“Ning koom koglg mogr sobg sẽn gudg pʋgẽ”

YÃMB kõn gesẽ manesem sẽn yaa yell a woto wa bũmb sẽn pa zemse, yalemd la bũmb sẽn tõe n yɩ yell meng-meng sɩda? Baasg zãnga neb kẽer teegda b mens yel-kãngã buud pʋgẽ, sã n yaa ne makr wɛɛngẽ. Wãn to? Yʋʋm kob-gĩn 17 soab gʋlsd sẽn yit Ãngeletɛɛre, a Thomas Fuller yeelame: “Ra maan-y baa fʋɩ sũ-yikr kãseng pʋgẽ ye. Rẽ yaa wa f sẽn na n ning koom koglg mogr sobg sẽn gudg pʋgẽ.”

Kell n kẽng taoor ne manesem sũ-yikr sẽn ka koak pʋgẽ biisã tõe n yɩɩ wẽns wʋsgo. Rẽ yaa vẽeneg ne yell b sẽn togs Biiblã pʋgẽ. A Simeõ la a Levi sẽn yaa tẽn-kʋdem wẽndẽ zak soab a Zakoob kom-dibli wã talla sũ-yikr manesem, b sẽn yõg b tão a Dina wã, n tall sũ-dokr manesem sẽn lagem ne sũ-yikr kãseng wʋsgo. Rẽ kɩtame tɩ neb wʋsg kʋʋb la zaeeb wʋsg zĩndi. Pa lingr la a Zakoob sẽn ning b tʋʋm-wẽngã taal n yeel woto wã ye: “Yãmb baoo yell n kõ maam tɩ Kana neba ne Ferɛs neba na n wa kisg maam.”—Sɩngre 34:25-30.

Ne yam, Wẽnnaam Gomdã sẽn yaa Biiblã sagendame tɩ d tall manesem sẽn yaa lebend ne woto. A yetame: “Da kãbg f sũur ye, yõ wã wata ne wẽng maaneg bala.” (Yɩɩl Sõamyã 37:8) Sagl-kãngã tũub tõe n gɩdga yel-wẽn-kãsemse.—Koɛɛg Soaba 10:4; ges-y Yelbũna 22:24, 25 me.