Kiris-nebã vɩɩm la b tʋʋma tigissã na-kẽndr not-rãmbã
SIG-NOY RASEM A 3-9
D SẼN BÃNG BIIBLÃ KARENG PƲGẼ | SÕDBO 27-29
“D rɩk a Zeova togs-n-taare, n da bakd nebã ye”
Yãmb mi a Zeova zʋg-sõma wã fãa bɩ?
14 B kẽnga a Moyiiz nengẽ n tɩ kos sõngre. B yeela woto: “Yaa bõe tɩ d ba wã yʋʋr na n menem a buudã sʋka, b sẽn ka paam bi-riblã yĩnga? Bɩ y kõ tõnd zĩig d ba wã ba-biisã sʋka.” A Moyiiz pa yeel tɩ tõogã sẽn wilg bũmb ningã bal n be ye. A “rɩka yellã n kẽng Zu-soabã nengẽ.” (Sõd. 27:2-5) A Zeova sẽn kelg yellã poore, a yeela a Moyiiz woto: “A Zelofehaad kom-pugli wã tara bʋʋm. Bɩ f kõ bãmb zĩig b ba wã ba-biisã sʋk tɩ b sooge. Bɩ f rɩk zĩig ning b ba wã sẽn da na n paamã n kõ bãmba.” La pa rẽ bal ye. A Zeova kõo noor a to n yeel woto: “Ned sã n ki n ka paam bi-ribla, bɩ b rɩk a zĩigã n kõ a bi-pugla.” (Sõd. 27:6-8; Zoz. 17:1-6) Rẽ tɛka, Israyɛll ned sã n ki n pa paam bi-ribla, b rɩkda a rogem-pʋɩɩrã n kõ a bi-pugla.
Yãmb mi a Zeova zʋg-sõma wã fãa bɩ?
15 A Zeova sẽn welg yellã to-to wã wilgdame t’a sɩd pa bakd ned n sõng ye. A Zelofehaad kom-pugli wã ra pa tar ned sẽn na n sõng-b ye. La a Zeova welga b zu-loɛɛgã wa a sẽn da mi n welgd Israyɛll neb a taabã zu-loeesã. A sẽn maan woto wã, a waoog-b lame. (Yɩɩl 68:6) Kibay a taab bee Biiblã pʋgẽ n wilgdẽ t’a Zeova pa tũusd neb ye.—1 Sãm. 16:1-13; Tʋʋ. 10:30-35, 44-48.
Yãmb mi a Zeova zʋg-sõma wã fãa bɩ?
16 Wãn to la d tõe n dɩk a Zeova togs-n-taare, n pa bakd ned n sõngdẽ? Tẽeg-y tɩ y sã n dat n maand nebã buud fãa neere, y segd n deng n kɩsa sɩd tɩ ned buud fãa segda ne rẽ. Tõe tɩ y tagsdame tɩ y pa tũusd neb ye. La tẽeg-y tɩ moos maana b kibar tɩ “baag pa wʋmd a zugẽ yũug ye.” Woto wã, wãn to la y tõe n bãng y sã n sɩd pa tũusd neba? Y tõe n maana wa a Zeezi. Daar a ye, a sẽn wa n dat n bãng nebã sẽn yet bũmb ning yẽ zugã, a soka a zo-rãmbã woto: “Nebã yetame tɩ mam sẽn yaa Ninsaal Biigã yaa ãnda?” (Mat. 16:13, 14) Yãmb me tõe n baoa y zoa y sẽn mi t’a na n pelga a pʋg ne-yã, n sok woto: ‘Fo tagsdame tɩ mam maanda neb buud fãa neer bɩ, bɩ m bakda nebã n sõngdẽ?’ Tõe t’a yeel tɩ wakat ninga, y mi n tara manesem tɩ yaa wa y geta ned yĩng kõbgo, a tarem wall a sẽn karem n tek zĩig ningã. A sã n yeel-y woto, bõe la y segd n maane? Pʋʋs-y-yã a Zeova, n kos-a t’a sõng-y tɩ y toeeme, n tõog n maneg n dɩk a togs-n-taare.—Mat. 7:7; Kol. 3:10, 11.
D bʋgs Wẽnnaam Gomdã zug neere:
it-2 850 s. a 1
Maando
Divẽ b sẽn kiigd maoong zugu. B sã n da na n maan maoongo, b ra wae n paasda divẽ, sẽn yɩɩd fãa, Israyɛll nebã sẽn kẽ kãabg tẽngẽ wã poore. (Sõd. 15:2, 5, 8-10) Ra yaa divẽ (bɩ rãam buud a to) b sẽn da pʋdgd tẽn-kugrã zugu. (Sõd. 28:7, 14; Yik. 30:9; Sõd. 15:10) Tʋm-tʋmd a Poll gʋlsa Filip kiris-nebã n yeel yaa: “B sã n pʋdgda maam wa divẽ b sẽn kõ tɩ b kiig maoong zug mam sẽn teend tʋʋmd ning sẽn yaa sõngã yĩnga, mam sũur nooma wʋsgo.” A rɩka makr ne divẽ b sẽn kiigd maoong zugã, n na n wilg a sẽn sak ne yamleoog n mongd a meng bũmb toor-toor a tẽed-n-taasã yĩngã. (Fili. 2:17) A kũumã ket tɩ bilfu, a gʋlsa a Tɩmote n yeele: “B zoe n pʋdgda maam wa divẽ b sẽn daagd tẽn-kugr zugu, la wakat ning mam sẽn na n paam m mengã kolgame.”—2 Tɩm. 4:6.
SIG-NOY RASEM 10-16
D SẼN BÃNG BIIBLÃ KARENG PƲGẼ | SÕDBO 30-31
“Pids-y y sẽn pʋlem bũmb ninsã”
it-2 1164
Pʋlenga
Pʋleng yaa ne yamleoogo, la f sã n pʋlme yaa tɩlɛ tɩ f pidsi. B ra maanda pʋleng ne yamleoogo. La sã n yaa ne Wẽnnaam Tõogã, ned sã n da maan pʋlenga, yaa tɩlɛ t’a pids-a. Rẽ n so tɩ ned sã n da pʋlem bũmb bɩ b yetẽ t’a wẽename, la t’a segd n pidsame. A sã n da pa maan woto, tõe n tũu ne a yõore. (Sõd. 30:2; ges-y Rom. 1:31, 32 me.) Sẽn mik tɩ yaa yõor yellã, pa lingr la Biiblã sẽn sagend tõnd tɩ d segd n tagsame n yaool n pʋlem bũmbu, rat n yeel tɩ d reng n tags pʋlengã sẽn baood tɩ d maan bũmb ningã. Tõogã yetame: “Fo sã n pʋlem Sẽn-Ka-Saab sẽn yaa yãmb Wẽnnaamã, bɩ f ra kaoos n dol f pʋlemdã ye. Bala, Sẽn-Ka-Saab sẽn yaa yãmb Wẽnnaamã na n ninga foom taal tɩ lebg fo yel-wẽnde. Fo sã n ka pʋlme, kongr ka be f zug ye.”—Tõo. 23:22, 23.
it-2 1164
Pʋlenga
Yaa f sẽn na n pʋlem Wẽnnaam tɩ f na n maana bũmbu, tɩ f na n kõo kũuni, tɩ f na n tʋma tʋʋmde, wall tɩ f na n zãaga f meng ne bũmb Tõogã sẽn pa gɩdge. Ra yaa ned n yãkd yam a toor n maan pʋlenga. Pʋleng ne wẽeneg pãng ra zema taaba. Biiblã pʋgẽ, b wae n naagda gom-biis a yiibã taaba. (Sõd. 30:2; Mat. 5:33) “Pʋleng” pa f sẽn na n togs bũmb f sẽn dat n maan bal ye. Yɩɩda rẽ. Wẽeneg yaa f sẽn na n kos ned naam sẽn yɩɩd foo t’a kõ kaset tɩ f sẽn togsã yaa sɩda, wall tɩ yaa tɩlɛ tɩ f pids f gomdã. Naoor wʋsgo, b sã n na n maan kaoola, b wẽendame.—Sɩng. 26:28; 31:44, 53.
Sõdb sebrã tags-kãsemse
30:6-8—Kiris-ned tõe n viiga pʋleng a pag sẽn pʋlem bɩ? Rũndã-rũndã, ned kam fãa pʋleng paka yẽ ne a Zeova bala. Wala makre, rɩk f meng n kõ a Zeova wã yaa pʋleng ned kam fãa sẽn pʋlemd a meng yĩnga. (Galat dãmba 6:5) Sɩd pa tar sor n na n gɩdg bɩ n viig pʋleng kãng ye. Baasg zãnga, pag segd n gũusame n da pʋlem bũmb sẽn kɩɩsd Wẽnnaam Gomdã bɩ sẽn pa zemsd ne zɩɩb ning a sẽn tar a sɩdã taoorã ye.
D bʋgs Wẽnnaam Gomdã zug neere:
it-2 1203 s. a 4
A Zɛfte
B ra tõe n dɩka ned n kõ a Zeova t’a na n tʋm sɛk-roogẽ wã. Roagdbã ra tara sor n na n maan woto ne b biiga. A Sãmwɛll yɩɩ ned a woto buudu. Sẽn deng a Sãmwɛll rogmã, a ma a Ann pʋlmame t’a Sãmwɛll na n tɩ tʋma sɛk-roogẽ wã. A Ann sɩd a Ɛlkana saka pʋlen-kãnga. A Sãmwɛll sẽn sigã bala, a Ann tall-a lame n tɩ kõ sɛk-roogẽ wã. A zãa rũng me n tɩ kõ tɩ b maan maoongo. (1 Sãm. 1:11, 22-28; 2:11) A Sãmsõ me yɩɩ biig b sẽn kõ Wẽnnaam t’a na n yɩ Nazireyẽ n tʋm Wẽnnaam tʋʋmã.—Bʋ. 13:2-5, 11-14; ges-y Sõd. 30:3-5, 16 tɩ y na n yãa ba sẽn da tar noor ning a bi-pugl zugã.
SIG-NOY RASEM 17-23
D SẼN BÃNG BIIBLÃ KARENG PƲGẼ | SÕDBO 32-33
“Bɩ y rig tẽngã neb fãa”
w10 1/8 23
Yãmb ra miime bɩ?
“Tẽn-kug” bɩ zĩ-zãnts nins yell b sẽn wae n gomd Biiblã babg ning b sẽn da gʋls ne Ebre wã yaa bõe?
Nand tɩ Israyɛll nebã kẽ kãabg tẽngẽ wã, a Zeova yeel-b lame tɩ b sãam zĩis nins fãa Kanaã nebã sẽn waoogd b wẽnnaam-dãmbã. A yeelame: “Bɩ y . . . sãam b wẽn-naands nins bãmb sẽn pees ne kuga, wall sẽn kud ne kutã, la y sãam b tẽn-kugã.” (Sõd. 33:52) Zĩis nins b sẽn da waoogd b wẽn-faadã tõe n yaa kunkub sẽn be zĩ-vɩɩdẽ, wall zĩ-zãnts b sẽn maan zĩis a taab wala tɩɩs tẽngr bɩ tẽns pʋsẽ. (1 Rĩm. 14:23; 2 Rĩm. 17:29; Eze. 6:3) Tẽn-kuga, kug wall ra-lugs b sẽn lug n pʋʋsdẽ, bõn-naandse, wisd tẽn-kuga, la bũmb a taab b sẽn tar n pʋʋsdẽ n da be zĩ-kãense.
w08 15/2 27 s. a 5-6
Rɩk-y yam Israyɛll nebã kongr toor-toorã pʋgẽ
Rũndã-rũndã, tõnd paamda zu-loees sẽn wõnd zu-loees nins Israyɛll nebã sẽn da paamdã. Rũndã-rũndã, bõn-naands buud n be. Tõe n yaa ligdã, reem-dɛɛmdb yʋy sẽn yi, ɛspoorã gãndaado, politikã nin-bɛda, tũudum taoor dãmb kẽere, la baa neb kẽer zags rãmba. Tõe n wa lebga bõn-kãensã n pak tõnd n yɩɩda. D sã n baood neb nins sẽn pa nong a Zeova wã zoodo, tõe n sãama tõnd ne a Zeova zoodã.
Yoobã sẽn da naag bũmb nins b sẽn da maand n waoogd a Baallã yamleoog wa n yõka Israyɛll neb wʋsgo. Wẽnnaam nin-buiidã sʋka, neb wʋsg ket n lʋɩta bẽd-kãngã pʋgẽ. Wala makre, nina tõe n paa a zakẽ n widg a ordinatɛɛre, tɩ nif-na-yãrã, wall a sẽn pa gũus yĩng kɩt t’a kẽ zĩig n ges bũmb t’a sũur-kasetã ningd-a taale. Kiris-ned sã n kẽ ẽntɛrnetẽ wã n bas tɩ yoob yɛl gesg yamleoog kẽ-a, yaa kaeto!
it-1 392 s. a 4
Kanaã
Ne yam, a Zozuwe “ka bas bũmb ning Sẽn-Ka-Saab sẽn wilg a Moyiisã tɩ vaal ye.” A maana woto, n sãam Kanaã nebã. (Zoz. 11:15) La Israyɛll buudã neb pa tũ a mak-sõngã, n yiis bũmb ning fãa sẽn dẽgemd soolmã ye. Israyɛll nebã sẽn bas tɩ Kanaã neb kell n zĩnd b sʋkã kɩtame tɩ bãmb mensã rẽgme. Sãmbg kae tɩ kaoosg zugẽ, rẽ yɩɩ sabab tɩ b wʋsg ki (tɩ b pa gomd nin-kʋʋrã, yoobã la bõn-naands pʋʋsgã ye). Sẽn ki-bã sõor yɩɩda neb nins sẽn da na n ki wã sõore, b sã n da tũ noor ning b sẽn kõ-b n yeel tɩ b sãam Kanaã nebã. (Sõd. 33:55, 56; Bʋ. 2:1-3, 11-23; Yɩɩn. 106:34-43) A Zeova ra yeela Israyɛll nebã tɩ yẽ bʋʋdã kaoob yaa tɩrga, la t’a pa bakd ned n sõng ye. A paasame tɩ Israyɛll nebã sã n da yõg zood ne Kanaã nebã, n kẽ kãadem ne-ba, n tũud yẽ la b tũud Kanaã nebã wẽnnaam-dãmba, n maan b tũudmã yɛla, n dɩk b minundã sẽn yaa wẽnsã, bũmb ning sẽn paam Kanaã nebã na n paama bãmb me, tɩ sãmbg kae ye. Na n kɩtame tɩ soolmã ‘zãgs-ba.’—Yik. 23:32, 33; 34:12-17; Maan. 18:26-30; Tõo. 7:2-5, 25, 26.
D bʋgs Wẽnnaam Gomdã zug neere:
it-1 933 s. a 6
Toadga
B sẽn maan poeer n bãng buud fãa sẽn segd n zĩndẽ wã poore, b ra segd n tika bũmb a to n bãng buud fãa zĩig yalem sẽn tog n yɩ to-to: Yaa buud fãa neb sõor la b ra geta. “Yãmb segd n maana poeer n pʋɩ soolmã n kõ y buud toor-toorã. Buud neb sã n yaa wʋsgo, b pʋɩɩrã segd n yɩɩ bedre. La buud neb sã n pa waoogẽ, b pʋɩɩrã segd n yɩɩ bilfu. Ned kam fãa pʋɩɩr na n yɩɩ zĩig ning a poeerã sẽn lʋɩ wã.” (Sõd. 33:54) Poeerã sẽn wilg buud fãa sẽn segd n zĩndẽ wã ra pa segd n toeeme, la b ra tõe n paasame, wall b boog zĩigã yalem. Rẽ n so tɩ b sẽn wa n mik tɩ Zida zĩigã yaa yaleng wʋsgã, b boog a yalmã, n yãk n kõ Sɩmeyõ buudã nebã.—Zoz. 19:9.
SIG-NOY RASEM 24-30
D SẼN BÃNG BIIBLÃ KARENG PƲGẼ | SÕDBO 34-36
“Bao-y soondg zĩig a Zeova nengẽ”
Yãmb baooda soondg zĩig a Zeova nengẽ bɩ?
4 La Israyɛll ned sã n da yãk a to yõor ne yĩdgu? Baa ne a sẽn pa maan pʋ-toogã, a tara taale, bala yaa ned yõor la a sẽn yãkã. (Sɩng. 9:5) La a Zeova nimbãan-zoeerã yĩnga, a ra kɩtame tɩ b yãk soondg tẽns a yoobe, tɩ nin-kʋʋd tõe n zoe n kẽng be tɩ sẽn tog n dok-a kiidã sũurã ra paam-a ye. A sã n ta soondg tẽngẽ, a tõe n paama koglgo. La yaa tɩlɛ t’a pa be n tãag maan-kʋʋdb kãsmã kũum.—Sõd. 35:15, 28.
Yãmb baooda soondg zĩig a Zeova nengẽ bɩ?
6 Israyɛll ned sã n da yãk a to yõor ne yĩdgu, a segd n zoe n kẽnga soondg tẽngẽ. A sã n ta, a rengd n ‘togsa a yellã tẽngã kãsem-dãmbã’ sẽn be tẽngã noorã. Kãsem-dãmbã reegd-a lame, n bao zĩig n kõ-a tẽngã pʋgẽ. (Zoz. 20:4) Sã n kaoos bilfu, kãsem-dãmbã wat n kɩtame t’a leb tẽng ningẽ yellã sẽn maanã, tɩ be kãsem-dãmbã bʋ yellã. (Karm-y Sõdb 35:24, 25.) Kãsem-dãmbã sã n bʋ, n yeel tɩ sẽn kʋ-a a to wã pa maan pʋ-toogo, tɩ yɩɩ ne yĩdgu, b segd n kɩtame t’a leb soondg tẽngẽ wã.
Yãmb baooda soondg zĩig a Zeova nengẽ bɩ?
13 Sẽn kʋ-a a to wã sã n paam n ta soondg tẽngẽ wã, a põsame. A Zeova ra yeela Israyɛll nebã tɩ soondg tẽnsã yaa tẽns b sẽn tõe n “tɩ kẽ n soonde.” (Zoz. 20:2, 3) A Zeova ra pa kõ noor tɩ b bʋ sẽn kʋ-a to wã n yɩlem ye. A pa kõ sor me tɩ ned ning sẽn tog n dok kiidã sũurã tõe n kẽ soondg tẽngẽ wã n kʋ-a ye. Sẽn kʋ-a a to wã sã n be soondg tẽngẽ wã, a pa le yɛɛsd b na n wa maan-a bũmb ye. A vɩɩ bãane, tɩ rabeem kae, bala a paamda a Zeova koglgo. A tara lohorem n tõe n maan a sẽn dat tẽngã pʋgẽ. Pa wa ned sẽn be bãens roog ye. A tõe n tʋma a tʋʋma, n sõng a taabã, la a tũud a Zeova tɩ yell kae ye. Hakɩɩka, a tõeeme t’a vɩɩmã tall barka!
D bʋgs Wẽnnaam Gomdã zug neere:
w91 15/2 13 s. 13
A yao yaood ning sẽn da segd n yao n fãag ninsaalbã fãa ne yel-wẽndã
13 La a Ãdem ne a Awa pa na n dɩ a Zeezi maoongã nafa ye. A Moyiiz Tõogã pʋgẽ, b yeelame: “Yãmb ka tog n deeg yaoodo, n bas nin-kʋʋd sẽn zems kũum t’a vɩɩmd ye.” (Sõdbo 35:31) B pa belg a Ãdem ye. Rẽnd yaa yẽ mengã n yãk yam maan yel-wẽndã. (1 Tɩmote 2:14) Yaa wa a sẽn kʋ a kambã ne a yagensã, bala b lebga neb sẽn pa zems zãnga, n segd ne kũum. Vẽenega, a Ãdem segda ne kũum, bala a sẽn da yaa ned sẽn zems zãngã, a yãka yam n kɩɩs Wẽnnaam noorã. A Zeova sã n bas t’a Ãdem dɩ a Zeezi maoongã yõodo, pa zems ne a noyã sẽn yaa tɩrsã ye. La b sẽn yao a Ãdem yel-wẽndã yaoodã, kɩtame t’a kambã la a yagensã tõe n wa põs kũumã! (Rom dãmbã 5:16) Sẽn zems ne Wẽnnaam noyã sẽn yaa tɩrsã, b sãama yel-wẽndã pãng a yẽgrẽ wã. Sẽn yao-a yaoodã “lemba kũum ned buud fãa yĩnga,” n zɩt yel-wẽnã sẽn wat ne bũmb ninsã a Ãdem kambã fãa yĩnga.—Ebre-rãmbã 2:9; 2 Korẽnt rãmbã 5:21; 1 Pɩyɛɛr 2:24.
SIG-NOY RASEM 31–SIGRI RASEM A 6
D SẼN BÃNG BIIBLÃ KARENG PƲGẼ | TÕODO 1-2
‘Yaa Wẽnnaam n so bʋʋdã’
w96 15/3 23 s. a 1
A Zeova nonga sẽn zemse, la tɩrlem
Ned sã n maan yel-wẽn-kãsenga, yaa tɩlɛ tɩ tigingã kãsem-dãmbã kao a bʋʋdo. (1 Korẽnt rãmbã 5:12, 13) B sã n wa maand woto, b tẽegdame tɩ Wẽnnaam sẽn yaa tɩrlem soabã ratame tɩ b kʋm a soabã nimbãanega, sã n mik tɩ bũmb be b sẽn tõe n tik n maan dẽ. Bũmb sã n kae b sẽn tõe n tik n kʋm-a, b pa tõe n zoe a nimbãaneg ye. Wala makre, yel-wẽn-maandã sã n pa rat n tek yam n kos sugri. La kãsem-dãmbã pa segd n yiis yel-wẽn-maand tigingã pʋgẽ, b sũur sẽn yik ne-a yĩng ye. B saagdame tɩ b sẽn yiis-a wã na n kɩtame t’a toeem yam. (Ges-y Ezekɩyɛll 18:23.) Kiristã wilgda kãsem-dãmbã sore, tɩ b tʋmd sẽn na yɩl tɩ tɩrlem zĩndi. Woto baoodame me tɩ b yɩ “wa zĩ-lilldg sobg wakate.” (Ezayi 32:1, 2) Rẽnd b pa segd n bak ned n sõng ye. B segdame me n yɩ wʋmdba.—Tõodo 1:16, 17.
Sak-y Wẽnnaam zu-sobendã wakat fãa
4 La pa f sẽn na n tar tõogã minim bal la f tõe n yɩ bʋ-kaood ye. Kãsem dãmbã sẽn pa zems zãngã yĩnga, b segd n gũusame n da bas tɩ bãmb mensã manesem sẽn pa zems wala rat-m-yembre, bak-n-sõng la rat-tɩ-loog wa kɩt tɩ b kao bʋʋdã kɛgr ye. A Moyiiz yeel-b lame: ‘Mam yeela bãmb tɩ b sã n kaood bʋʋdo, bɩ b ra tũus neb ye. Bɩ y kelg nin-bõoneg wa nin-bɛda. Tɩ bõe, yaa Wẽnnaam n so bʋʋdo.’ N-ye, Israɛll bʋ-kaoodbã ra kaooda bʋʋdã Wẽnnaam yĩnga. Ad woto sɩd ra yaa zu-noog sẽn pa reem yelle!—Tõodo 1:16, 17.
D bʋgs Wẽnnaam Gomdã zug neere:
A Zeova tõogã zemsa zãnga
9 Israyɛll nebã yeeba “we-raoogã sẽn sek yɛɛsgã” pʋgẽ yʋʋm 40. La b sẽn wa n na n sɩngã, a Zeova pa reng n togs-b a sẽn na n kogl-b to-to, n ges b yelle, bɩ a sẽn na n wilg-b sor to-to ye. La a maana bũmb wʋsg n wilg tɩ b sã n teeg-a la b sak a noyã, na n naf-b lame. A kɩtame tɩ sawad-taok wilgd Israyɛll nebã sor wĩntoogo, tɩ yʋng sã n ta bɩ a lebg bugum n kõt-b vẽenem. A maana woto sẽn na yɩl tɩ b bãng tɩ we-raoogã pʋga, a bee ne-b wakat fãa. (Tõo. 1:19; Yik. 40:36-38) A gesame tɩ b paam bũmb nins fãa sẽn yaa tɩlae ne-bã, “tɩ bũmb ka paoog-b ye. Bãmb futã ka ki ye, la b nao wã ka mod ye.”—Nee. 9:19-21.
SIGRI RASEM A 7-13
D SẼN BÃNG BIIBLÃ KARENG PƲGẼ | TÕODO 3-4
“A Zeova noyã yaa tɩrse, la b kõt yam”
it-2 1199 s. a 2
Bãngre
Ned sã n zãmsd Wẽnnaam Gomdã sõma la a tũud a noyã, tõe n kɩtame t’a wʋmd yɛlã võor sõma n yɩɩd a karen-saam-dãmba, la kɩt t’a paam bãngr n yɩɩg nin-kẽemba. (Yɩɩn. 119:99, 100, 130; ges-y Luk 2:46, 47.) Bala yaa Wẽnnaam noyã la a saglsã pʋsẽ la ned tõe n paam yam la bãngre. Rẽ n so tɩ Israyɛll nebã sã n da sak Wẽnnaam noyã la a saglsã, tẽn-yagsã ra na n getame tɩ b “yaa neb sẽn sɩd tar yam la bãngre.” (Tõo. 4:5-8; Yɩɩn. 111:7, 8, 10; ges-y 1 Rĩm. 2:3.) Ned sẽn tar bãngr sak n deegame t’a pa segd n kɩɩs Wẽnnaam Gomdã ye. A ratame t’a sẽn vɩ to-to wã zems ne Wẽnnaam Gomdã sẽn yetã, n pʋʋsd Wẽnnaam n kot-a sõngr zĩ-kãng wɛɛngẽ. (Yɩɩn. 119:169) A basdame tɩ Wẽnnaam goamã kẽed-a sõma (Mat. 13:19-23), n gʋlsd-b a sũurẽ wã (Yel. 3:3-6; 7:1-4), la a modgd sẽn na yɩl n kisg “zĩrẽ buud fãa.” (Yɩɩn. 119:104) Wẽnnaam Biigã sẽn wa n be tẽngã zugã, a maana woto n wilg t’a tara bãngre, hal n sak n ki ra-lukã zugu, bala ra yaa tɩlɛ t’a kũumã yɩ woto sẽn na yɩl tɩ Gʋlsg-sõamyã sẽn yetã pidsi.—Mat. 26:51-54.
it-2 799 s. a 6
Arzɛgsã
Rĩm a Salomo kibarã yaa kaset sẽn wilgd tɩ Israyɛll yʋʋrã sẽn da yi wã kɩtame tɩ buud a taab neb pẽg a Zeova. A naamã sɩngrẽ, a Zeova sẽn wa n kõ-a weer t’a kos-a bũmb ning fãa a sẽn datã, a pa kos t’a kõ-a arzɛgs ye. A kosa a Zeova yam la bãngre, sẽn na yɩl n tõog ges nin-buiidã yelle. A Zeova leoka a Salomo kosgã. Sẽn paase, a kõ-a-la “arzegs ne paoong la waoogre.” (2 Kib. 1:7-12; 9:22-27) A Salomo yamã la a arzɛkã kibarã kɩtame tɩ nebã ra gomd a Zeova yelle. Wala makre, Saba rĩm-poakã sẽn wʋm bũmb nins a Zeova sẽn maan n kõ a Salomo wã, a yii zĩ-zãrg n wa n na n ges b sẽn yet bũmb ning a Salomo yamã la arzɛkã wɛɛngẽ wã sã n yaa sɩda. (1 Rĩm. 10:1, 2) A sẽn yã bũmb ningã kɩtame t’a sak n deeg t’a Zeova nonga Israyɛll nebã. A yeelame yaa: “Mik mam sẽn dag n bee m tẽngẽ wã n wʋmd b sẽn gomd yãmb yellã, ne y yamã yellã sɩd yaa sɩda! Sã n ka mam sẽn wa tɩ m ninã yãndã, mam dag n ka sak n deeg tɩ yaa sɩd ye. Mam sẽn dag n wʋmdã ka ta mam sẽn yã wã pʋɩ-sʋk meng ye. Yãmb yamã ne y arzegsã yɩɩda mam sẽn dag n wʋm tɩ b gomd to-to wã. Neb nins sẽn be ne yãmbã, ne neb nins sẽn tʋmd ne yãmb daar fãa wã yaa zu-nood-rãmba. Bala, bãmb bee ne yãmb n wʋmd yãmb yam goamã wakat faa! Bɩ Sẽn-Ka-Saab sẽn yaa yãmb Wẽnnaamã paam pẽgre, bala, taa bãmb yam tɩ b yãk yãmb n kɩt tɩ y yɩ Israyɛll rĩmã! Yaa Sẽn-Ka-Saab sẽn nong Israyɛll nebã wakat fãa yĩngã n kɩt tɩ bãmb yãk yãmb tɩ y yɩ rĩmã, n kaood bʋʋdã ne sɩda, la ne tɩrlem. Rẽ poore, Seba tẽng rĩm-poakã kõo rĩm a Salmo sãnem kɩlo tus a naas la kobessi, ne parfe-rãmb wʋsg sẽn tar yũ-noog wʋsgo, la kug-sõama. Ned ka tol n leb n wa ne parfẽ-rãmb wʋsg sẽn tar yũ-noog a woto wa Seba tẽng rĩm-poakã sẽn wa n kõ rĩm a Salmo wã ye.”—1 Rĩm. 10:6-10.
Yãmb yaa arzɛgs rãmb Wẽnnaam nifẽ bɩ?
13 Wakat fãa, a Zeova sã n na n ning a nin-buiidã barka, sɩd yaa bark tɛkẽ. (Zak 1:17) Wala makre, a Zeova sẽn wa n na n kõ Israyɛll nebã tẽng tɩ b zĩndã, a kõ-b-la “tẽng sẽn tar bĩisim ne sɩɩd wʋsgo.” Baa ne b sẽn bilgd tɩ Ezipt me ra yaa woto wã, bũmb a ye n kɩt tɩ tẽng ning a Zeova sẽn da kõ Israyɛll nebã ra yaa toor fasɩ. A Moyiiz yeela nin-buiidã tɩ ‘yaa tẽng Zu-soab a Wẽnnaam sẽn get a yelle.’ A ra rat n yeelame tɩ b sẽn maand fãa na n talla barka, a Zeova sẽn na n ges b yellã yĩngã. Nin-buiidã sã n da sakd a Zeova, a ningd-b-la bark wʋsg hal tɩ tẽn-yagsã neb neẽ tɩ b sɩd yaa sõma n yɩɩd bãmba. Woto wilgda vẽeneg tɩ yaa a Zeova bark n sɩd kõt ned arzɛka!—Sõdbo 16:13; Tõodo 4:5-8; 11:8-15.
D bʋgs Wẽnnaam Gomdã zug neere:
Tõod sebrã tags-kãsemse
4:15-20, 23, 24—B sẽn gɩdg tɩ b ra pees bõn-naandsã rat n yeelame tɩ b pa segd n maan bõn-naandg n nags zĩig bɩ? Ayo. Zĩ-kãensã, bũmb ning b sẽn gɩdgã yaa maan bõn-naands n tarẽ n balemdẽ wã, sẽn dat n yeel tɩ ‘wõgemd b taoor n waoog-bã’ bala. Gʋlsg Sõamyã pa gɩdg tɩ b ra pees wall b gʋl bõn-naand sebr bɩ peend zug n tall n nags zĩis ye.—1 Rĩm dãmba 7:18, 25.
SIGRI RASEM 14-20
D SẼN BÃNG BIIBLÃ KARENG PƲGẼ | TÕODO 5-6
“Sõng-y y kambã tɩ b wa nong a Zeova”
Roagdba, ges-y y zakã neb yelle
11 Rẽ wɛɛngẽ wã, tõe tɩ b pa lebg n togs Gʋlsg Sõamyã verse a to n yɩɩd Tõodo 6:5-7 ye. D bõos tɩ y lak y Biiblã tɩ d karem verse kãensã. Ges-y tɩ b yeta roagdbã tɩ b reng n paas b mensã tẽeb ne Wẽnnaam, tɩ b paas b nonglmã ne a Zeova la b sak a goamã ne b sũyã fãa. N-ye, y segd n yɩɩ ned sẽn zãmsd Wẽnnaam Gomdã neere, n karemd Biiblã la y bʋgsd a zugu, sẽn na yɩl n sɩd bãng a Zeova soyã, a noyã la a tõodã sõma la y nong-ba. Rẽ na n kɩtame tɩ y nong sɩd nins sẽn be Biiblã pʋgẽ n be yamleoog wʋsgã, la rẽ na n kõ-y-la sũ-noog wʋsgo, waoogr kãseng la nonglem ne a Zeova. Y na n paama bõn-sõma wʋsg n taas y kambã.—Luk 6:45.
w07 15/5 15-16
Wãn to la m tõe n wub m kambã sõma?
Pa yãmb no-goamã bal n wilgd bũmb nins yãmb sẽn date, bũmb nins sẽn tar yõod y nifẽ, la y sẽn nongã ye. Bũmb nins y sẽn maandã me wilgda rẽ. (Rom dãmbã 2:21, 22) Hal b yãadmẽ, kambã maagda b mens n get b roagdbã n bãngd bũmb toor-toore. Kambã nee bũmb nins sẽn tar yõod b roagdbã nifẽ wã. Naoor wʋsgo, wat n yaa bõn-kãens me n tar yõod b nifẽ. Yãmb sã n sɩd nong a Zeova, yãmb kambã na n bãnga rẽ. Wala makre, b na n yãame tɩ Biiblã kareng la a zãmsg tara yõod ne yãmba. B na n wa bãngame tɩ yaa Wẽnnaam Rĩungã la y rengd n baoodẽ. (Matiye 6:33) Yãmb sẽn kẽnd tigissã la y moond Rĩungã koe-noogã n pa vaandẽ wã na n wilg-b lame t’a Zeova tʋʋmã n yaa bũmb ning sẽn pak yãmb n yɩɩdã.—Matiye 28:19, 20; Ebre-rãmbã 10:24, 25.
Roagdba, ges-y y zakã neb yelle
14 Wala Tõodo 6:7 sẽn wilgdã, segb wʋsg la yãmb sẽn yaa roagdbã tõe n tũnug ne n sõs ne y kambã tẽebã yɛl zutu. Y togda sor ne taaba, tɩ y tʋmda ne taab bɩ y kokda pemsem ne taab me, y tõe n paama soay n pids y kambã tẽeb ratem. Yaa sɩda, y pa segd n zãmsd y kambã sɩd nins sẽn be Biiblã pʋgẽ wã n pa satẽ ye. La y na n modgame n kɩt tɩ zakã pʋgẽ sõssã yɩ sõma la b keng zakã neb tẽebo. Wala makre, Réveillez-vous ! wã tara sõss wʋsg yɛl toɛy-toɛy zutu. Sõs-kãensã tõe n paka sor tɩ y paam n sõs rũmsã a Zeova sẽn naanã, zĩ-neeb sẽn be dũniyã gill zugu, la buud toɛy-toɛy neb vɩɩm zutu. Sõs-kãens tõe n kɩtame tɩ kambã bao n karem sɛb nins tʋm-tʋmd sẽn tũud sɩd la sẽn tar yamã sẽn kõtã n paase.—Matiye 24:45-47.
D bʋgs Wẽnnaam Gomdã zug neere:
Wãn to la a Moyiiz tõogã wilgd t’a Zeova yaa nonglem la tɩrlem soaba?
11 D sẽn bãngã: A Zeova pa get nina sẽn ne wã bal ye. A geta ned sẽn sɩd yaa a soab a sũurẽ wã. (1 Sãm. 16:7) Ned pa tõe n solg a Zeova a tagsa bɩ a tʋlsem wall a tʋʋm-tʋmdɩ ye. A Zeova sẽn get n yɩɩdã yaa tõnd zʋg-sõma wã, n dat tɩ d mao n bɩɩs zʋg-kãense. La a ratame me tɩ d bao n bãng bũmb nins sẽn tõe n wa ne tʋls-wẽns d sũurẽ wã, la d mao n tõog-ba, tɩ ra wa kɩt tɩ d maan sẽn yaa wẽng ye.—2 Kib. 16:9; Mat. 5:27-30.
SIGRI RASEM 21-27
D SẼN BÃNG BIIBLÃ KARENG PƲGẼ | TÕODO 7-8
“Ra maan yi-kãadem ne bu-bãmb ye”
w12 1/7 29 s. a 2
Bõe yĩng tɩ Wẽnnaam dat tɩ ned sẽn tũud yẽ kẽ kãadem ne a tẽed-n-taag bala?
Sẽn paase, a Zeova miime t’a Sʋɩtãan sẽn dat yaa a kɩt t’a nin-buiidã bas yẽ n tũ wẽn-faado, n dẽgem b mense. Rẽ n so tɩ Wẽnnaam keoog-b tɩ sẽn pa tẽed-b yẽ wã ‘na n kɩtame tɩ b kambã bas yẽ n tɩ tũ wẽnnaam-dãmb a taaba.’ Tõe n waa ne yɛl wʋsgo. Israyɛll nebã sã n waoog wẽnnaam-dãmb a taaba, b pa na n le tat Wẽnnaam yam t’a kogend-b ye. Woto na n kɩtame tɩ lebg nana tɩ b bɛɛbã tõog-ba. Sã n yɩ woto, Mesi wã Wẽnnaam sẽn da pʋlmã na n yɩɩ wãn n dog Israyɛll buudã pʋgẽ? Vẽenega, pa zaalem la a Sʋɩtãan sẽn da belgd Israyɛll neb n dat tɩ b kẽ kãadem ne bu-zẽmsã ye.
w15 15/3 30-31
Kẽ kãadem “Zu-soabã pʋgẽ balã” yaa bũmb sẽn ket n tõe bɩ?
Baasgo, a Zeova wilga a Gomdã pʋgẽ, tɩ d segd n kẽe kãadem Zu-soabã pʋgẽ bala. Bõe yĩnga? Bala a mii bũmb ning sẽn yaa sõma ne a nin-buiidã. A rat n kogla a nin-buiidã ne zu-loees nins b sẽn tõe n paame, b sã n dɩk so-wẽnga. A ratame me tɩ b paam sũ-noogo. A Neemi wakatẽ wã, Zʋɩf-rãmb wʋsg sẽn da kẽed kãadem ne bu-zẽms neb sẽn pa tũud a Zeova wã, a Neemi tẽeg-b-la a Salomo mak-wẽngã yelle. Baa Wẽnnaam sẽn da nong a Salomo wã, “pʋg-sãamsã n tus yẽnda t’a lʋɩ yel-wẽnd pʋga.” (Nee. 13:23-26) Rẽnd Wẽnnaam sẽn wilg tɩ d segd n kẽe kãadem ne kiris-neb hakɩɩk balã yaa tõnd neer yĩnga. (Yɩɩn. 19:7-10; Eza. 48:17, 18) Kiris-neb hakɩɩkã sũy nooma ne a Zeova sẽn get b yell to-to wã. B teeg-a lame t’a wilgd-b sore. B sẽn sakd-a a sẽn yaa Naabã yĩnga, b wilgdame tɩ b sak n deegame t’a yaa yĩngr la tẽng fãa Soaala.—Yel. 1:5
Gũus-y tũud-n-taarã wɛɛngẽ tɩ yaa yaoolem wakate
12 Yaa kiris-neb nins sẽn dat n kẽ kãadmã n segd n maan gũusg tũud-n-taarã wɛɛngẽ n yɩɩda. Wẽnnaam Gomdã yeela woto: “Bɩ y da paam lagem-n-taar ne neb nins sẽn ka Kiris tẽedbã ye. Bala, bõe lagem-n-taar n be tɩrlem ne wẽng sʋka? Wall bõe lagem-n-taar n be vẽenem ne lik sʋka?” (2 Kor. 6:14) Biiblã yeelame me tɩ ned sẽn tũud Wẽnnaam sã n dat n kẽ kãadem, a segd n baoo “ned sẽn tũud Zu-soabã bala,” rat n yeel tɩ ned sẽn dɩk a meng n kõ Wẽnnaam n deeg lisg n tũud a noyã. (1 Kor. 7:39, Wẽnnaam Sebre, 1983) Y sã n kẽ kãadem ne ned a woto, y paama ned sẽn na n sõng-y tɩ y kell n sak a Zeova ne y sũur fãa.
D bʋgs Wẽnnaam Gomdã zug neere:
A Zeova kõt-d-la bũmb nins sẽn yaa tɩlae ne-dã daar fãa
4 D sẽn pʋʋsd n kot d noorã rɩɩb daar fãa wã me segd n tẽeg-d lame tɩ d rata tẽebã rɩɩb daar fãa. Baa ne a Zeezi sẽn da loe noor n kaoos tɩ kom da tar-a wã, a Sʋɩtãan sẽn mak-a n yeel-a t’a kɩt tɩ kugã lebg burã, a yeelame: “A gʋlsame: ‘Ninsaal ka na n vɩ ne rɩɩb bal ye, la yaa ne goam nins sẽn yit Wẽnnaam noorẽ wã.’” (Matiye 4:4) A Zeezi lebs n dɩka no-rɛɛs a Moyiiz sẽn da togs Israyɛll nebã bũmb ningã n yeele: “Zusoaba kɩtame tɩ y lebg nimbãan dãmba la b bas tɩ kom nams yãmba n yaool n kõ yãmb mann yãmb ne y yaab rãmba sẽn da ka mi, sẽn na n yɩlga tɩ y bãng tɩ ninsaal ka na n vɩ ne rɩɩb bal ye, la b tog n vɩɩnda ne goam nins sẽn yit Zusoaba noorẽ wã.” (Tõodo 8:3) A Zeova sẽn kõ Israyɛll nebã mannã ne manesem ningã, a rɩlg-b lame la a zãms-b yɛl kẽer tẽebã wɛɛngẽ me. Bũmb a yembr a sẽn zãms-b ne rẽ yaa tɩ nebã ra segd n ‘wʋka sẽn sekd daar a yembr dɩɩb’ bala. B sã n da wʋk tɩ yɩɩg rẽ, kellã põogdame n kẽ zũnzũyã. (Yikri 16:4, 20) La rasem a yoob raarã b sẽn da segd n wʋk rasem a yiib rẽnd sẽn na yɩl n dɩ kellã vʋʋsg raarã, kel-kãng ra pa põogd ye. (Yikri 16:5, 23, 24) Woto, mannã ra kɩtame tɩ b gãd b yamẽ wã tɩ b segd n yɩɩ sakdba, la tɩ b vɩɩmã pa tɩ loe ne rɩɩb bal ye, la yaa ne “goam nins sẽn yit Zusoaba noorẽ wã.”
SIGRI RASEM 28–SẼOOGO RASEM A 4
D SẼN BÃNG BIIBLÃ KARENG PƲGẼ | TÕODO 9-10
“Bõe la a Zeova rat tɩ y maane?”
w09 1/10 10 s. a 3-4
Bõe la a Zeova rat tɩ tõnd maane?
Bõe n tõe n kɩt tɩ d sakd Wẽnnaam ne yamleoogo? A Moyiiz wilga bũmb a yembr n yeele: “Zoe-y Sẽn-Ka-Saab sẽn yaa yãmb Wẽnnaamã.” (Tõo. 10:12) Pa rat n yeel tɩ d segd n zoe-a-la a sẽn na n wa sɩbg-d yĩng ye. D segd n zoe-a-la d sẽn waoogd-a yĩnga, la d sẽn nand a noyã yĩnga. D sã n waoogd Wẽnnaam ne d sũy fãa, d pa na n dat n sãam a sũur ye.
La sẽn yɩɩd fãa, bõe n segd n kɩt tɩ d sakd Wẽnnaam? A Moyiiz yeelame: “Nong-y bãmba, n sak Sẽn-Ka-Saab sẽn yaa yãmb Wẽnnaamã ne y sũyã fãa la ne y yamã fãa.” (Tõo. 10:12) Nong Wẽnnaamã pa sũurẽ bal ye. Sebr a yembr pʋgẽ, b yeelame tɩ Ebre wã pʋgẽ, b sã n wa gomd nonglem yelle, tõe yaa tʋʋm nins nonglmã sẽn kɩtd tɩ d tʋmdẽ wã me. Sebrã paasame tɩ “nong Wẽnnaam” rat n yeelame tɩ f tʋm tʋʋm sẽn wilgd tɩ f nong-a lame. Woto rat n yeelame tɩ d sã n sɩd nong Wẽnnaam, d na n maanda bũmb nins d sẽn mi tɩ noom-a lame wã.—Yel-bũnã 27:11.
w09 1/10 10 s. a 6
Bõe la a Zeova rat tɩ tõnd maane?
D sẽn sakd Wẽnnaam ne yamleoogã na n kɩtame tɩ d paam bark toor-toore. A Moyiiz yeelame: “Sak-y bãmb noyã . . . mam sẽn kõ yãmb dũndã wã n paam sũ-noogo.” (Vɛrse 13) A Zeova noyã fãa, rat n yeel tɩ bũmb nins a sẽn dat tɩ d maanã yaa tõnd neer yĩnga. Tõeeme n pa yɩ woto sɩda? Biiblã yetame tɩ “Wẽnnaam yaa nonglem.” (1 Zã 4:8) Rẽnd a kõta tõnd noy sẽn na n naf tõnd wakat fãa yĩng bala. (Ezayi 48:17) D sã n maand bũmb nins fãa a Zeova sẽn dat tɩ d maanã, d na n gila zu-loees wʋsg rũndã-rũndã, la kɩt tɩ d wa paam bark sẽn ka sɛt Wẽnnaam Rĩungã naam sasa.
cl 16 s. a 2
Yãmb sɩd tõe n ‘kolga Wẽnnaam’ bɩ?
2 Pĩnd wẽndẽ, a Abrahaam paama zood a woto. A Zeova yeelame t’a yaa yẽ zoa. (Eza. 41:8) A Zeova ra getame t’a Abrahaam yaa a zoa meng-menga. A Abrahaam paama zood a woto, a sẽn “tẽ a Zeova” wã yĩnga. (Zak 2:23) Rũndã-rũndã me, a Zeova raab yaa a kolg neb nins sẽn tũud-a, b sẽn nong-a wã yĩngã. (Tõo. 10:15) A Gomdã sagend-d lame yaa: “Kolg-y Wẽnnaam, la bãmb na pẽneg yãmba.” (Zak 4:8) Ne gom-kãensã, Wẽnnaam boond-d lame, la a pʋlemd tõnd bũmbu.
D bʋgs Wẽnnaam Gomdã zug neere:
it-1 115
A Anak yagensã
Yaa buud neb sẽn yaa wogd la bɛda, n da be Kanaã soolmã babs nins sẽn yaa tãensã n paas zĩis kẽer sẽn be mogrã noore, sẽn yɩɩd fãa goabg sẽnesã. Wakat n zĩnd t’a Anak yagens a tãab sẽn yaa nin-kãsems ra be Ebrõ. Yaa a Ahima, a Sesayi la a Talmayi. (Sõd. 13:22) Yɩɩ be la Ebre tẽn-gũusdb piig la a yiibã sẽn yã a Anak yagensã. Bãmb piigã tɩ togsa kibay sẽn kẽesd rabeem, n yeel tɩ nin-kãens yaa Nefilim-dãmbã sẽn zĩnd nand t’a Nowe wakatẽ sa-kãsengã ni wã yagense, la tɩ b taoore, Ebre-rãmbã yaa wa sʋya. (Sõd. 13:28-33; Tõo. 1:28) A Anak yagensã woglmã kɩtame tɩ nebã sã n da na n gom nin-wobg yelle, b ra wae yetame t’a soab yaa wa a Anak yagensã. B ra maanda woto, baa b sã n da na n gom Emim nebã ne Refayim nebã sẽn da yaa nin-wobd me wã yelle. Wõnda yaa b pãngã n kɩt tɩ nebã ra wẽed yel-bũnd n yetẽ yaa: “Ãnda n tõe n yals Anak yagensã taoore?”—Tõo. 2:10, 11, 20, 21; 9:1-3.