-
Bãng-y n yãk-y y zo-rãmbãVɩɩmd-y wakat sẽn kõn sa!—Biiblã zãmsg sebre
-
-
SAK 48
Bãng-y n yãk-y y zo-rãmbã
Zo-rãmb hakɩɩk bee ne tõnd sũ-noog wakate, la b kengd d raood me zu-loees wakate. La Biiblã pʋgẽ, b yeta tõnd tɩ d gũus tɩ pa nebã fãa n yaa zo-sõma ye. D maanda wãn n bãng n yãk d zo-rãmbã? Bɩ d gom rẽ yelle.
1. Bõe yĩng tɩ d zo-rãmbã yãkr tar yõodo?
D sã n wae n be ne-ba, tɩ yaa vẽeneg-vẽeneg tɩ yaa reezo sosiyo rãmbã maasem, d tõe n wa rɩka b togs-n-taare, n maand wa bãmba, la d tagsd wa bãmba. Biiblã pʋgẽ, b yetame yaa: “Ned sã n tũud yam soaba, a paamda yam. La ned sã n tũud yalma [neb nins sẽn pa nong a Zeova wã], yɛl n paamd-a.” (Yel-bũnã 13:20) Zo-rãmb nins sẽn nong a Zeova la b tũud-a wã tõe n sõnga tõnd tɩ d kell n tall zood sõma ne a Zeova, la d bãngd n yãkd yam. La zo-rãmb nins sẽn pa nong a Zeova wã tõe n kɩtame tɩ d zãag d meng ne-a. Yaa rẽ yĩng la b sẽn sagend tõnd Biiblã pʋgẽ tɩ d bãng n yãk d zo-rãmbã! Tõnd zo-rãmbã sã n nong Wẽnnaam, na n nafa tõndo, la naf bãmb me. D na n tõog n ‘kengda taab raoodo, la d paasd taab tẽeb pãnga.’—1 Tesalonik rãmbã 5:11.
2. A Zeova tagsg na n yɩɩ wãn ne d zo-rãmbã?
A Zeova maagda a yĩng n yãkd a zo-rãmbã. A “yaa nin-tɩrsã zoa.” (Yel-bũnã 3:32) A Zeova tagsg na n yɩɩ wãna, d sã n yãk zo-rãmb sẽn pa nong-a? A sũur na n sãama wʋsgo! (Karm-y Zak 4:4.) La d sã n zãag d meng ne neb nins sẽn yaa tũud-n-ta-wẽnsã, la d bao a Zeova ne neb nins sẽn nong-a wã zoodo, a sũur na n yɩɩ noogo, t’a sak me tɩ d lebg a zoa.—Yɩɩn-sõamyã 15:1-4.
D BAO N BÃNG N PAASE
D ges bũmb ning sẽn kɩt tɩ d zo-rãmbã yãkr tar yõod wʋsgã, la y sẽn tõe n maan to-to n yõg zood sẽn na n sɩd naf-yã.
3. Gũus-y ne tũud-n-ta-wẽnsã
Neb nins sẽn pa nong Wẽnnaam, la b pa nong a noyã yaa tũud-n-ta-wẽnse. Ges-y VIDEO wã, tɩ rẽ poor bɩ y leok sokrã.
Wãn to la d tõe n wa maand tũud-n-taar ne neb sẽn yaa tũud-n-ta-wẽnse, n pa bãng menga?
Karm-y 1 Korẽnt rãmb 15:33, tɩ rẽ poor bɩ y leok sogsgã:
Nin-bʋg buud n tõe n yɩ tũud-n-ta-wẽng ne yamba? Bõe yĩnga?
Karm-y Yɩɩn-sõamyã 119:63, tɩ rẽ poor bɩ y leok sokrã:
Bõe n na n sõng-y tɩ y bãng ned sã n na n yɩɩ zo-sõngo?
Pomm a ye sẽn põog tõe n sãama sẽn ketã fãa. Wãn to la tũud-n-taar sẽn pa sõma tõe n wã yãmba?
4. Neb sẽn yaa toor ne tõnd tõe n wa lebga d zo-rãmba
Biiblã pʋgẽ, b gomda a Davɩɩd ne a Zonatã yelle. Yaa rap a yiib sẽn zĩnd pĩnd wẽndẽ Israyɛllẽ wã. B yʋʋmã ra pa yembre, b yɛlã me ra pa yembr ye. Karm-y 1 Sãmwɛll 18:1, tɩ rẽ poor bɩ y leok sokrã:
Wãn to la kiba-kãngã wilgd tɩ pa tɩlɛ tɩ tõnd ne d zo-rãmbã yʋʋm yɩ yembre, bɩ d tarmã zem taaba?
Karm-y Rom dãmb 1:11, 12, tɩ rẽ poor bɩ y leok sokrã:
Wãn to la zo-rãmb sẽn nong a Zeova kengd taab raoodo?
Video-kãngã pʋgẽ, ges-y bi-bɩɩg sẽn paam zo-rãmb zĩig a sẽn da pa tẽede. Ges-y VIDEO wã, tɩ rẽ poor bɩ y leok sogsgã.
Video wã pʋgẽ, bõe yĩng t’a Akill roagdbã ra maand yɩɩre, zo-rãmb nins a sẽn tar lekollẽ wã wɛɛngẽ?
Sɩngrẽ wã, bõe n kɩt t’a ra rat b zoodo?
A sẽn da tagsd t’a yaa a yembrã, wãn to la a tõog n welg yel-kãnga?
5. Y sẽn tõe n maan n yõg zood sẽn yaa sõma
D ges y sẽn tõe n maan to-to n paam zo-rãmb hakɩɩka, la yãmb mengã sẽn tõe n yɩ zoa hakɩɩk to-to. Ges-y VIDEO wã.
Karm-y Yel-bũn 18:24 la 27:17, tɩ rẽ poor bɩ y leok sogsgã:
Wãn to la zo-rãmb meng-meng sõngd taaba?
Yãmb tara zo-rãmb a woto buud bɩ? Y sã n pa tare, wãn to la y tõe n paam zo-rãmb a woto?
Karm-y Filip rãmb 2:4, tɩ rẽ poor bɩ y leok sokrã:
Y sã n dat n paam zo-sõma, yãmb mengã segd n yɩɩ zo-sõngo. Wãn to la y tõe n maan dẽ?
Y sã n dat n paam zo-sõma, yãmb mengã segd n yɩɩ zo-sõngo
NEB KẼER SẼN YETE: “F tõe n yõga zood ne ned buud fãa.”
Y na n leokame tɩ bõe?
KƲMSGO
D sã n bãng n yãk d zo-rãmbã, d na n taa a Zeova yam, na n nafa tõnd me.
Lebg-n-gese
Bõe yĩng tɩ tõnd zo-rãmbã yãkrã tar yõod wʋsg a Zeova nifẽ?
Nin-bʋs buud la d pa segd n yãk tɩ b yɩ d zo-rãmba?
Wãn to la y tõe n yõg zood sẽn tar pãng ne neb nins sẽn nong a Zeova wã?
BŨMB A TAABA
Wãn to la zo-sõma tõe n sõng-d zu-loees sasa?
“D bɩɩs d zoodã ne d tẽed-n-taasã, nand tɩ dũniyã saab ta” (Yʋʋmd 2019 sɩpaolg kiuug Gũusg Gasgã)
Bũmb nins y sẽn tõe n maane, n paam zo-sõma.
Bõe la y segd n bãng reezo sosiyo rãmbã zug zo-rãmbã wɛɛngẽ?
Rao a ye kibare. Ges-y bũmb ning sẽn kɩt t’a toeem zo-rãmbã.
“Biiblã toeemda neba” (Yʋʋmd 2012 tʋʋl-nif kiuug pipi daar Gũusg Gasgã)
-
-
Yãkd-y reem sẽn tat a Zeova yamVɩɩmd-y wakat sẽn kõn sa!—Biiblã zãmsg sebre
-
-
1. Bõe yell la d segd n tẽege, d sã n wa na n yãk d sẽn na n maan n kok pemsem bɩ n deeme?
Y sã n wa na n kok pemsem, bõe la y nong n maandẽ? Neb kẽer nong n paada zakẽ n karem sebre, n kelg miziki, n ges filim wall n kẽ ẽntɛrnetã pʋgẽ. Sãnda me nong n naagda b zo-rãmb tɩ b yi n gilgi, n deem koom, wall b tão ze. Sẽn yaa bũmb ning fãa la d yãk yam n na n maan n kok pemsem bɩ n deeme, d segd n modgdame tɩ yɩ bũmb sẽn ‘tat Zu-soabã yam.’ (Efɛɛz rãmbã 5:10) Segdame tɩ d wʋm rẽ võor sõma, bala bũmb nins nebã sẽn nong n getẽ wã, n kelgdẽ, wall n maandẽ wã naaga ne yɛl a Zeova sẽn kisi. Wala makre, nen-kɛglem, yoobo, pa rẽ bɩ zĩn-dãmb yɛla. (Karm-y Yɩɩn-sõamyã 11:5.) Bõe n na n sõng-do, tɩ d bãngd n yãkd reem?
D sã n bao zo-rãmb sẽn nong a Zeova, na n naf-d-la wʋsgo. B leb n tõe n sõnga tõnd sõma reemã yãkr wɛɛngẽ. Wa d sẽn yã sak ning sẽn loogã pʋgẽ wã, “ned sã n tũud yam soaba, a paamda yam.” La d sã n nong n be ne neb sẽn pa nong a Zeova noyã, ‘yɛl n na n paam-do.’—Yel-bũnã 13:20.
-