“Zãms biiga”

MAAN zẽed sẽn womd biis sõma baooda sẽn yɩɩd fãeeg bõn-buud tẽngã la f lebg kiis a wãn poor n wa wobe. Tʋʋm-toog wʋsg n be tẽngã seglg pʋgẽ, bõn-buudã bʋdbo, la rẽ poore, koomã zãgsg la bõn-bɩtsã birg ningr sẽn na yɩl n tɩ b tõog n bɩ n koge.

B tõe n da bilga manesem kãnga sõma ne gom-sɩd ning sẽn be Yelbũna 22:6 pʋgẽ wã sẽn yet tɩ: “Zãms biig a manesem sẽn tog n yɩ to-to. La a sã n lebg nin-kẽema, a ka na n bas-b ye.” Sɩda, yaa roagdbã zãmsg n yaa bõn-kãseng ning sẽn kɩtd tɩ b tõog kambã wubrã.

Baasgo, dũni sẽn yaa bas-yaarã pʋgẽ, roagdb wʋsg pa tũud sagl-kãngã ye. B sã n tũ nebã sẽn nong n tar yam ning n yetẽ tɩ kamb segd n zãms n gesa b mens zu-loeesã yelle, naoor wʋsgo, b raagda b kambã n bas tɩ b maood b yembre. Na-kẽndr a woto kẽesda kambã ninsaalb sẽn yaa pʋ-lik rãmb la sẽn pa tũud noy rãmb pãn-tusd-wẽng tẽngr nana-nana.—Yelbũna 13:20.

Ad yaa sõma wʋsg n yɩɩd tɩ roagdbã kẽes kiris-ned noyã bilf-bilf b kambã sũy pʋsẽ, n tũnugd ne wẽn-zoeer formasiõ pĩnd-pĩnd b yãadem wakate! Pĩnd-pĩnd wãn to? “Hal b yãadem wakate,” woto la tʋm-tʋmd a Poll yeta. Ra yɩɩ ne woto ne bi-bɩɩg a Tɩmotɩ. A ma a Enis, la a yaab-poak a Loiiz zãmsa a Tɩmotɩ “Gʋlsg-Sõamyã,” la b ra kɩtame t’a ‘sak n tẽ-ba.’ A baasgã yɩɩ bõe? Formasiõ a woto talla tʋʋm-kãseng sẽn kɩt t’a yɩ “yam soab fãagrã yĩnga.”—2 Tɩmotɩ 1:5; 3:14, 15.

Woto me rũndã-rũndã, roagdb nins sẽn ‘pa yɛɛd ne tʋʋm sõama maanegã’ na n paama keoob wʋsgo, b “sã n ka yɛ ye.” (Galat dãmba 6:9) Rĩm a Salomo sẽn yaa yam soabã yetame: “Nin-sõng ba na n kɩdmame.”—Yelbũna 23:24.