Kiris-nebã vɩɩm la b tʋʋma tigissã na-kẽndr not-rãmbã
SẼOOG RASEM A 5-11
D SẼN BÃNG BIIBLÃ KARENG PƲGẼ | TÕODO 11-12
“A Zeova sẽn dat tɩ b waoog-a to-to”
it-1 93 s. a 7
Sɩɩga
Tũ Wẽnnaam ne f sɩɩg fãa. “Sɩɩgã” makda ninsaalã tõr wa d sẽn zoe n yã wã. La Biiblã vɛrse kẽer pʋsẽ, b sagenda tõnd tɩ d tall nonglem, la d tũ Wẽnnaam ne ‘d sũurã fãa la ne d sɩɩgã fãa,’ (Tõo. 4:29; 11:13, 18, MN) tɩ Tõod 6:5 yetẽ: “Bɩ y nong Sẽn-Ka-Saab sẽn yaa yãmb Wẽnnaamã ne y sũur fãa, la ne y yalẽ [sɩɩgã, MN] fãa la ne y pãngã fãa.” A Zeezi yeelame tɩ d segd n tũu Wẽnnaam ne d sɩɩgã fãa, ne d pãngã fãa, la a paas tɩ ne d “yamã fãa.” (Mark 12:30; Luk 10:27) Bõe yĩng tɩ b sõdg bõn-kãensã fãa n paas sɩɩgã, tɩ sɩɩgã yaool n yaa ninsaalã tõre? Ad makr sẽn na n sõng tɩ d bãng rẽ sẽn tõe n dat n yɛɛlga: Nina tõe n koosa a meng (a sɩɩgã) yembdo, tɩ ned ning sẽn da-a wã so-a, n yaa a zu-soaba. Baasgo, a tõeeme n pa tʋmd a zu-soabã tʋʋm ne a sũur fãa, la a rat n maan sẽn noom-a ye. A pa na n tʋm ne a pãngã fãa bɩ ne a yamã fãa sẽn na yɩl t’a zu-soabã paoong paas ye. (Ges-y Efɛ. 6:5; Kol. 3:22.) Dẽnd b sõdga bõn-kãensã n naag n na n wilg tɩ b tara yõodo, sẽn na yɩl tɩ d sẽn tũud Wẽnnaam sẽn yaa soab ning sẽn so tõndã, la a Biigã sẽn yaa soab ning sẽn kõ a vɩɩmã tɩ yɩ maoong tõnd yĩngã, bɩ d ra yĩm bõn-kãens yell ye. Tũ Wẽnnaam ne d “sɩɩg fãa” rat n yeelame tɩ d tũ-a ne d mengã tõre. D yĩngã wil fãa, d sẽn tõe n maan bũmb ninsã, la d tʋlsmã me naagame.—Ges-y Mat. 5:28-30; Luk 21:34-36; Efɛ. 6:6-9; Fili. 3:19; Kol. 3:23, 24.
it-1 231 s. a 9
Tẽn-kugri
Wẽnnaam yeela Israyɛll nebã tɩ b sãam bu-zẽmsã tẽn-kugã, la b wã ra-lugsã la kugã b sẽn lug n pʋʋsdẽ wã sẽn da wae n be tẽn-kugã sɛɛgẽ wã. (Yik. 34:13; Tõo. 7:5, 6; 12:1-3) B ra pa segd n maan tẽn-kug sẽn wõnd bu-zẽmsã tẽn-kuga, wall b yõog b kamb bugmẽ wa Kanaã nebã ye. (Tõo. 12:30, 31; 16:21) B ra pa segd n maan tẽn-kug wʋsg ye. B ra segd n maana tẽn-kug-yɛng sẽn na yɩl n waoog Wẽnnaam sɩd-sɩdã sẽn yaa a yembrã. Sẽn paase, ra segd n yɩɩ zĩig ning a Zeova sẽn na n yãkã bala. (Tõo. 12:2-6, 13, 14, 27, Babilon nebã ra maana tẽn-kug bãmb 180 wẽn-poak a Istaar a ye tãa yĩnga.) Pipi, Wẽnnaam yeel-b lame tɩ b maan tẽn-kugr ne kug sẽn pa peese, Zʋrdẽ kʋɩlgã rʋʋnde. (Tõo. 27:4-8) Yɩɩ a Zozuwe n maan tẽn-kug-kãng Eball tãngã zugu. (Zoz. 8:30-32) B sẽn pʋɩ soolmã b sẽn zab n deegã poore, Rubɛn ne Gaad buudã n paas Manase buudã pʋɩ-sʋkã maana tẽn-kug-bedr Zʋrdẽ kʋɩlgã noore. Rẽ kɩtame tɩ buud a taab sũy yiki, n tãag b sẽn wa n bãng tɩ tẽn-kugrã pa wilgd tɩ b kɩɩsa Wẽnnaam, la tɩ yaa sẽn na n tẽegdẽ tɩ b segd n maana sɩd ne a Zeova sẽn yaa Wẽnnaam sɩd-sɩdã.—Zoz. 22:10-34.
D bʋgs Wẽnnaam Gomdã zug neere:
it-1 1037-1038
Gerizim tãngã
Nand tɩ Israyɛll buudã neb zab n tõog Ayi, b tũu noy nins a Moyiiz sẽn kõ a Zozuwe wã, n tigim Gerizim tãngẽ wã ne Eball tãngẽ wã. Zĩ-kãnga, nin-buiidã kelga b sẽn karem bark nins b sẽn na n paame, b sã n sak a Zeova wã, ne kãab-beed nins sẽn na n wa b zutu, b sã n kɩɩs-a wã. Sɩmeyõ buudã, Levi, Zida, Isakaare, Zozɛf la Bẽnzame buudã ra yasame n tees Gerizim tãngã. Levi buudã neb ne kaoolã koglg ra bee longẽ wã, tɩ buud a yoobã sẽn ketã yas n tees Eball tãngã. (Tõo. 11:29, 30; 27:11-13; Zoz. 8:28-35) Wõnda b sã n da karem kãab-noodã n tees buud nins sẽn yas Gerizim tãngã sɛɛgẽ wã, yaa bãmb n deesde, tɩ sẽn da yas-b Eball tãngã sɛɛgẽ wã reesd kãab-beed nins b sẽn karemd n teesd tãn-kãng sẽnesã. Neb kẽer yetame tɩ b ra segd n karma kãab-noodã n tees Gerizim tãngã a sẽn yaa neer n yɩɩd la a sakd koodã, tɩ Eball tãngã yaool yaa kug la zĩ-vɩʋʋgã yĩnga. La Biiblã pa gomd rẽ yell baa bilf ye. B karma Tõogã “Israyɛll nebã ne b pagbã la b kambã ne bu-zẽmsã sẽn dag n be bãmb sʋkã nifẽ.” (Zoz. 8:35) Neb kʋʋngã fãa ra tõe n paa tãens a yiibã sɛɛg n wʋm b sẽn da karemd bũmb ningã. Tõe tɩ yaa zĩigã sẽn da kɩtd tɩ rãamd tõe n zãag zĩigã yĩngã.—Ges-y EBALL TÃNGÃ.
SẼOOG RASEM 12-18
D SẼN BÃNG BIIBLÃ KARENG PƲGẼ | TÕODO 13-15
“Tõogã sẽn wilg to-to tɩ naong rãmbã yell paka a Zeova”
it-1 648 s. a 5
Piig-pʋɩɩre
Wõnda nin-buiidã ra yãkda piig-pʋɩɩr a to yʋʋmd fãa, sẽn yaa toor ne a soab ning b sẽn da yãkd sẽn na yɩl n teel Levi buudã neb maan-kʋʋrã tʋʋmdã. Baasgo, Levi buudã neb ra tõe n naag n dɩɩ piig-pʋɩ-kãnga. Israyɛll nebã fãa sã n da tigim taab n na n maan tigri, b fãa ra rɩta pʋɩ-kãng yõodo. Sã n mik tɩ b segd n toga so-wok n yaool n ta Zerizalɛm tɩ kɩt tɩ yaa toog tɩ b zã piig-pʋɩɩrã n kẽnge, b ra koosdame n zã ligdã n tɩ ges b zagsã rãmb yell tigsg sẽn yaa sõngã wakate. (Tõo. 12:4-7, 11, 17, 18; 14:22-27) Yʋʋm a yopoe-poe vʋʋsg yʋʋmdã pʋgẽ, yʋʋm a tãab-n-soabã la yʋʋm a yoob-n-soabã baasgẽ, b ra pa tar piig-pʋɩ-kãng n get b zagsã rãmb yell tigissã b sẽn da maandã sasa ye. Ra yaa Levi buudã neb ne sãambã la pʋg-kõapã, n paas kɩɩbsã sẽn be soolmẽ wã pʋɩɩre.—Tõo. 14:28, 29; 26:12.
it-2 843-844
Vʋʋsg yʋʋmde
B ra boonda Vʋʋsg yʋʋmdã tɩ “bas-taal yʋʋmde [hash·shemit·tahʹ].” (Tõo. 15:9; 31:10) Yʋʋm-kãnga, b ra basda pʋtã tɩ b vʋʋse, n pa bʋd bũmb ye. (Yik. 23:11) B ra segd n basa samã me taale. Ra yaa bas-taal a Zeova yĩnga, sẽn na yɩl n waoog-a. Yel-kãng wɛɛngẽ, neb kẽer tagsg yaa toore. Sãnda yetame tɩ b ra pa basd samã taal zãng ye. Sam-soab ra pa segd n pẽdg a Ebre-taag sẽn na yɩl t’a yao-a a samde, bala ka-kaoodbã ra pa paamd bũmb yʋʋm-kãng ye. La sã n yaa sãana, sam-soabã tõe n pẽdg-a lame sẽn na yɩl t’a yao. (Tõo. 15:1-3) Rabẽ-rãmb kẽer yetame tɩ samd ning b sẽn segd n bas taalã, yaa bũmb f sẽn kõ f ba-biig a sẽn be raab pʋgẽ yĩnga, la tɩ sã n yaa leebgã wɛɛngẽ samde, yaa toore. B leb n yetame tɩ pipi kiris-nebã wakatẽ, a Hillel yiisa noor sẽn wilgd tɩ ned ning sẽn kõ a to samd tõe n kẽnga bʋ-kaoodb taoor n tɩ togse, tɩ yɩ kaset tɩ nedã tara a samde.
it-1 793 s. a 4
Yamba
Noya, yamb ne a zu-soab yĩnga. Israyɛll nebã sʋka, noy nins b sẽn gãneg yamb sẽn yaa Ebre ne yamb sẽn yaa sãan yĩngã ra yaa toor-toore. Yamb sẽn pa Ebre ra yaa a zu-soabã soolem wakat fãa yĩnga. Rao ra tõe n dɩka ned a woto n kõ a biig t’a yɩ a yamba. (Maan. 25:44-46) La b ra kõta Ebre sẽn yaa yamb lohorem a yembdã yʋʋm a yopoe-n-soabã wall Kɩdeng yʋʋmdã sasa. Bee ne yʋʋmd ning sẽn na n deng n ta wã. Wakat nins fãa Ebre wã sẽn na n yɩ yambã, b segd n gesa a yell wa ned b sẽn dɩk tʋʋma. (Yik. 21:2; Maan. 25:10; Tõo. 15:12) Ebre sã n da koos a meng yembd ne sãana, sẽn yaa wakat ning fãa, yẽ mengã wall ned sẽn tar sor n tõe n lebs n da-a ra tõe n lebs n da-a lame. Yaood ning b sẽn da segd n yao n deeg-a wã ra bee ne yʋʋm sõor sẽn ket nand tɩ Kɩdeng yʋʋmdã, wall a yembdã yʋʋm a yopoe-n-soabã ta. (Maan. 25:47-52; Tõo. 15:12) Yamb sẽn yaa Ebre zu-soab sã n wa na n kõ-a lohorem, a ra segd n kõo yambã kũuni, sẽn na yɩl t’a le tõog n ges a meng yelle, a sẽn lebg ned sẽn paam lohormã yĩnga. (Tõo. 15:13-15) Ned sã n da lebg yamb ne a paga, a pagã tũud-a lame n looge. La a zu-soabã sã n kõ-a paga, pagã ne kamb nins fãa a sẽn dogã na n kell n yɩɩ a zu-soabã rẽnda (yaa vẽeneg tɩ yaa bu-zẽng paga, n pa tar sor n na n paam lohorem yʋʋm a yopoe-n-soabã ye.) Sã n wa yaa woto, Ebre wã ra tõe yãka yam n kell n pa ne a zu-soabã. A sã n dat n kell n pa, b segd n pooga a tʋbrã ne pĩim, sẽn na yɩl n wilg t’a na n yɩɩ yamb wakat fãa yĩnga.—Yik. 21:2-6; Tõo. 15:16, 17.
D bʋgs Wẽnnaam Gomdã zug neere:
w06 1/4 31
Karemdbã sogsgo
B sẽn yeel Yikr 23:19 tɩ “ra rʋg-y bull a ma bĩisim pʋgẽ” wã wilgda tõnd bõe?
A Moyiiz Tõogã no-kãngã sẽn be zĩis a tãab Biiblã pʋgẽ wã tõe n sõnga tõnd tɩ d bãng bũmb ning sẽn pa sõma a Zeova nifẽ wã, a nimbãan-zoeerã, la a bʋgsmã. Leb n wilgdame t’a kisa ziri tũudmã wʋsgo.—Yikri 34:26; Tõodo 14:21.
Ned sã n dʋg bull wall rũng a to biig a ma bĩismẽ, pa zems ne a Zeova sẽn sigl yɛlã to-to wã ye. Wẽnnaam kɩtame tɩ ma-rãmbã tar bĩisim sẽn na yɩl n dɩlg b kambã, la sõng-b tɩ b bɩ. Bãngd a yembr yeelame tɩ ned sã n dʋg rũng a ma bĩismẽ, wilgdame t’a “pa nand bũmb ning Wẽnnaam sẽn kɩt tɩ be rũng ne a biig sʋkã, t’a getẽ yɩ yaa sõngã ye.”
Sẽn paase, neb kẽer yetame tɩ rʋg rũng a ma bĩismẽ yaa bũmb ziri tũudmã rãmb sẽn da maand n na n bool saaga. Sã n da yaa woto, dẽnd Wẽnnaam sẽn gɩdg tɩ b ra maan dẽ wã ra kogenda Israyɛll nebã ne buud nins sẽn gũbg-bã minung sẽn pa tar yõodo, la sẽn yaa wẽnem. A Moyiiz Tõogã ra wilga vẽeneg tɩ Israyɛll nebã pa segd n tũ bu-kãens rog-n-migsã ye.—Maan-kʋʋre 20:23.
Sẽn na n baase, no-kãngã wilgdame t’a Zeova yaa nimbãan-zoɛta. Sɩd me, Tõogã tara noy wʋsg sẽn gɩdg tɩ b ra maan rũmsã wẽnga, la tɩ b ra maan bũmb sẽn yaa kɛgr ye. Wala makre, Tõogã ra gɩdgame tɩ b pa segd n kʋ rũng n maan maoongo, t’a pa reng n zĩnd ne a ma wã rasem a yopoe, tɩ b ra kʋ rũng ne a kamb daar-n-yɛnga, la tɩ b ra naag liuul ne a gɛl wall a kamb n dɩk tʋk pʋgẽ ye.—Maan-kʋʋre 22:27, 28; Tõodo 22:6, 7.
Vẽenega, Tõogã pa noy b sẽn kõ n gɩdg bũmb toor-toor bal ye. Saglsã sẽn be a pʋgẽ wã tõe n sõnga tõnd tɩ d bɩɩs zʋg-sõma, n tõog n dɩk a Zeova togs-n-taare.—Yɩɩn-sõamyã 19:7-11.
SẼOOG RASEM 19-25
D SẼN BÃNG BIIBLÃ KARENG PƲGẼ | TÕODO 16-18
“Noy b sẽn segd n tik n kao bʋʋd tɩrga”
it-1 410 s. a 2
Zondo
B mi n gomda zond yelle, tɩ makd b sẽn kao bʋʋd kɛgre. Tõogã pʋgẽ, noy wʋsg n be be n gɩdg noor-madgre, reeg kũun n maan zãmbo, la bak n sõnge. Bala bõn-kãensã tõe n kɩtame tɩ bʋ-kaood mum a nin n kao bʋʋd kɛgre. “Zãmb kũun luta yam dãmb nini.” (Yik. 23:8) “Kũun luta yam dãmb nini.” (Tõo. 16:19) Baa bʋ-kaood sẽn yaa tɩrg la yam soab to-to, b sã n kõ-a kũuni, tõe n kɩtame t’a yãk yam n sõng neda, wall a sõng-a n pa bãng ye. Wẽnnaam tõogã wilgame tɩ pa kũun bal n tõe n kɩt tɩ bʋ-kaood mum a nin n kao bʋʋd kɛgr ye. A yeelame: “Ra mong naong soab bʋʋm a naongã yĩnga, la f ra kõ nin-kãseng bʋʋm a sẽn yaa nin-kãsengã yĩng ye.” (Maan. 19:15) Bʋ-kaood ra pa segd n kao bʋʋd nimbãan-zoeer yĩnga, wall a sẽn dat n noog neb wʋsg sũur yĩnga, n ning arzɛk soab taal a sẽn yaa arzɛk soabã yĩng bal ye.—Yik. 23:2, 3.
it-2 415 s. a 2
Sõore, sõadga
Yiibu. Bʋ-kaoorã wɛɛngẽ, b wae n gomda yiib yelle. Neb a yiib kaset paasda kaool pãnga. B sã n da tall yell n kẽng bʋ-kaoodb taoore, ra yaa tɩlɛ tɩ b paam kaset rãmb a yiib bɩ a tãabo. Kiris-nebã tiging pʋgẽ me b tũuda no-kãnga. (Tõo. 17:6; 19:15; Mat. 18:16; 2 Kor. 13:1; 1 Tɩm. 5:19; Ebre. 10:28) Wẽnnaam tũu no-kãngã, a sẽn wa n na n wilg t’a Biigã n yaa ninsaalbã Fãagdã. A Zeezi yeelame: “Yãmb Tõogã pʋgẽ menga, b gʋlsame: ‘Rap a yiib kaset yaa sɩda.’ Mam kõta m meng kaseto, la Ba wã sẽn tʋm maamã me kõta mam kaseto.”—Zã 8:17, 18.
it-2 657 s. a 3
Maan-kʋʋda
Sẽn yɩɩd fãa, maan-kʋʋdbã n da segd n wilg nin-buiidã Wẽnnaam noyã võore. Sẽn paase, b ra sõngda bʋʋdã kaood wɛɛngẽ Israyɛlle. Tẽns nins b sẽn da yãk n kõ maan-kʋʋdbã pʋsẽ, b ra tõe n sõnga bʋ-kaoodbã, la yell sã n wa yaa kãn-kãe n yɩɩd bʋ-kaoodbã nugu, b naagda bʋ-kaoodbã n kao bʋʋdã. (Tõo. 17:8, 9) B sã n da kʋ ned tɩ b pa bãng sẽn yaa ned ning n kʋ-a wã, maan-kʋʋdbã ra naagda tẽngã kãsem-dãmb sẽn na yɩl tɩ b maan bũmb nins b sẽn segd n maane, tɩ zɩɩm taal ra zĩnd tẽn-kãng zug ye. (Tõo. 21:1, 2, 5) Rao sã n da rõd a pag t’a soosd n yoodame, b ra segd n talla pagã n kẽng wẽnd-doogẽ wã, tɩ maan-kʋʋdã maan bũmb ning a sẽn segd n maanã, n kos a Zeova sẽn yaa soab ning sẽn mi pagã sã n tara taalã t’a kao a bʋʋdo. (Sõd. 5:11-31) Maan-kʋʋdbã wall bʋ-kaoodb nins b sẽn yãkã sã n da kao bʋʋd fãa, nin-buiidã segd n saka rẽ. Ned sã n da kɩɩs rẽ ne yamleoogo, b segd n kʋ-a lame.—Sõd. 15:30; Tõo. 17:10-13.
D bʋgs Wẽnnaam Gomdã zug neere:
it-1 852
Yiis ned buud sʋka
Tõogã wilgame tɩ nand tɩ b yiis ned buud sʋka, yaa tɩlɛ tɩ b paam neb a yiib bɩ sẽn yɩɩd rẽ kaseto. (Tõo. 19:15) Kaset rãmbã n da segd n yɩ pipi n lobg a soabã kuga. (Tõo. 17:7) Rẽ ra na n wilgame tɩ b sɩd nonga a Wẽnnaam tõogã, la tɩ b ratame tɩ Israyɛll buudã kell n yɩ yɩlemde. Rẽ leb n da tõe n kɩtame tɩ ned ra kõ kaset sẽn yaa ziri, wall a yɩ tao-tao n kõ kaset n pa reng n tags ye.
SẼOOG RASEM 26–SA-SIK PIPI DAARE
D SẼN BÃNG BIIBLÃ KARENG PƲGẼ | TÕODO 19-21
“Ninsaal vɩɩm tara yõod wʋsg a Zeova nifẽ”
D rɩk a Zeova togs-n-taare, tɩrlmã la nimbãan-zoeerã wɛɛngẽ
4 Soondg tẽns a yoobã fãa ra yaa zĩis b sẽn tõe n kẽng nana-nana. A Zeova ra kɩtame tɩ b yãk tẽns a tãab Zʋrdẽ kʋɩlgã rʋʋnd a ye, a tãab rʋʋnd a to wã. Bõe yĩnga? Yaa sẽn na yɩl tɩ yɩ nana ne ned t’a zoe n ta be tao-tao. (Sõd. 35:11-14) Soay nins sẽn da rabd soondg tẽnsẽ wã ra manega sõma. (Tõo. 19:3) Zʋɩf-rãmbã kʋdemdã sɛb pʋgẽ, b wilgame tɩ b ra ninga bãna, tɩ ned tõe n bãng sorã nana. Soondg tẽns sẽn da be wã, ra pa tɩlɛ tɩ ned sẽn yãk yõor ne yĩdg zoe n kẽng bu-zẽms tẽngẽ, tɩ rẽ wa yɩ sabab t’a bas a Zeova tũub n pʋʋsd bõn-naands ye.
D rɩk a Zeova togs-n-taare, tɩrlmã la nimbãan-zoeerã wɛɛngẽ
9 Ad bũmb a ye sẽn kɩt tɩ b yãk soondg tẽnsã: Yaa sẽn na yɩl tɩ zɩɩm taal ra wa zĩnd Israyɛll nebã zug ye. (Tõo. 19:10) A Zeova nanda ninsaal vɩɩmã. A kisa “nus sẽn daagd bʋʋm soab zɩɩm.” (Yel. 6:16, 17) A sẽn yaa sõng la tɩrgã, ned sã n yãk a to yõore, baa yaa ne yĩdgu, a pa tõe n bas taal woto bal ye. Yaa sɩd tɩ sã n yaa ne yĩdgu, a paamdame tɩ b zoe a nimbãanega. La a segd n deng n tɩ yãa kãsem-dãmbã, n togs yellã. Kãsem-dãmbã sã n fees yellã n mik t’a sɩd pa maan pʋ-toogo, a segd n kell n zĩnda soondg tẽngẽ wã n tãag maan-kʋʋdb kãsmã kũum. Tõe meng t’a na n paa be a yõor tɛka. No-kãnga ra sõngda Israyɛll nebã fãa tɩ b bãng tɩ b segd n nanda ninsaal vɩɩmã. Sẽn na yɩl n wilg tɩ b waoogda b Naandã, ra yaa tɩlɛ tɩ b gũus n da wa maan bũmb sẽn tõe n yãk b to yõor ye.
it-2 892
Zɩɩm
Wẽnnaam naana ninsaal sẽn na yɩl t’a vɩɩmde, tɩ ned sã n yãk a to yõor bɩ Wẽnnaam segd n sok a soabã. Wẽnnaam sẽn yeel a Kayẽ sẽn yɩ nin-kʋʋdã bũmb ningã wilgda rẽ: “Fo yao wã zɩɩm bee tẽn-gãongã zug n kelemdẽ tɩ tat maam.” (Sɩng. 4:9-11) Ned sã n kis a ba-biiga, n dat t’a ki, n kãnd-a wall a kõt kaset sẽn yaa ziri n na n dõd-a, tɩ rẽ tõe n tũ ne a yõore, a kɩtdame t’a ba-biigã zɩɩm taal be a zugu.—Maan. 19:16; Tõo. 19:18-21; 1 Zã 3:15.
D bʋgs Wẽnnaam Gomdã zug neere:
it-2 1106 s. a 1
Bʋ-kaoor zĩiga
Tẽng bʋ-kaoor zĩig ra bee a rignoorẽ wã. (Tõo. 16:18; 21:19; 22:15, 24; 25:7; Rut 4:1) B sẽn gomd “rignoor” yellã, yaa vɩʋʋg ning sẽn da be tẽngã pʋgẽ, rignoorã sɛɛgã yell la b gomda. Ra yaa rignoyẽ wã la b ra tigimd nin-buiidã n karemd Tõogã tɩ b kelgdẽ, la b moond koeese. (Nee. 8:1-3) B ra tõe n paama kaset rãmb nana-nana tẽngã rignoorẽ sẽn na yɩl n welg yell neb sʋka, wala makre, ned sã n da koos a pʋʋg bɩ a zĩiga. Bala daarã tõre, nebã fãa la bal ra tũuda be n yit la b kẽedẽ. Bʋ-kaoodbã sẽn da kaood bʋʋd rignoorẽ wã tɩ nebã getẽ wã, ra kɩtdame tɩ b maagd b yĩng n kaood bʋʋdã, la b modgdẽ tɩ sard ning b sẽn na n dɩkã yɩ tɩrga. Vẽenega, b ra yãka zĩig rignoorã sɛɛg n maneg tɩ bʋ-kaoodbã tõe n zĩnd be n kao bʋʋdo. (Zoob 29:7) A Sãmwɛll ra kẽngda Betɛll ne Gilgall la Mispa, “n kaood Israyɛll nebã bʋʋd zĩ-kãens fãa,” n paas Rama sẽn yaa tẽng ning a yirã sẽn da be wã.—1 Sãm. 7:16, 17.
SA-SIK RASEM A 2-8
D SẼN BÃNG BIIBLÃ KARENG PƲGẼ | TÕODO 22-23
“Tõogã sẽn wilg to-to tɩ rũmsã yell paka a Zeova”
it-1 867-868
Zɩɩbo
Pĩnd wẽndẽ wã, b ra tara rũms n zɩt zɩɩbo. Wẽnnaam ra yeela Israyɛll nebã tɩ b sã n yã ned sẽn kis bãmb bõang sẽn lʋɩ ne a zɩɩbo, b pa segd n bas-a n loog ye. B segd n ‘sika bõangã zɩɩbo.’ (Yik. 23:5) B ra boonda bũmb ning rũng sẽn tõe n zɩ wã tɩ zɩɩbo, wala makre, b gomda bõn-wees a yiib zɩɩb yelle.—2 Rĩm. 5:17.
it-1 635 s. a 2
Tõodo
Tõod sebrã pʋgẽ, Wẽnnaam kõo noy sẽn wilgd tɩ rũmsã tara yõodo. B ra gɩdgame tɩ Israyɛll ned ra yõk liuul sẽn põg a tʋkẽ ye. Bala yaa woto la a maand n kogend a kambã, tɩ kɩt t’a yõkr yaa nana. B ra segd n bas-a lame t’a looge, la b tõe n wʋka a kamba. Woto, a ra tõe n le wa loba gɛla. (Tõo. 22:6, 7) B ra gɩdga ka-koaadbã tɩ b ra naag bõang ne loalg n balg n ko, sẽn na yɩl n kogl bõangã pãng sẽn pa ta loalgã. (Tõo. 22:10) Loalg sã n da tʋmd zɛɛgẽ, b pa segd n ning a noorã yʋk ye. Yaa sẽn na yɩl t’a ra wa modgd n tʋmd ne kom tɩ rɩɩb yaool n be a taoor ye.—Tõo. 25:4.
w03 15/10 32 s. a 1-2
“Da bao-y lagem-n-taar sẽn pa zems ye”
YÃMB sã n ges desẽ wã, y pa ne tɩ yʋgemdã ne loalgã sẽn naag taab n koodã namsdame sɩda? Gollã b sẽn tall n balg-bã maana rũms a yiib sẽn zem taab tɩ b pãngã me zem taab yĩnga. Yaa rẽ n kɩt tɩ rũms a yiibã namsdẽ wã. Wẽnnaam sẽn pa rat tɩ rũmsã nams woto wã yĩnga, a yeela Israyɛll nebã yaa: “Da rɩk loalg ne bõang n balg n naag taab n ko ye.” (Tõodo 22:10) Yaa woto me ne loalg la yʋgemde.
Ka-koaad pa na n nams a rũms woto ne yamleoog ye. La a sã n pa tar lols a yiibu, a tõe balga rũms a yiib a sẽn tare. Wõnda yaa rẽ n kɩt tɩ ka-koaad ning sẽn be desẽ wã zugã maan woto wã. B sã n balg rũms a yiib bedrem la zɩslem sẽn yaa toor-toore, na n yɩɩ toog ne sẽn pa tar-a pãng wʋsgã t’a tõog t’a kẽnã tʋʋlem ta a to wã. Sẽn paase, zɩɩbã na n bee sẽn tar-a pãng wʋsgã zug n yɩɩda.
D bʋgs Wẽnnaam Gomdã zug neere:
it-1 629
Samde, Sam-soaba
Samd yaa f sẽn na n tar ned bũmbu, tɩ yaa tɩlɛ tɩ f yao wall f lebse. Pĩnd wẽndẽ wã, yaa Israyɛll ned sã n wa lʋɩ naong pʋgẽ la a reegd samde. Bala Israyɛll nebã ra getame tɩ b sã n deeg samde, pa zu-noog ye. Sɩd me, sẽn deeg-a samdã lebga bũmbã soab tʋm-tʋmda. (Yel. 22:7) Rẽ n so tɩ Wẽnnaam ra sagl a nin-buiidã tɩ b yɩ kõatba, la b pengd b saam-biis nins sẽn be naong pʋgẽ wã ne yamleoogo, n pa baood tɩ b yao n dogl yõod ye. (Yik. 22:25; Tõo. 15:7, 8; Yɩɩn. 37:26; 112:5) La b ra tõe n kɩtame tɩ sãan yao samd n dogl yõodo. (Tõo. 23:20) Zʋɩf-rãmbã bãngdb ra yetame tɩ no-kãngã yaa leebgã wɛɛngẽ, la tɩ pa sãamb nins sẽn dat sõngrã yĩng ye. Naoor wʋsgo, sãamb nins sẽn da be Israyɛllã yaa neb sẽn pa na n kaoos be ye. Wae n yaa lɛɛbdba, tɩ b tõe n tags tɩ nin-kãens tõe n yaoo samd n dogl yõodo, sẽn yɩɩd fãa, bãmb me sẽn pengd neb a taab n dogend yõodã yĩnga.
SA-SIK RASEM A 9-15
D SẼN BÃNG BIIBLÃ KARENG PƲGẼ | TÕODO 24-26
“Tõogã sẽn wilg to-to tɩ pagbã yell paka a Zeova”
it-1 874 s. a 4
Paga
Baa noy nins b sẽn da kõ tãb-biisã yãkrã wɛɛngẽ wã ra nafda pagbã ne b sɩdbã fãa, bala rao sẽn nan kẽ kãadem ra pa segd n kẽng zabre, tɩ pa ta yʋʋmd ye. Woto ra kɩtame tɩ b tõe n paam weer n dog biiga, tɩ sɩdã sã n wa loog zabr bɩ pagã sẽn tar biigã belsd-a, sẽn yɩɩd fãa, a sɩdã sã n ki zabrã pʋgẽ.—Tõo. 20:7; 24:5.
it-1 994 s. a 3
Yiisgu
Wẽnnaam sẽn da kõ noor yiisgã wɛɛngẽ tɩ nafd soolmã naong rãmbã, ra kɩtame tɩ nebã tõe n yɩ kõatba, neb sẽn pa tagsd b mens yell bala, la sẽn kɩs sɩd t’a Zeova na n ning-b-la barka. La ra yaa vẽeneg tɩ pa sẽn na yɩl tɩ naong rãmbã lebg kʋɩɩmb ye. Rẽ sõngda tõnd tɩ d wʋm a Davɩɩd sẽn yeel bũmb ningã võore. A yeelame: “Mam zɩ n yãnd tɩ b bas nin-tɩrga, wall a yageng t’a bõsd rɩɩb ye.” (Yɩɩn. 37:25) Naong rãmbã sẽn da tũud Tõogã sẽn yetã n yiisd koodã la b tʋmd wʋsgã, kom da pa namsd-b ye. Bãmb ne b kambã ra pa bõosd rɩɩb me ye.
w11 1/3 23
Yãmb ra miime bɩ?
Pĩnd wẽndẽ wã, Israyɛll rao sã n da ki n pa paam biiga, a ba-biig n da rɩkd pʋg-kõorã n maan a paga, sẽn na yɩl t’a rog kamb tɩ sẽn ki-a wã yʋʋr da menem buudã pʋg ye. (Sɩngre 38:8) Kaoosg zugẽ, b ninga minun-kãng a Moyiiz Tõogã pʋgẽ. (Tõodo 25:5, 6) A Boaaz sẽn maan bũmb ning tɩ b gomd rẽ yell Rut sebrã pʋgẽ wã wilgdame tɩ sẽn ki-a wã ba-biig sã n pa le beẽ, rao a to sẽn kĩ ne-a tõe n dɩka pʋg-kõorã.—Rut 1:3, 4; 2:19, 20; 4:1-6.
Kaset sẽn wilgd t’a Zeezi wakatẽ wã tɩ nebã ra ket n tũuda minun-kãngã, yaa bũmb ning Sadiseẽ-rãmbã sẽn yeel tɩ be Mark 12:20-22. A Flavius Josèphe sẽn yaa Zʋɩf-rãmbã kʋdemd yel-mit sẽn zĩnd pipi kiris-nebã wakatẽ wã yeelame tɩ minun-kãngã ra kɩtdame tɩ kiidã yʋʋr da menem ye. Sẽn paase, kɩtdame tɩ buudã rogem-pʋɩɩr pa tõe n lebg buud a to rẽnda, la sõngdẽ me tɩ pʋg-kõorã paam tɩ b ges a yelle. Wakat kãng tɩ pag ra pa tar sor n na n soog a sɩdã paoong ye. La a sɩdã ba-biig sã n dɩk-a n maan a pag t’a rog biiga, biigã tõe n sooga kiidã paoongo.
D bʋgs Wẽnnaam Gomdã zug neere:
it-1 657 s. a 5
Kãadem kaoobo
Basg sebre. Kaoosg zugẽ, b wa n kaooda kãadmã nana-nana, la rẽ pa segd n kɩt tɩ d tags t’a Moyiiz Tõogã ra kɩtame tɩ kãadem kaoob yaa nana ye. Rao sã n da rat n kao a kãadem, bũmb toor-toor la a ra segd n deng n maane. A ra segd n gʋlsa sebre. A segd n “gʋlsa basg sebr n kõ-a.” Raoã segd n ninga sebrã pagã nugẽ, la a yiis-a a zakẽ wã. (Tõo. 24:1) Baa ne Gʋls-sõamyã sẽn pa togs yɛlã sẽn da tog n yɩ to-to wã ball-ballã, wõnda b ra segd n kẽnga rap sẽn tar zu-sobend taoore, tɩ nin-kãens reng n mak n kɩt tɩ b le zems taaba. Sebrã gʋlsg la bũmb a taabã raoã sẽn segd n maan kãadmã kaoob wɛɛngẽ wã sẽn dɩkd sẽkã, tõe n kɩtame t’a tags n toeem yam. Rao ra segd n paama bũmb a sẽn na n tik n kao a kãadem. Sẽn paase, noy nins b sẽn gãneg kãadmã kaoob wɛɛngẽ wã ra yaa sẽn na n kɩt tɩ nebã ra yɩt tao-tao n kaood b kãadmã ye. Ra kɩtdame me tɩ pagbã paamd koglg b kãadmã pʋgẽ. Gʋls-sõamyã pa wilg bũmb ning b sẽn da gʋlsd basg sebrã pʋgẽ wã ye.
SA-SIK RASEM 16-22
D SẼN BÃNG BIIBLÃ KARENG PƲGẼ | TÕODO 27-28
“Ad bark nins fãa sẽn na n sig yãmb zugu”
Sak-y Rĩm ning vʋʋsem sõngã sẽn wilgd sorã n paam barka!
18 Sak Wẽnnaam koɛɛgã rat n yeelame tɩ d tũud sagls nins sẽn be a Gomdã pʋgẽ wã, la d tũud sɛb nins a sẽn kɩtd t’a tʋm-tʋmdã yiisdẽ wã saglsã me ne d sũur fãa. (Mat. 24:45) Rat n yeelame me tɩ d sakd Wẽnnaam ne a Biigã. Bala a Zezi yeela woto: ‘Ka neb nins fãa sẽn boond maam tɩ Zusoaba, Zusoaba! n na n kẽ saasẽ soolmẽ wã ye. Yaa ned ning sẽn maand mam Ba sẽn be saasẽ wã raabã bala.’ (Mat. 7:21) Sak Wẽnnaam leb n dat n yeelame tɩ f sak kãsem dãmbã b sẽn boond tɩ “kũun sẽn yaa nebã” sẽn lʋɩt tigingã taoorã.—Ef. 4:8, MN.
Yãmb na n paama a Zeova barka bɩ?
2 Hebre gom-biig ning b sẽn lebg tɩ “ket n kelgdẽ” (NW) sẽn be Tõodo 28:2 pʋgẽ wã wilgda bũmb sẽn maand wakat fãa. A Zeova nin-buiidã pa segd n kelg-a wakat-wakat bal ye. B ra segdame n ket n kelgd-a wakat fãa. Ra yaa ne woto maaneg bal la b ra na n paam Wẽnnaam barkã. Hebre gom-biig ning b sẽn lebg tɩ “paam[a]” yaa gom-biig sẽn tɩ loe ne tãoosgo, tɩ naoor wʋsgo a võorã yaa “paam” bɩ “ta.”
D baood a Zeova barkã ne d sũy fãa
4 Bõe la Israɛll nebã ra segd n maan tɩ wilg tɩ b yaa wẽn-sakdba? Wẽnnaam Tõogã ra wilgame tɩ b sã n da pa sak Wẽnnaam ‘ne sũ-noog la ne b sũyã fãa,’ a sũur ra pa na n yɩ noog ne-b ye. (Karm-y Tõod 28:45-47.) A Zeova sẽn segd ne sakr ningã pa sak noy sẽn yaa tɩlae tɩ d sak wa sẽn mi n yaa to-to ne rũmsã la zĩn-dãmbã ye. (Mark 1:27; Zak 3:3) Ned sã n sakd Wẽnnaam ne a sũurã fãa, yaa a sẽn nong-a wã yĩnga. Nin-kãng sũur nooma ne a sẽn sakd a Zeova wã, a sẽn kɩs sɩd t’a Zeova noyã pa zɩɩbã, la t’a “yaa neb nins sẽn baood bãmbã roandã” yĩnga.—Heb. 11:6; 1 Zã 5:3.
D bʋgs Wẽnnaam Gomdã zug neere:
it-1 364
Toadg bãnde
A Zeova noyã ra gɩdgame tɩ ned ra serg toadg bãnd ye. (Tõo. 19:14; ges-y Yel. 22:28 me.) Sɩd me, kãab-wẽng bee ne ned ning sẽn sersd “toadg ning sẽn be yẽnda ne a yak pʋʋg sʋkã bãnã.” (Tõo. 27:17) Sẽn mik tɩ pʋtã rãmb ra teega bũmb nins b sẽn paamd b pʋtẽ wã n vɩ wã, ned sã n da serg a to pʋʋg toadg bãnde, a boogda rɩɩb ning a to wã sẽn paamdã. Woto maaneg ne wagdem yaa a ye. Pĩnd wẽndẽ wã, b sɩd ra geta rẽ wa wagdem. (Zoob 24:2) La neb sẽn yaa zãmb dãmb n da maand woto. A Ooze wakatẽ wã, b maka Zida nanambsã ne neb sẽn sersd todse.—Ooze 5:10.
SA-SIK RASEM 23-29
D SẼN BÃNG BIIBLÃ KARENG PƲGẼ | TÕODO 29-30
“A Zeova raabã maaneg pa toog wʋsg ye”
w09 1/11 31 s. a 2
A Zeova kõo tõnd sor tɩ d tõe n yãk yam d toore
Yaa toog tɩ d bãng Wẽnnaam daabã sẽn yaa a soab la d tũ bɩ? A Moyiiz yeelame: “Tõ-kãngã mam sẽn kõt yãmb dũndã wã ka yɩɩd yãmb pãng ye, la a ka zãr ne yãmb ye.” (Vɛrse 11) A Zeova pa kot tɩ d maan bũmb d sẽn pa tõe ye. A sẽn dat tɩ d maan bũmb ninsã zemsame, n pa yɩɩd d pãng ye. Sẽn paase, d tõe n bãnga bõn-kãense. Pa tɩlɛ tɩ d rʋ saasẽ, wall d tog sor n kẽng “ko-kãsengã rʋʋnd” sẽn na yɩl n bãng Wẽnnaam sẽn dat tɩ d maan bũmb ninsã ye. (Vɛrse 12, 13) Biiblã wilgda tõnd d sẽn segd n vɩɩmd to-to wã vẽenega.—Miise 6:8.
w09 1/11 31 s. a 1
A Zeova kõo tõnd sor tɩ d tõe n yãk yam d toore
PAG a ye sẽn yaa kiris-ned yeelame: “Mam wae n yɛɛsda m na wa n maan bũmb n kɩɩs a Zeova.” Yaa a sẽn nams a yãadmẽ wã n kɩt t’a tagsd t’a pa tol n tõe n sak a Zeova kɛpɩ wã. Sɩd yaa woto bɩ? Tõnd yɛlã sẽn da yaa to-to wã pʋgda tõnd tɩ d pa tar d sẽn na n maan bɩ? Ayo. Wẽnnaam a Zeova kõo tõnd ned kam fãa sor t’a tõe n yãk yam a toore. Dẽnd tõnd ned kam fãa tõe n yãka a sẽn na n tees a vɩɩmã neng ninga. A Zeova ratame tɩ d yãk yam-sõngo. Biiblã sẽn yaa a Gomdã wilgda d sẽn tõe n maan dẽ to-to. D ges bũmb ning a Moyiiz sẽn yeel tɩ be Tõod sak 30 wã.
w09 1/11 31 s. a 4
A Zeova kõo tõnd sor tɩ d tõe n yãk yam d toore
Tõnd sẽn na n yãk yam n tees d vɩɩmã neng ningã paka a Zeova bɩ? N-ye! Wẽnnaam vẽnega a Moyiiz t’a yeele: “Yãk-y vɩɩmã.” (Vɛrse 19) La wãn to la d tõe n yãk vɩɩmã? A Moyiiz yeelame: “La y nong Sẽn-Ka-Saab sẽn yaa yãmb Wẽnnaamã, n sak bãmb koɛɛgã n loe y sũurã ne bãmba.” (Vɛrse 20) Tõnd sã n nong a Zeova, d na n tʋll n kelga a goamã la d sake, la d maand sɩd ne-a baa sẽn wa n yaa a soaba. D sã n maand woto, d yãka vɩɩmã. Yaa vɩɩm sẽn tar bark rũndã-rũndã, la sẽn na n kɩt tɩ d wa paam vɩɩm sẽn kõn sa Wẽnnaam dũni-paalgã sẽn watã pʋgẽ.—2 Pɩyɛɛr 3:11-13; 1 Zã 5:3.
D bʋgs Wẽnnaam Gomdã zug neere:
it-2 453 s. a 3
Tʋbre
A Zeova tũnuga ne a tʋm-tʋmdbã n gom ne Israyɛll nebã sẽn yaa tõatb la neb sũy sẽn diglmã, n yeel tɩ b yaa “tʋb-kɩd rãmba.” (Zer. 6:10; Tʋʋ. 7:51) Ra yaa wa bũmb n yẽd b tʋbã tɩ b pa wʋmdẽ ye. A Zeova ra pa yok b tʋbã ye. A Zeova n yaa soab ning sẽn kɩtd tɩ neb nins sẽn baood-a wã tʋb kelgd goam n wʋmd b võor la b sakdẽ, la sẽn kɩtd tɩ kɩɩsdbã tʋb lebgd kɩdã. (Tõo. 29:3; Rom. 11:8) Tʋm-tʋmd a Poll pĩnd n togsame tɩ wakat n wat tɩ neb sẽn yet tɩ b yaa kiris-neb na n kɩɩs tẽeb hakɩɩkã, n pa rat n kelg sɩdã sẽn be Wẽnnaam Gomdã pʋgẽ wã ye. B na n datame tɩ b “salemd b tʋbã” ne goam sẽn noom bãmba, tɩ kɩt tɩ b kelgd zirẽ-be-karen-saam-dãmba. (2 Tɩm. 4:3, 4; 1 Tɩm. 4:1) Sẽn paase, ned sã n wʋm kibar sẽn yaa lingri, sẽn yɩɩd fãa yel-beed kibare, a tʋbã tõe n “wãgame.”—1 Sãm. 3:11; 2 Rĩm. 21:12; Zer. 19:3.
SA-SIK RASEM 30–BÕN-BƖƲƲNG RASEM A 5
D SẼN BÃNG BIIBLÃ KARENG PƲGẼ | TÕODO 31-32
“Makr toor-toor sẽn be yɩɩll pʋgẽ tɩ d tõe n dɩk yam”
“Kɩt-y tɩ mam zoe yãmb yʋʋrã ne m sũur fãa”
8 Sẽn wa n ket bilf tɩ Israyɛll nebã kẽ kãabg tẽngẽ wã, a Zeova zãmsa a Moyiiz yɩɩlle. (Tõo. 31:19) A Moyiiz me ra segd n dɩka yɩɩllã n zãms nin-buiidã. (Karm-y Tõod 32:2, 3.) D sã n bʋgs vɛrse a 2 ne a 3 zugu, d nee vẽeneg t’a Zeova pa rat tɩ b solg a yʋʋrã, wall b pʋd n kɩt tɩ yaa wa a yʋʋrã boolg kisame ye. A pʋd n datame tɩ nebã fãa bãng a yʋʋrã. Ad Israyɛll nebã sẽn paam t’a Moyiiz zãms-b bũmb wʋsg a Zeova la a yʋʋrã sẽn tar ziirã zugã, sɩd yɩɩ zu-zẽkr meng-menga! A Moyiiz sẽn zãms-b bũmb ningã paasa b tẽebã pãng la keng b raoodo, wa sa-koom sẽn manegd tɩɩs to-to wã. Wãn to la tõnd me tõe n maan tɩ d sẽn zãmsd nebã to-to wã naf-b woto?
9 D sã n wa moond koɛɛgã zak-zak wall zãma sʋka, d tõe n talla Biiblã n wilg nebã Wẽnnaam yʋ-peellã sẽn yaa Zeova wã. D tõe n kãab-b-la sɛba, la d wilg-b video-rãmb la bũmb a taab sẽn be tõnd sɩtã pʋgẽ, n gomd a Zeova yelle. D tʋʋmã zĩigẽ bɩ lekollẽ wã, wall d sã n wa togd sore, d tõe n paama segb n gom d Wẽnnaamã d sẽn nongã yelle, n wilg a sẽn sɩd yaa a soaba. D tõe n wilg-b-la bõn-sõma nins a Zeova sẽn na n maan n kõ ãdem-biisã. Rẽ tõe n sõng-b lame tɩ b bãng t’a Zeova sɩd nonga ninsaalbã wʋsgo. D sã n sõngd nebã tɩ b bãngd sɩdã d Ba wã zugu, kɩtdame t’a yʋʋrã paamd waoogr n paasdẽ. D sõngda nebã tɩ b bãng tɩ b zãms-b-la ziri wʋsg Wẽnnaam zugu. Bũmb pa be d sẽn tõe zãms nebã tɩ naf-ba, la keng b raood n ta bũmb nins sẽn be Biiblã pʋgẽ wã ye.—Eza. 65:13, 14.
w09 1/5 14 s. a 4
Yãmb wʋmda makr toor-toorã sẽn be Biiblã pʋgẽ wã võor bɩ?
Biiblã mi n maka a Zeova ne bũmb toor-toor sẽn pa vɩ me. B boola a Zeova tɩ “Israyɛll pĩig kugrã,” tɩ “pĩiga,” la “pãng zĩiga.” (2 Sãmwɛll 23:3; Yɩɩn-sõamyã 18:3; Tõodo 32:4) Bõe yĩng tɩ b yet woto? Yaa tɩ Wẽnnaam a Zeova tõe n yɩɩ soondg zĩig meng-meng yãmb yĩnga, wa kug-bedr sẽn dɩg a zĩigẽ tɩ baa fʋɩ pa tõe n yẽrg-a wã.
Rɩk-y a Zeova togs-n-taar y kambã wubr pʋgẽ
7 Ges-y nonglem ning a Zeova sẽn tall ne Israɛll nebã. A Moiiz tũnuga ne makr sẽn be rasãnd n bilg a Zeova nonglmã ne Israɛll buudã sẽn da yaa bu-paalgã. D karemda woto: “Zusoaba maana bãmb wa sɩl-kẽeng sẽn nekd a kamb a tʋkẽ n zãmsd bãmb yɩgbo n yaool n tẽeg a pɩgs n kokd bãmb tɩ b zao a pɩgsa zutu. Yaa Zusoaba bal n tall bãmba, Wẽnnaam a to ka zĩnd ne [a Zakoob] ye.” (Tõodo 32:9, 11, 12) Sẽn na yɩl n zãms a kambã yɩgbo, sɩl-kẽeng ‘nekda a kamb a tʋkẽ,’ n fibd a pɩgsã sẽn na yɩl t’a kambã yɩge. Liuun-bil sã n wa baas n yi tʋka pʋgẽ, sẽn nong n be pĩig sẽn zãnt zugã, a ma wã ‘tẽegda a pɩgsã’ n kok a biigã. Sã n wẽnd a biigã na n wẽe tẽnga, a ma wã ‘kokd-a-la a pɩgsa zutu.’ A Zeova gesa Israɛll sẽn yaa bu-paalgã yell woto ne nonglem. A kõo a nin-buiidã a Moiiz Tõogã. (Yɩɩl Sõamyã 78:5-7) Rẽ, Wẽnnaam gesa buudã yell neere, n sak n fãag-ba, b sã n da be zu-loees pʋgẽ.
D bʋgs Wẽnnaam Gomdã zug neere:
Tõod sebrã tags-kãsemse
31:12. Tigingã tigissẽ, kom-bɩɩsã segd n zĩi ne kãsembã n modgd n kelgd n paamd zãmsgo.