2 1062 Wẽn-naandse

Tẽn-vaeesdbã sẽn yã bũmb nins Mezopotami soolmẽ wã la zĩis a taab sẽn pẽ be wã wilgdame tɩ ned sã n da tar zak rãmb wẽn-naandse, a tara sor n tõe n wa paam zakã rãmb rogem-pʋɩɩre. B yãa kug-walg a ye Nuzi, tɩ b sẽn gʋls a zugã wilgd tɩ sasa ninga, rɛɛmb sã n da tar zak rãmb wẽn-naandse, a ra tõe n tika rẽ n kẽng bʋ-kaoodb taoore, n kos tɩ b kõ-a a pagã ba wã paoongã. (Ancient Near Eastern Texts, par J. Pritchard, 1974, p. 219, 220, et note 51) Tõe tɩ yaa a Rasɛll sẽn da mi rẽ wã n kɩt t’a tags t’a ra tara sor n na n zuk wẽn-naandsã, bala a ba wã ra zãmba a sɩd a Zakoobe. (Ges-y Sɩng. 31:14-16.) Yaa wẽn-naandsã sẽn da tar yõod wʋsg rogem-pʋɩɩrã paoong wɛɛngẽ wã me n kɩt t’a Labã da rat ne a sũur fãa n le paam a wẽn-naandsã, hal n peeg a saam-biisã tɩ b tũ-a n kẽn rasem a yopoe kẽnde, n na n babs a Zakoobe. (Sɩng. 31:19-30) A Zakoob ra pa mi t’a Rasɛll zuka wẽn-naandsã ye. (Sɩng. 31:32) Sẽn paase, baa fʋɩ pa wilgd t’a baoome n na n tũnug ne a Labã wẽn-naandsã n deeg a kom-dibli wã rogem-pʋɩɩrã ye. A Zakoob toog ra kae ne wẽn-naands ye. Kaoosg zugẽ, a zakã rãmb sẽn yiis wẽn-naandsã n kõ-a wã, a pʋd n dɩka fãa n bus tɩ-bedr a ye sẽn pẽ ne Sɩkɛm tẽngre.—Sɩng. 35:1-4.

Sɩngre 31:41, 42, 1 Pɩyɛɛr 2:18; w13 3/1 24 s. a 8 A Zeova yaa tõnd laafɩ zĩiga

⁸ A Zakoob sẽn ta Harã wã, a yasb a Labã reeg-a-la ne sũ-noogo, tɩ kaoosg zugẽ bɩ a kõ-a a Lea ne a Rasɛll t’a maan a pagba. La a Labã wa n yik n wẽgda a Zakoobe, hal n toeem a yaoodã naoor piiga. (Sɩng. 31:41, 42) La a Zakoob maana sũ-mar yel-kãngã taoore, bala a ra kɩsa sɩd t’a Zeova na n sõng-a lame. A Zeova sɩd sõng-a lame. A sẽn wa n yeel a Zakoob t’a yik n leb Kanaã wã t’a ra “tara dũms ne yem-pogse, la yem-daad ne yʋgma la bõens wʋsgo.” (Sɩng. 30:43) A Zakoob talla mi-beoog wʋsg ne a Zeova, n pʋʋs-a n yeel woto: “Mam ka zems ne bark la sɩd ning yãmb sẽn da wilg maamã ye. Tɩ bõe, mam sẽn wa n na n dʋʋg Zʋrdẽ-kãngã wã, rẽ tɩ yaa rasaar bal la mam tara. La masã, mam lebga kʋʋng a yiibu.”—Sɩng. 32:11.

TƲƲL-NIF RASEM 20-26

D SẼN BÃNG BIIBLÃ KARENG PƲGẼ | SƖNGRE 32-33

“Yãmb maoodame n na n paam bark bɩ?”

Sɩngre 32:25; w16 9/1 13 s. a 6 Kell-y n mao-yã, n paam a Zeova barka

Wẽn-sakd a Zakoob maoa ne a sũur fãa la a tõog toogo, bala, a ra nonga a Zeova, la a getẽ t’a sẽn paam n yaa a zoa wã yaa bõn-sõng tɛkẽ. Sẽn paase, a ra kɩsa sɩd t’a Zeova na n ninga a yagensã bark wa a sẽn pʋlmã. (Sɩng. 28:3, 4) A maoa ne malɛk sẽn tedg n lebg ninsaala, sẽn na yɩl n paam Wẽnnaam barkã. Rẽ t’a kolga yʋʋm koabga. (Karm-y Sɩngr 32:25-29.) Rẽ yĩnga yaa ne a Zakoob meng pãng la a sẽn tõog n mao ne malɛkã bɩ? Ayo! La a sẽn da rat barkã ne a sũur fãa wã, a pẽdgame, n sak n maan a sẽn tõe fãa! A sẽn pẽdg woto wã, a Zeova ning-a-la barka, n pʋd a yʋʋr t’a Israyɛlle, sẽn dat n yeel tɩ sẽn “mao-a ne Wẽnnaam.” Yaa keoor ning a Zakoob sẽn paamã buud la tõnd me sẽn baoodã. D ratame n ta Wẽnnaam yam, la d paam a barka.

Sɩngre 32:26, 27; it-1 356 Woabga

A Zakoob ra yaa woabga. A Zakoob sẽn wa n tar yʋʋm 97 wã, a maoo yʋng tõr ne Wẽnnaam malɛk sẽn tedg n lebg ninsaala. A tõog n gɩdga malɛkã t’a pa looge, hal t’a wa ning-a barka. Maoorã sasa, malɛkã sɩɩsa a Zakoob kɩʋʋlgã, tɩ rãmbe. Rẽ kɩtame t’a Zakoob ra keoosdẽ. (Sɩng. 32:25-33; Ooze 12:3-5) Ra tẽegd-a lame tɩ baa ne a sẽn mao ne ‘Wẽnnaam [Wẽnnaam malɛkã] la ne ninsaalbã n paam tõogr’ wa malɛkã sẽn yeelã, sɩd-sɩdã a pa tõog Wẽnnaam malɛkã sẽn tar pãn-kãsengã ye. A Zakoob tõog n maoo ne malɛkã, bala yaa Wẽnnaam n da rat rẽ, n na n wilg t’a Zakoob ra baooda Wẽnnaam barkã ne a sũur fãa.

Sɩngre 32:28, 29; it-1 1212 Israyɛlle

1. Yaa yʋʋr ning Wẽnnaam sẽn pʋd a Zakoobe, a sẽn waa n tar yʋʋm 97 wã. Yɩɩ yʋng ning a Zakoob sẽn yik n dʋʋg Yabok kʋɩlgã rʋʋndã n na n tɩ seg a kẽem a Ezayu wã la a sɩng maoor ne malɛk sẽn tedg n lebg ninsaala. A Zakoob sẽn kell n mao n pa basã, b toeema a yʋʋrã tɩ lebg Israyɛlle, tɩ yaa kaset t’a paama Wẽnnaam barkã. Sẽn na yɩl n tẽeg bõn-kãens yelle, a Zakoob boola zĩigã yʋʋr tɩ Peniyɛlle, bɩ Penuwɛlle. (Sɩng. 32:23-32; ges-y JACOB.) Kaoosg poore, Wẽnnaam le tẽega yʋʋr ning a sẽn pʋd a Zakoobã Betɛlle. Rẽ tɛk n tãag a kũum, b ra wae n boonda a Zakoob tɩ Israyɛlle. (Sɩng. 35:10, 15; 50:2; 1 Kib. 1:34) La Biiblã pʋgẽ, Israyɛllã b sẽn pʋd sẽn yɩɩd naoor 2500 wã fãa la bal yaa a Zakoob yagensã sẽn lebg buudã yell la b gomda.—Yik. 5:1, 2.

D bʋgs Wẽnnaam Gomdã zug neere:

Sɩngre 32:11, 13-15; w10 6/1 22 s. 10-11 Goam sẽn bʋgs wata ne zems-n-taare

¹⁰ D sã n gomd ne bʋgsem la d pelgd d pʋs n sõsd ne d taabã, wata ne zoodo, la paasd d zems-n-taarã pãnga. Sɩd me, d sã n maand d sẽn tõe fãa sẽn na yɩl tɩ d zems-n-taarã tall pãnga, na n kɩtame tɩ d moorã noomẽ. D sã n nong n yɩt pipi n maand d taabã neer ne d sũy fãa, wala makre, n baood weer n sõngd-ba, n mi n kõt-b kũun ne pʋ-peelem, n boond-b d zagsẽ wall zĩis a taab tɩ d rɩtẽ la d sõsda, tõe n kɩtame tɩ d wa minim n pelgd d pʋs n sõsd ne taaba. Tõnd ne d to sã n pa noomẽ, woto maaneg tõe n yɩɩ wa “bug-saal” n yẽneg a manesem wẽngã t’a toeem zʋgo, tɩ kɩt tɩ d tõog n yẽs n welg yellã.—Rom 12:20, 21.

¹¹ A Zakoob ra miime tɩ maan neer wata ne zems-n-taare. Wakat n zĩnd t’a kinkir taag a Ezayu sũur yik ne-a hal wʋsgo. A Zakoob tagsame t’a Ezayu sã n paam-a, a na n kʋ-a lame, tɩ kɩt t’a zoe. La yʋʋm wʋsg poore, a Zakoob yãka yam n na n lebg n kuli. A Ezayu sẽn wʋmã, a yii ne rap 400 n na n seg-a sorẽ. A Zakoob pʋʋsa a Zeova n kos sõngre. Rẽ poore, a yãka rũms buud toor-toor wʋsgo, n tool tɩ b reng taoor n tɩ kɩs a Ezayu. Kũunã sɩd kɩtame t’a Ezayu toeem yam. B sẽn wa n na n seg taabã t’a Ezayu sũurã sigame. A wudgame n seg a Zakoob n gãd-a n mobg-a.—Sɩng. 27:41-44; 32:7, 12, 14-16; 33:4, 10.

Sɩngre 33:20; it-1 641 Ɛll-Elohe-Israyɛll, bɩ Wẽnnaam sẽn yaa a Israyɛll Wẽnnaamã

A Zakoob sẽn mao ne a Zeova malɛkã Peniyɛllã poore, b toeema a yʋʋrã tɩ lebg Israyɛlle. A sẽn seg a kẽem a Ezayu n bao laafɩ wã poore, a kẽnga Sukot la Sɩkɛm. Beenẽ, a raa zĩig a Hamoor kambã nengẽ, n tilg a fu-roogã. (Sɩng. 32:25-31; 33:1-4, 17-19) “A Zakoob maana tẽn-kugr beenẽ n pʋd a yʋʋr tɩ ‘Ɛll-Elohe-Israyɛll,’” bɩ Wẽnnaam sẽn yaa a Israyɛll Wẽnnaamã. (Sɩng. 33:20) A Zakoob sẽn dɩk a yʋ-paallã n pʋd tẽn-kugrã, a wilgame t’a saka yʋʋrã, t’a sũur yaa noog ne yʋʋrã la t’a sũur me yaa noog ne Wẽnnaam, a sẽn sõng-a t’a tõog n lebg n leb kãabg tẽngẽ wã ne laafɩ wã. Biiblã pʋgẽ, yaa vugr bal la d yãt gom-bil ning sẽn yaa ‘Ɛll-Elohe-Israyɛllã.’

TƲƲL-NIF RASEM 27 –SIG-NOY RASEM A 3

D SẼN BÃNG BIIBLÃ KARENG PƲGẼ | SƖNGRE 34-35

“Ned sẽn da tar tũud-n-ta-wẽnse, tɩ baas wẽnga”

Sɩngre 34:1; w97 1/2 30 4 Sɩkɛm: Tẽng sẽn da be long pʋgẽ

Wãn to la tẽngã rapã ra get pʋg-sad-kãngã sẽn da nan pa mi rao, n da wae n wat a yembr b tẽngẽ wã? Naab a ye biig n yãnd-a, n yõk-a n gãande. Bõe yĩng t’a Dina ra kẽnd n get Kanaã nebã sẽn da pa tũud Wẽnnaamã, n na n bao yell n kõ a menga? Yaa a sẽn da rat kom-pugli sẽn yaa a rog-taas zood bɩ? Yaa a sẽn da yaa bi-bɛɛga, n maand a sẽn dat wa a kẽem-dãmb kẽerã bɩ? Karm-y kibarã sẽn be Sɩngr sebrã pʋgẽ wã, n bãng a Zakoob ne a Leya bi-puglã sẽn da nong n kẽnd Sɩkɛm tẽngã sẽn wa ne zu-loees ninsã, la rẽ sẽn sãam a Zakoob ne a Leya sũy to-to wã võore, la yãnd ning sẽn da tog n tar-bã.—Sɩngre 34:1-31; 49:5-7; ges-y yʋʋmd 1985 sigr kiuug rasem 15 Gũusg Gasgã, seb-neng 31 wã.

Sɩngre 34:2; lvs 124 s. 14 “Zoe-y yoobo!”

¹⁴ A Sɩkɛm wa n maana bũmb a sẽn tagsd tɩ yaa sõma la zemsame. A yamã sẽn da kẽ a Dina wã yĩnga, a “yõk-a lame” n “gãand-a, n sãam-a.” (Karm-y Sɩngr 34:1-4.) A sẽn maan woto wã baasa ne yel-beed sẽn nams a Dina ne a zakã nebã fãa.—Sɩngre 34:7, 25-31; Galat rãmbã 6:7, 8.

Sɩngre 34:7, 25; w09 1/9 21 1-2 B sã n maan-y bũmb tɩ sãam y sũuri

Naoor wʋsgo, b sã n maan ned bũmb tɩ sãam a sũuri, a soabã na n baoome n dok a sũuri. Wala makre, Biiblã wilgdame tɩ Zʋɩf-rãmbã yaab a Zakoob kom-dibli wã sẽn wʋm tɩ Kanaã rao a Sɩkɛm yõga b yao-bi-pugl a Dina wã, b “sũyã sãama hal wʋsgo, la b sũyã yikame.” (Sɩngre 34:1-7) Bãmb b yiib n yãk yam n na n maan a Sɩkɛm ne a zakã rãmb wẽnga, n dok b sũuri. A Leevi ne a Sɩmyõ maana sɩlem n kẽ Kanaã tẽngã pʋgẽ n kʋ a Sɩkɛm la rapã fãa.—Sɩngre 34:13-27.

La rẽ manega yellã bɩ? A Zakoob sẽn wʋm a kom-dibli wã sẽn tʋm tʋʋmd ningã, a zab-b lame n yeel yaa: “Yãmb baoo yell n kõ maam, n kɩt tɩ tẽngã nebã, . . . na n kisg maam . . . Tẽngã nebã na n tigma taab n wa zab ne maam n sãam maam ne m zakã rãmba.” (Sɩngre 34:30) A Zakoob kom-dibli wã sẽn tʋm tʋʋmd ningã waa ne zu-loeese. Pa maneg yellã ye. A Zakoob zakã rãmb ra maanda yɩɩr tẽn-yagsã na n wa yik n zab ne-ba. Rẽ n so tɩ Wẽnnaam yeel a Zakoob t’a yik ne a zakã rãmb n kẽng Betɛlle.—Sɩngre 35:1, 5.

D bʋgs Wẽnnaam Gomdã zug neere:

Sɩngre 35:8; it-1 603 9 A Deboora

1. Yaa pag ning sẽn zã a Rebeka wã. A Rebeka sẽn yi a ba a Betuwɛll zakẽ wã n kẽng Palɛstin n na n tɩ kẽ kãadem ne a Izaakã, a Deboora tũ-a lame. (Sɩng. 24:59) A tʋma a Izaak zakẽ wã n kaoos yʋʋm wʋsgo. Rẽ poore, a tɩ bee a Zakoob zakẽ wã. Tõe tɩ yɩɩ a Rebeka kũumã poore. Yʋʋm 125 a Izaak ne a Rebeka sẽn kẽ kãadmã poore, a Deboora maana kaalem, tɩ b mum-a Betɛlle, tɩ-bedr tẽngre. Yʋʋr ning b sẽn pʋd tɩɩgã (Allon-bakuti, sẽn dat n yeel tɩ “yãbr tɩɩga”) wilgdame t’a Zakoob ne a zakã rãmb ra nong-a-la wʋsgo.—Sɩng. 35:8, MN.

Sɩngre 35:22-26; w17.12 14 Karemdbã sogsgo

Yɩl tɩ Israyɛll ned paam n naag Mesi wã yaab-rãmbã, ra yaa tɩlɛ t’a yɩ a ba wã bi-kãseng bɩ?

Bũmb kẽer la d ra mi n yetẽ, tɩ wilgdẽ tɩ d ra tagsda woto. Ra wõnda zemsa ne Ebre-rãmb 12:16 sẽn yetã. B yeela be t’a Ezayu rɩka “a kãosengã n tek” ne a Zakoobe, “rɩɩb a yembr tãa” yĩnga. Sebr Sõng pʋgẽ wã, b yeelame tɩ yaa a sẽn “ka pẽgd Wẽnd kũuna” la a sẽn maan woto wã. Kɩtame tɩ d ra tagsdẽ tɩ yaa a Zakoob sẽn deeg a Ezayu “kãosengã” yĩng la a sẽn paam n yɩ Mesi wã yaabã.—Mat. 1:2, 16; Luk 3:23, 34.

La Biiblã kibay n wilgd tɩ pa tɩlɛ tɩ ned yɩ a ba bi-kãsenga, n yaool n paam n naag Mesi wã yaab-rãmbã roogã ye. Ad Biiblã kibay a wãn sẽn wilgd rẽ:

A Lea biig a Rubɛn n yaa a Zakoob b sẽn boond me t’a Israyɛllã bi-kãsenga. A Rasɛll sẽn da yaa a Zakoob pʋg-nongrã bi-kãseng yaa a Zozɛf. A Rubɛn sẽn wa n maan sẽn pa segdã, a ba wã rɩka kãosengã n kõ a Zozɛf. (Sɩng. 29:31-35; 30:22-25; 35:22-26; 49:22-26; 1 Kib. 5:1, 2) La Mesi wã yaab-rãmbã pa yɩ a Rubɛn yagense, pa yɩ a Zozɛf yagens me ye. Yɩɩ a Zida sẽn yaa a Lea bi-ribl a naas-n-soabã roog neba.—Sɩng. 49:10.