“Sui-y mam nintãma y ko-waoog pʋgẽ”

12. Wãn to la d mi t’a Zeova mii tood nins sẽn namsd a nin-buiidã sõma?

¹² A Zeova pa mi a sõgen dãmbã yembr-yembr bal ye, a leb n mii tood nins sẽn namsd bãmb ned kam fãa wã. Wala makre, Israɛll nebã sẽn da wa n namsd yembdã pʋgẽ wã, a Zeova yeela a Moiizi: “Mam yãa m neba sẽn be Ezipta namsgo. La mam wʋma bãmb kelemse tʋʋm soaadba sẽn namsd bãmbã. N-ye, mam mii bãmb toogã.” (Yikri 3:7) Ad sɩd yaa bũmb sẽn kõt-d belsgo, d sẽn mi tɩ d sã n wa be makr pʋgẽ, a Zeova nee bũmb ning sẽn maandã, la a wʋmda tõnd kelemsã! Sɩd-sɩda, a pa maand a toog kae ne tõnd namsgã ye.

13. Bõe n wilgd t’a Zeova sɩd zoeta a sõgen dãmbã nimbãanega?

¹³ D leb n nee a Zeova sẽn get neb nins sẽn tar zood ne yẽ wã yelle, d sã n ges a sẽn tall nimbãan-zoeer ning ne Israɛll nebã. Baa ne sẽn da yaa bãmb mens tõdgrã n da kɩtd tɩ b namsd naoor wʋsgã, a Ezai gʋlsa woto a Zeova wɛɛngẽ: “B toogã fãa sasa, yɩɩ sũ-sãang ne-a.” (Ezai 63:9, NW) Y sã n yaa a Zeova sõgen sẽn sakd-a, y tõe n kɩsa sɩd tɩ bũmb sã n sãamd y sũuri, sãamda a Zeova me sũuri. Rẽ pa tusd yãmb tɩ y zab ne yɛlã n da zoe rabeem la y ket n maand y sẽn tõe fãa sẽn na yɩl n maan a Zeova raabã sɩda?—1 Pɩɛɛr 5:6, 7.

14. Yaa yel-bʋs pʋsẽ la b gʋls Yɩɩl Sõamyã 56 soabã?

¹⁴ Rĩm a Davɩɩd sẽn da kɩs sɩd t’a Zeova ra geta a yell la t’a ra zoeta a nimbãanegã yaa vẽeneg Yɩɩl Sõamyã 56 soabã pʋgẽ. Yaa a Davɩɩd n gʋls yɩɩn-kãngã a sẽn da wa n zoet n baood a yõor rĩm a Sayull sẽn da baood-a n dat n kʋ wã sasa. A Davɩɩd zoe n kẽnga Gate, la Filisti nebã sẽn wa n bãng-a wã, a ra yaeesda b na n wa yõk-a. A gʋlsame: “Mam gũusdba baooda mam n na n tab daar fãa; tɩ bõe, wʋsg zẽkda b mens ne maam n zabd ne maam.” A Davɩɩd sẽn da be yell pʋgẽ wã yĩnga, a baoa a Zeova sõngre. A yeelame: “Daar fãa bãmb wẽnemdeda mam goama. Bãmb ka tar tagsg ne maam tɩ sã n ka wẽng ye.”—Yɩɩl Sõamyã 56:3, 6.

15. a) A Davɩɩd da rat n yeelame tɩ bõe, a sẽn kos a Zeova t’a ning a nintãmã ko-waoogẽ bɩ t’a gʋls-a sebr zugã? b) Tõnd sã n segd yell sẽn yaa makr n kõ tõnd tẽebã, d tõe n kɩsa sɩd ne bõe?

¹⁵ Yɩɩl Sõamyã 56:9 pʋgẽ, a Davɩɩd leb n togsa gom-kãensã sẽn be rasãndã: “Yãmb geelgda mam gõodem. Sui-y mam nintãma y ko-waoog pʋgẽ. Bãmb ka be yãmb sebr pʋgẽ sɩda?” Ad bilg-kãngã sɩd wilgdame t’a Zeova geta d yell ne nonglem wʋsgo! D sã n wa be yɩɩr pʋgẽ, d tõe n kelmame n kos a Zeova sõngr ne nintãm. Baa ne a Zezi sẽn da yaa ninsaal sẽn zems zãngã, a maana woto. (Hebre dãmba 5:7) A Davɩɩd da kɩsa sɩd t’a Zeova ra get-a lame, la t’a ra na n wa tẽega a toogã yelle, tɩ yaa wala a ra bĩngda a nintãmã ko-waoog pʋgẽ bɩ t’a ra gʋlsd-a-la sebr pʋgẽ.d Tõe tɩ y tagsdame tɩ y nintãmã yaa wʋsg ko-wao-kãng pʋgẽ bɩ tɩ y nintãmã gʋlsa seb-nens wʋsg zut seb-kãng pʋgẽ. Sã n yaa woto, y tõe n paama belsgo. Biiblã kõta tõnd bas-m-yam woto: “Zusoaba pẽnegda neb nins sũy sẽn sãamã, la bãmb fãagda sũ-pa-noom dãmbã.”—Yɩɩl Sõamyã 34:19.