Biiblã pʋgẽ, b yeelame tɩ ninsaal “vɩɩm yaa koɛɛg n pid ne yɩɩre.” (Zoob 14:1) Yaa woto la Wẽnnaam sɩd rat tɩ d vɩɩmã yɩ bɩ? Sã n pa woto, a ratame tɩ d vɩɩmã yɩ wãn-wãna? Wakat n wat t’a sẽn dat bũmb ningã na n pids bɩ? D ges b sẽn leokd sogs-kãensã to-to Biiblã pʋgẽ tɩ kengd raoodo.

1. A Zeova ratame tɩ d vɩɩmã yɩ wãn-wãna?

A Zeova ratame tɩ d vɩɩmã yɩ noogo. A sẽn wa n naan a Ãdem ne a Awa wã, a ning-b-la zĩig sẽn yaa neer wʋsgo, rat n yeel tɩ Edɛn zẽedã zĩigẽ. Rẽ poore, “Wẽnnaam ning-b-la barka n yeel-ba: ‘Rog-y kamb n fɩɩg n pid dũniyã, la y soog-a.’” (Sɩngre 1:28) A Zeova ra ratame tɩ b rog kamba, n kɩt tɩ dũniyã gill lebg arzãna, la b ges rũmsã yelle. A ra ratame tɩ ninsaalbã fãa tall keelem sõma, la b vɩɩmd wakat sẽn kõn sa.

Rũndã-rũndã, vɩɩmã pa woto ye.a La Wẽnnaam daabã pa toeem ye. (Ezayi 46:10, 11) A ket n datame tɩ neb nins sẽn sakd-a wã vɩɩmd wakat sẽn kõn sa, tɩ yɛlã fãa yaa sõma.—Karm-y Vẽnegr 21:3, 4.

2. Bõe la d tõe n maan n paam vɩɩm sẽn tar bark rũndã-rũndã menga?

A Zeova naana tõnd tɩ d tʋll t’a wilgd-d sore. Rẽ n so tɩ d segd n bao n bãng-a, la d tũ-a. (Karm-y Matiye 5:3-6.) A ratame tɩ d paam zood sõma ne-a, ‘n tũ a soayã, la d nong-a,’ la d sak-a ‘ne d sũyã fãa.’ (Tõodo 10:12; Yɩɩn-sõamyã 25:14) D sã n maand woto, d na n paama sũ-noog hakɩɩka, baa d sẽn segd zu-loeesã. D sã n tũud a Zeova, d neeme tɩ d vɩɩmã sɩd tara barka, bala d sẽn vɩ to-to wã zemsa ne a raabã.

3. A Zeova ratame tɩ ninsaalbã vɩɩm yɩ noogo

Ges-y VIDEO wã, tɩ rẽ poor bɩ y leok sokrã.

VIDEO: Bõe yĩng tɩ Wẽnnaam naan tẽngã?—B sẽn kʋrge (1:41)

• Bõe yĩng tɩ Wẽnnaam naan tẽngã sẽn be rasãndã?

Karm-y Koɛɛg soab 3:11, tɩ rẽ poor bɩ y leok sokrã:

• Sã n yaa ne vɛrse-kãngã, a Zeova ratame tɩ d vɩɩmã yɩ wãna?

4. A Zeova raabã pa toeem ye

Karm-y Yɩɩn-sõamyã 37:11, 29 la Ezayi 55:11, tɩ rẽ poor bɩ y leok sokrã:

• Bõe n kɩt tɩ d miẽ t’a Zeova raabã pa toeeme?

5. D sã n tũud a Zeova, d vɩɩmã tara barka

VIDEO: Mam bãnga Wẽnnaam sẽn dat tɩ d vɩɩmã yɩ to-to wã (5:03)

• A Terumi sẽn bãng Wẽnnaam sẽn dat tɩ d vɩɩmã yɩ to-to wã, wãn to la naf-a?

Karm-y Koɛɛg soab 12:13, tɩ rẽ poor bɩ y leok sokrã:

• A Zeova sẽn maan bũmb wʋsg woto fãa n kõ tõndã, wãn to la d tõe n wilg tɩ d sũur nooma ne-a?

KƲMSGO

A Zeova ratame tɩ d vɩɩmd tẽngã zug wakat fãa yĩnga, tɩ d bũmba fãa yaa sõma. D sã n tũud-a ne d sũur fãa, d vɩɩmã na n talla barka, baa rũndã-rũndã menga.

Lebg-n-gese

• Sɩngrẽ wã, a Zeova ra ratame t’a Ãdem ne a Awa vɩɩmã yɩ wãn to?

• Bõe n kɩt tɩ d miẽ tɩ Wẽnnaam sẽn dat tɩ ninsaalbã vɩɩmã yɩ to-to wã pa toeeme?

• Bõe la y tõe n maan n paam vɩɩm sẽn sɩd tar barka?

BŨMB A TAABA

Bũmb toor-toor sẽn wilgd tɩ Edɛn zẽedã zĩig sɩd zĩndame.

“Edɛn zẽedã zĩig sɩd zĩndame bɩ?” (Yʋʋmd 2011 wao-fugdg kiuug pipi daar Gũusg Gasgã)

Bõe yĩng tɩ d tõe n kɩs sɩd tɩ tẽngã na n paa wakat sẽn kõn sa yĩnga?

“Tẽngã na n wa sãamame bɩ?” (Bee jw.org)

Biiblã pʋgẽ, bõe la b yet vɩɩmã võor wɛɛngẽ?

“Vɩɩmã võor yaa bõe?” (Bee jw.org)

Rao a ye kibare. A ra tagsdame t’a tara bũmb fãa, n wa bãng tɩ bũmb n paoog-a.

Masã, mam vɩɩmã tara barka (3:55)

2. Ãnd dãmb n naag a Zeezi n dɩt naamã?

A Zeezi pa rɩt naamã a yembr ye. Biiblã pʋgẽ, b yeelame tɩ “neb sẽn yit buud toɛy-toɛy pʋsẽ, neb sẽn gomd buud-goam toɛy-toɛya, la neb sẽn yit tẽns toɛy-toɛy pʋsẽ . . . segd n dɩɩ naam tẽngã zugu.” (Vẽnegre 5:9, 10) Neb a wãn n na n naag Kiristã n dɩ naamã? A Zeezi sẽn wa tẽngã zugã tɛka, neb milyõ-rãmb n lebg a karen-biisi. Yaa b fãa n na n naag-a n dɩ naam bɩ? Ayo. Yaa neb 144 000 bal n na n kẽng saasẽ n tɩ naag-a n dɩ naam. (Karm-y Vẽnegr 14:1-4.) Kiris-neb a taabã fãa sẽn be tẽngã zugã na n yɩɩ Rĩungã poorẽ dãmba.​—Yɩɩn-sõamyã 37:29.

Wẽnnaam Rĩungã rĩm zoe n dɩta naam. Ka la bilfu, a na n toeema bũmb wʋsg tẽngã zugu. Bɩ d gom bõn-sõma kẽer Rĩungã sẽn na n wa maan yelle.

1. Bõe la Wẽnnaam Rĩungã na n maan tɩ laafɩ la tɩrlem zĩnd tẽngã zugu?

A Zeezi sẽn yaa Wẽnnaam Rĩungã rĩmã na n sãama nin-wẽnsã la goosneema-rãmba, Armagedõ zabrã sasa. (Vẽnegre 16:14, 16) Ad bũmb b sẽn pʋlem Biiblã pʋgẽ tɩ na n pids zãng wakat kãnga: “Keta bilf bala, tɩ nin-wẽng ka leb n zĩnd ye.” (Yɩɩn-sõamyã 37:10) Ne Rĩungã maasem, a Zeezi na n kɩtame tɩ laafɩ la tɩrlem zĩnd tẽngã gill zugu.​—Karm-y Ezayi 11:4.

2. Wẽnnaam raabã sã n wa maand tẽngã zugu, vɩɩmã na n yɩɩ wãn-wãna?

Wẽnnaam Rĩungã rĩm naam sasa, “nin-tɩrsã n na n soog tẽngã, la b na n paa beenẽ wakat sẽn kõn sa.” (Yɩɩn-sõamyã 37:29) Mams-y y yamẽ y sẽn na n vɩ dũni pʋgẽ, tɩ nebã fãa maand sẽn yaa tɩrga, n nong a Zeova la b nong taaba! Ned baa a ye pa na n lʋɩ bãag ye. Nebã fãa na n vɩɩmda wakat sẽn kõn sa.

3. Bõe la Wẽnnaam Rĩungã na n maan nin-wẽnsã sãoong poore?

Nin-wẽnsã sãoong poore, a Zeezi sẽn yaa rĩmã na n dɩɩ naam yʋʋm 1000. Sasa kãnga, a Zeezi ne neb 144 000 sẽn yaa a na-rɩt-n-taasã na n sõnga ninsaalbã sẽn be tẽngã zugã tɩ b lebg neb sẽn zems zãnga, la sẽn pa maand yel-wẽna. Yʋʋm 1 000 saabẽ, tẽngã gill na n lebga arzãna. Nebã fãa na n tara sũ-noogo, b sẽn tũud a Zeova noyã yĩnga. Rẽ poore, a Zeezi na n lebsa a Ba a Zeova naamã. Rẽ, a Zeova yʋʋrã na n paama waoogr n yɩɩd pĩnda. (Matiye 6:9, 10) Na n yɩɩ vẽeneg t’a Zeova yaa na-sõng sẽn get a nin-buiidã yell neere. Rẽ poore, a Zeova na n sãama a Sʋɩtãan ne zĩn-dãmbã, la neb nins fãa sẽn yãk yam n kɩɩsd a naamã. (Vẽnegre 20:7-10) Wẽnnaam Rĩungã sẽn na n wa ne bõn-sõma ninsã na n kaoosa wakat sẽn kõn sa.

D BAO N BÃNG N PAASE

4. Wẽnnaam Rĩungã na n sãama ninsaalbã goosneema-rãmbã

“Ninsaal tõe a to n maand-a wẽnga.” (Koɛɛg soaba 8:9) Ne a Rĩungã maasem, a Zeova na n kɩtame tɩ zãmbã la wẽgbã sa.

Karm-y Dãniyɛll 2:44 la 2 Tesalonik rãmb 1:6-8, tɩ rẽ poor bɩ y leok sogsgã:

• Bõe la a Zeova ne a Bi-ribl a Zeezi na n wa maan ninsaalbã goosneema-rãmbã, la neb nins sẽn teend-ba?

• Wãn to la bũmb nins y sẽn bãng a Zeova ne a Zeezi zugã kɩt tɩ y maneg n kɩs sɩd tɩ b sẽn na n maanã yaa tɩrga, la zemse?

5. A Zeezi yaa rĩm sẽn ka to

A Zeezi sẽn yaa Wẽnnaam Rĩungã rĩmã, a na n maana bũmb wʋsg sẽn na n naf Rĩungã poorẽ dãmbã sẽn be tẽngã zugã. Ges-y VIDEO wã, tɩ y na n bãnga a Zeezi sẽn zoe n wilg to-to t’a ratame n sõng ninsaalbã, la tɩ Wẽnnaam kõ-a-la tõog t’a tõe n maan rẽ.

VIDEO: A Zeezi wilga Wẽnnaam Rĩungã sẽn na n wa maane (1:13)

Bũmb nins a Zeezi sẽn maan a sẽn wa n be tẽngã zugã wilgda Rĩungã sẽn na n wa maanã. Bõn-sõma nins b sẽn sõdg tẽngrã sʋka, bʋs la yãmb gũud n tɩ yɩɩda? Karm-y vɛrse nins b sẽn sõdgã, sẽn na yɩl n bãng n paase.

6. Wẽnnaam Rĩungã na n kɩtame tɩ d beoog vɩɩmã yɩ neere

VIDEO: D beoog vɩɩmã sẽn na n yɩ noog to-to wã reng-n-lɛmbga (4:38)

Karm-y Yɩɩn-sõamyã 145:16, tɩ rẽ poor bɩ y leok sokrã:

• Yãmb sẽn mi t’a Zeova na n gesame ‘tɩ sẽn vɩ-bã fãa paamd b sẽn dat tɩ sekã,’ y tagsg yaa wãna?

KƲMSGO

Wẽnnaam Rĩungã na n pidsa bũmb nins Wẽnnaam sẽn dat t’a maanã. A na n kɩtame tɩ tẽngã gill lebg arzãna, n pid ne nin-sõma sẽn na n waoog a Zeova wakat sẽn kõn sa yĩnga.

Lebg-n-gese

• Wãn to la Wẽnnaam Rĩungã na n kɩt t’a Zeova yʋʋrã paam waoogre?

• Bõe yĩng tɩ d tõe n kɩs sɩd tɩ Wẽnnaam Rĩungã na n pidsa bũmb nins fãa b sẽn pʋlem Biiblã pʋgẽ wã?

• Bõn-sõma nins Rĩungã sẽn na n wa maanã sʋka, bʋg la yãmb gũud n tɩ yɩɩda?

BŨMB A TAABA

Armagedõ rat n yeelame tɩ bõe?

“Armagedõ zabrã yaa bõe?” (Bee jw.org)

Bũmb nins sẽn na n maan a Zeezi naamã sẽn na n kaoos yʋʋm tusrã sasa, la rẽ poore.

“Bõe n na n maan bʋ-kaoorã daare?” (Yʋʋmd 2012 bõn-bɩʋʋng kiuug pipi daar Gũusg Gasgã)

Zak rãmb sẽn tõe n naag taab n bʋgs bõn-sõma nins Rĩungã sẽn na n wa ne wã zug to-to.

Tags arzãnã yelle (1:50)

Rao a ye sẽn da kẽesd a meng politikã yɛlẽ kibare. A togsda a sẽn paam a sogsg kẽer leoor to-to. A kibarã gom-zug yaa: “Sogsg wʋsg n da namsd maam.”

“Biiblã toeemda neba” (Yʋʋmd 2012 yʋʋm-vẽkr kiuug pipi daar Gũusg Gasgã)