Y sẽn tõe n bao n bãng Wẽnnaam to-to

Y tõe n bao n bãnga a Zeova, y sã n karemd Biiblã. Hal sẽn kaoos wʋsgo, Wẽnnaam yãka ninsaalb kẽer tɩ b gʋls a goamã. B boonda seb-kãens tɩ Biiblã. Rũndã-rũndã, yaa d sẽn na n karemd Biiblã la d bãngd Wẽnnaam. Biiblã sẽn tar a Zeova gomdã bɩ a koɛɛgã yĩnga, b boond-a lame me tɩ Wẽnnaam Gomde. D tõe n tẽe Biiblã sẽn yet bũmb ningã, bala a Zeova zɩ n yag ziri ye. ‘Wẽnnaam ka tõe n yag zĩri ye.’ (Hebre dãmba 6:18) Wẽnnaam Gomdã pʋgẽ la sɩdã be.—Zã 17:17.

Biiblã yaa Wẽnnaam kũun yõod sẽn yɩɩd-bã a yembr a sẽn kõ-do. Biiblã yaa wa lɛtr ba sẽn tar nonglem sẽn gʋls a kamba. A yeta tõnd tɩ Wẽnnaam kãabame t’a na n toeema tẽngã t’a lebg zĩ-neer vɩɩm sẽn noomẽ: arzãna. Biiblã yeta tõnd Wẽnnaam sẽn maan bũmb nins pĩnd wẽndẽ wã, a sẽn maand bũmb ning masã, la a sẽn na n maan bũmb ning beoog-daar n kõ a kamb nins sẽn yaa kɩs-sɩd dãmbã. A ye sõngda tõnd tɩ d welg d zu-loeesã la d paam sũ-noogo.—2 Tɩmote 3:16, 17.

A Zeova Kaset rãmbã yaa Wẽnnaam zo-rãmba. B na n sõng-y lame tɩ y wʋm Biiblã sẽn zãmsd bũmb ningã võore. Yãmb wee n togs-b bal tɩ y rat n zãmsa Biiblã. B pa na n kɩt tɩ y yao ligd rẽ yĩng ye. (Matɩe 10:8) Sẽn paase, y tõe n kẽnga kiris-neb tigissã. B maanda tigis-kãens baleng zĩisẽ b sẽn boond tɩ Rĩung Roto. Y sã n kẽng kiris-neb tigissẽ wã, y bãngrã Wẽnnaam wɛɛngẽ wã na n paasa tao-tao.

Y sã n ges bũmb nins Wẽnnaam sẽn naana y tõe n bãng-a lame. Wala makre, Biiblã yetame: “Wẽnnaam naana saasã la tẽngã.” (Sɩngre 1:1, NW ) A Zeova sẽn wa n naan “saasã,” a maana wĩntoogã. Masã, bõe la rẽ zãmsd tõnd Wẽnnaam wɛɛngẽ? Rẽ wilgda tõnd t’a Zeova tara pãng wʋsgo. Yaa yẽ bal n tõe n maan bũmb sẽn tar pãng wʋsg wa wĩntoogã. Rẽ leb n wilgda tõnd t’a Zeova yaa yam soaba, bala tũu ne yam t’a maan wĩntoogã sẽn kõt tʋʋlem la vẽenem, la a pa tond n yõog n sa wã.

A Zeova naanegã wilgdame t’a nonga tõndo. Tags-y tɩɩs biis toor-toorã sẽn be tẽng zugã yelle. A Zeova ra tõe n kõo tõnd tɩɩg biis buud a yembr bala, bɩ a ra pa kõẽ-d ba a yembr meng ye. Sẽn yaa lebende, a Zeova kõo tõnd tɩɩs biis buud wʋsgo, tɩ b halhaalã, b bedrmã, b gʋlmã la b noomã yaa toor-toor wʋsgo. Rẽ wilgdame t’a Zeova pa Wẽnnaam sẽn tar nonglem bal ye, la a leb n yaa kõta, neb a taabã beoog yell bɛoonda, la nin-sõng wʋsgo.—Yɩɩl Sõamyã 104:24.