Wẽnd sõmblem sẽn pid ne nonglmã kõta yolsg la koglgo

11, 12. a) Yaa mak-bʋs pʋsẽ la a Zozɛf maan kaset ne a Zeova sõmblem sẽn pid ne nonglmã? b) Wãn to la Wẽnnaam wilg sõmblem sẽn pid ne nonglmã ne a Zozɛf?

¹¹ Masã, bɩ d ges Sɩngr sak 39. Sak kãng sẽn gomd ned ning yell n yɩɩd ya a Abrahaam yagen-tʋbrakẽeg a Zozɛf b sẽn da koos t’a lebg yamb Eziptã. Baasg zãnga, “Zusoaba ra bee ne a Zozɛf.” (Verse a 1, 2) Sɩda, a Zozɛf zu-soabã sẽn yaa Ezipt ned a Potifaarã meng wa n yãame t’a Zeova bee ne a Zozɛfe. (Verse a 3) Baasg zãnga, a Zozɛf sega makr sẽn yaa kɛgengã. A Potifaar pagã rõda a Zozɛf t’a ra rat n yõga yẽ, tɩ b yõk-a n kẽes bi-bees roogẽ. (Verse a 7-20) Ra yaa “bi-bees roog” pʋgẽ la ‘neb nams yẽ nao ne balgre, b balga a yubla ne kutu.’—Sɩngre 40:15; Yɩɩl Sõamyã 105:18.

¹² Yaa bõe n maan yel-kãngã sẽn yɩ mak-kãsengã sasa? “La Zusoaba bee ne a Zozɛf n wilg yẽ [“a sõmblem sẽn pid ne,” NW ] nonglem.” (Verse 21a) A Zeova talla sõmblem sẽn pid ne nonglem manesem takɩ ne a Zozɛfe, tɩ wa ne yɛl sẽn pʋg taaba, tɩ wa baas n wa ne yolsg n kõ-a a sẽn da be zu-loees pʋsẽ wã. A Zeova kɩtame tɩ “bi-bees roog gũudba naaba nong” a Zozɛfe. (Verse 21b) Rẽ kɩtame t’a kõ a Zozɛf zu-sobendo. (Verse 22) Rẽ poore, a Zozɛf sega rao ning sẽn na n wa gom a yell Ezipt naab a Faraõ taoorã. (Sɩngre 40:1-4, 9-15; 41:9-14) Rẽ poore, rĩmã zẽka a Zozɛf t’a lebg naab a yiib-n-soab Ezipt soolma pʋgẽ, tɩ rẽ yɩ sabab t’a tʋm tʋʋmd sẽn fãag yõyã, komã sẽn wa n kẽ Ezipt tẽngã sasa. (Sɩngre 41:37-55) A Zozɛf namsga sɩnga a sẽn da wa n tar yʋʋm 17, la rẽ kaoos n yɩɩga yʋʋm 12! (Sɩngre 37:2, 4; 41:46) La yʋʋm kãens fãa sẽn yɩ yel-beed la toog wakatã, Wẽnnaam a Zeova wilga a sõmblem sẽn pid ne nonglmã ne a Zozɛf n kogl-a ne yel-beed zãng-zãngã, la a wa kõ-a zu-noog tʋʋmd a raabã pʋgẽ.

16. Wãn to la Biiblã gomd n pẽgd a Abrahaam la a Zozɛfe?

¹⁶ Sɩngr sak 24 kɩbarã wilgda vẽeneg tɩ zood sõma n da be a Abrahaam la a Zeova sʋka. Pipi verse wã yetame tɩ “Zusoaba ninga a [Abrahaam] zug bark ne bũmb fãa.” A Abrahaam sõgna boola a Zeova tɩ “mam soaal a Abrahaam Wẽnnaam.” (Verse 12, 27) La karen-biig a Zak yeelame t’a Abrahaam paama kaset t’a yaa tɩrga, “la b boola yẽ tɩ Wẽnnaam zoa.” (Zak 2:21-23) Yɩɩ woto me ne a Zozɛf. D nee zood sõma ning sẽn be a Zeova ne a Zozɛf sʋkã vẽeneg Sɩngr sak 39 pʋgẽ. (Verse a 2, 3, 21, 23) Sẽn paase, a Zozɛf wɛɛngẽ karen-biig a Etɩɛn yeelame tɩ “Wẽnnaam zĩnda ne yẽnda.”—Tʋʋma 7:10.