A Zeova, tõnd vɩɩmã sẽn yit a soab nengẽ wã yiisa noor n yeel tɩ d pa segd n dɩ zɩɩm ye. (Sɩngre 9:3, 4) Tõog ning b sẽn kõ pĩnd wẽndẽ Israɛllã pʋgẽ, Wẽnnaam yãka koak ne zɩɩmã rɩk-n-tʋme, bala a makda vɩɩmã. A kõo noor woto: “Yĩng vɩɩm bee zɩɩm pʋgẽ. La mam kõo yãmb zɩɩm kãnga tẽng-kugra zug tɩ y maan paasg y vɩɩma yĩnga.” Yaa wãn to, ned sã n kʋ rũng n na n wãbe? Wẽnnaam yeelame: “Bɩ a raag a zɩɩm n bus ne tom.”a (Maankʋʋre 17:11, 13) A Zeova togsa no-kãngã n yɩlem naoor ka tɛka. (Tõodo 12:16, 24; 15:23) Zʋɩf rãmbã Soncino Chumash yetame: “B pa segd n bĩng zɩɩm ye, la b na n kɩtame tɩ b ye pa tõe n dɩ-a, n daag-a tẽnga.” Israɛll ned ba a yembr da pa segd n talle, n bĩngi, bɩ a rɩk bõn-naandg a to zɩɩm n tʋm ye. Bõn-naandg vɩɩm yaa Wẽnnaam n so.

Logtor tõe n wa sagla bãad t’a bĩng a meng zɩɩm semen dãmb sẽn deng wopeerã (f meng zɩɩm kũun sẽn deng f wopeerã) sẽn na yɩl tɩ raab sã n wa zĩndi, bɩ a tõog n dɩk bãada meng zɩɩm n wẽneg n ning-a. La zɩɩmã tigisgu, a bĩngr la a ningr woto kɩɩsda bũmb ning b sẽn yeel Maankʋʋre la Tõod sebrẽ wã vẽenega. B pa segd n bĩng zɩɩm ye. B segd n daag-a lame: n lebs-a Wẽnnaam sã n yaa ne makr wɛɛngẽ. Yaa sɩd tɩ d ye pa tũud a Moiiz Tõogã ye. Baasg zãnga, a Zeova Kaset rãmbã waoogda noy nins Wẽnnaam sẽn ning pʋgẽ be wã, la b rɩka sard kãn-kãe n na n ‘lak b mens ne zɩɩm.’ Woto yĩnga, d pa kõt d zɩɩm ye. La d pa bĩngd d zɩɩmã b sẽn segd n ‘daagã,’ n wa rɩk-a n ning d yĩngã pʋgẽ ye. Minung kãngã kɩɩsda Wẽnnaam tõogã.