SAK 26
Bõe yĩng tɩ wẽnemã la namsgã beẽ?
Yel-beed sã n mi n maane, nebã wae n sokdame yaa: “Bõe yĩng tɩ bõn-kãngã maane?” D sũur noomame, bala Biiblã sõngdame tɩ d paam sok-kãngã leoore.
1. Bõe la a Sʋɩtãan maan-yã, tɩ yel-beed toor-toorã sɩng tẽngã zugu?
A Sʋɩtãan kɩɩsa Wẽnnaam. A Sʋɩtãan da rat n sooga a taabã. Rẽ n so t’a belg a Ãdem ne a Awa sẽn yɩ pipi ninsaalbã tɩ bãmb me kɩɩs Wẽnnaam. Sẽn na yɩl n pids a raabã, a togsa a Awa zirẽ-beedo. (Sɩngre 3:1-5) A kɩtame t’a Awa tags tɩ bũmb sẽn yaa sõma ne-a la a Zeova pa rat t’a paame. A yeelame tɩ ninsaalbã sã n kɩɩs Wẽnnaam, b vɩɩmã na n yɩɩ noog n yɩɩda. A Sʋɩtãan yeela a Awa t’a pa na n ki ye. Rẽ n yɩ pipi zirẽ-beedo. Yaa rẽ yĩng la Biiblã pʋgẽ, b sẽn boond a Sʋɩtãan tɩ “pʋ-yagd la ziri wã ba” wã.—Zã 8:44.
2. Bõe la a Ãdem ne a Awa yãk yam n maane?
A Zeova ra kõo a Ãdem ne a Awa bõn-sõma wʋsgo. A yeel-b lame tɩ b tõe n dɩɩ tɩɩsã fãa sẽn be Edɛn zẽedã zĩigẽ wã biisi, sã n pa a ye bala. (Sɩngre 2:15-17) La b wa n yãka yam n dɩ tɩ-kãng biisã. A Awa “yãka tɩɩgã bil n dɩ.” Rẽ poore, a Ãdem me rɩɩ tɩɩgã bila. (Sɩngre 3:6) B yiibã fãa kɩɩsa Wẽnnaam. A Ãdem ne a Awa sẽn da zems zãngã yĩnga, wẽng maaneg tʋlsem ra pa be b sũyẽ wã ye. Dẽnd b sẽn wa n kɩɩs Wẽnnaamã yɩɩ bãmb mens yam-yãkre. B maana yel-wẽnde, la b zãgs tɩ b pa rat Wẽnnaam naamã ye. B yam-yãkrã kɩtame tɩ b paam tood wʋsgo.—Sɩngre 3:16-19.
3. Wãn to la a Ãdem ne a Awa yam-yãkrã namsd tõndo?
A Ãdem ne Awa sẽn maan yel-wẽndã, b lebga neb sẽn pa zems zãnga. Kɩtame me tɩ b kambã ne b yagensã lebg neb sẽn pa zems zãnga. Biiblã pʋgẽ, b goma a Ãdem yell n yeele: ‘Yel-wẽndã tũu ne rao a yembr n kẽ dũni wã, tɩ kũum tũ ne yel-wẽndã n wa, tɩ kũum ta nebã fãa, b fãa sẽn maan yel-wẽnã yĩngã.’—Rom dãmbã 5:12.
Bũmb toor-toor n kɩt tɩ d namsdẽ. Wakat ninga, d namsda d sẽn yãk yam n maan bũmb tɩ pa yɩ sõma yĩnga. Wakat kẽere, yaa neb a taab sẽn yãk yam tɩ pa sõma yĩnga. Wakat ninga, d namsda d sẽn be zĩig ning tɩ yell kell n paam-d yĩnga.—Karm-y Koɛɛg soab 9:11.
D BAO N BÃNG N PAASE
D ges bũmb ning sẽn wilgd tɩ pa Wẽnnaam n kɩt tɩ wẽnemã la namsgã be rũndã-rũndã wã, la a tagsg sẽn yaa a soaba, d sã n wa namsdẽ.
4. Soab ning sẽn kɩt tɩ tõnd namsdẽ wã
Neb wʋsg tagsdame tɩ Wẽnnaam n dɩt naam dũniyã gill zugu. Yaa woto bɩ? Ges-y VIDEO wã.
Karm-y Zak 1:13 ne 1 Zã 5:19, tɩ rẽ poor bɩ y leok sokrã:
Yaa Wẽnnaam n kɩt tɩ namsgã la wẽnemã beẽ bɩ?
5. A Sʋɩtãan naamã sẽn wa ne yɛl ninsi
Karm-y Sɩngr 3:1-6, tɩ rẽ poor bɩ y leok sogsgã:
Bõe la a Sʋɩtãan yeel tɩ yaa ziri?—Ges-y vɛrse a 4 ne a 5.
Bõe la a Sʋɩtãan yeel tɩ yaa wa a Zeova mongda ninsaalbã bũmb sẽn yaa sõma?
Sã n yaa ne a Sʋɩtãana, sẽn na yɩl tɩ ninsaalbã paam sũ-noogo, yaa tɩlɛ tɩ b sak t’a Zeova yɩ b naab bɩ?
Karm-y Koɛɛg soab 8:9, tɩ rẽ poor bɩ y leok sokrã:
A Zeova sẽn pa dũni-kãngã naabã yĩnga, bõe n maande?
A. A Ãdem ne a Awa ra zemsa zãng n be arzãnã pʋgẽ. La b kelga a Sʋɩtãana, n kɩɩs a Zeova
B. B kɩɩsgã poore, yel-wẽnã, namsgã la kũumã piuuga dũniyã zugu
D. A Zeova na n kɩtame tɩ yel-wẽnã, namsgã la kũumã sa. Ninsaalbã na n le zemsa zãnga, n vɩɩmd arzãnã pʋgẽ
6. Tõnd sẽn namsdã pa noom a Zeova ye
Wẽnnaam maanda a toog kae ne tõnd sẽn namsdã bɩ? Ges-y rĩm a Davɩɩd ne tẽn-tʋmd a Pɩyɛɛr sẽn gʋls bũmb ninga. Karm-y Yɩɩn-sõamyã 31:8 la 1 Pɩyɛɛr 5:7, tɩ rẽ poor bɩ leok sokrã:
Y sẽn bãng tɩ d sã n namsdẽ a Zeova miime, la t’a geta d yellã, y tagsg yaa wãna?
7. Wẽnnaam na n kɩtame tɩ namsgã fãa sa
Karm-y Ezayi 65:17 ne Vẽnegr 21:3, 4, tɩ rẽ poor bɩ y leok sokrã:
A Zeova pʋlmame t’a na n yẽesa namsg ning fãa yel-beedã sẽn paamd ninsaalbã sẽn wa ne wã. Bõe yĩng tɩ rẽ kengd raoodo?
Yãmb miime bɩ?
A Sʋɩtãan sẽn wa n na n yag ziri pipi wã, a kãnega a Zeova. Woto rat n yeelame t’a sãama a Zeova yʋʋrã, n yeel t’a pa naab sẽn dɩt a naamã ne tɩrlem la nonglem ye. A Zeova sã n wa kɩt tɩ namsgã sa ka la bilfu, na n kɩtame t’a yʋʋrã paam waoogre. Rat n yeelame t’a na n wilgame tɩ yaa yẽ naamã la sõma. A Zeova yʋʋrã na paam waoogrã yaa bũmb sẽn tar yõod wʋsgo.—Matiye 6:9, 10.
NEB KẼER SẼN YETE: “Tõnd sẽn namsdã yaa Wẽnnaam daabo.”
Yãmb na n yeelame tɩ bõe?
KƲMSGO
Sẽn yɩɩd fãa, yaa a Sʋɩtãan n paas a Ãdem ne a Awa n kɩt tɩ namsgã beẽ wã. Tõnd sẽn namsdã sãamda a Zeova sũur wʋsgo. Ka la bilfu, a na n kɩtame tɩ namsgã sa.
Lebg-n-gese
Bõe la a Sʋɩtãan yeel a Awa tɩ yaa ziri?
Wãn to la a Ãdem ne a Awa kɩɩsgã namsd tõnd fãa?
Bõe n kɩt tɩ d miẽ tɩ d namsgã pa noom a Zeova?
BŨMB A TAABA
Biiblã pʋgẽ, wãn to la b bilgd yel-wẽnd sẽn yaa a soaba?
Bũmb a taaba, no-koeemd ning a Sʋɩtãan sẽn wa ne Edɛn zẽedã zĩigẽ wã wɛɛngẽ.
“Bõe yĩng tɩ Wẽnnaam bas tɩ namsgã beẽ?” (Yʋʋmd 2014 yʋʋm-vẽkr kiuug pipi daar Gũusg Gasgã)
Sokr a ye sẽn yaa toog b sẽn leoke, hal tɩ kengd raoodo.
“Bõe yĩng tɩ Nazi-rãmbã kʋ Zʋɩf-rãmb wʋsgo? Bõe yĩng tɩ Wẽnnaam pa gɩdg rẽ?” (Bee jw.org)
Rao a ye kibare. A bãnga bũmb ning sẽn kɩt tɩ namsgã beẽ wã.